БАРУУН АЙМГУУДЫН НУТГААР ЦАСАН ШУУРГА ШУУРЧ, ЭРС ХҮЙТЭРНЭ

04 / 12 0 сэтгэгдэл 177 үзсэнe

Цаг агаарын аюултай үзэгдлээс сэрэмжлүүлэх мэдээ: Дөрөвдүгээр сарын 12-ны өдөр Ховдын төв, Говь-Алтайн баруун хэсгээр салхи секундэд 18-20 метр, зарим үед секундэд 24 метр хүрч ширүүснэ. Малчид, иргэд, тээвэрчдийн анхааралд: Энэ сарын12-нд баруун аймгуудын нутгийн баруун болон хойд хэсгээр, 13-нд нутгийн баруун хагаст, 14-нд нутгийн зүүн хагаст цас орж, цасан шуурга, нутгийн өмнөд хэсгээр шороон шуурга шуурч, эрс хүйтрэхийг онцгойлон анхааруулж байна. 2024 оны дөрөвдүгээр сарын 11-ний 20 цагаас дөрөвдүгээр сарын 12-ны 20 цаг хүртэл цаг агаарын урьдчилсан мэдээ: Хур тунадас: Нутгийн баруун хагаст үүлшинэ, бусад нутгаар солигдмол үүлтэй. Шөнөдөө баруун болон төвийн аймгуудын нутгийн хойд, зүүн аймгуудын нутгийн зүүн хэсгээр бага зэргийн бороо, нойтон цас, өдөртөө баруун аймгуудын нутгийн баруун болон хойд, төвийн аймгуудын нутгийн баруун хойд хэсгээр бороо, нойтон цас, уулаараа цас орж, цасан шуурга шуурна. Салхи: Шөнөдөө ихэнх нутгаар баруун өмнөөс секундэд 5-10 метр, өдөртөө нутгийн баруун хэсгээр баруун өмнөөс баруун хойш эргэж секундэд 9-14 метр, Алтайн уулархаг нутаг болон Арц богдын өвөр хоолойгоор секундэд 18-20 метр, зарим үед секундэд 24 метр хүрч ширүүсэж, шороон шуурга шуурна. Агаарын температур: Шөнөдөө Увс нуур болон Дархадын хотгор, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр -3…-8 градус хүйтэн, Алтай, Хангай, Хөвсгөлийн уулархаг нутаг, Орхон-Сэлэнгийн сав газар, Туул, Хэрлэн, Онон, Улз голын хөндийгөөр -4…+1 градус, говийн бүс нутгийн өмнөд хэсгээр +4…+9 градус, бусад нутгаар 0…+5 градус дулаан, өдөртөө Увс нуурын хотгор, Тэс голын хөндийгөөр -2…+3 градус, Монгол-Алтайн уулархаг нутаг, Завхан голын эх, Хүрэнбэлчир орчмоор +4…+9 градус, Их нууруудын хотгор, Хангай, Хөвсгөлийн уулархаг нутаг, Тэрэлж голын хөндийгөөр +10…+15 градус, говийн бүс нутгийн өмнөд хэсэг, Дорнод-Дарьгангын тал нутгаар +21…+26 градус, бусад нутгаар +15…+20 градус дулаан байна. УЛААНБААТАР ХОТ ОРЧМООР: Шөнөдөө үүл багасна, өдөртөө үүлшинэ. Хур тунадас орохгүй. Салхи баруун өмнөөс секундэд 5-10 метр. Шөнөдөө +1…+3 градус, өдөртөө +16…+18 градус дулаан байна. БАГАНУУР ОРЧМООР: Шөнөдөө үүл багасна, өдөртөө багавтар үүлтэй. Хур тунадас орохгүй. Салхи баруун өмнөөс секундэд 6-11 метр. Шөнөдөө -2…-4 градус хүйтэн, өдөртөө +15…+17 градус дулаан байна. ТЭРЭЛЖ ОРЧМООР: Шөнөдөө үүл багасна, өдөртөө багавтар үүлтэй. Хур тунадас орохгүй. Салхи баруун өмнөөс секундэд 6-11 метр. Шөнөдөө -3…-5 градус, өдөртөө +13…+15 градус дулаан байна.

