ИРЭХ ДАВАА ГАРАГААС ТӨРИЙН АЛБАН ХААГЧДЫН ЦАЛИН 100-150 МЯНГАН ТӨГРӨГӨӨР НЭМЭГДЭНЭ

03 / 29 4 сэтгэгдэл 69 үзсэнe

Засгийн газраас төрийн албаны цалингийн тогтолцооны шинэчлэлийг эхлүүлж, төрийн албан хаагчдын цалин хөлсийг өнгөрөгч оны долдугаар сарын 1-ний өдрөөс 40 хувиар нэмсэн. Энэ цалин энэ оны дөрөвдүгээр сарын 1 буюу ирэх даваа гарагаас дахин нэмэгдэхээр болжээ. Тодруулбал, төрийн албан хаагчдын цалин 100-150 мянган төгрөгөөр нэмэгдэхээр болсон байна. Тухайлбал, төрийн захиргааны алба, төрийн мэргэжлийн үйлчилгээ, төрийн тусгай албаныхны цалин 100 мянган төгрөгөөр, төрийн нийтлэг үйлчилгээнийхний цалин 150 мянган төгрөгөөр нэмэгдэхээр болжээ. Ингэснээр, төрийн албан хаагчийн дундаж цалин 2.5 сая төгрөгт хүрч байна.

Л.ЧИНБАТЫН ХЭРГИЙГ ШАЛГАЖ ДУУСААД, ДАХИН ПРОКУРОРТ ХҮРГҮҮЛЖЭЭ

03 / 29 1 сэтгэгдэл 55 үзсэнe

Гацуурт ХХК-ийн захирал Л.Чинбат нь бусдыг авто машинаар хөөсөн, дайрахыг завдсан гэх хэргийг Цагдаагийн байгууллага шалгаж дуусаад шүүхэд шилжүүлэх саналтайгаар прокурорт хүргүүлээд байсан ч хэргийн оролцогч нараас хүсэлт гаргасан тул Л.Чинбат нарт холбогдох хэргийг нэмэлт мөрдөн байцаалт хийлгэхээр цагдаагийн байгууллагад буцаасан талаар мэдээлж байсан. Өөрөөр хэлбэл, энэ хэргийг шийдэгдэхгүй хагас жил гаруй хугацаа болох гэж байна. Тэгвэл мөрдөн шалгах байгууллагаас тус хэрэгт нэмэлт мөрдөн шалгах ажиллагаа явуулж дуусаад шүүхэд шилжүүлэх саналтайгаар хэргийг дахин прокурорт шилжүүлжээ.

ЗАСГИЙН ГАЗРЫН ОРДНЫГ НҮҮЛГЭХ АЖЛЫГ СУДЛАЖ ЭХЭЛЛЭЭ

03 / 27 1 сэтгэгдэл 279 үзсэнe

Төрийн байгууллагуудыг нийслэл хотоос үе шаттай бүсчлэн байршуулах бодлогын хүрээнд Засгийн газрын ордон, төрийн захиргааны зарим байгууллагын ажиллах нэгдсэн байрыг нүүлгэхээр төлөвлөжээ. Тодруулбал Төв аймгийн Зуунмод, Сэргэлэн сумын нутаг дэвсгэр дэх Номтын аманд байгуулах асуудлыг судалж, санал, дүгнэлт боловсруулах, холбогдох хууль тогтоомжийн төсөл боловсруулах чиг үүрэг бүхий Ажлын хэсэг байгуулахыг Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга Б.Дэлгэрсайханд үүрэг болгожээ. Түүнчлэн зураг төсөл боловсруулахад шаардагдах зардлыг танилцуулж, шийдвэрлүүлэхийг Эдийн засаг, хөгжлийн сайд Ч.Хүрэлбаатарт даалгасан юм.

