МҮИС ОЮУТНУУДАА ЗОРИУЛАН СУРАЛЦАХ ХУГАЦААНДАА ЦАЛИНТАЙ АЖЛЫН БАЙРТАЙ, ХОС ДИПЛОМТОЙ ТӨГСӨХ ТӨСЛИЙГ ХЭРЭГЖҮҮЛЖ БАЙНА

06 / 24 0 сэтгэгдэл 574 үзсэнe

Монголын Үндэсний Их Сургууль нь 1998 онд байгуулагдсан цагаасаа хойш өдийг хүртэл боловсролын салбарт 24 дэх жилдээ тасралтгүй үйл ажиллагаа явуулж байна. Өнөөдрийн байдлаар Улс орон даяар ЭЕШ явагдаж байна. Тэгвэл Ерөнхий Боловсролын Сургууль төгсөгчид мэргэжил сонголт болоод ямар сургуульд элсэн суралцах гээд хамгийн хариуцлагатай шийдвэр гаргах цаг үедээ ирээд байгаа билээ. Энэ хүрээнд МҮИС-ийн ТУЗ-ийн дарга Л.Мөнхбаттай ярилцлаа. Өнөөдрийн байдлаар 13 салбар сургуульд олон улсад эрэлт хэрэгцээтэй хамгийн өндөр цалинтай төгсөөд шууд ажлын байранд гарах боломжтой 250 гаруй мэргэжлээр 15000 оюутан, 700 гаруй өндөр хөгжилтэй оронд докторын зэрэг хамгаалалсан багшлах боловсон хүчинтэйгээр "Олон улсын тэргүүлэх Их Сургууль" төслийг хэрэгжүүлэн ажиллаж байна Олон улсын тэргүүлэх их сургууль төсөл гэдэг бол Монголын боловсролын системийг хөгжингүй орнуудын болон Харвард, Стэнфордын их сургуулийн түвшинд хүргэх зорилготой төсөл юм. Уг төслийн хүрээнд МҮИС-ийн орчин нөхцөл болоод хичээлийн агуулга, мэргэжлийн нэршил нь хүртэл олон улсын стандартыг ханган ажиллаж байна. МҮИС-ийн багш сурган хүмүүжүүлэгч нар нь гадаадын өндөр хөгжилтэй орнуудад доктор, профессорын зэрэг хамгаалсан эрдэмтэд байдаг бөгөөд мөн Америк, Австрали, Герман, Япон, Солонгос зэрэг олон орны эрдэмтэд ч МҮИС-д ажилладаг билээ. Хос дипломийн тухайд, Монгол залуус маань гадаадад өндөр цалинтай ажил хийх сонирхолтой байдаг хэдий ч хэлний мэдлэггүй болон, мэргэжил таарахгүйгээс хар бор ажил хийдэг. Бид үүнд тулгуурлан үндсэн мэргэжлийнхээ хажуугаар Англи, Хятад, Солонгос, Япон, Герман гээд олон орны хэлний мэдлэгтэй болж Хос Дипломтой төгсөх боломжийг нээж өгч байгаа юм. 1000-СЕО төсөл бол маш чухал төсөл. Олон улсын тэргүүлэх сургуулиуд энэ л зарчмаар явдаг. Бид Монголдоо анх удаа энэ боломжийг оюутнууддаа олгохын тулд 10 жил бэлдэж, 100 гаруй тэрбумыг хөрөнгө оруулаад байна. Тодруулбал, 1000-СЕО төсөл нь оюутан байх хугацаандаа өөрийн гэсэн бизнес компанитай, үйлдвэртэй болж олон улсын түвшинд өрсөлдөхүйц хэмжээний удирдлагын ухаанд суралцсан оюунлаг Монгол иргэнийг зах зээлд бэлдэн гаргах гол зорилготой юм. Ийнхүү, Хонгконгд 100 мянган доллараар суралцдаг маркетинг, менежментийн сургалтыг нэгдүгээр курсд нь үнэ төлбөргүй зааж, амжилттай суралцсан тохиолдолд хоёрдугаар курсээсээ нэг сарын 100 мянган төгрөгийн цалинтай, компанийн захирал болон менежер гэсэн албан тушаалтай болж, гуравдугаар курсээсээ нэг сарын 200 мянга, дөрөвдүгээр курсээсээ нэг сарын 400 мянган төгрөгийн цалинтай, тухайн компанийн олсон ашгаас хувь хүртэх боломжтой болж өөрийн үйлдвэрээ сургуульд сурах хугацаандаа байгуулах маш том төслийг Монголдоо анх удаа хэрэгжүүлж буйгаараа онцлог юм.

