Өнөөдөр буюу 07 сарын 25-ны 09:45:37 цагт газар зүйн байршил (Өргөрөг, Уртраг) : 45.08 93.07 Ховд аймгийн Алтай сумын нутагт 3.5 магнитудын хүчтэй газар хөдлөлт боллоо. Газар хөдлөлтийн төвөөс ойр орших аймаг сумд: Ховд аймгийн Алтай сумын төвөөс Зүүн урд зүгт 112км Говь-Алтай аймгийн Бугат сумын төвөөс Баруун урд зүгт 115км Ховд аймгийн Үенч сумын төвөөс Зүүн урд зүгт 137км
Олон Улсын Олимпын Хорооны 142 дугаар чуулган Парис хотноо эхэллээ. Чуулганы нээлтийн ажиллагаанд зуны олимпын наадмыг хүлээн авч буй Франц улсын ерөнхийлөгч Э.Макрон хүрэлцэн ирж, олимпын их гэр бүлийн төлөөлөлд баяр хүргэж, амжилт хүсэв. ОУОХ-ны ерөнхийлөгч Т.Бах хүн төрөлхтний эв нэгдлийн илэрхийлэл болсон олимпын наадмыг хүлээн авахад бэлэн болсон Парис хот, Францын ард түмэнд талархал илэрхийлж, хамгийн өрсөлдөөнтэй, хамгийн шударга, хамгийн сэтгэл хөдөлгөсөн наадам болно гэдэгт итгэлтэй байгаа сэтгэгдлээ хуваалцлаа. Энэ удаагийн чуулганаар шийдсэн хамгийн онцлох үйл явдал нь 2030 болон 2034 оны өвлийн олимпын наадмыг зохион байгуулах орныг баталгаажуулсан нь байв. Зохион байгуулагч хотыг сонгох комиссын санал болгосны дагуу 2030 оны өвлийн олимпын наадмыг Франц улсын Алпийн нурууны орчмын хотууд хамтран, 2034 оны өвлийн олимпын наадмыг АНУ-ын Солт Лэйк Сити хот тус тус хүлээн авахаар боллоо. Солт Лэйкийн хувьд 2002 онд Өвлийн олимпын наадмыг хүлээн авч байсан бол Францын Алпийн нурууны орчимд Шамони хот анхны олимпыг 1924 онд, Гренбобл хот 1968 онд, Албервилл хот 1992 онд тус тус олимпын наадам зохион байгуулагдаж байсан юм. Үүнээс гадна энэ удаагийн наадмаар ОУОХ-ны гишүүд анхны Цахим спортын олимпын наадмыг “Olympic Esports Games” нэрийн дор зохион байгуулах шийдвэр гаргалаа. 2025 оны анхны наадмыг Саудын Араб улс хүлээн авах болно. Энэ нь дижитал технологийн эрин үед хүүхэд, залуусын дунд хамгийн хурдацтай хөгжиж буй цахим спортыг олимпын хөдөлгөөн хүлээн зөвшөөрч, нэг хэсгээ болгож байгаа чухал ач холбогдолтой шийдвэр билээ. Тэрчлэн энэ удаагийн хурлаар Олимпын хартын 5 заалтад найруулгын болон утгын засвар оруулж, нийт 8 шинэ гишүүнийг батламжлан, 15 гишүүний бүрэн эрхийг сунгажээ. Мөн дараагийн олимпын наадмыг зохион байгуулах Милан-Кортина 2026, Лос Анжелес 2028, Брисбэйн 2032-ийн бэлтгэл ажлын танилцуулга мэдээллийг сонслоо. Энэ удаагийн чуулганд Монгол улсыг төлөөлөн МҮОХ-ны ерөнхийлөгч, ОУОХ-ны гишүүн Б.Баттүшиг оролцож байгаа юм.
