КОРОНАВИРУСААР ӨВЧЛӨН ЭМНЭЛЭГТ ХЭВТЭЖ БАЙСАН ИРГЭН ОРГОН СУРАГГҮЙ БОЛЖЭЭ

11 / 17 0 сэтгэгдэл 878 үзсэнe

Өчигдөр буюу арваннэгдүгээр сарын 16-ны өдөр 51 настай эмэгтэй Өмнөговь аймгийн нэгдсэн эмнэлэгт ковидын халдвар аван эмчлэгдэж байгаад сураггүй алга болжээ. Тус иргэнийг цагдаагийн газраас эрэн сурвалжилж байна. Эмнэлгээс гарч явах үедээ хар хөх өнгийн углааш, дан цамцтай байсан аж. Хэргийг аймгийн цагдаагийн газар үргэлжлүүлэн шалгаж байна. Зарим эх сурвалжийн мэдээлснээр ковидын халдвараас гадна сэтгэл гутрал, мэдрэлийн гаралтай өвчний оноштой байжээ.

ЭМД-ААС ЗҮРХНИЙ ГАЖИГТАЙ ХҮҮХДИЙН ОНОШИЛГОО, ЭМЧИЛГЭЭГ БҮРЭН ДААДАГ БОЛЖЭЭ

11 / 17 0 сэтгэгдэл 992 үзсэнe

Жирэмсэн үед ээжийн хэрэглэж байгаа эм тариа, удамшил, ээж аавын амьдралын хэв маяг архи тамхины хэрэглээ идэж буй хоол хүнс, агаар хүүхдийн урагт нөлөөлдөг. ЭХЭМҮТ-д хүүхдийн зүрхний төрөлхийн гажгийг эмчлэх судсан дотуурх мэс заслыг нэвтрүүлээд байгаа аж. Долоон жилийн хугацаанд жил бүр 60-120 хүүхдийг оношлон эрүүл болгожээ. Өмнө нь зүрхний төрөлхийн гажигтай хүүхдийн эмчилгээ, мэс заслын зардлыг 75 хувийг улсаас, ар гэрээс 25 хувийг гаргуулдаг байсан. Эмчилгээ нь дунджаар 500 мянгаас 5 сая хүртэлх төгрөгт хэлбэлздэг. 2021 оны ЭМД-ын тухай гуравдугаар тогтоолоор 100 хувь улсаас даадаг болсон нь иргэдийн нуруунаас нэлээдгүй ачааг хөнгөлсөн. Одоогийн байдлаар он гарснаас хойш 70 гаруй хүүхэд оношлогдож, даатгалын сангаас 120 гаруй сая төгрөгийн хөнгөлөлт үзүүлээд байна. Зүрхний гажиг нь эмээр эмчлэгдэх боломжгүй зөвхөн нээлттэй мэс засал эсвэл судсан дотуурх аргаар эмчилж болдог. Судсан дотуур хийгддэг мэс заслаар 100 хувь эмчлэгддэг аж.

ЭРҮҮЛ МЭНДИЙН ЯАМНЫ ХАРЬЯАНД ГУРВАН АМАРЖИХ ГАЗРЫГ ШИЛЖҮҮЛЭВ

11 / 17 0 сэтгэгдэл 759 үзсэнe

Нийслэлийн амаржих газруудыг Эрүүл мэндийн яамны харьяа болгох шийдвэрийг Засгийн газрын хуралдаанаар гаргалаа. Дүүргийн есөн эмнэлэг, гурван амаржих газар Нийслэлийн эрүүл мэндийн газрын харьяанд байдаг. Улс орны эрүүл мэндийн тусламж үйлчилгээний чанарыг эх, хүүхдэд үзүүлж буй үйлчилгээ чанараар хэмждэг. ЭМЯ хөрөнгө оруулалт, шинэ технологийг нэвтрүүлэх зэрэгт нэлээдгүй анхаарлаа хандуулах хэрэгтэй хэмээн үзжээ.

