Италийн Милан хотод энэ сарын 7-нд Монгол Улсын консулын газар нээгджээ. Элчин сайд Ц.Жамбалдорж, Монгол Улсаас Итали Улсын Ломбарди мужид суух Өргөмжит консул Паоло Бонеттид Өргөмжит консулын Патентыг гардуулан өгчээ. Тус мужид сурч, амьдардаг Монгол Улсын иргэдийн эрх ашгийг хамгаалах, зөвхөн консулын төдийгүй хоёр орны хооронд эдийн засгийн хамтын ажиллагааг хөгжүүлэхэд томоохон хувь нэмэр оруулах юм.
Байгаль орчны багц хуулийн төслийн ажлын хэсгийг ахлан ажиллаж буй УИХ-ын гишүүн Б.Саранчимэг ойн санг хамгаалах зорилгоор хуш модны самар түүж, бэлтгэхийг хориглох асуудлаар Ерөнхий сайд Л.Оюун-Эрдэнэ, Байгаль орчин, аялал жуулчлалын сайд Н.Уртнасан нарт албан бичиг хүргүүллээ. Тус албан бичигт “Монгол Улсын “Байгаль орчныг хамгаалах тухай хууль”-ийн 15 дугаар зүйлийн 15.1.1, 15.1.2, 15.1.4 дэх заалт, “Ойн тухай хууль”-ийн 12 дугаар зүйлийн 12.1.1, 12.1.2, 12.1.5, 13.1.5 заалт болон Монгол Улсын Ерөнхийлөгчийн 2021 оны 10 дугаар сарын 04-ний өдрийн “Тэрбум мод” үндэсний хөдөлгөөнийг санаачлан өрнүүлэх талаар “Засгийн газарт чиглэл өгөх тухай” 58 тоот зарлигийг баримтлан ой мод үрээр тарьж ургуулах, иргэдийн хувийн хэрэгцээнээс бусад зорилгоор хуш модны самар түүж бэлтгэхийг урт хугацаагаар буюу 10 хүртэлх жилээр хориглох тухай асуудлыг нэн яаралтай хэлэлцэн шийдвэрлэж өгөхийг хүсье” гэжээ.
2021 оны долоодугаар сараас хойш улсын хэмжээнд нийт 5,766 өрх хүнсний талон авахаа больсон байна. Түүнчлэн хүнсний талон авахаа больсон хэд хэдэн аймаг болон нийслэлийн дүүрэг байна.Үүнд: 2019 оны нэгдүгээр сард Говь-Алтай аймгийн Алтай сум Хүнсний талонгүй сум 2020 оны нэгдүгээр сард Сэлэнгэ аймгийн Бугант сум Хүнсний талонгүй сум 2020 оны аравдугаар сард Говь-Алтай аймгийн Баянтоорой тосгон 2021 оны гуравдугаар сард Дорноговь аймгийн Сайхандулаан 2021 оны долдугаар сард Хэнтий аймгийн Баян-Овоо, Өмнөговь аймгийн Хүрмэн 2021 оны наймдугаар сард Дорноговь аймгийн Алтанширээ 2021 оны аравдугаар сард Дархан-Уул аймгийн 11, 12, 16-р баг, Улаанбаатар Баянгол дүүргийн 2-р хороо хүнсний талон авдаг өрхгүй болж, ажлын байранд зуучилжээ. "2022 онд Хөдөлмөр эрхлэлтийг дэмжих сангийн үйл ажиллагаа илүү тэлж Эмэгтэйчүүдийн хөдөлмөр эрхлэлтийг дэмжих” хөтөлбөр нэмэгдэнэ. Өрх дээр суурилсан “Төгсөлтийн аргачлал”-аар урт хугацааны туршилт хөтөлбөрийн төсөл эхлээд байгаа.