"ЭРДЭНЭТ ҮЙЛДВЭРИЙН АЖИЛЧДЫН УСАНД ОРОХ ӨРӨӨНД БАЙРЛУУЛСАН КАМЕР БИЧЛЭГ ХИЙДЭГГҮЙ НЬ ТОГТООГДСОН" ГЭВ

03 / 27 0 сэтгэгдэл 231 үзсэнe

Орхон аймгийн прокурорын газраас “Эрдэнэт үйлдвэр ТӨҮГ-ын ажилчдын усанд орох өрөөнд камер байршуулсан” гэх мэдээллийг шалгасан эрх бүхий албан тушаалтны шийдвэрийг хянаад хэвээр үлдээж, тус газарт прокурорын мэдэгдэл хүргүүлжээ. Тодруулбал аймгийн Цагдаагийн газраас дээрх мэдээллийн мөрөөр холбогдох шалгалтыг явуулахад “Эрдэнэт үйлдвэр” ТӨҮГ-ын ажилчдын усанд орох өрөөнд байрлуулсан камер нь ямар нэгэн тоног төхөөрөмжид холбогдоогүй, бичлэг хийдэггүй болох нь тогтоогдсон байна. Тиймээс эрх бүхий албан тушаалтан Зөрчлийн тухай хуулийн 6.22 дугаар зүйлд заасан “зөвшөөрөлгүй гэрэл зураг авах, дууны, дүрсний, дуу-дүрсний бичлэг хийх” зөрчлийн шинжгүй үндэслэлээр хүлээн авахаас татгалзаж шийдвэрлэжээ. Орхон аймгийн прокурорын газраас “Эрдэнэт үйлдвэр” ТӨҮГ-т гэмт хэрэг, зөрчлөөс урьдчилан сэргийлэх ажил зохион байгуулах, ялангуяа хүний хувийн мэдээлэл хамгаалах тухай хуулийг холбогдох албан тушаалтнуудад танилцуулж, сургалт зохион байгуулж, цаашид хүний эрхийн зөрчил гаргахгүй байх талаар мэдэгдэл хүргүүлсэн байна. Хүний хувийн мэдээлэл хамгаалах тухай хуульд: Ариун цэврийн өрөө, хувцас солих өрөө, караокены өрөө, зочид буудлын өрөө, эрүүл мэндийн тусламж, үйлчилгээг үзүүлэх хэвтүүлэн эмчлэх өрөө зэрэг хүний халдашгүй, чөлөөтэй байх эрхэд илтэд халдахаар байршилд дүрсний бичлэгийн төхөөрөмж байршуулах Нийтийн зориулалттай орон сууцанд оршин сууж байгаа айл, өрхийн орох, гарах хэсгийг хамруулан дүрсний бичлэгийн төхөөрөмж байршуулах, уг дүрсний бичлэгийг олон нийтийн мэдээллийн хэрэгслээр дүрст хэлбэрээр тараах, мэдээллийн эзнээс өөр хүний мэдээлэл байгаа тохиолдолд дүрсний бичлэгийг бусдад үзүүлэх, хуулбарлаж өгөхийг хориглосон байдаг. Эх сурвалж: УЕПГ

ЗАМЫН-ҮҮД-ЭРЭЭН БООМТЫН АЧАА ТЭЭВРИЙГ ИРЭХ САРЫН 1-НЭЭС 24 ЦАГААР АЖИЛЛУУЛНА

03 / 27 0 сэтгэгдэл 165 үзсэнe

Замын-Үүд-Эрээний авто замын боомтын ачаа тээврийг 2024 оны дөрөвдүгээр сарын 1-нээс есдүгээр сарын 30-ны өдрийг хүртэлх хугацаанд 24 цагийн горимоор ажиллуулах бэлтгэлийг хангах, удирдан зохион байгуулахыг Засгийн газрын хуралдаанаас Монгол Улсын сайд, Боомтын сэргэлтийн Үндэсний хорооны дарга Б.Тулгад даалгалаа. "Шинэ сэргэлтийн бодлого"-ын “Боомтын сэргэлт”-ийн хүрээнд Замын-Үүд боомтыг олон улсын жишигт нийцүүлэн шинэчилж, өргөтгөснөөр нийт талбай найм, суудлын автомашин нэвтрүүлэх хүчин чадал долоо, том оврын ачаа тээврийн хэрэгслийнх гурав дахин нэмэгдээд байгаа юм. Тус боомтоор цагт 900 зорчигч, зорчигч тээврийн 100 хэрэгсэл нэвтэрч байсан бол өнөөдөр 5000 зорчигч, зорчигч тээврийн 500 хэрэгсэл нэвтэрч, өдөрт 20 мянган хүнд үйлчлэх хүчин чадалтай болж, 24 цагаар ажиллах боломж бүрдсэн.