ГАДААДЫН ИРГЭНД 100 ЖИЛЭЭР ГАЗАР ЭЗЭМШҮҮЛЭХ ЗААЛТЫГ ХӨРӨНГӨ ОРУУЛАЛТЫН ХУУЛИАС ХАСЛАА

04 / 12 0 сэтгэгдэл 164 үзсэнe

Өнөөдрийн чуулганы нэгдсэн хуралдаанаар гадаадын иргэнд газрын 100 жилээр эзэмшүүлэх заалтыг Хөрөнгө оруулалтын хуулиас хасах хуулийн төслийг хэлэлцэж баталлаа. Иргэд төрийн үйл хэрэгт шууд оролцох эрхээ УИХ-аар дамжуулан эдлэх Үндсэн хуулийн заалтыг хэрэгжүүлж, УИХ-ын нийтийн өргөдлийн цахим системийг нэвтрүүлсэн. 100 мянган иргэний дэмжлэг авсан санал түүхэндээ анх удаа хууль болон батлагдаж байгааг УИХ-ын дарга Г.Занданшатар онцлоод, нийтийн өргөдөл санаачилсан иргэн Н.Номун-Эрдэнэ болон дэмжиж саналаа өгсөн Монгол Улсын 100 мянган иргэнд тусгайлан талархал дэвшүүлэв. УИХ-ын дарга Г.Занданшатар: Жирийн иргэн цахимаар хуулийн төсөлд саналаа өгч, үүнийг нь УИХ-аар хэлэлцэн баталж буй нь ардчилсан, цахим парламентын хөгжлийн тод жишээ боллоо. Өнөөгийн технологийн эрин зуунд цахим талбарыг зөв ашиглаж, эрх ашгийг нь хөндсөн заалтыг хуулийн төслөөс хасуулав. Иргэн хүн төрийн бодлогод саналаа хэлж, олноороо дэмжигдэж, хууль болон батлагдах үйл явц цааш цаашдын парламентад зөв үлгэр жишиг болно гэдэгт итгэж байна 2013 онд батлагдсан Хөрөнгө оруулалтын тухай хуулинд “хөрөнгө оруулагчид газрыг 15-60 хүртэл жилээр гэрээний үндсэн дээр ашиглуулах, уг хугацааг гэрээний анхны нөхцөлөөр нэг удаа 40 хүртэл жилээр сунгах хөрөнгө оруулалтын татварын бус урамшууллыг үзүүлж болно” гэсэн заалт нь орсон байдаг. Гэвч Газрын тухай болон Үндсэн хуультай зөрчилдсөн тул өнөөг хүртэл хэрэгжээгүй. Хэдийгээр хэрэгжээгүй заалт боловч цаашид ийм санаархал гарахаас сэргийлж, хуулийн зохицуулалтаар хаалт хийнэ гэж УИХ-ын дарга мэдэгдэж байсан. Ийнхүү газрыг гадаадын иргэнд 100 жилээр эзэмшүүлэх заалт Монгол Улсын ямар ч хуулинд байхгүй боллоо.

ИХ ХЭМЖЭЭНИЙ СУМ, ГАЛТ ЗЭВСГИЙГ ХУУЛЬ БУСААР ТЭЭВЭРЛЭЖ ЯВСНЫГ ИЛРҮҮЛЖЭЭ

04 / 11 0 сэтгэгдэл 334 үзсэнe

Цагдаагийн байгууллагаас иргэн Д нь 2024 оны дөрөвдүгээр сарын 11-ний өдөр Хан-Уул дүүргийн 21 дүгээр хорооны нутаг дэвсгэрт байлдааны зориулалттай их хэмжээний сум, галт зэвсгийг хууль бусаар тээвэрлэж явсныг илрүүллээ. Эрүүгийн хуулийн тусгай ангийн 20.4 дүгээр зүйл /Галт зэвсэг, галт хэрэгсэл, тэсэрч дэлбэрэх бодис хууль бусаар эзэмших/-д заасан гэмт хэргийн шинжтэй үйлдэлд мөрдөн шалгах ажиллагааг явуулж байгаа аж. Иймд иргэд та бүхэн бүртгэл, гэрчилгээгүй галт зэвсэг, түүний бүрдэл хэсэг, тэсэрч дэлбэрэх бодис, галт хэрэгсэл, тэсэлгээний хэрэгслийг хууль бусаар олж авсан, хадгалж байсан хүн зохих байгууллагад сайн дураараа авчирч өгсөн бол эрүүгийн хариуцлагаас чөлөөлөх эрх зүйн зохицуулалттайг анхаарна уу.