ААЖУУ ЯВБАЛ АЯНДАА ХҮРНЭ ДЭЭ, УУСАН БОЛ БҮҮ ЖОЛООД АЯН ҮРГЭЛЖИЛЖ БАЙНА

06 / 24 0 сэтгэгдэл 485 үзсэнe

Энэ оны эхний 5 сарын байдлаар зам тээврийн ослын улмаас 486 гэмт хэрэг бүртгэгдсэнээс 195 эрдэнэт хүн амь насаа алдаж, үүнээс 43 хүн согтууруулах ундааны зүйл хэрэглэсэн үедээ тээврийн хэрэгсэл жолоодож амь насаараа хохирсон байна. Тээврийн цагдаагийн албанаас 2022.06.20-2022.09.15 хооронд Улсын хэмжээнд “Аажуу явбал аяндаа хүрнэ дээ” арга хэмжээ эхлүүлсэн бөгөөд Зам тээврийн осол, хэргийн улмаас иргэдийн амь нас, эд хөрөнгө хохироос урьдчилан сэргийлэх, хөдөлгөөнд оролцогчдын буруу дадал хандлагыг өөрчлөх, зөв үйлдэлд урилах, иргэдийн эрх зүйн мэдлэгийг дээшлүүлэх, сурталчилан таниулахад оршиж байна. Аян эхэлснээс хойш буюу 2022.06.20-ны өдрөөс 2022.06-23 өнөөдрийг хүртэл хугацаанд согтууруулах ундааны зүйл хэрэглэсэн үедээ тээврийн хэрэгсэл жолоодсон нийт 534 зөрчлийг илрүүлж болзошгүй зам тээврийн хэрэг ослоос урьдчилан сэргийлж ажилласан байна. Согтууруулах ундааны зүйл хэрэглэсэн үедээ авто машин жолоодох нь жолооч хурд хэтрүүлэх, гэрэл дохио болон өөдөөс ирэх саадыг анзаарахгүй, зогсоох арга хэмжээ авч чадахгүй, анхаарал төвлөрөхгүй байх зэргээр өөрийгөө хянах чадварт муугаар нөлөөлж ноцтой зам тээврийн осол гарах үндэс болдог. Архи согтууруулах ундаа нь авто машин жолоодож буй хүний оюун ухаан, жолоодох ур чадвар, самбаачлах хугацаа, оюун санаанд шууд нөлөөлдөг учрас согтолт их байх туссам эрсдэл нь өндөр байдаг байна. Иймд жолооч та өөрийн болон бусдын амь нас, эрүүл мэнд, эд хөрөнгөнд хохирол учрахаас урьдчилан сэргийлж, согтуугаар тээврийн хэрэгсэл жолоодохоос татгалзаж, замын хөдөлгөөнд оролцохдоо #хууль, #дүрмийг биелүүлж #соёлтой оролцохыг #уриалж байна. " ИРЭЭДҮЙГЭЭ ХАМГААЛЪЯ" № Он Согтуугаар тээврийн хэрэгсэл жолоодсон зөрчил Согтуугаар үйлдэгдсэн зам тээврийн осол Согтуу жолоочийн улмаас амь нас нь хохирсон хүний тоо 1 2017 он 30532 793 96 2 2018 он 32335 799 135 3 2019 он 34591 978 150 4 2020 он 26696 1103 112 5 2021 он 39428 1479 106 6 2022 оны эхний 5 сар 18599 541 43 Нийт 182181 5693 642