Монгол улсын ерөнхийлөгч У.Хүрэлсүх аж үйлдвэрлэлийн салбарын хөгжил дэвшилд үнэтэй хувь нэмэр оруулсан АПУ ХК-ийн ажилтнуудыг өндрөөр үнэлж 100 жилийн түүхэн ойн баярыг тохиолдуулан төрийн дээд цол тэмдгээр шагналаа. АПУ компанийг сүүлийн 16 жил тасралтгүй удирдаж буй Гүйцэтгэх захирал Ц.Эрдэнэбилэгт ерөнхийлөгчийн зарлигаар Төрийн дээд шагнал “Сүхбаатарын одон” гардууллаа. АПУ ХК-ийн Санхүү эрхэлсэн захирал Г.Энхбилэг, Үйлдвэрчний эвлэлийн хороо болон Ахмадын хорооны дарга Л.Аваасүрэн, ахмад инженер Б.Содномпэлжээ нарт “Аж үйлдвэрийн гавьяат ажилтан” цол хүртээлээ. Мөн АПУ ХК-ийн Агуулах хариуцсан менежер Д.Бямбацогт, Энтертэйнмент хариуцсан ахлах менежер М.Сэргэлэнбат, Ахлах инженер П.Жаргалсайхан нарыг “Хөдөлмөрийн гавьяаны улаан туг”-ийн одонгоор шагнасан бол Ахлах инженер Г.Батцэнгэл, Үйлчилгээний жолооч Б.Бат-Орших, Худалдааны төлөөлөгч М.Отгонбаатар нарыг “Алтан гадас” одонгоор шагнаж, Брэнд загвар хөгжүүлэлтийн дизайнер Б.Хурбаяр, Савлалтын оператор А.Сувдаа, Бүртгэл тайлагналын менежер А.Гүнжидмаа нарыг “Хөдөлмөрийн хүндэт медал”-иар тус тус шагналаа. Монгол улс үйлдвэрлэгч, экспортлогч, брэнд бүтээгч орон болохын төлөөх замналыг бүтээлцэж, эх орондоо үнэтэй хувь нэмэр оруулж буй та бүхэндээ халуун баяр хүргэе. ҮРГЭЛЖ ӨӨДӨӨ АПУ ХУВЬЦААТ КОМПАНИ
Алдарт дуучин Селин Дион энэ баасан гарагт болох Парист-2024 олимпын нээлтийн ёслолд дуулна хэмээн TMZ мэдээллээ. Хөшүүн хүний хам шинж буюу гэнэт булчин нь хөшдөг өвчнөөр шаналж буй түүний биеийн байдал харьцангуй сайн байгаа гэв. Тэрбээр энэ талаараа "Би бол Селин Дион" баримтат кинондоо дэлгэрэнгүй ярьсан ба нэвтрүүлэгтээ “Би тайзан дээр эргэн ирэх болно” гэсэн нь Олимпын нээлтийн ёслолын тайз байжээ. Тэрбээр саяхан Парист ирж Нээлтийн ёслол Сена мөрний эрэг дагуу болох тул Селин энэ дурсгалт газрын урд тоглолтоо хийх магадлалтай юм. Сонирхуулахад түүнийг нэг дуу тутамдаа 2 сая ам.долларын төлбөр авна хэмээн эх сурвалжууд TMZ-д мэдээлжээ.
Борооны улмаас албан байгууллага, орон сууц, автомашин усанд автсан тухай дуудлага 20:32 цагт Онцгой байдлын албанд ирсэн байна. Дуудлагаар тус аймгийн Онцгой байдлын газрын Гал түймэр унтраах, аврах 25 дугаар ангийн алба хаагчид Сайнцагаан сумын мэргэжлийн ангийн ажилтнууд 3 цаг 30 минут ажиллаж аймгийн Цагдаагийн газрын байр, залуус хорооллын 221 дүгээр байрны зоорийн давхарт ус орсныг соруулж, 4 автомашин усанд авсан байсныг 00:30 цагт татан гаргаж 17 хүн үүнээс (3 нь хүүхэд)-ийн аюулгүй байдлыг хангасан байна.