ГАЗРЫГ ГАДААДЫН ИРГЭНД 100 ЖИЛЭЭР ЭЗЭМШҮҮЛЭХ ЗААЛТЫГ ХҮЧИНГҮЙ БОЛГОХЫГ УИХ-ЫН ГИШҮҮДИЙН ОЛОНХ ДЭМЖЛЭЭ

04 / 11 0 сэтгэгдэл 134 үзсэнe

УИХ-ын чуулганы өнөөдрийн нэгдсэн хуралдаанаар Хөрөнгө оруулалтын тухай хуульд тусгасан газрыг хөрөнгө оруулагчдад 100 жилээр эзэмшүүлэх заалтыг хасах талаар хэлэлцэж байна. Энэ үеэр УИХ-ын гишүүн Ж.Бат-Эрдэнэ "Газрыг гадаадын иргэдэд 100 жилээр эзэмшүүлэх заалтыг УИХ-ын олон гишүүн эсэргүүцэж байгаа. Газар тариалангийн бизнес эрхлэгчид мөн манай нутагт газар эзэмших эрхийг 15 жилээр сунгадаг. Энэ хуулийн төсөлд хоёр л заалт өөрчлөх юм. Нэг нь Хөрөнгө оруулалтын тухай хуулийн 12-р зүйлийн 12.1.1-т заасан “Газрыг гадаадын иргэнд 100 жилээр эзэмшүүлэх тухай” заалтыг хүчингүй болгох юм. Засгийн газраас өргөн мэдүүлсэн Хөрөнгө оруулалтын тухай хуулийн төсөлд Гадаадын хөрөнгө оруулагчдад 100 мянган ам.долларын босго тавьсныг байхгүй болгохоор тусгасан. Үүнийг харж үзэх ёстой. Учир нь, 100 мянган доллар бол тэр тусмаа стратегийн ач холбогдолтой салбаруудад хөрөнгө оруулагчдад бол асар бага мөнгө шүү дээ. Засгийн газрын бодлого нь хөрөнгө оруулагчдад хаалгаа нээе гэдэг утгаар босгоо намсгаж байгаа юм байна" гэв. Хөрөнгө оруулалтын тухай хуульд өөрчлөлт оруулах тухай хуулийн төслийн анхны хэлэлцүүлгийг эцэслэн батлах үе шаттай нэгтгэн явуулах тухай Эдийн засгийн байнгын хорооноос гаргасан горимын саналыг хуралдаанд оролцсон гишүүдийн олонх дэмжив. Санал хураалтад уг саналыг 22 гишүүн дэмжиж, 51.2 хувиар санал дэмжигдлээ. Хуулийн төслийг эцэслэн батлах бэлтгэл хангуулахаар Эдийн засгийн байнгын хороонд шилжүүлэв. Ингэснээр Хөрөнгө оруулалтын тухай хуульд байсан газрыг гадаадын иргэнд 100 жилээр эзэмшүүлэх заалтыг хүчингүй болгохыг хуралдаанд орсон гишүүдийн олонх дэмжлээ.