СЭРЭМЖЛҮҮЛЭГ: ХҮНД ӨВЧТЭЙ ХҮҮХЭД, ТЭДНИЙ ГЭР БҮЛИЙН ЗУРАГ, БИЧЛЭГ АШИГЛАН ХАНДИВ ГУЙХ ЯВДАЛ ГАРСААР БАЙНА

03 / 27 0 сэтгэгдэл 205 үзсэнe

Олон нийтийн цахим сүлжээнд хүнд өвчтэй хүүхэд, тэдний гэр бүлийн зураг, бичлэг, түүнчлэн гадаад улсын иргэн, хүүхдийн зураг мэдээллийг ашиглан бусдаас хандив, тусламж гуйх үйлдэл удаа дараа давтагдаж байна. Тухайлбал, цагдаагийн байгууллагад 23 настай, эмэгтэй, М гэгч нь “Мөнхзаяа” нарын нэртэй 5057645379, 5168373373, 5168634655, 5169107297, 5169641639, 5303137844, 5304191028, 5304314938, 5305028505, 5306303978 зэрэг банкны данс ашиглан энэ төрлийн залилах гэмт хэрэг үйлдсэн байж болзошгүй хэрэгт мөрдөн шалгах ажиллагаа явуулж байна. Иймд эх сурвалж тодорхой бус, баталгаагүй цахим хаягаас хандив тусламж хүссэн тохиолдолд анхаарал болгоомжтой байж, залилах төрлийн гэмт хэргээс урьдчилан сэргийлэхийг анхааруулж байна.

МОНГОЛ УЛСЫН ЕРӨНХИЙ САЙД АСАН “БОХИР” МӨНГӨӨР МАНХЭТТЭН ДҮҮРЭГТ ТАНСАГ СУУЦНУУД ХУДАЛДАЖ АВСНЫГ ТОГТООЖЭЭ

03 / 27 0 сэтгэгдэл 282 үзсэнe

Монгол улсын ерөнхий сайд асан эрхэм “бохир” мөнгөөр Нью-Йорк хотын Манхэттэн дүүрэгт тансаг ангиллын хоёр орон сууц худалдаж авсныг тогтоосноо АНУ-ын эрх баригчид өнөөдөр мэдээлжээ. Нийтдээ $14 саяын үнэ бүхий эдгээр үл хөдлөх хөрөнгийг хурааж авах хүсэлтийг прокурорууд шүүхэд гаргасан байна. Өмчийн эзэн нь 2009-2012 оны хооронд Монгол улсын ерөнхий сайдаар ажиллаж байсан С.Батболд болохыг мэдээлжээ. Томоохон уул уурхайн гэрээ байгуулсны шагналд түүний гэр бүлийн компани их хэмжээний мөнгө авсны дараа дээрх орон сууцнуудыг худалдаж авсан байна. Ерөнхий сайд асан дээрх дүгнэлтийг хүлээн зөвшөөрөхгүй байгаа ажээ. “Ноён Батболд эдгээр үндэслэлгүй нэхэмжлэлийн эсрэг өөрийгөө өмгөөлөх боломжтой шүүх хуралдааныг тэсэн ядан хүлээж байна” гэж түүний өмгөөлөгч Орин Снайдер хэвлэлд мэдэгдсэн байна. “Уул уурхайн гэрээнээс олсон олон сая долларыг хууль бус компаниудаар дамжуулан гэр бүлийнхээ тансаг амьдралыг санхүүжүүлсэн” гэж АНУ-ын холбооны прокурорууд дүгнэжээ. “Төрийн авлигаас хувьдаа ашиг хонжоо олсон Батболдын үйлдэл нь түүний удирдаж байсан хуулийг дээдлэгч ард иргэдийг хохироож байна” гэж Холбооны Мөрдөх Товчооны захирлын туслах Жэймс Смит дүгнэсэн байна. Батболдын төлөөний хүний нэр дээр бүртгэлтэй, уул уурхайн үйл ажиллагаа эрхэлж байсан ямар ч түүхгүй Catrison нэртэй компани томоохон гэрээ байгуулсны шагналд $68 саяыг авсныг шалгалтын явцад тогтоожээ. Уг компанийн цорын ганц захирал нь хэл шинжлэлийн багш хүн байсныг бас тогтоосон байна. Энэ мөнгөний тодорхой хэсгээр Манхэттэн дүүрэгт хоёр орон сууц худалдаж авсныг АНУ-ын эрх баригчид тогтоожээ. Орон сууцнуудын нэгд Батболдын ууган хүү амьдарч, шуудангийн хаягийг нь ашиглаж байсныг прокуроруудын шүүхэд гаргасан нэхэмжлэлд дурдсан байна. Одоогоор С.Батболдод ямар нэг ял төлөвлөөгүй ч хэрвээ шүүх прокурорын нэхэмжлэлийг үндэслэлтэй гэж үзвэл дээрх үл хөдлөх хөрөнгүүдийг улсын мэдэлд хурааж авах юм. Эх сурвалж: BBC

