“МОНГОЛИАН ЭЙРВЕЙС’’ КОМПАНИЙН НИСДЭГ ТЭРЭГ ОСОЛДЛОО

09 / 26 0 сэтгэгдэл 774 үзсэнe

“Монголиан эйрвейс” ХХК-ийн эзэмшлийн “Eurocopter AS350” загварын JU-6888 дугаартай нисдэг тэрэг Төв аймгийн Аргалант сумын нутагт өчигдөр үдээс өмнө осолджээ. Зарим эх сурвалж “Уг нисдэг тэрэг ослын буулт хийгээгүй. Осолдсон гэж хэлэхэд ч болно. Улаанбаатараас хөөрөөд Аргалант сумын нутаг дахь бөөгийн хөшөөний орчимд тариан талбайд нисдэг тэрэг осолдсон. Ийм байдалд орсон агаарын хөлгийг дахиж ашиглах боломжгүй болдог учраас осолдсон гэж хэлж байгаа юм” хэмээлээ. Харин твиттер дэх “The Юүхүү” хаягтай хэрэглэгчийн нийтэлсэн эл зургаас үзэхэд ослын буулт биш, осолдож, дахин ашиглах боломжгүй болсон нь тодорхой харагдаж байна. Нийслэлээс Өвөрхангай аймгийн чиглэлд нисэж байсан эл нисдэг тэргэнд дөрвөн хүн зорчиж явсан гэнэ. Нисдэг тэрэгний сэнс гацсанаас ослын буулт хийсэн, нисгэгч болон зорчигчид гэмтэж бэртээгүй гэж цагдаагийн байгууллагынхан мэдээлсэн юм. Цагдаагийн болон ЗТХЯ-ны харьяанд байдаг Нислэг-техникийн осол, зөрчлийг шинжлэн шалгах албаныхан тухайн газарт ажиллаж, шалтгаан нөхцөлийг тогтоохоор үзлэг хийсэн байна. Уг нисдэг тэргээр Өвөрхангай аймгийн Хужирт сум дахь нисдэг тэрэгний зогсоолд техникийн үзлэг, засвар, үйлчилгээ хийх хүмүүс зорчиж явсан гэх мэдээлэл бий. “Дайны эрсдэлийн даатгал” нэрээр мөнгө угаасан хэрэгт холбогдож, ял шийтгүүлж байсан МИАТ-ийн захирал асан Ч.Хоролсүрэнгийн үүсгэн байгуулсан, түүний ах, дүү нарын нэг нь захирлаар нь ажилладаг “Монголиан эйрвейс” ХХК-ийн агаарын хөлгүүд нэг бус удаа зөрчил гаргаж байсан билээ.

Ч.МӨНХБАЯРТ ОНООСОН 10 ЖИЛИЙН ЯЛЫГ ХЭВЭЭР ҮЛДЭЭЖЭЭ

09 / 23 0 сэтгэгдэл 353 үзсэнe

“Өмнөд монголчуудын соёлын холбоо”, “Монгол хүн монгол хүндээ тусалъя” зэрэг төрийн бус байгууллагын тэргүүнээр ажилладаг Ч.Мөнхбаяр, түүний өмгөөлөгч нарын гаргасан гомдлын дагуу нийслэлийн Эрүүгийн хэргийн давж заалдах шатны шүүх энэ сарын 20, 21-нд хэргийг төрийн болон албаны нууцтай холбоотой үндэслэлээр хаалттай хянан хэлэлцлээ. Уг хэрэгт Тагнуулын ерөнхий газрын мөрдөгчид мөрдөн шалгах ажиллагаа явуулж, НПГ-аас Эрүүгийн хуулийн 19.4-1 дэх хэсэгт заасан “Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан” хэмээн яллах дүгнэлт үйлдэж хэргийг шүүхэд шилжүүлсэн юм. Сүхбаатар дүүргийн Эрүүгийн хэргийн анхан шатны шүүхээс түүнд холбогдох хэргийг өнгөрсөн зургадугаар сарын 28-нд хэлэлцээд гадаадын тагнуулын байгууллагын үүрэг даалгавар, санхүүжилтээр үйл ажиллагаа явуулж, хамтран ажилласан гэм буруутайд тооцож нээлттэй хорих ангид 10 жил ял эдлүүлэхээр шийдвэрлэсэн.Шүүгдэгч Ч.Мөнхбаяр, түүний өмгөөлөгч Г.Баасан, А.Батдорж нар давж заалдах гомдолдоо “Тагнуулын байгууллага хуурамч нотлох баримт бүрдүүлсэн” хэмээсэн ч тэр нь үндэслэл бүхий байгаагүй учраас тэдний гомдлыг хэрэгсэхгүй болгосон байна. Ингэснээр анхан шатны шүүхээс Ч.Мөнхбаярт оноосон ял гэм бурууд нь тохирсон гэж шүүх бүрэлдэхүүн үзжээ.