СОГТУУРУУЛАХ УНДААНЫ ТУСГАЙ ЗӨВШӨӨРӨЛ ОЛГОХ ЭРХИЙГ ДҮҮРГИЙН ЗАСАГ ДАРГА НАРТ ШИЛЖҮҮЛЛЭЭ

04 / 11 0 сэтгэгдэл 134 үзсэнe

Улаанбаатар хотод бизнес эрхэлж байгаа аж ахуйн нэгж, байгууллагуудад нийслэлийн хөгжлийн бодлого, чиглэлийг танилцуулах, тэдний санал бодол, тулгамдаж буй асуудал, цаашдын чиг хандлагыг сонсох зорилгоор “Худалдаа, үйлчилгээний салбарын бизнес эрхлэгчдэд тулгамдаж буй асуудал, шийдвэрлэх арга зам” сэдэвт уулзалтыг өнөөдөр зохион байгуулж байна. Уулзалтад нийслэлд үйлчилгээ эрхэлж байгаа 700 гаруй иргэн, аж ахуйн нэгжийн төлөөлөл оролцож байгаа юм. Уулзалтын эхэнд Нийслэлийн Засаг дарга бөгөөд Улаанбаатар хотын Захирагч Х.Нямбаатар худалдаа үйлчилгээний салбарын өнөөгийн байдал, 2024 онд хэрэгжүүлж байгаа ажлын талаар танилцууллаа. Тэрбээр “Нийслэлийн зүгээс бизнес эрхлэгчдийг хуулийн хүрээнд хэрхэн дэмжиж, хамтран ажиллах боломжтой талаар ярилцан, тулгамдаж буй асуудлуудаа шийдвэрлэхээр энэ уулзалтыг зохион байгуулж байна. Аливаа асуудлаас тойрч зугтах биш, нүүр тулж шийдэх хэрэгтэй. Бид “Согтууруулах ундааны эргэлтэд хяналт тавих, архидан согтуурахтай тэмцэх тухай” хуулийн 15.8 дугаар зүйлд заасны дагуу “Согтууруулах ундаа худалдах, түүгээр үйлчлэх тусгай зөвшөөрөл олгох, сунгах, түдгэлзүүлэх, сэргээх, хүчингүй болгох эрх”-ийг энэ оны гуравдугаар сарын 15-наас дүүргийн Засаг дарга нарт шилжүүлсэн. Ингэснээр зөвшөөрлийн шинжтэй төрийн үйлчилгээ улам хялбар, шуурхай болно. Мөн жижиглэн худалдааны газар, түүний үйлчилгээ, ерөнхий шаардлагын стандартад өөрчлөлт оруулж, хүнсний дэлгүүрийн талбайн хэмжээг 51-ээс 41 ам метр болгон өөрчлөх хүсэлтийг төрийн дээд шатны холбогдох байгууллагуудад хүргүүлсэн байгаа. Бүхий л салбарт ажиллах хүч, хүний нөөцийн асуудал хөндөгдөж байна. Төлөвлөгдсөн даацаасаа хэд дахин олон хүн амтай болсон Улаанбаатар хотод цэвэрлэгээ, үйлчилгээ, тохижилтоос эхлээд олон асуудал ундарч байна. Тохижилт, үйлчилгээний салбарын ажилтнууд ачааллаа дийлэхгүй байна. Тиймээс аж ахуйн нэгжүүд орчны 50 метр талбайн цас мөс, хог шороо, гадна фасадын угаалга, цэвэрлэгээ, ногоон байгууламжийн арчлалт хамгаалалтыг хийх хэрэгтэй. Мөн стандартаа мөрдөж, хаягжилт, камержуулалт, хөгжлийн бэрхшээлтэй иргэнд зориулсан налуу шат, гэрэлтүүлэг, ногоон байгууламж, авто зогсоолын асуудлаа цогцоор нь шийдэх учиртай” хэмээн онцолж байлаа. Нийслэлийн Засаг даргын 2021 оны захирамжаар зөвшөөрлийн шинжтэй 74 төрлийн үйлчилгээг цахимд шилжүүлсэн. Өдгөө цахим бүртгэлийн хуудастай 11,888 иргэн, аж ахуйн нэгжид 110 мянган иргэн ажиллаж байна. Цаашид цахим зөвшөөрлийн системийг илүү сайжруулж, ойлгомжтой, шуурхай болгох юм. Уулзалт худалдаа, үйлчилгээний салбарын бизнес эрхлэгчдийн санал хүсэлт, асуулт хариултаар үргэлжилж байна.