ХАН-УУЛ ДҮҮРЭГТ ХАМТРАН АМЬДРАГЧАА ХӨНӨӨГӨӨД ЦОГЦСЫН НЬ МӨЧИЛЖ, НОХОЙНД ХАЯЖ ӨГСӨН БАЙЖ БОЛЗОШГҮЙ ХЭРГИЙН ШҮҮХ ШИНЖИЛГЭЭНИЙ ДҮГНЭЛТ ГАРСАН БАЙНА

03 / 26 2 сэтгэгдэл 1 175 үзсэнe

Хан-уул дүүрэгт хамтран амьдрагчаа хөнөөгөөд цогцсын нь мөчилж, нохойнд хаяж өгсөн байж болзошгүй хэргийн шүүх шинжилгээний дүгнэлт гарсан байна. Шүүх шинжилгээний үндэсний үндэсний төвийн урьдчилсан дүгнэлтээр: “ нохойн үүрнээс олдсон яс нь сураггүй алга болсон иргэний буюу бүрлээч эмэгтэйн ээжийн ДНХ-тэй таарч байгаа нь тогтоогдоод байгаа” талаар мэдээлэл байна.

ЦАСАН БОЛОН ШОРООН ШУУРГАНЫ АЮУЛТ ҮЗЭГДЛЭЭС СЭРЭМЖЛҮҮЛЖ БАЙНА

03 / 26 0 сэтгэгдэл 126 үзсэнe

Өнөөдөр /2024.03.26/ үдээс хойшдоо Завхан аймагт цасан шуурга, Говь-Алтай, Баянхонгор аймагт хүчтэй шороон шуурга шуурна. Шөнөдөө Хөвсгөл, Булган, Архангай, Сэлэнгэ, Төв аймгийн нутагт цасан шуурганы аюулт үзэгдэлд хүрч шуурахаар байна. Мөн Өвөрхангай, Дундговьд хүчтэй шороон шуурга шуурч маргааш Хэнтий, Дорнод, Сүхбаатар аймагт эрч нь нэмэгдэж, ялангуяа Сүхбаатар аймагт гамшигт үзэгдлийн хэмжээнд хүрнэ. Учир нь салхины хурд Сүхбаатар аймагт секундэд 29 метр түүнээс дээш гарч болзошгүй. Тиймээс мэргэжлийн байгууллагаас өгч байгаа зөвлөгөө, мэдээллийг сайтар дагаж аюулгүй байдалдаа онцгойлон анхаарахыг зөвлөж байна.