УЛСЫН БҮРТГЭГЧ НАР ХУУЛЬ ЗӨРЧСӨӨР

09 / 23 0 сэтгэгдэл 539 үзсэнe

Улсын бүртгэлийн байгууллагын зарим бүртгэгч, албан тушаалтны хууль зөрчсөн хуумгай үйлдлээс болж тухайн салбарт ажиллаж буй нийт ажилтны нэр хүнд сэвтэж байна. УБЕГ-ын харьяа нийслэлийн дүүргүүд дэх Улсын бүртгэлийн хэлтсийн улсын бүртгэгч нараас цөөнгүй хүн эрүүгийн хэрэгт холбогдож, АТГ-ын үүдийг сахиж, зарим шүүхээр гэм буруутай, эсэхээ дэнслүүлэхээр болоод буй юм. Олон нийтийн мэдээллийн хэрэгслээр тус газрын Хуулийн этгээдийн бүртгэлийн газрын ахлах бүртгэгч Ж.Нямдорж, Хяналт, шалгалтын газрын улсын байцаагч Д.Чинтулга нарыг АН-ын тамга, тэмдэгтэй холбоотой үйлдэлд шалгаж эхэлсэн хэмээн мэдээлээд буй. Түүнчлэн “Алтандорнод Монгол” ХХК-ийн ерөнхий захирал Т.Ганболд, гэргий Х.Янжингаажид нарын гэрлэлтийн бүртгэлийг хууль бусаар хийсэн байж болзошгүй үйлдэлд тус газрын ажилтнуудыг ч холбогдуулан шалгаж байгаа билээ. Тэгвэл улсын бүртгэгч нартай холбоотой өөр цөөнгүй хууль бус үйлдлийг АТГ-ынхан шалгасан байна. Тухайлбал, Чингэлтэй дүүргийн улсын бүртгэлийн хэлтсийн улсын бүртгэгч Б.Золзаяа нь УБЕГ-ын Иргэний бүртгэлийн газрын гадаадад зорчих эрхийн бүртгэлийн улсын бүртгэгчийн албан үүргийг түр орлон гүйцэтгэгчээр ажиллаж байхдаа эрх мэдлээ урвуулж, хийх ёсгүй үйлдэл хийснийг АТГ-ын мөрдөгчид тогтоосон аж. Улмаар НПГ-аас Эрүүгийн хуулийн 22.1 дэх хэсэгт заасан эрх мэдэл, албан тушаалын байдлаа урвуулсан үндэслэлээр яллах дүгнэлт үйлдэн Сүхбаатар дүүргийн Эрүүгийн хэргийн анхан шатны шүүхэд шилжүүлээд байна. Тэрбээр хэрэг нь шүүх, прокурорын байгууллагад шилжсэнтэй холбоотойгоос уу, өөр шалтгаан байсан уу, ажлаасаа түр гарсан гэнэ. Тодруулбал, БНСУ-д ажиллаж, амьдарч байсан иргэн энгийн гадаад паспорт хүссэн мэдүүлэг бөглөж өгсөн аж. Уг нь Засгийн газрын 2016 оны 126 дугаар тогтоолын хавсралтаар баталсан журамд зааснаар Монгол Улсын иргэн энгийн гадаад паспорт авах хүсэлтээ биечлэн гаргахаар заасан байдаг. Харин Б.Золзаяа нь уг заалтыг зөрчиж, гүйцэтгэх ёсгүй үйлдлийг хийхийн тулд хахууль авсан хэрэгт холбогджээ. Зөвхөн мөрдөн шалгах ажиллагаагаар тогтоогдсон нь л энэ аж. Түүнээс биш өөр үйлдлүүд ч байж болзошгүй гэх мэдээлэл бий. Ийм байдлаар гадаад паспортын олон материал авч, олгосон байж болзошгүй гэсэн хардлага байдаг юм билээ. 2017 оноос Чингэлтэй дүүргийн Улсын бүртгэлийн хэлтсийн улсын бүртгэгчээр ажиллахдаа дандаа гадаад паспортын бүртгэл хийсэн нь өөр ийм хэрэг өдүүлсэн байж болзошгүй гэсэн хардлага дагуулдаг аж. Гадаад паспорт бүртгэж, олгодог албан тушаалтнуудтай холбоотой өөр нэг хэргийг Баянгол дүүргийн Эрүүгийн хэргийн анхан шатны шүүх өнгөрсөн долоо хоногт хэлэлцээд 60 хоногийн дотор нэмэлт ажиллагаа хийлгэхээр прокурорын хяналтад буцаасан байна. Баянгол дүүргийн Улсын бүртгэлийн хэлтсийн улсын бүртгэгч Г.Ган-Утас, хороо хариуцсан бүртгэгчээр ажиллаж байсан С.Энхчимэг нар Монгол Улсад байхгүй В.Алтангэрэл гэх хүний гадаад паспорт гаргуулах хүсэлтийг авч, олгосон хэрэгт холбогдсон юм. Уг хоёр ажилтанд прокуророос албан тушаалаа урвуулж, бусдад давуу байдал бий болгосон хэмээн яллах дүгнэлт үйлдэн шүүхэд шилжүүлээд байсан юм. Дээрх бүртгэгч нараас гадна саяхан УБЕГ-таа шилжин албан тушаалд томилогдсон Мөнхтогтох гэдэг хүнтэй холбоотой үйлдлийг АТГ-ынхан шалгаж байна. Баянгол дүүргийн нутаг, Гандангийн дэнж орчмын өмчлөх эрхийн гэрчилгээтэй газрыг зам барина хэмээн улсын мэдэлд авч, өмчлөгч иргэнд нь нөхөн олговор өгсөн аж. Гэвч зам бариад үлдсэн хэсэг нь эзэнгүй болмогц дээрх Мөнхтогтох гэх албан тушаалтан гэрчилгээ гарган зарсан, мөн хээл хахууль авсан байж болзошгүй гэх хэрэгт холбогдон шалгуулж буй юм билээ.