УЛААНБААТАР ХОТЫН ЦАХИМ ШИЛЖИЛТИЙГ МЭДЭЭЛЭЛ ТЕХНОЛОГИЙН ҮНДЭСНИЙ ТОМООХОН КОМПАНИУДТАЙ ХАМТРАН ХЭРЭГЖҮҮЛНЭ

06 / 24 0 сэтгэгдэл 387 үзсэнe

Нийслэлийн салбар бүрд мэдээлэл технологийн шийдлүүдийг ашиглан, иргэдийн ажиллаж, амьдрахад таатай ухаалаг хотыг бий болгоход нийслэлийн төрийн байгууллагууд үндэсний мэдээлэл технологийн 70 гаруй аж ахуйн нэгжтэй хамтран ажиллахаар боллоо. 2022-2024 онд хэрэгжүүлэх "Улаанбаатар хотын цахим шилжилт" нь төр, хувийн хэвшлийн хамтран хэрэгжүүлэх анхны томоохон төсөл бөгөөд технологийн шийдэл, төлөвлөгөөг өнөөдөр танилцуулсан юм. Энэ үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Төр болон хувийн хэвшлийн үйл ажиллагааг ил тод, нээлттэй явуулах хамгийн зөв хэлбэр бол цахим шилжилт. Улаанбаатар хот цахим шилжилт хийх цаг нь болсон. Дэлхийн томоохон хотууд цахим шилжилтийг хийж, хөгжиж байгаа. Ийм ч учраас дэлхийн хөгжилтэй хөл нийлүүлэн алхахын тулд Монгол Улсын нийгэм, эдийн засгийн томоохон төв болсон Улаанбаатар хот цахим шилжилт хийх ёстой. Монголд үйл ажиллагаа явуулж байгаа мэдээлэл технологийн томоохон 70 гаруй аж ахуйн нэгжтэй хамтран цахим шилжилтийг хийнэ. Энэ бүхэнд аж ахуйн нэгжүүдийн маань оролцоо чухал. Хиймэл оюун ухааны тусламжтай, хүний хүчин зүйлээс үл хамаарах зохицуулалтыг хамтран хэрэгжүүлнэ. Улаанбаатар хотод тулгамдаж байгаа олон асуудлыг шийдэх, төрийн бүтээмжийг нэмэгдүүлэх, авлигаас ангид, ил тод, нээлттэй үйл ажиллагаа явуулах боломж бүрдэх юм” хэмээлээ. “Нэг тархи-Нэгдсэн систем” төслийг Нийслэлийн Цахим хөгжил, мэдээллийн технологийн газрын дарга О.Чинзориг танилцуулав. Тэрбээр “2016 оноос эхлэн Улаанбаатар хотын төрийн үйлчилгээний цахим шилжилт төслийг эхлүүлсэн. Нийслэлээс үзүүлж буй төрийн үйлчилгээний чанар хүртээмжийг нэмэгдүүлэх, ил тод байдлыг хангах хүрээнд 2018 онд Нийслэлийн цахим үйлчилгээний E-SERVICE системийг хэрэглээнд нэвтрүүлсэн юм. Энэ нь нийслэлийн нутгийн захиргааны 20 байгууллагын 133 төрлийн үйлчилгээг цахимжуулсан нь одоогийн Төрийн цахим үйлчилгээний нэгдсэн портал E-Mongolia-ийн суурийг тавьсан томоохон төсөл болсон. Мөн UB ERP систем буюу төрийн албан хаагчийн нэгдсэн системээр дамжуулж 30 мянга гаруй төрийн албан хаагч үйл ажиллагаагаа түргэн шуурхай, хялбар байдлаар явуулж, зардал хэмнэх боломжтой болсон. E-Mongolia аппликейшнээр дамжуулж 10 сая гаруй үйлчилгээ үзүүлсэн байна. Монгол Улсын цахим үндэстэн болох зорилтыг нэгтгэж, 167 тэрбум орчим төгрөг хэмнэсэн тооцоо гарсан. Бид 2016 оноос хойш 26 төсөл, арга хэмжээг хийж хэрэгжүүлсэн” гэв. Ийнхүү дээрх цахим засаглалын суурь төслүүдэд үндэслэн үндэсний технологийн тэргүүлэгч 70 гаруй компанитай хамтран нийслэлийн бүх салбарт цахим шилжилтийг нэвтрүүлж, соёлтой шуурхай үйлчилгээтэй, иргэдийн ажиллаж амьдрахад таатай, аюулгүй ухаалаг хотыг бий болгох юм. Энэ хүрээнд 2022-2024 онд хэрэгжүүлэх төсөл нь Цахим засаглал, Зам тээврийн нэгдсэн ухаалаг систем, Аюулгүй