Л.ОЮУН-ЭРДЭНЭ: БООМТЫН СЭРГЭЛТИЙН ДАРААГИЙН ҮЕ ШАТ ИННОВАЦИ ХИЙМЭЛ ОЮУН УХААНД ТУЛГУУРЛАХ ЁСТОЙ

03 / 26 0 сэтгэгдэл 99 үзсэнe

Монгол Улсын Ерөнхий сайд Л.Оюун-Эрдэнэ “Боомтын сэргэлт” үндэсний форумд оролцож үг хэллээ. Тэрбээр, “Шинэ сэргэлтийн бодлого”-оос амжилттай хэрэгжиж буй ажлуудын тэргүүн эгнээнд боомтын сэргэлттэй холбогдох ажлууд эрэмбэлэгдэж байна. Боомтын сэргэлтийн ажил амжилттай, үр дүнтэй байгаа нь Монгол Улсын эдийн засгийн сэргэлтэд ч хувь нэмрээ оруулж байна. 2023 онд Монгол Улсын дотоодын нийт бүтээгдэхүүн 68.9 их наяд төгрөг болон тэлж, нэг хүнд ногдох дотоодын нийт бүтээгдэхүүн анх удаа 5,678 ам.долларт хүрсэн. Мөн төлбөрийн тэнцэл 1.5 тэрбум ам.доллараар ашигтай гарч, төсвийн тэнцвэржүүлсэн орлого 1.2 их наяд төгрөгөөр даван биелсэн төдийгүй гадаад валютын албан нөөц 4.9 тэрбум ам.доллар болж нэмэгдсэнд боомтын сэргэлт чухал үүрэг гүйцэтгэсэн. Тухайлбал, боомтын хүчин чадлыг нэмэгдүүлж, биржийн худалдааг эхлүүлснээр Монгол Улс анх удаа Ковидын өмнөх үе буюу 2019 онд 36.6 сая тонн нүүрс экпортолж байсан үзүүлэлтээ ахиулж, 2023 онд 69.6 сая тонн нүүрс экспортоллоо” гэж хэллээ. Цаашид боомтын сэргэлтийн бодлого бүсчилсэн хөгжлийн бодлоготой уялдаатай хэрэгжинэ. Бүс бүр боомтоороо дамжуулан олон улсын худалдааны оролцогч байх шаардлагатай. Боомт дагасан хотуудыг бий болгохоор зорьж байна. Бүсчилсэн хөгжлийн бодлогын хүрээнд 2024 оноос аймгуудыг холбох тойрог замын ажлыг эхлүүлнэ. Мөн бүх боомтыг авто замаар холбоно. Боомтын сэргэлтийн дараагийн үе шат нь инноваци хиймэл оюун ухааныг хослуулах ёстой. Хүний оролцоог багасгаж боомтуудад инноваци хиймэл оюун ухааныг нэвтрүүлэх талаар өнөөдрийн форумаар ярилцах нь чухал гэдгийг Ерөнхий сайд онцлов. Өнгөрсөн гурван жилд боомтуудад хийсэн бүтээн байгуулалтын ажлаас танилцуулбал, Замын-Үүд боомтын зорчигч болон ачаа тээврийн цогцолборыг бүрэн ашиглалтад оруулж, олон улсын стандартад нийцүүллээ. Тус боомт ирэх дөрөвдүгээр сарын 1-нээс 24 цагаар ажилладаг болно. Гашуунсухайтын боомтын зорчигч ачаа тээврийн байгууламжийн ажил 61 хувийн гүйцэтгэлтэй байна. Алтанбулаг боомтын ачаа тээврийн байгууламжийн нэг, дөрөвдүгээр хэсгийг ашиглалтад оруулсан байна. Сүхбаатар боомтын нэг цэгийн үйлчилгээний байгууламжийн ажил дуусаж, улсын комисс хүлээн авчээ. Боршоо боомтын бүтээн байгуулалтын ажил дуусаж, Бичигт боомтын өргөтгөлийн ажил 2023 онд эхэлсэн. Энэ жил Цагааннуур, Булган, Хавирга боомтуудад инженерийн дэд бүтцийн ажил эхэлнэ. Ингэснээр боомтуудын хүчин чадал 2-3 дахин нэмэгдэнэ. Мөн Гашуунсухайт, Шивээхүрэн боомтод автомат удирдлагатай чингэлэг тээврийг ашиглалтад оруулаад байна. Өнгөрсөн гурван жилд Тавантолгой-Гашуунсухайт чиглэлийн 267 км, Тавантолгой-Зүүнбаян чиглэлийн 416 км, Зүүнбаян-Ханги чиглэлийн 226 км төмөр замыг ашиглалтад орууллаа" хэмээн онцоллоо.