СЭРЭМЖЛҮҮЛЭГ:”UPPER HOUSE RESIDENCE’’-Д ОРОН СУУЦ ХУДАЛДАН АВБАЛ ҮЛ ХӨДЛӨХ ХӨРӨНГИЙН ГЭРЧИЛГЭЭ ГАРАХГҮЙ !!!

09 / 23 1 сэтгэгдэл 1 434 үзсэнe

Хан-Уул дүүргийн 11 хорооны нутаг дэвсгэрт байрлах таны харж байгаа энэ барилга бол “Global residence нэртэй орон сууцны хотхон. Харин газрын зөвшөөрөл нь “Аялал жуулчлалын цогцолбор, сургалтын төв гэсэн зориулалтаар гарсан юм билээ. Өөрөөр хэлбэл тусгай хамгаалалттай газар нутагт орон сууц барих зөвшөөрөл олгодоггүй. Гэсэн ч аялал жуулчлал, худалдаа үйлчилгээний зориулалтаар зураг төслөө батлуулаад өдгөө 20 давхар 98 айлын орон сууц баригджээ. Та бидний бурхантай хөшөөний хажуууханд ч гэсэн мөн л ийм жишгээр барилга баригдсан. Тодруулбал, Хан-Уул дүүргийн 11 хороонд байрлах “Upper House residence” ч гэсэн мөн л аялал жуулчлалын зориулалтаар газраа аваад орон сууц болсон. Одоо ашиглалтад оруулаад өндөр зэрэглэлийн орон сууцаа иргэдэд худалдаалаад эхэлжээ. Хэдийгээр тус барилгуудыг улсын комисс хүлээж авсан ч оршин суугчид нь байрны ордер буюу Үл хөдлөх хөрөнгийн гэрчилгээгээ авч чадаагүй байгаа. Учир нь тус барилга орон сууцны зориулалттай бус “Аялал жуулчлалын цогцолбор” барих зөвшөөрөлтэй байгаатай холбоотой. Тиймээс газрын зөвшөөрлийг өөрчлөх хүртэл иргэд байрны гэрчилгээгээ авах боломжгүй. Барилгыг барьсан Бату констракшн нэг бол газрын зориулалтыг өөрчилж, орон сууц болгохгүй л бол тус байрны оршин суугчид хэзээ ч гэрчилгээгээ авч чадахгүй. Хамгийн ноцтой нь дээрх “хууль бус” хоёр орон сууцны барилгын ард МАН-ын нөлөө бүхий эрхэм, хүүтэйгээ хамт байгаа гэх мэдээлэл бий. Тэд эрх мэдэл, албан тушаал, танил талаа ашиглан ийнхүү орон сууц барьж түрийвчээ түнтийлгээд амжсан аж. Тэгвэл газрыг зориулалтын бусаар ашиглаж байгаа нь өөрөө гэмт хэргийн шинжтэй үйлдэл бөгөөд хяналт шалгалт хийх эрх нь МХЕГ-т, АТГ-т хандах эрх нь БОАЖ-ийн сайдад бий. Төрийн албанд байгаа баримт бичгүүдээр бол Зайсанд аялал жуулчлалын зориулалттай цогцолборууд баригдах ёстой байсан ч өнөөдөр бол битүү орон сууц болсон билээ. Өөрөөр хэлбэл Зайсанд зөвхөн цаасан дээр л аялал жуулчлалын цогцолбор сүндэрлэсэн, харин бодит байдал дээр битүү LUXURY орон сууцнууд л харагдаж байгааг олон нийт харж байгаа. Тиймээс газрыг зориулaлтын бусаар ашиглаж байгаа энэ үйлдэлд МХЕГ, Байгаль орчин, аялал жуулчлалын сайд анхаарч, хууль хяналтын байгууллагад хандах эсэхийг бид дараагийн цувралд хөндөх болно. Мөн дараагийн цувралуудаар бид энэхүү орон сууц, газрын маргааны улмаас Гадаадын болон дотоодын Хөрөнгө оруулагч иргэд хэрхэн хохирч байгаа талаар болон хэргийн эзэн Бату Констракшны ард МАН-ын нөлөө бүхий эрхэм, дэд сайдын албан тушаалтай хүүгийнхээ хамт байгаа талаар баримттайгаар хүргэсээр байх болно. А.Баярмаа

ЭХЭМҮТ-Д ТӨРСӨН ЭЭЖ ГЭРЭЭСЭЭ ШӨЛ АВАХ ШААРДЛАГАГҮЙ БОЛЛОО

09 / 23 0 сэтгэгдэл 504 үзсэнe

Амаржсан, төрсөн ээжид шинэ шөл уулгаж биеийг нь тэнхрүүлдэг Монгол уламжлал бий. Энэ уламжлалын дагуу төрсөн эхийн ар гэрийнхэн нь эмнэлгийн гадаа, машины тээшинд шөл хийх явдал түгээмэл болсон. Нэг талаар энэ нь шинэ хоол байж болох ч нөгөө талаар эхийн халдвар хамгаалал, аюулгүй байдлын хувьд өндөр эрсдэлтэйд тооцогддог. Иймээс ЭХЭМҮТ шинэ хонины махаар хийсэн хар шөл, цайг төрөх өрөөнд хүргэдэг үйлчилгээг нэвтрүүллээ. Захиалгын хувьд шөл сонголтгүй, цай нь сүүтэй сүүгүй гэсэн хоёр сонголттойгоор төрсөн ээжид эмнэлгийн гал тогооноос шууд хүрч байна. Ингэхдээ захиалга авсан тогооч өөрөө шөл, цайгаа бэлтгэн мөн өөрийн биеэр төрөх тасаг руу хүргэж өгнө гэв. Захиалгыг өглөө 07:30-19:30 цагийн хооронд авна.