Зургаадугаар сарын 18-наас нийслэлийн холбогдох албаныхан “Цэвэрч иргэн - цэмцгэр хот” арга хэмжээг зохион байгуулж буй. Энэ хүрээнд 3517 зөрчил илрүүлсэн бөгөөд цаашид хог хаясан нь зураг бичлэгээр нотлогдсон бол хариуцлага тооцох боломжтойг НЦУГ-ын Нийтийн хэв журам хамгаалах, олон нийтийн аюулгүй байдлыг хангах хэлтсийн ахлах байцаагч О.Мөнхцэцэг хэллээ. Тэрбээр “Тусгай арга хэмжээний хүрээнд 3517 зөрчил илрүүлж, зөрчлийг газар дээр нь засуулах, холбогдох байгууллагатай хамтран арилгуулах арга хэмжээ авч байна. Цаашид иргэд “Цахим Эко Цагдаа” нээлттэй фейсбүүк группт нэгдэн, зөвшөөрөлгүй газар хог хаяж байгаа асуудлыг зургаар баримтжуулж мэдээлснээр цагдаагийн байгууллага шуурхай арга хэмжээ авч хариуцлага тооцон хариу мэдэгдэх боломжтой болж буй. Эл арга хэмжээний үр дүнд хүн торгохоос илүүтэйгээр нийслэл хотын өнгө үзэмж, цэвэр цэмцгэр байдлыг ханган, иргэдийн эрүүл, аюулгүй орчинд ая тухтай амьдрах орчин нөхцөлийг бүрдүүлэх юм. Иймд цаашид иргэд иргэний үүргээ биелүүлж, хууль тогтоомж зөрчихгүй, ил задгай хог хаяхгүй, хогоо зориулалтын цэгт хаяж хэвшихийг уриалж байна” гэлээ.
Монгол Улсын Ерөнхийлөгч Ухнаагийн Хүрэлсүх гэргий Лувсандоржийн Болорцэцэгийн хамт 2024 оны 07 дугаар сарын 26-ны өдөр болох “Парис-2024” зуны Олимпын XXXIII наадмын нээлтэд Бүгд Найрамдах Франц Улсын Ерөнхийлөгч Эммануэл Макрон, Олон улсын олимпын хорооны Ерөнхийлөгч Томас Бах нарын урилгаар оролцоно. Зуны Олимпын нээлтэд дэлхийн 60 гаруй орны төр, засгийн болон олон улсын байгууллагын тэргүүн нар оролцох юм. Хүн төрөлхтний эв найрамдлын бэлгэ тэмдэг болсон зуны Олимпын XXXIII наадамд Монгол Улсын 33 тамирчин 9 төрөлд оролцох ба манай багийн тэмцээн байт харваагаар эхэлнэ. Монгол Улс 1964 оноос эхлэн Олимпын наадамд оролцож эхэлсэн бөгөөд Монголын баг, тамирчид зуны Олимпын наадмаас 30, Паралимпын наадмаас 4 медаль хүртсэн амжилттай билээ.
Сэтгүүлч Н.Өнөрцэцэгт шүүхээс 4 жил 9 сарын хорих ял оноосон. Үүнтэй холбоотойгоор түүний ар гэрийнхэн төрийн гурван өндөрлөгтэй биечлэн уулзах хүсэлт гаргахаар болсон талаараа өнөөдөр мэдээлэл хийсэн юм. Энэ үеэр түүний ар гэрээс Н.Өнөрцэцэгт холбогдуулан шалгаж буй төрийн нууц мэдээллийг олж авсан, хадгалсан гэх хэргийн хүрээнд мэдээлэл өгсөн юм. Ингэхдээ тухайн мэдээллийг задруулсан хүн нь БОАЖ-ын сайд асан, УИХ-ын гишүүн Б.Бат-Эрдэнэ хэмээн мэдэгдсэн. Үүнтэй холбоотойгоор УИХ-ын гишүүн Б.Бат-Эрдэнэ дараах мэдээллийг өглөө. Тэрбээр "Төрийн нууц задруулсан гээд яваад эхэлж. Тийм юм байхгүй. Тийм боломж ч байхгүй. Тухайн хадгалсан гэх нууцын баримт юу болох ямар баримт болох талаар би огт мэдэхгүй ба мэдэх ч боломжгүй. Учир нь төрийн нууц нь Төрийн болон албаны нууцын тухай хуулийн 20, 21 дүгээр зүйлд заасны дагуу тусгай нөхцөлд танилцдаг, мөн хуулийн 28 дугаар зүйлд зааснаар нууцыг хариуцан хамгаалах тусгайлсан ажилтантай бөгөөд миний бие ийнхүү хуулиар хамгаалагдсан баримт, материалыг өөрөө аваад явах боломжгүй юм. Мөн төрийн нууцад хамаарах материалыг авсан бол заавал баталгаажуулж тэмдэглэгддэг бөгөөд авсан хүн нь маш тодорхой байдаг. Гэтэл ямар ч баримт, нотолгоогүй зүйлээр нэр хамаатуулж байгаа тухай өмнө нь мэдэгдэж байсан. Энэ удаад ч мөн албан ёсоор мэдэгдэе" гэжээ.