Өнөөдөр "Олон улсын охидын эрхийг хамгаалах өдөр" тохиож байна. Хүчирхийлэлд өртөж бие сэтгэлээрээ хохирч буй бяцхан охидыг төлөөлж Сүхбаатарын талбайд бүжингийн суулт боллоо. Тус суултын хүрээнд Монголын эмэгтэйчүүдийн холбооноос хүчирхийллийг таслан зогсоох, урьдчилан сэргийлэх зорилго бүхий “Бүүвэй-Бүү айг” арга хэмжээг мөн зохион байгууллаа. 330 чихмэл бүжин сандал дээр суун суулт зарлажээ. Эдгээр бүжин бол 2019 онд гаргасан акцыг шийдвэр гаргагч нар анхаарахгүй байгаа учраас биднийг авраач ээ” гэсэн аврал ирсэн суулт хэмээжээ. Энэ өдрийг 2012 оноос хойш дэлхийн 193 оронд тэмдэглэн өнгөрүүлдэг болсон. 2019 онд Монголын эмэгтэйчүүдийн холбоо “Бүжингийн чимээгүй хашхираа” акцыг төрийн эрх бүхий хүмүүст хүргүүлж байсан удаатай. Бэлгийн хүчирхийллийн хохирогчид насан туршдаа бие мах бодь, сэтгэл санаа, эдийн засгаараа хохирч үлддэг. Ар гэр нь ч давхар хохирдог гэмт хэрэгт юм.
Хөрсний бохирдлоос урьдчилан сэргийлэх, эрүүл аюулгүй орчинд зорчих нөхцлөийг бүрдүүлэх зорилгоор иргэдийн хөдөлгөөн ихтэй нийтийн эзэмшлийн гудамж, талбайд Нийтийн бие засах газрыг үе шаттайгаар байрлуулах ажлыг Нийслэлийн Засаг даргын мөрийн хөтөлбөрт тусгагдсан зорилтын хүрээнд хийж байна. Эхний байршил СХД-ийн 29-р хороо “Драгон” худалдааны төвийн орчимд байрлуулж цэвэр, бохирын шугам сүлжээний холболтын ажлыг хийж эхлүүллээ. Дараагийн байршил Хан-уул дүүргийн 2 дугаар хороо “Ажилчны алдар” талбайд байршуулж холболтуудыг хийхээр төлөвлөөд байна.
Их Британийн Ковидын улаан жагсаалтаас Монгол Улс хасагдлаа. Улаан жагсаалтад ордог орнуудын тоогоо 54-өөс долоо болгон бууруулсан байна. Жагсаалтад багтсан улсын иргэд жуулчид зочид буудалд 10 хоног тусгаарлагдаж байсан юм.Тэгвэл жагсаалтаас хасагдсан улс орны иргэд коронавирусын вакциндаа бүрэн хамрагдсан бол тусгаарлалтанд орохгүй ажээ. Харин вакцины бүрэн тунд хамрагдаагүй бол дээрх журам үйлчлэхгүй бөгөөд урьдын адил 10 хоног тусгаарлагдана. Аравдугаар сарын 11-ний өдрөөс эхлэн уг журам хэрэгжиж эхлэх юм байна. Дараах 47 улсыг улаан жагсаалтаас хасчээ. Үүнд: Афганистан, Ангола, Аргентин, Боливи, Ботсвана, Бразил, Бурунди, Кабо Верде, Чили, Конго (Бүгд Найрамдах Ардчилсан Улс), Коста Рика, Куба, Эритреа, Эсватини, Этиоп, Францын Гвиана, Гүрж, Гайана, Индонез, Лесото, Малави, Майотте, Мексик, Монгол, Монтенегро, Мозамбик, Мьянмар, Намиби, Балба, Парагвай, Филиппин, Реюньон, Руанда, Сейшелийн арлууд, Сьерра Леон, Сомали, Өмнөд Африк, Судан, Суринам, Танзани, Тайланд, Тринидад ба Тобаго, Тунис, Уганда, Уругвай, Замби, Зимбабве. Улаан жагсаалтад Хаити, Панам, Венесуэл, Доминиканы Бүгд Найрамдах Улс, Колумби, Перу, Эквадор зэрэг долоон улс үлджээ.
Нэгдсэн шуурхай штабаас коронавируст халдварын эсрэг дархлаажуулалтын цэгүүдийн байршил, 24 цаг болон уртасгасан цагаар ажиллаж буй эмийн сангийн хаяг, байршлыг орон зайн дүн шинжилгээний системд байршууллаа. Ийнхүү иргэд өөрт ойр байрлаж байгаа дархлаажуулалтын цэгийн байршил, хаяг, очих газрын маршрутаа гар утаснаасаа харж төлөвлөх боломж нээгдэж байгаа юм. 24 цаг болон уртасгасан цагаар ажиллах эмийн сангийн байршил, хаяг, холбогдох утасны дугаар зэрэг мэдээллийг харах боломжтой. Уг аппликэйшнд хандаж хэрэгцээт мэдээллээ авахыг хүсвэл arcg.is/1zaHya холбоос линкээр болон QR кодыг уншуулан нэвтрэнэ.