ШҮҮХЭЭС ОРГОСОН СЭЖИГТЭН ЦАГДАН ХОРИХ БАЙРАНД УЧИР БИТҮҮЛГЭЭР НАС БАРЖЭЭ

09 / 23 2 сэтгэгдэл 815 үзсэнe

Сэлэнгэ аймгийн Мандал сум буюу олны нэрлэж заншсанаар Зүүнхараа дахь ШШГЕГ-ын харьяа нээлттэй, хаалттай хорих 413 дугаар ангийн Цагдан хорих байранд саатуулагдаж байсан хүн энэ сарын 22-ны 19.00 цагийн үед учир битүүлгээр нас баржээ. Дээрх сумд оршин суудаг 36 настай У гэх залуу шүүхээр хэргийг нь хэлэлцэх гэж байх үед оргосон юм байна. Тиймээс шүүхээс түүнийг цагдан хорих захирамж гаргаж, дээрх хорих ангид хүргэн саатуулсан аж. Түүнийг хоригдож байх үед хэн нэгэн өрөөнд нь ороогүй, ухаан алдаж таталт өгч байгаа дүрс бичлэг нь хяналтын камерт үлдсэн гэдгийг орон нутгийн эх сурвалжууд мэдээллээ. Зүүнхараа дахь ШШГЕГ-ын харьяа нээлттэй, хаалттай хорих 413 дугаар ангиас наймдугаар сарын 29-нд Б.Баянбаатар гэх 29 настай хүмүүжигч оргосон билээ. Түүнийг есдүгээр сарын 2-ны 09.30 цагийн үед Мандал сумын нутаг, Нурамт гэх газраас цагдаагийн ажилтнууд олж саатуулсан юм. Хулгайн хэрэгт ял шийтгүүлсэн тэрбээр замаасаа айлаас морь хулгайлж унасан нь ч мөрдөн байцаалтаар тогтоогдсон. Хорих ангиудаас хүмүүжигч нар оргосон асуудлыг ШШГЕГ-ын удирдлага хэлэлцэж байхтай зэрэгцээд цагдан хоригдсон хүн учир битүүлгээр нас барсныг тус газрын удирдлага анхааралдаа авсан биз ээ.