хот гэсэн гурван бүлэг, 12 дэд төсөл, 27 арга хэмжээнээс бүрдэнэ. ЦАХИМ ЗАСАГЛАЛ ТӨСӨЛ Энэ хүрээнд нийслэлд бизнес эрхлэх үйл ажиллагааг хялбаршуулах, ил тод байдлыг хангахаар Онлайн бизнес төв төслийн Үйлчилгээ эрхлэх бүртгэлийн системийг энэ оны нэгдүгээр сарын 1-нээс хэрэглээнд нэвтрүүлж эхэлсэн. Ингэснээр дүүргүүдээс бизнес эрхлэгч иргэн, аж ахуй нэгж байгууллагад олгож буй зөвшөөрлийн шинжтэй 74 төрлийн үйлчилгээг цахимжуулж, үйлчилгээ эрхлэх хүсэлтээ цахимаар ирүүлж шийдвэрлүүлэх боломжийг бүрдүүлсэн юм. Энэхүү системд 126.504 иргэн, аж ахуй нэгж байгууллага хандаж 1311 иргэн, аж ахуй нэгж байгууллага хүсэлтээ шийдвэрлүүлж, үйл ажиллагаагаа эхэлсэн байна. Мөн төслийн 2-р шатанд нийслэлд барилга барихтай холбоотой үйл ажиллагаа эрхлэх үйлчилгээг энэ ондоо багтаан цахимжуулж, тус системд нэвтрүүлэхээр холбогдох тооцоо судалгааг хийж байна. ЗАМ, ТЭЭВРИЙН НЭГДСЭН УХААЛАГ СИСТЕМ ТӨСӨЛ Зам тээврийн харилцаанд хүн бүр оролцдог. Иймээс хамгийн түрүүнд зам, тээврийн харилцаанд оролцогч талуудын хэрэгцээ, шаардлагад нийцсэн цогц системийг бий болгохоор 2024 он хүртэл хэрэгжүүлэх долоон арга хэмжээ төлөвлөсөн. 2022 ондоо багтаан суурь өгөгдлийг цуглуулж, дүн шинжилгээ төлөвлөлт хийх боломжийг бүрдүүлэх радио давтамж тодорхойлох RFID төхөөрөмжийг нийслэлийн 138 уулзварт суурилуулах, Энхтайваны өргөн чөлөөний нэгдүгээр эгнээ болон томоохон уулзваруудын замын хөдөлгөөний хяналтын камерыг бүрэн шинэчлэх бэлтгэл ажлыг хангаад байна. Ингэснээр гэмт хэрэг, зөрчил багасна, замын хөдөлгөөнд оролцогчдын соёл дээшилнэ, мөргөлдсөн шүргэлцсэнээс үүдэлтэй цаг хугацаа алдах, зам дээр түгжрэл үүсгэх байдал арилах юм. Мөн радио давтамж тодорхойлох RFID төхөөрөмжийг гэрлэн дохионы удирдлагын систем, төлбөрийн систем зэрэг чиг үүргийн байгууллагын мэдээллийн системүүдтэй холбосноор нийслэлийн шалган нэвтрүүлэх товчоодоор орж, гарахад төлдөг төлбөрийн сонголтыг нэмэгдүүлэх, урьдчилсан болон дараа төлбөрт байдлаар төлөх боломж бий болох юм. Цаашлаад зам, тээвэртэй холбоотой чиг үүргийн байгууллагуудын мэдээлэл солилцох чадварыг сайжруулах, мэдээллийн систем, тоног төхөөрөмжийн нийлмэл бүхий “Удирдлагын төв”-ийг шинэчлэн байгуулахаар төлөвлөн, ухаалаг хотын үзүүлэлтээрээ дэлхийд тэргүүлдэг Сингапур зэрэг томоохон хотуудтай туршлага солилцон хамтран ажиллаж байна. АЮУЛГҮЙ ХОТ ТӨСӨЛ Телекамерын ухаалаг системд түшиглэсэн гэмт хэргээс урьдчилан сэргийлэх, нэгдсэн мэдээллийн системийн тогтолцоо бий болгож, чиг үүргийн байгууллагуудын уялдаа холбоог сайжруулж, мэдээлэл солилцох, дүн шинжилгээ хийх, шийдвэр гаргах хурдыг нэмэгдүүлж, нийслэлийн иргэдийн амьдрах, ая тухтай орчныг бүрдүүлэх, гэмт хэрэг зөрчлөөс урьдчилан сэргийлж аюулгүй хотыг бий болгоно. Тус төслийн хүрээнд 2020-2024 онд орчны теле хяналтын камерын чиглэлээр 2019 оны А/925 захирамжаар баталсан нийслэлд нэн шаардлагатай 5426 цэгт 13.944 камер суурилуулахаар төлөвлөөд байна.