Баянзүрх дүүргийн Засаг дарга Н.Баярмөнхөөр удирдуулсан хүнс худалдаа үйлчилгээний хэлтсийн ажилтан, алба хаагчид дүүргийн хэмжээнд үйл ажиллагаа явуулдаг Вьетнам засварын газруудаар орж дараах зүйлсийг хийж хэрэгжүүлэхийг үүрэгдлээ. Үүнд: 1. Вьетнам засварын газрууд дүүрэгт татвар төлдөггүй учир татвар төлдөг болгох 2. Үйл ажиллагаа явуулж буй газрын дотор болон гадна талын тохижилтод анхаарч шаардлагатай тохижуулалтыг хийж, иргэдэд ээлтэй орчныг бүрдүүлэх 3. Гарч буй хог хаягдлыг яаралтай шийдэж ажиллах хэрэгтэй талаар хэлж санууллаа. Дээрх шаардлагуудыг хэрэгжүүлэх тал дээр байнгын хяналт шалгалт тавьж ажиллахыг Баянзүрх дүүргийн Хүнс, худалдаа үйлчилгээний хэлтсийн дарга Л.Бадамхандад үүрэг болголоо.
БОАЖЯ-аас зохиолч Ч.Галсанд "Байгаль орчны тэргүүний ажилтан" тэмдгийг гардуулан өгчээ. 2009 онд өөрийн бичсэн номоо зарж олсон мөнгөөрөө нэг сая мод худалдан авч хүмүүст хандивлаж, тарьж ургуулж эхэлснээс хойш дэлхийн олон хүмүүс, байгууллага түүнд туслаж дэмжсээр 2021 оны намар нэг сая дахь модоо тарьж дуусгажээ. Түүний нөр их хөдөлмөрийн үр шим өдгөө цэцэрлэг, сургууль, эмнэлэг, олон нийтийн газар, цэргийн анги, 17 аймгийн олон зуун суманд үндэслэж, ногоон төгөл болон ургаж байна. Тэрээр хэлсэн үгэндээ "нэг хүн сэдэж эхлүүлээд нэг сая мод тарьж болж байгаа юм чинь над шиг 1000 хүн байхад л бид нэг тэрбум мод тарина" хэмээжээ. Зохиолч маань аравдугаар сарын 9-ний хагас сайн өдөр Баянхошууны Зүүн Салааны эцэст байрлах Энх Мөнхийн Байгаль цэцэрлэгт 3000 мод аравдугаар сарын 10-ны Ням гаригт Сэлхийн аманд байрлах Гүнжийн Булагт дахин 2000 мод тус тус хандивлахаар төлөвлөжээ.
Ургац хураалтад 1797 цэрэг, 1911 оюутан, 7404 халамжийн болон гэрээт ажилтан, нийтдээ 11112 хүн хөдөлмөрийн түр гэрээгээр ажиллаж байгаа билээ. Урьдчилсан байдлаар 594.1 мянган тонн үр тариа, үүнээс 559.2 мянган тонн улаанбуудай, 198.8 мянган тонн төмс, 117 мянган тонн хүнсний ногоо, 64.3 мянган тонн тосны ургамал, 203.3 мянган тонн малын тэжээлийн ургамал тус тус хураан авах төлөв гарчээ. Өнөөдрийн байдлаар 55.7 мянган га талбайг ангилан хадаж, 106.4 мянган га-аас 154.6 мянган тонн үр тариа, үүнээс 99.7 мянган га-аас 145.2 мянган тонн улаанбуудай, 13.9 мянган га-аас 128.4 мянган тонн төмс, 6.1 мянган га-аас 72.6 мянган тонн хүнсний ногоо, 22.6 мянган га-аас 64.5 мянган тонн тэжээлийн ургамал, 22.6 мянган га-аас 13.7 мянган тонн тосны ургамал тус тус хураан авсан. Ийнхүү одоогийн байдлаар улсын хэмжээнд үр тарианы хураалт 26.4 хувьтай, төмс, хүнсний ногооны хураалт 65.6-69.9 хувийн явцтай байна.