ДАРХАНЫ ЗАМЫН БҮТЭЭН БАЙГУУЛАЛТЫГ ГАЦААСАН ХЭРЭГТ ХОЛБОГДОГЧДЫГ СААТУУЛЖ ЭХЭЛЛЭЭ

09 / 23 0 сэтгэгдэл 750 үзсэнe

Улаанбаатар-Дархан чиглэлийн автозамын бүтээн байгуулалтын тендерийг анх шалгаруулахад оролцсон ЗТХЯ болон бусад байгууллагын албан тушаалтнуудыг АТГ-ынхан шалгаж эхэлсэн билээ. Тодруулбал, уг замыг барих сонгон шалгаруулалтыг хариуцаж байсан тухайн үеийн сайд, яамны мэргэжилтнүүд, Автозамын газрынхан гээд нэлээд хэдэн хүнээс тайлбар мэдүүлэг авч буй. Энэ хүрээнд өчигдөр З.Буяннэмэх гэх залууг албадан саатууллаа. Ажиллах хүч, техник тоног төхөөрөмжгүй, зам барих туршлагагүй БНХАУ-ын аж ахуйн нэгжүүдийг тендерт шалгаруулахад нөлөөлж, хээл хахууль зуучилсан байж болзошгүй гэх хэрэгт түүнийг сэжиглэн цагдан хорьсныг хэд хэдэн эх сурвалж мэдээллээ. Тэрбээр тухайн үеийн ЗТХЯ-ны Төрийн нарийн бичгийн дарга С.Батболдтой ойр дотно харилцдаг нэгэн учраас Тендерийн хороонд нөлөөлсөн байж болзошгүй гэж тус яамны нэрээ хэлэхийг хүсээгүй нэг бус хүн өгүүлсэн юм. Тодруулбал, БНХАУ-ын хөрөнгө оруулалттай аж ахуйн нэгж болох “Чайна гео инженеринг корпорац” компанийг тендерийн шаардлага хангаагүй байхад З.Буяннэмэх Тендерийн хорооныхонд нөлөөлснөөр ЗТХЯ-ны эрх бүхий албан тушаалтнууд дээрх эл аж ахуйн нэгжид давуу байдал олгосон гэнэ. “Чайна гео инженеринг корпорац” ХХК нь Өндөрхөөн-Чойбалсан чиглэлийн хатуу хучилттай 50 км зам барих тендерт шалгарсан ч гэрээгээр хүлээсэн үүргээ гүйцэтгээгүйн улмаас төрд 10.9 тэрбум гаруй төгрөгийн хохирол учруулсан байдаг. ЗТХЯ-наас уг аж ахуйн нэгжийн эсрэг зарга мэдүүлж, маргаан нь шүүхээр эцэслэн шийдвэрлэгдээгүй байхад З.Буяннэмэх тэргүүтний оролцоотойгоор Дарханы замын бүтээн байгуулалтад оролцох тендерт шалгарсан аж. Ингэхдээ ЗТХЯ-ны эрх бүхий албан тушаалтнууд сонгон шалгаруулалтын баримт бичгийг өөрчлөн шүүх, арбитрын маргаантай оролцогчийг шалгаруулахгүй байх заалтыг нь хасаж байгаад “Чайна гео инженеринг корпорац” компанийг ялуулсан гэнэ. Уг компани нь Улаанбаатар-Дархан чиглэлийн замын дөрөвдүгээр багц буюу Сүмбэрийн уулзвараас Цайдамын хөндий хүртэлх 45.08 км авто замыг барихаар болсон ч ажлаа төдийлөн үр дүнтэй гүйцэтгээгүй, удаашралтай байгаа нь ийнхүү хууль сахиулах байгууллагынханд шалгуулах үндэслэл болсон юм.

ТАМХИ БА ХҮҮХЭД

09 / 23 0 сэтгэгдэл 918 үзсэнe