ЭРЧИМ ХҮЧНИЙ ҮР АШГИЙГ ДЭЭШЛҮҮЛЭХ ТӨСЛИЙН ҮР ДҮНГ ХҮЛЭЭЛГЭН ӨГӨВ

06 / 23 0 сэтгэгдэл 340 үзсэнe

Германы Олон улсын хамтын ажиллагааны нийгэмлэг /GIZ/ нь “Монгол дахь барилга байгууламжийн эрчим хүчний үр ашгийг дээшлүүлэх нь” төслийн хүрээнд хэрэгжүүлсэн “Улаанбаатар хотын барилгын эрчим хүчний үр ашгийг дээшлүүлэх үйл ажиллагааны төлөвлөгөө” /LEEAP/ болон төслийнхөө үр дүнг хүлээлгэн өглөө. Тус төсөл нь эрчим хүч хэмнэх, агаарын бохирдлыг бууруулах, барилга байгууламжийн ашиглалтыг уртасгах, иргэдийн тав тухтай амьдрах орчныг нэмэгдүүлэх зэрэг олон талын ач холбогдолтой юм. Төслийн үр дүнг хүлээлгэн өгөх арга хэмжээг нээж Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ “Эрчим хүчний үр ашгийг дээшлүүлэх төслөөр гэр хорооллын 22 сургууль, цэцэрлэгийн засвар шинэчлэлийн ажил, хөрөнгө оруулалт, төлөвлөлтийг ил тод болгоход чиглэсэн болон эрчим хүчний үр ашгийг дээшлүүлэх төлөвлөлтийг бэхжүүлэх олон ажлыг хийж гүйцэтгэсэн. Мөн бодлогын түвшинд “Улаанбаатар хотын барилгын эрчим хүчний үр ашгийг дээшлүүлэх үйл ажиллагааны төлөвлөгөө”-г боловсруулсан нь чухал үр дүнтэй ажил болсныг онцлох нь зүйтэй юм. Цаашид төслийн хүрээнд олж авсан сайн туршлагад үндэслэн хөрөнгө оруулалтын ажлуудыг илүү нээлттэй, оновчтой болгож, эрчим хүчний хэмнэлтийг хэрэгжүүлж, үр ашгийг нэмэгдүүлэх ажлуудыг үргэлжлүүлэн хийж, хэрэгжүүлэх боломжтой гэж харж байна” хэмээв. Энэ үеэр Германы Олон улсын хамтын ажиллагааны нийгэмлэгийн “Монгол дахь барилга байгууламжийн эрчим хүчний үр ашгийг дээшлүүлэх нь” төслийн удирдагч Др.Дуняа Хоффман хэрэглэж буй эрчим хүчээ бууруулахын тулд барилга байгууламж, ялангуяа сургууль, цэцэрлэгүүдийн дулаан алдагдлыг багасгаж, цаашлаад эрчим хүчний ашиглалтыг бууруулах нь чухлыг хэлж байв. Мөн тэрбээр 2018 оноос төслийг амжилттай хэрэгжүүлж, үүний үр дүнд бий болсон бүтээгдэхүүн, төслийн үр дүнг албан ёсоор хүлээлгэн өгч байна гэдгийг онцоллоо. “Монгол дахь барилга байгууламжийн эрчим хүчний үр ашгийг дээшлүүлэх нь” төслийн бүрэлдэхүүн хэсгийн менежер С.Түвшинхүү “Хуучин системийн үед барьсан угсармал орон сууц, сургууль, цэцэрлэгийн эрчим хүчний хэрэглээ өнөөдрийн норм дүрмийн шаардлагаас даруй 2-3 дахин илүү байна. Иймд стандартад нийцүүлж, сэргээн засварлах, шинээр барьж буй барилга, байгууламжийг эрчим хүчний хэмнэлттэй болгох боломжийг туршиж, нэвтрүүлсэн. Барилга, байгууламжийг дулаалснаар ашиглалтын хугацааг мөн нэмэгдүүлдэг” гэв. Төслийн зорилт нь Улаанбаатар хотын барилгын эрчим хүчний үр ашгийг яаж сайжруулах вэ гэдэгт оршино. Төслийн үйл ажиллагааг олон нийтийн барилга буюу сургууль, цэцэрлэгүүд, угсармал орон сууц, амины орон сууц, шинэ барилга гэсэн дөрвөн хэсэгт хуваасан хэмээн Төслийн бүрэлдэхүүн хэсгийн менежер С.Цэцгээ ярилаа. Эрчим хүчний үр ашгийг дээшлүүлэх төслийн хүрээнд Улаанбаатар хотын гэр хорооллын 22 сургууль, цэцэрлэгийн засвар шинэчлэл, 26 амины орон сууцыг эрчим хүчний хэмнэлттэй стандартад нийцүүлэн сэргээн засварлах, иргэдийн төсвийн талаарх гарын авлага, цахим платформ, хөрөнгө оруулалтын гарын авлага, албан хаагчдын чадавхыг нэмэгдүүлэх зэрэг ажлыг хийж, хэрэгжүүлжээ. Түүнчлэн NAMA буюу Угсармал орон сууцны дулаан алдагдлыг бууруулах төслийг наймдугаар сард эхлүүлэхээр болжээ.