7 ӨРХИЙН 15 ИРГЭН УГААРТАЖ, ХОЁР ИРГЭН НАС БАРЖЭЭ

04 / 11 0 сэтгэгдэл 241 үзсэнe

Өчигдөр шөнө буюу дөрөвдүгээр сарын 9-ний шөнө Баянзүрх, Сонгинохайрхан дүүрэгт оршин суух долоон өрхийн нийт 15 иргэн угаартсан тухай дуудлага мэдээлэл Онцгой байдлын газарт бүртгэгджээ. Онцгой байдлын алба хаагчид тусламж үзүүлсэн ч харамсалтайгаар угаартсан иргэдийн хоёр нь нас барсан байна. Хавар, намрын улирал буюу дулаарч буй энэ үед угаартах тохиолдол эрс нэмэгддэг тул иргэд дулаан байгаа ч хяналтаа сулруулахгүй байхыг ОБЕГ-аас анхааруулж байна.

ӨНӨӨДӨР ЗАСГИЙН ГАЗРЫН ХУРАЛДААНААР ХЭЛЭЛЦЭХ АСУУДЛУУД

04 / 10 0 сэтгэгдэл 142 үзсэнe

Засгийн газрын ээлжит хуралдаан үргэлжилж байна. Өнөөдөр: Уламжлалт мал аж ахуйд тулгамдаж буй байгаль, цаг уурын өөрчлөлтөөс шалтгаалсан сөрөг нөлөөллийг бууруулах тухай хуулийн төсөл "Тогтоолын хавсралт шинэчлэн батлах тухай" Засгийн газрын тогтоолын төсөл /"Монгол Улсад 2024 онд хөдөлмөр эрхлэх гадаад ажилтны тоо, хувь хэмжээг тогтоох тухай" Засгийн газрын 360 дугаар тогтоол/ "Газар тариалангийн талаар авах зарим арга хэмжээний тухай" Засгийн газрын тогтоолын төсөл Газрын нэгдмэл сангийн 2023 оны улсын нэгдсэн тайлангийн талаар Хүүхдийн хоол үйлдвэрлэл, шим тэжээлийн сургалт арга зүйн үндэсний төвийн талаар Авлигатай тэмцэх "Шил" ажиллагааны талаар "Монгол Улсын хөгжлийн 2025 оны төлөвлөгөө батлах тухай" Улсын Их Хурлын тогтоолын төсөл зэрэг 26 асуудал хэлэлцэх болон танилцахаар төлөвлөөд байна.

"ТЭНҮҮН-ОГОО" КОМПАНИЙН А.ГАНХУЯГИЙН ҮЛ ХӨДЛӨХ ХӨРӨНГҮҮДИЙГ 75 ТЭРБУМ ТӨГРӨГӨӨР ҮНЭЛЖ ТӨР АВАХААР БОЛЖЭЭ

04 / 10 1 сэтгэгдэл 308 үзсэнe

"Ногоон автобус"-ны гэх тодотголтой хэрэгт прокуророос яллах дүгнэлт үйлдэж, хэргийг шүүхэд шилжүүлсэн. Шүүх хурлыг УИХ-ын Түр хорооны сонсголын дараа явуулахаар болжээ. Уг хэрэгт холбогдуулан "Тэнүүн-Огоо" компанийн А.Ганхуяг цагдан хоригдож буй. Тэр тус хэрэгт шалгагдаж байх явцдаа нийслэлд учруулсан хохирлоо барагдуулахаар хуулийн байгууллагад хандсан байна. Энэ дагуу АТГ-аас томилсон Сангийн яамнаас эрх авсан үл хөдлөх хөрөнгийн үнэлгээний компани нь тухайн компанийн автобус баазууд, засвар үйлчилгээний төвүүд зэрэг нийтийн тээвэртэй холбоотой үл хөдлөх хөрөнгүүдийг 75 тэрбум төгрөгөөр үнэлж авахаар болжээ.