Бид XXI зуунд, 2022 онд амьдарч байна. Бидний амьдарч буй нийгэмд маш олон асуудлууд шийдэгдэж чадахгүй мухарлагдаж байгаагийн учир юу вэ? Бидний цөөхөн Монголчуудад арга заль нь дэндсэн ПОП улс төрчдөөс илүүтэй эрдэмтэд, инженерүүд, физикч, архитектур нар үнэхээр үгүйлэгдэж байна. Өнөөдөр дэлхийд 1,3 тэрбум хүн тамхи хэрэглэж, хорт хавдраар өвчилж, мөн 8 сая орчим хүн тамхины хамааралтай өвчлөлөөр нас барж байна. Гэтэл үүнээс гарах арга зам алга гэдэгтэй эвлэрсээр байх уу? Машин, техник хэрэглээн дээр тулгуурлан асар богино хугацаанд шийдлүүд нь хувьсан өөрчлөгдөж байгаад хүн бүр итгэдэг ч тамхины хор уршиг, хорт зуршлаас салах арга зам нь цахилгаан тамхи гэдгийг Англи улсын Засгийн газар, эрүүл мэндийн яам нь нуулгүй зарлаж, тамхины хорт зуршлаас салах гэж байгаа хүмүүст цахилгаан тамхийг санал болгож, үр дүнд хүрч байгаад яагаад итгэхгүй байна вэ? Аан тийм, учир нь тамхины компаниудийн цахилгаан тамхины эсрэг ПР үүнд нөлөөлж байгаа юм. Тэгвэл Англи улсын засгийн газар, Эрүүл мэндийн яам үр дүнтэй тамхинаас гаргах аргыг хэрэглэхээсээ өмнө ямар нэг гар зургийн үзэсгэлэн гаргуулж хориглож, хааж, боож байгаагүй юм. Тэд судалж, шинжилж, баримт нотолгоог эрэлхийлж, хайж үүний үр дүнд цахилгаан тамхийг янжуур тамхины хорт зуршлаас салах гэж зорьж байгаа хүмүүст хэрэглэх нь зөв юм байна хэмээн үзэж байна. Гэтэл манай улс үүний эсрэг байр суурин дээр зогсож тамхины хор уршгийг тайлбарлаж ойлгуулах гэхээсээ илүүтэй тамхины хор уршгийн тухай сэдэвлэн гар зургийн уралдааныг насанд хүрээгүй хүүхдүүдийн дунд зохиож байгаа нь тэднийг ашиглаж байгаатай ижил. Үүний үр дүнд тамхи гэдэг нь томчуудын хэрэглээ юм байна, том болохоороо хэрэглэж үзнэ гэсэн нууцхан сэдлийг хүүхдүүдийн бодол санаанд хөндөөд орхиж байгаа нь харин ч эсрэгээрээ хор уршигтай. Олон улсад энэ арга бол туйлын буруу гэдгийг олон жилийн өмнө баталсан. Тэр тусмаа хүүхдүүдээр үүнийг хийлгэж байгаа нь ирээдүйд тамхины том компаниудын хэрэглэгчдийг бэлдэж өгч байгаатай агаар нэг гэж үздэгтэй холбоотой. Нийгэмд санаатайгаар гулгуулж байгаа олон буруу зөрүү мэдээллийн үр дүнд хэн хохирч болох вэ? Бид л хохирно шүү дээ. Тамхины бизнесийн эзэд бол хэзээ ч хохирохгүй, учир нь тэдний мөнгө их, хүч их. Тэд аймгийн засаг дарга, эрүүл мэндийн газрыг хүчээр хөдөлгөж өөрсдийн бизнесээ хүчээр хамгаалж үлдэхийн тулд юу ч бичүүлж, яриулахаас ухрахгүй. Эцэст нь хэлэхэд судалгаа нотолгоон дээр үндэслэж хийгдсэн мэдээлэлд итгэж, хөгжлөөрөө олон жилээр урд яваа Англи, Шинэ Зеланд, Франц зэрэг орнууд иргэдээ тамхины хорт зуршлаас татгалзахад санал болгож байгаа цахилгаан тамхины бодит жишээг олж уншиж өөрийн мэдлэгтээ нэмэрлээсэй гэж хүсч байна.