ЭКО АЖ ҮЙЛДВЭР БАЙГУУЛАХ ЗАМААР АЖЛЫН БАЙР НЭМЭГДҮҮЛЭХ ХЭЛЭЛЦҮҮЛЭГ БОЛЛОО

06 / 23 0 сэтгэгдэл 312 үзсэнe

НЗДТГ, “Эмээлт эко аж үйлдвэрийн парк” НӨААТҮГ хамтран “Арьс ширний салбарт ажлын байр нэмэгдүүлэх түлхүүр бодлого” уулзалт, хэлэлцүүлэг зохион байгууллаа. Тус уулзалт, хэлэлцүүлэг нь Монгол Улсад эко аж үйлдвэрийн парк байгуулах замаар ажлын байрыг нэмэгдүүлэхэд талуудын хамтын ажиллагааг уялдуулах, цаашид арьс ширний салбарт төр, хувийн хэвшлийн хамтын ажиллагааг өргөжүүлэх зорилготой юм. Хэлэлцүүлэгт Хүнс, хөдөө аж ахуй, хөнгөн үйлдвэрийн яам, Дэлхийн банк, Монголын арьс ширний үйлдвэрлэлийн холбоо, Ус сувгийн удирдах газар ОНӨААТҮГ болон арьс ширний салбарын үйлдвэр, аж ахуйн нэгж байгууллагуудын төлөөлөл оролцож, уг салбарт хийж, хэрэгжүүлж буй болон цаашид хэрэгжүүлэх ажлыг танилцуулан, тулгамдаж буй асуудлыг хэлэлцлээ. Тухайн салбарт хийж буй гол ажил нь иргэдийн эрүүл мэнд, аюулгүй байдлыг хангах, байгаль орчинд ээлтэй үйлдвэрүүдийн нэгдэл бий болгох зорилготой шинэ аж үйлдвэрийн парк байгуулах төсөл юм. “Эмээлт эко аж үйлдвэрийн парк”-ийг байгуулснаар нийт 8700 гаруй тогтвортой ажлын байр бий болно гэсэн судалгаа бий. Өнөөгийн байдлаар манай улсад арьс ширний 34 үйлдвэр үйл ажиллагаа явуулж байгаагаас 90 хувь нь нийслэлд байгаа юм. Иймд аж үйлдвэрийг нүүлгэж, дэлхий жишигт нийцсэн хөдөө аж ахуйн эко парк байгуулснаар ажлын байр нэмэгдэх, эдийн засгийн өрсөлдөх чадвар сайжрах, Улаанбаатар хотын төвлөрлийг сааруулах томоохон ач холбогдолтой. Түүнчлэн тухайн бүсэд хөнгөн үйлдвэр, хөдөө аж ахуй, мал аж ахуй, газар тариалан, ойн аж ахуй гэх мэт чиглэлээр үйл ажиллагаа өргөжин, хөгжих юм.

ХУД-Т БАРИГДАЖ БАЙСАН БАРИЛГЫН КРАН УНАЖ 20-36 НАСНЫ 2 ЭРЭГТЭЙ АМИА АЛДЛАА

06 / 22 0 сэтгэгдэл 767 үзсэнe

ХУД-ийн 18-р хороонд баригдаж байгаа байгууламж дээр ажиллаж байсан сунадаг автокран унасан гэх мэдээллийг 12.52 цагт Цагдаагийн байгууллагаас хүлээн авч шалгалтын ажиллагааг явуулсан байна. Бидэнд ирсэн мэдээллээр Тус барилга дээр ажиллаж байсан “Х” /эр, 36 настай/, “Б” /эр, 20 настай / нар нас барсан бөгөөд Хан-Уул дүүргийн Цагдаагийн 1 дүгээр хэлтэс шалгалтын ажиллагааг явуулж байна.