Ө.ШИЖИР: ОДОО ГАНЦ АРДЧИЛЛЫН ОРДОН Л ӨӨРИЙН ӨМЧЛӨЛДӨӨ ҮЛДЛЭЭ. ЭРГЭН ТОЙРОН ДАХЬ ГАЗРЫГ НЬ Э ДАРГА ЗАРААД ДУУССАН

04 / 10 0 сэтгэгдэл 234 үзсэнe

Саяхан болсон Ардчилсан намын 34 жилийн ойн хурал дээр тус намын дарга Л.Гантөмөр “Манай нам олон далавчтай. Угаас ганц далавчтай шувуу өндөрт нисэхгүй. Олон далавчтай ниснэ” гэсэн нь нам доторх олон бүлэг, фракцуудыг нэрлэж хэлсэн гэх. Соёлын төв өргөөний хүзүүвчинд байсан тус намын жижигхэн байр хэдэн жилийн өмнө үгүй болсон. Гэвч одоо Төв шуудангийн урдах байр нь зарагдчихжээ. Намын нэг бүлэг нь зарж идсэн талаар зарим гишүүд сошиалд жиргэлээ. Онцолбол тус нам доторх МоАХ фракцын төлөөллүүд энэ талаар хүчтэй дуугарч байна. Ерөнхийлөгч Х.Баттулгын Тамгын газрын даргаар ажиллаж байсан Ө.Шижир “Эхлээд хүзүүвч буюу Сүхбаатарын талбайн зүүн талд СТӨ-ний хажууд байрлах манай намын байр зарагдсан, одоо талбайн урд талын С.Зориг агсны хөшөөтэй байрыг Да.Ганболд тэргүүтэй хэсэг бүлэг хужа нар зарчхаж. Гэхдээ угаас намын байр байгаагүй ч түүхэн дурсгал гэж үзээд авч үлдэх ёстой байсан юм. Олон мянган ардчиллын анхдагчид, партизануудын голомт болсон МоАХ өөрийн өмчлөлийн байрныхаа өмнө анхны зохицуулагч С.Зориг агсны хөшөөг тавья. Хөшөөг нь арай ч зарчхаагүй байлгүй дээ…” гэжээ. Мөн тэрээр “АН-д хүзүүвч, шинэ дэвшилт холбоонд(МҮДН) энэ байрыг, МоАХ-д ардчиллын ордонг тухайн үед өгсөн. Одоо ганц ардчиллын ордон л өөрийн өмчлөлдөө үлдлээ. Эргэн тойрон дахь газрыг нь Э дарга зараад дууссан даа” гэв. Ийн Л.Гантөмөр АН-аа олон далавчтай өндөрт ниснэ гэсэн ч бүлэг фракцууд нь байр саваа зарж, талцаж, далавч бүрээрээ салж унасаар.

О.МӨНХЖИН, Б.ГАНТИГ НАРТ ХОЛБОГДОХ ХЭРГИЙГ ШҮҮХЭД ШИЛЖҮҮЛЛЭЭ

04 / 03 1 сэтгэгдэл 279 үзсэнe

Нийслэлийн прокурорын газраас "Их бит" ХХК-ийн үйл ажиллагаа хариуцсан захирал О.Мөнхжин, гүйцэтгэх захирал Б.Гантиг нарыг үгсэн тохиролцож, мөнгө угаасан хэрэгт буруутай гэж үзлээ. Холбогдох хэргийг Сүхбаатар дүүргийн эрүүгийн хэргийн анхан шатны шүүхэд шилжүүлжээ. Нийслэлийн прокурорын газраас О.Мөнхжин, Б.Гантиг нарыг гэмт хэрэг үйлдэх талаар урьдчилан үгсэн тохиролцож, нэр бүхий койны үнэ цэнд нөлөөлөх нийтийн хүртээл болоогүй дотоод мэдээллийг ашиглан өөрийн болон хамаарал бүхий хүмүүсийн дансаар койн арилжаалсан, мөнгө угаасан, худал мэдэгдэл хийж олон нийтийг төөрөгдүүлэн, виртуал хөрөнгийн үйлчилгээ үзүүлэгчийн үйл ажиллагаанд арилжааг урвуулан ашигласан гэж үзсэн байна. Иймд Эрүүгийн хуулийн: 18.19 дүгээр зүйлийн 2.1, 2.2 /Виртуал хөрөнгийн үйлчилгээний дотоод мэдээллийг хууль бусаар ашиглах/, 18.6 дугаар зүйлийн 1 /Мөнгө угаах/, 18.20 дугаар зүйлийн 1 /Виртуал хөрөнгийн үйлчилгээ үзүүлэгчийн үйл ажиллагаанд арилжааг урвуулан ашиглах/-д зааснаар яллах дүгнэлт үйлджээ. Эх сурвалж: Нийслэлийн Прокурорын Газар