ИРГЭНИЙ БОЛОН ЖОЛООНЫ ҮНЭМЛЭХ ЗЭРЭГ 74 БИЧИГ БАРИМТЫГ НОТАРИАТААР ГЭРЧЛҮҮЛЭХ ШААРДЛАГАГҮЙ БОЛЛОО

09 / 21 0 сэтгэгдэл 463 үзсэнe

Цахим хөгжим, харилцаа холбооны яам болон Монголын Нотариатчидын танхим хамтран төрийн үйлчилгээний нэгдсэн систем буюу "И-Монголиа"-гаар дамжуулан авах боломжтой лавлагаа, тодорхойлолтыг нотариатаар гэрчлүүлэхийг шаардахгүй байх тухай санамж бичигт өнөөдөр /2022.09.21/ гарын үсэг зурлаа. Энэхүү санамж бичгийн хүрээнд иргэний үнэмлэх, жолооны үнэмлэх, төрсний гэрчилгээ, гэрлэлтийн баталгаа, нас барсны гэрчилгээ, оршин суугаа хаягийн тодорхойлолт, нийгмийн даатгалын шимтгэл төлөлт зэрэг 74 нэр төрлийн лавлагаа, тодорхойлолтыг нотариатаар баталгаажуулах шаардлаггүй болж байгаа юм. Тус үйлчилгээг нэвтрүүлснээр цахимаар нотариатын үйлдэл хийх платформыг хөгжүүлэх, тоон гарын үсгээр иргэн, хуулийн этгээдийн хувийн байдлыг тогтоож, баталгаажуулан үйлчилгээ үзүүлэх нөхцөлийг бүрдүүлэх, нотариатын үйлдэл хийхэд нийтийн мэдээллийн дэд бүтцийг ашиглах зэрэг иргэдийн өргөдөл гомдол нийтлэг төвлөрдөг нотариаттай холбоотой асуудлууд цэгцрэнэ хэмээн албаныхан онцолж байна.