Ардын хувьсгалын 103 жилийн ойн үндэсний их баяр наадамд зодоглосон зарим бөхийн сэргээшийн шинжилгээ хариу эерэг гарсан тухай мэдээлэл цацагдаад байна. Тэдний нэг нь Баянхонгор аймгийн Хүрээмарал сумын харьяат, цэргийн арслан Г.Жамбалдорж аж. Тэрбээр цахим хуудсандаа өөрийн сэтгэгдлээ хуваалцжээ. Г.ЖАМБАЛДОРЖ: “Дөрөв давж, баяр наадмын хуулийн дагуу допингийн шинжилгээнд хамрагдсан. Хариугаа өчигдөр Үндэсний их баяр наадмын зохион байгуулах хорооны Үндэсний бөхийн салбар хорооноос байгуулагдсан Үр дүнгийн удирдлагын багаас авч, өөрийн биеэр танилцлаа. Би “В” сорьцын шинжилгээгээ өгөхгүй гэдгээ мэдэгдсэн учраас өөрөө хариугаа зарлаж байна. Миний шинжилгээний хариу эерэг гарч, допингийн төрлийн бодис гарсан гэж зохион байгуулах хорооноос танилцуулж бичгээр өглөө. Миний хувьд санаатайгаар допингийн төрлийн хориотой бодис хэрэглэсэн зүйл байхгүй. 2014 оноос хүзүүндээ хүнд бэртэл авч,байнга эмчилгээ хийлгэж байсан. Миний хувьд олон улсын итгэмжлэгдсэн лабораторийн хариуг үгүйсгэхгүй. Мэдлэг мэдээлэл дутуу, хариуцлагагүй алдаа гаргасан тул, гаргасан алдаагаа хүлээн зөвшөөрч, шударга бус өрсөлдөөн бий болгох, санаа зорилго байгаагүй гэдгээ албан ёсоор хэлж, Баяр наадам зохион байгуулах комиссын оногдуулах шийтгэлийг хүлээн авахад бэлэн байгаагаа мэдэгдэж байна” гэж дурджээ.
Сэтгүүлч Н.Өнөрцэцэгт шүүхээс илт худал мэдээллийг олон нийтэд тараасан, төрийн нууц мэдээллийг олж авсан, хадгалсан, татвар төлөхөөс зайлсхийсэн гэх таван үндэслэлээр 4 жил 9 сарын хорих ял оноосон. Шүүхээс хорих ял оноосон нэг үндэслэлийг төрийн нууц мэдээлэл олж авсан гэж үзэж буй. Тухайн төрийн нууц мэдээллийг БОАЖ-ын сайд асан, УИХ-ын гишүүн Б.Бат-Эрдэнэ түүнд дамжуулсан хэмээн ар гэрийнхэн нь мэдээлэл хийсэн. Төрийн нууцыг задруулсан нь батлагдсан тохиолдолд Эрүүгийн хуулийн 19.12 дүгээр зүйлд зааснаар "Төрийн маш нууцад хамаарах мэдээ, баримт бичиг, эд зүйлийг итгэмжлэгдэн хариуцсан, албан тушаал, ажил үүргийн хувьд мэдсэн этгээд задруулсан нь эх орноосоо урвах, гадаадын тагнуулын алба, байгууллага, иргэнтэй хууль бусаар хамтран ажиллах гэмт хэргийн шинжгүй бол гурван жил хүртэл хугацаагаар эрх хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ" гэсний дагуу шийтгүүлэх хуультай аж. Дашрамд сануулахад, Төрийн болон албаны нууцын тухай хуулийн 5.1.1 дэх хэсэгт "ТӨРИЙН НУУЦ" гэж Монгол Улсын хууль тогтоомжийн дагуу төрийн нууцад хамааруулсан, задруулах, үрэгдүүлэх тохиолдолд үндэсний аюулгүй байдал, үндэсний ашиг сонирхолд аюул, занал, хохирол учруулах төрийн хамгаалалтад байх мэдээллийг" хэлнэ хэмээн тодорхойлсон байдаг.