“ААЖУУ ЯВБАЛ АЯНДАА ХҮРНЭ ДЭЭ’ НЭГДСЭН АРГА ХЭМЖЭЭ ЭХЭЛЛЭЭ

06 / 21 0 сэтгэгдэл 210 үзсэнe

Өнөөдрөөс эхлэн зам тээврийн ослоос урьдчилан сэргийлэх чиглэлээр зохион байгуулагдах “Аажуу явбал аяндаа хүрнэ дээ’ нэгдсэн арга хэмжээ орон даяар эхэлж нээлтээ хийлээ. Энэ оны эхний 5 сарын байдлаар улсын хэмжээнд зам тээврийн ослын улмаас 195 хүний амь нас хохирч, 1087 хүн гэмтэж бэртсэнийг өмнөх оны мөн үеийнхтэй харьцуулахад хүний амь нас хохирсон тохиолдол 68,1 хувиар, гэмтсэн хүн 58,9 хувиар өссөн үзүүлэлттэй байна. Манай аймгийн хувьд энэ оны эхний 5 сарын байдлаар зам тээврийн осол хэрэг 98 бүртгэгдэж, осол хэргийн улмаас 18 хүний амь нас хохирсон нь өмнөх оноос нэг дахин өссөн байна. Иймд бид “Аажуу явбал аяндаа хүрнэ дээ арга хэмжээг орон нутагтаа үр дүнтэй зохион байгуулж, зам тээврийн ослын гаралтыг бууруулах, иргэдийн амь нас эрүүл мэндийг хамгаалах, ялангуяа бага насны хүүхдийг зам тээврийн осолд өртөхөөс хамгаалах ажлыг зохион байгуулж замын хөдөлгөөний аюулгүй байдлыг хангаж ажиллахыг төрийн болон төрийн бус байгууллагуудад даалгаж, иргэд, жолооч нар, эцэг эх, асран хамгаалагчид нэгдэж ажиллахыг тус нээлтийн үеэр уриаллаа.

ТӨРИЙН АЛБАНД АНХ ТОМИЛОГДСОН АЛБАН ХААГЧДЫГ ЧИГЛҮҮЛЭХ СУРГАЛТАД ХАМРУУЛЛАА

06 / 21 0 сэтгэгдэл 190 үзсэнe

Төрийн албаны тухай хуулийн хэрэгжилтийг хангах, Засгийн газрын 2019 оны “Сургалтын агуулга, хөтөлбөр батлах тухай” 299 дүгээр тогтоолын дагуу НЗДТГ Удирдлагын академитай сургалт, судалгаа шинжилгээ, зөвлөх үйлчилгээний чиглэлээр Хамтран ажиллах санамж бичиг байгуулсан. Энэ дагуу төрийн албанд анх томилогдсон албан хаагчийг чиглүүлэх сургалтыг НЗДТГ-ын Хүний нөөцийн хөгжлийн төв, Удирдлагын академи хамтран зохион байгуулж буй. Тэгвэл тус 40 цагийн сургалтыг хоёр дахь удаагаа зургадугаар сарын 7-17-ны хооронд амжилттай зохион байгууллаа. Сургалтад Нийслэлийн Засаг даргын эрхлэх асуудлын хүрээний хэрэгжүүлэгч агентлагууд, дүүргүүдийн ИТХ, ЗДТГ-ын нийт 77 албан хаагч амжилттай хамрагдаж, сертификатаа гардаж авсан юм.

ГАР ЗУРАГ, ГАР УРЛАЛ, ЗОХИОН БИЧЛЭГИЙН УРАЛДААНЫ ШИЛДГҮҮД ШАЛГАРЛАА

06 / 20 0 сэтгэгдэл 365 үзсэнe

НЗДТГ-ын дэмжлэгтэйгээр Хөгжлийн бэрхшээлтэй хүний эрхийг хангах Нийслэлийн салбар зөвлөл болон Нийслэлийн Нийгмийн халамжийн газар хамтран зохион байгуулсан гар зураг, гар урлал, зохион бичлэгийн уралдааны шилдгүүд өнөөдөр шагналаа гардлаа. Хөгжлийн бэрхшээлтэй хүүхдийн авьяас чадварыг хөгжүүлэх, бүтээлч хандлагыг нэмэгдүүлэх, нийгэмд эерэг хандлагыг бий болгох зорилготой энэхүү уралдааныг гурав дахь жилдээ зохион байгуулж байна. Энэ жил “Хүүхдийн ертөнц” гар зургийн уралдаан, “Миний мөрөөдөл” зохион бичлэгийн уралдаан, “Бүтээлч-БИ” гар бүтээлийн уралдаан гэсэн гурван төрөлд нийслэлийн есөн дүүргийн 250 хүүхэд оролцжээ. Үүнээс 20 хүүхэд шилдэг гурав болон тусгай байрт шалгарч, шагналаа гардан авлаа. Жил бүрийн Олон улсын хүүхдийн эрхийг хамгаалах өдөр болон Хөгжлийн бэрхшээлтэй иргэдийн эрхийг хамгаалах олон улсын өдрийг тохиолдуулан хүүхдүүдийн дунд зохион байгуулдаг тус уралдаанд 2019 онд 75 хүүхэд, 2021 онд 158 хүүхэд тус тус оролцож байв. НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