ХҮҮХДИЙН НҮДНИЙ ЭРҮҮЛ МЭНД БА ЭРТ ИЛРҮҮЛЭГ

09 / 21 0 сэтгэгдэл 1 574 үзсэнe

Монгол Улсын Засгийн газар, Эрүүл мэндийн яамнаас хүн амын нас, эрүүл мэндийн эрсдэлд суурилсан, зонхилон тохиолдох халдварт болон халдварт бус өвчнөөс урьдчилан сэргийлэх, эрт илрүүлэх үзлэг шинжилгээ, оношилгоог зохион байгуулах үйл ажиллагааны хүрээнд 1366 эмч, эмнэлгийн мэргэжилтэн “Хүүхдийн хараа шалгах арга” сургалтад хамрагдаж, сургуулийн өмнөх насны хүүхдийн хараа шалгах “Lea хүснэгт”-ийг 21 аймгийн эрүүл мэндийг дэмжих төв ба өрхийн эрүүл мэндийн төвд хүлээлгэн өгч, Монгол Улсын 21 аймагт 4 ба 6 настай хүүхдийн хараа шалгах үйл ажиллагаа явагдаж байна. Хүүхдийн нүдний эмгэгийн анхан шатны тусламж үйлчилгээний нэн чухал асуудал нь 0-18 насны хүүхдэд нүдний эмгэгийн анхан шатны үзлэг хийж, нүдний эмгэгийг эрт, илрүүлэн, хоёр ба гуравдугаар шатлалын эмнэлэг рүү хугацаа алдалгүй илгээж, эмчлэх нь юм. Хүүхэд бүрийн нүдний харааг шалгаж, хараа муу, сул хараатай хүүхдийг эрт илрүүлэн, оношилж эмчлэх нь цаашид хүүхдийн сул хараа, сохролоос сэргийлэхэд чухал ач холбогдолтой. 2017 оны 09 сарын 05-ны өдөр Монгол Улсад анх удаа “Хүүхдийн нүдний хараа хамгаалах өдөр”-тэй болж, жил бүр уламжлал болгон тэмдэглэснээр, сохрол, сул хараанд хүргэдэг өвчнийг эрт илрүүлэх тогтолцооны суурь тавигдсан. ЭХЭМҮТ нь Орбис олон улсын байгууллагатай хамтарч “Монголын орчин үеийн нүд судлалын шилдэг загвар” төслийг амжилттай хэрэгжүүлж, улмаар “Хүүхдийн хараа хамгаалах”, “Дутуу нярайн ретинопати”, “Нүдний үзлэг”-ийг нярайн ба хүүхдийн эрүүл мэндийн үзлэгт нэгтгэх төслийг хэрэгжүүлж байна. Уг төслийн хүрээнд Ховд, Увс, Баян-Өлгий, Говь-Алтай аймгийн нийт сум, өрхийн эрүүл мэндийн төв, Улаанбаатар хотын 9 дүүргийн нэгдсэн эмнэлэг, нийслэлийн амаржих газрын хүүхэд, нярай, нүдний эмч нарт дутуу нярайн торлогийн эмгэг, хүүхдийн нүдний эрт илрүүлэг, нүдний угийн улаан рефлекс, хараа шалгахын ач холбогдлын талаар сургалт зохион байгууллаа. Түүнчлэн нүдний угийн улаан рефлекс шалгах “Аrclight ophthalmosciope and otoscope” багаж, хараа шалгах хүснэгтээр хангаснаар, хүүхдийн нүдний эмгэгийг эрт илрүүлэх тогтолцоо үүсээд байна. Дэлхийн улс орнуудад жил бүр ойролцоогоор хагас сая гаруй хүүхэд сохорч байгаа нь анагаах ухааны төдийгүй нийгмийн эрүүл мэндийн өмнө хурцаар тавигдаж байгаа асуудлын нэг болсоор байна. Монгол Улсад хүүхдийн сохролын тархалт нь 0.19/1000 байгаа нь бусад хөгжиж буй орнуудтай харьцуулахад бага боловч хүүхдийн катаракт өвчний улмаас үүссэн сохрол нь бусад Азийн хөгжиж буй орнуудын түвшинд (5-6/100,000) байна. Иймд “Сохролоос сэргийлэх үндэсний хөтөлбөр”-т хүүхдийн хараа хамгаалах асуудал нэн тэргүүнд шийдэх асуудал болгон тусгагдсан.