ӨСВӨР НАСНЫ ОХИД БАРИЛГЫН ДЭЭВЭР ДЭЭР СОГТУУРСАН БАЙДАЛТАЙ БАЙСНЫГ АЛБАНЫХАН АЮУЛГҮЙ БОЛГОЖЭЭ

11 / 15 0 сэтгэгдэл 894 үзсэнe

Нийслэлийн Чингэлтэй дүүргийн 3 дугаар хороо 17 байр 5 давхараас өсвөр насны хоёр хүүхэд унах болзошгүй аюултай байдалд байна гэсэн дуудлага Онцгой байдлын албанд иржээ. Уг дуудлагын дагуу Нийслэлийн аврах 105-р ангийн алба хаагчид 3 км замыг туулан 17:51минутанд очиход Хан-уул дүүргийн харьяат Н,Т нар согтууруулах ундаа хэрэглэн барилгын дээвэр дээр унаж эрсдэлтэй нөхцөлд байсныг эсэн мэнд буулгажээ.Хэргийг Цагдаагийн 1-р хэлтэст хүлээлгэн өгсөн байна.

ШОКОЛАД , ЧИХЭР , ХУУРАЙ СҮҮНЭЭС КОРОНАВИРУСИЙН ХАЛДВАР ИЛЭРЛЭЭ

11 / 15 0 сэтгэгдэл 1 203 үзсэнe

Хятадын Хэйлунцзян мужийн Хэйхэ хотод хүнсний агуулах, складад хадгалагдаж байгаа орос бараанд шинжилгээ хийхэд ковидийн халдвар илэрчээ. Шинжилгээгээр ОХУ-аас орж ирсэн 4 төрлийн барааны хайрцаг, сав, баглаа боодлоос илэсэн байна. Үүнд: шоколад вафли KONTI печенье KONTI чихэр KONTI хуурай сүү зэрэг бараанууд байжээ. Одоогоор халдвар илэрсэн барааны хэмжээг мэдээлээгүй байна. Дээр дурдсан бараатай дэлгүүр, хувь хүмүүсийг бараагаа битүүмжлэн, далд хийж, холбогдох байгууллагад мэдэгдэхийг анхааруулсан байна. Тус мужид аравдугаар сарын 27-оос халдварын шинэ тохиолдол 270 бүртгэгдээд байгаа юм

ТОМООХОН ЭМНЭЛГҮҮД ЭНЭ САРЫН 15-С COVID-19-Р ӨВЧЛӨГСӨДИЙГ ХҮЛЭЭН АВАХГҮЙ

11 / 12 0 сэтгэгдэл 846 үзсэнe

Коронавирусын шинээр илрэх тохиолдолын тоо буурсан ба 14 хоногийн өмнө эмнэлэгт нийтдээ 17,392 хүн хэвтэн эмчлүүлж байсан бол өнөөдөр 10,727 болжээ. Халдварын улмаас эмнэлэгт хэвтэгчдийн тоо хоёр долоо хоногийн хугацаанд 38.3 хувиар буурсан байна. Үүнийг дагаад, маш хүнд хүний тоо 37 хувиар, хүнд хүний тоо 40 хувиар, хүндэвтэр хүний тоо 30 хувиар, хөнгөн хүний тоо 45 хувиар тус тус буурсан үзүүлэлт гарчээ. Халдварын оргил үед халдварын улмаас улсын хэмжээнд 22,400 орчим хүн хэвтэн эмчлүүлж байсан бол өнөөдөр 50 хувиар мөн буурчээ. Бүх л томоохон эмнэлгүүд оргил үед өвчтөн авч хэвтүүлж бол одоо тохиолдлын тоо буурч байгаа учраас энэ сарын 15-наас хойш коронавирусийн тусламж үйлчилгээг буулгаж, үндсэн тусламж үйлчилгээ рүү илүү ажиллуулах төлөвлөлтийг хийжээ.

ХҮНСНИЙ НОГООНЫ ҮНЭ ӨСЛӨӨ

11 / 12 0 сэтгэгдэл 897 үзсэнe

Нийслэлийн статистикийн газраас хүнсний ногооны үнийг танилцуулав. Өнгөрсөн аравдугаар сард монгол төмс 893, монгол лууван 2518 төгрөгөөр, монгол байцаа 1966 төгрөгөөр, хүрэн манжин 3118 төгрөгөөр, сонгино 2658 төгрөгөөр тус тус худалдаалж байв. Тэгвэл өмнөх долоо хоногтой харьцуулахад монгол төмс 6.3 хувиар өсөж 1006 төгрөгөөр, монгол лууван 1.7 хувиар буурч 2553 төгрөгөөр, монгол байцаа 0.9 хувиар өсөж 2024 төгрөгөөр, монгол хүрэн манжин 4.4 хувиар өсөж 3424 төгрөгөөр тус тус худалдаалагдаж байна. Эх сурвалж: Нийслэлийн статистикийн газар