ЗАЛУУЧУУДЫН НЭГДСЭН ЗӨВЛӨГӨӨН БОЛЛОО

06 / 20 0 сэтгэгдэл 356 үзсэнe

Монголын залуучуудын холбоо /МЗХ/-ны 21 аймаг, Улаанбаатар хотын есөн дүүрэг, хороодын төлөөлөл буюу нийт 51 салбар холбоодын удирдлагууд оролцсон "Эв нэгдлээр манлайлъя" нэгдсэн зөвлөгөөн өнгөрсөн бямба гарагт боллоо. Тус зөвлөгөөнд Нийслэлийн Засаг дарга бөгөөд Улаанбаатар хотын Захирагч Д.Сумъяабазар оролцож, залуучуудын төлөөлөлтэй уулзсан юм. Энэ үеэр тэрбээр “МЗХ бол орчин цагийн Монгол Улсын хөгжилд чухал үүрэг гүйцэтгэсэн 100 гаруй жилийн түүхтэй томоохон байгууллага. Олон мянган сор болсон залуусыг эгнээндээ нэгтгэж, цаашдаа үйл ажиллагаа нь улам өргөжиж, улсын хөгжилд жин дараасай гэж би чин сэтгэлээсээ хүсэж байна. Залуучуудын холбоо бүс нутаг, дэлхийн хэмжээнд үйл ажиллагаагаа сурталчлан таниулсан, инновац, технологи болон бусад шийдлийг нэвтрүүлж чаддаг эрч хүчтэй залуусын байгууллага болоход Нийслэлийн Засаг даргын хувьд ямагт дэмжиж ажиллана. Улаанбаатар бол залуучуудын хот. Залуучуудаа дэмжих тал дээр Засаг даргын хувьд онцгойлон анхаарч ажиллаж байгаа. Хотын хөгжилд залуучуудын оролцоог нэмэгдүүлж, тэдний дэмжлэгийг авч ажиллах ёстой гэж боддог. Залуучуудын бодол, саналыг бид ойлгож мэддэг байх ёстой. Ингэж байж нийслэл Улаанбаатар хот орчин үеийн шийдэлд нийцсэн, хөгжлийн төлөө, инновац, технологийн эрин үетэй хөл нийлүүлсэн хот байна. Цаашид ухаалаг Улаанбаатар, дижитал Улаанбаатар, иргэндээ ээлтэй Улаанбаатар, сургууль, цэцэрлэгийн хүртээмжтэй, ногоон байгууламж бүхий, дэд бүтэц, инженерийн шийдэлтэй Улаанбаатар болгохын төлөө бүх хүчээ дайчлан залуучуудтайгаа хамтарч ажиллана” хэмээлээ. МЗХ-ны ерөнхийлөгч Б.Сэргэлэнбаатар “Зөвлөгөөнөөр холбоод алдаа, оноо, туршлагаа хэлэлцэж байна. Мөн цаашдын төлөвлөгөөгөө баталж байна. МЗХ сэргэх цаг нь болсон. Тус байгууллага залуучуудын эрх ашгийг хамгаалж, дуугарч асуудлуудыг шийддэг, төр засагтайгаа хамтран ажилладаг, алдаа, туршлагыг шүүмжилдэг. Нийслэлийн хэмжээнд залуучуудын дунд боловсрол, эрүүл мэнд, ажлын байрны асуудал тулгамдаж байна. Эдгээрийг өнөөдрийн үндсэн илтгэл дээр танилцуулж, хөтөлбөрийг баталлаа” гэв. МЗХ-ны удирдах зөвлөлийн гишүүн Ж.Нямаа “Үйл ажиллагаа нь доголдсон салбар холбоодын үйл ажиллагааг сэргээх, бүгд нэг бодлого, зорилготой, эвтэй цаашдын зорилгоо баталлаа. Мөн тодорхой шийдлүүд гаргасан чухал арга хэмжээ болж байна. Миний бие 2020 оны тавдугаар сарын 8-нд МЗХ-ны нийгмийн асуудал эрхэлсэн дэд ерөнхийлөгчөөр сонгогдсон. Удирдах зөвлөлд сонгогдсон ганц эмэгтэй байсан хэдий ч удирдах ажилтнуудын 30-аас дээш хувь нь эмэгтэй байх квотоо батлан, үүний дагуу ажиллаж байгаа. Залуу эмэгтэйчүүдээ улс төр, бизнесийн салбарт хэрхэн амжилт олох вэ гэдэгт илүү бодитой, судалгаатай ажиллах боломж нээгдэж байна” хэмээн ярьж байлаа. МЗХ-ны удирдах ажилтнууд тус зөвлөгөөнийг тодорхой шийдлүүд гарсан, төлөвлөгөөгөө баталсан үр дүнтэй боллоо гэдгийг онцолж байлаа.