ХУГАЦАА НЬ ДУУСАЖ АКТЛАХ 532 АВТОБУСЫН НАСЖИЛТЫГ НЭГ ЖИЛЭЭР СУНГАЛАА

11 / 12 0 сэтгэгдэл 867 үзсэнe

Өнөөдрийн байдлаар Нийслэлийн нийтийн тээвэрт “Зорчигч тээвэр гурав” ОНӨААТҮГ, “Зорчигч тээврийн нэгтгэл” гэсэн нийслэлийн хөрөнгө оруулалттай хоёр компани, хувийн хэвшлийн 17 компанийн 960 гаруй автобус үйлчилгээнд явж байна. Ирэх сард эдгээрийн 50%-г актад гаргахаар байсан ч Нийтийн тээврийн парк шинэчлэлтэд зарцуулах төсөв батлагдаагүй тул ашиглалтын хугацааг нэг жилээр сунгажээ. Автобуснуудыг засварлаж, ашиглах хугацааг сунгаж байгаа ч хөдөлгөөнд оролцож байхдаа эвдэрч, олон цагаар түгжрэл үүсгэх асуудал гарсаар байгаа юм. Дээд тал нь 12 жил ашиглах хугацаатай байдаг аж. Заасан стандарт хугацааг хэтрүүлж ашиглах нь эрсдэл дагуулж буй хэрэг юм. Нийслэлийн нийтийн тээврийн газар улсаас төсөв мөнгө нь шийдэгдвэл эдгээр автобусыг хэзээ шинэчилнэ хэмээв.

МӨСӨНД НААЛДСАН ИРГЭНИЙ ЦОГЦОСЫГ ОЛЖЭЭ

11 / 12 0 сэтгэгдэл 1 084 үзсэнe

Иргэд зам товчлохоор гүйцэт хөлдөөгүй гол мөрөн дээгүүр тээврийн хэрэгсэлтэйгээ явж осол аваар гарах нь ихсэж байна. Тухайлбал:Хөвсгөл аймгийн Цагааннуур сумын нутагт 2021 оны арваннэгдүгээр сарын 10-ны өдөр Шишгэдийн голын мөс цөмөрч “УАЗ Пургон 37419” загварын автомашин осолдож зорчиж явсан гурван иргэнээс хоёрынх нь цогцосыг уснаас гаргаж авсан боловч нэг иргэнийг хараахан олооогүй байсан юм. Тэгвэл үлдсэн иргэний цогцосыг голын эргээс 25 метрийн зайд мөсөнд наалдсан байдалтай байхад нь олж аймгийн цагдаагийн газрын шүүх шинжилгээний албаны шинжээчид хүлээлгэн өгчээ. Иймд иргэдийг гол мөрний мөс бэхжиж амжаагүй энэ үед зам товчлох, цаг хожих зорилгоор мөсөн дээгүүр тээвэр хийж, зорчихгүй байхыг Цагдаагийн байгууллагаас анхааруулж байна.

МАНАЙ УЛС ХОГ ШАТААН ЭРЧИМ ХҮЧ ГАРГАН АВАХ ҮЙЛДВЭРТЭЙ БОЛНО

11 / 10 0 сэтгэгдэл 463 үзсэнe

Засгийн газрын хуралдаанаас нийслэл Улаанбаатар хотод хог шатааж эрчим хүч гаргах үйлдвэр байгуулах төслийн урьдчилсан судалгаа, шаардагдах хөрөнгийн эх үүсвэр, боломжит бүтцийг тодорхойлох хамтарсан ажлын хэсэг байгуулах шийдвэр гаргалаа. Уг үйлдвэр ашиглалтанд орвол 2024 оноос нийт хог хаягдлын 31,8 хувийг шатаах үйлдвэрт устгаж, төвлөрсөн хогийн цэгт дарж булж байгаа хог хаягдлыг мөн нэлээдгүй хувиар бууруулах юм. 2040 он гэхэд Улаанбаатар хотын нийт хог хаягдлын 50 хувийг дахивар боловсруулалтад оруулж, дахин боловсруулалтад оруулах боломжгүй 42 хувийг шатааж устган эрчим хүч гарган, төвлөрсөн хогийн цэгт дарж булшлах хог хаягдлын хэмжээг бууруулах зорилт тавин ажиллаж байна.