ЗАСГИЙН ГАЗРЫН ХЭРЭГ ЭРХЛЭХ ГАЗРЫН АЛБАН ХААГЧДАД МЭДЭЭЛЭЛ ХИЙЛЭЭ

12 / 15 0 сэтгэгдэл 542 үзсэнe

ЖҮХАА-ны дарга Т.Энхбаяр ЗГХЭГ-ын албан хаагчдад жендэрийн эрх тэгш байдлыг хангах бодлого, үйл ажиллагааны талаар товч мэдээлэл өглөө. Тэрээр Монгол Улсын жендэрийн нөхцөл байдал, олон улс, бүс нутгийн түвшинд үзүүлж буй ахиц дэвшил, сорилтын талаар танилцуулж, ирэх арван жилд хамтран хэрэгжүүлэх стратеги төлөвлөгөөний ач холбогдол, үр нөлөө, онцлогийг тайлбарлав. Түүнчлэн ажил ар гэрийн тэнцвэрийг хангах, ажлын цагийн уян хатан зохицуулалт, цагийн хөдөлмөр, зайнаас ажиллах зэрэг Хөдөлмөрийн тухай хуулийн жендэрийн тэгш байдлыг хангахад чухал хувь нэмэр оруулах гол гол заалтуудыг хэрхэн хэрэгжүүлж буй туршлагыг үндэсний хэмжээнд судлан танилцуулахаар судлах зөвлөх үйлчилгээний байгууллагатай хамтран ажиллаж буйгаа онцоллоо. Мөн түүнчлэн байгууллага бүр өөрийн Хөдөлмөрийн дотоод журмыг шинэчлэн боловсруулахдаа албан хаагчдын хэрэгцээ, түүнийг илрүүлэх судалгаа, дүн шинжилгээнд үндэслэн жендэрийн мэдрэмжтэй хандахыг зөвлөж санал солилцсон юм.

ЧИХРИЙН ШИЖИН ӨВЧНИЙ ҮЕД ХЭРЭГЛЭХ 3 ТӨРЛИЙН ЭМИЙГ ЭМД-ЫН САНГААС 100 ХУВЬ ХӨНГӨЛӨЛТТЭЙ ОЛГОЖ БАЙНА

12 / 15 1 сэтгэгдэл 776 үзсэнe

ЭМДЕГ Швейцарийн Новартис компанитай хамтран олон улсад хүлээн зөвшөөрөгдсөн зүрх судас, чихрийн шижин, уушгины эмгэг болон хавдрын үед хэрэглэх 19 төрлийн эмийг ЭМД-ын шимтгэлээ төлсөн хүн бүрд ЭМД-ын сангаас 100 хувь хөнгөлөлттэй үнээр олгож байна. Эдгээр эмийг эхний ээлжинд "Новартис" компанийн албан ёсны 3 дистрибьютерийн 191 салбар эмийн сангаар олгож байсан бол эмийн хүртээмжийг нэмэгдүүлэх зорилгоор ЭМДЕГ-тай гэрээтэй бусад эмийн сангууд ч мөн олгох боломжтой болсон. Энэ хүрээнд өнөөдрийн байдлаар 31 эмийн сантай нэмэлтээр гэрээ байгуулснаар хот, хөдөөгийн нийт 220 гаруй эмийн сангаас Новартис компанийн эмийг ЭМД-ын 100 хувийн хөнгөлөлттэй үнээр олгож байна.

ТУРК ИРЭХ ОНЫ НЭГДҮГЭЭР САРЫН 1-НЭЭС ЖУУЛЧДААС ТАТВАР АВЧ ЭХЭЛНЭ

12 / 14 0 сэтгэгдэл 533 үзсэнe

Турк улс ирэх 2023 оны нэгдүгээр сарын 1-ээс эхлэн гаднын жуулчдаас хоёр хувийн үйлчилгээний татвар авахаар болжээ. Зочид буудал, рашаан, амралт, зугаалгын газар, дэн буудал, тосгон, жуулчны кэмп зэрэгт буудаллахад хоёр хувийн татвар төлөх аж. Харин гаднын оюутан болон дипломат ажилтнууд энэ татвараас чөлөөлөгдөнө. Туркийн Засгийн газар гаднын жуулчдыг хүлээн авах үйлчилгээнд хоёр хувийн татвар ногдуулах шийдвэрийг аль 2019 онд гаргаж байсан ч коронавирусний цар тахлын улмаас хойшлуулсан. Энэ оны байдлаар, Турк улс 51.5 сая жуулчин хүлээн авч, аялал жуулчлалаас нийт 46 тэрбум ам.долларын орлого олох хүлээлттэй байна. Ирэх онд тус улс 60 сая жуулчин хүлээн авахаар төлөвлөж байна.

Х.НУРЛАТЫГ НЭГ САРЫН ХУГАЦААГААР ЦАГДАН ХОРИХООР БОЛЖЭЭ

12 / 14 0 сэтгэгдэл 482 үзсэнe

Өнөөдөр /2022.12.12/ Чингэлтэй Дүүргийн Эрүүгийн хэргийн анхан шатны шүүхэд прокуророос ирүүлсэн саналыг хэлэлцэн "Эрдэнэс Тавантолгой” ХК-ийн Дотоод хяналт эрсдэлийн удирдлагын газрын захирал асан Х.Нурлатыг нэг сарын хугацаагаар цагдан хорих шийдвэр гаргажээ. Прокуророос түүнийг “Тавантолгой Түлш” ХХК-тай нүүрсний тээвэрлэлтийн бизнес эрхэлж, хамтран орлого олж, хууль бусаар хөрөнгөжсөн, мөн “Онлайн ложистикс” ХХК-ийг үүсгэн байгуулж эрх мэдэл албан тушаалаа ашиглан өөртөө болон бусдад давуу байдал бий болгосон байж болзошгүй гэх хэрэгт яллагдагчаар татсан байна.

ШАДАР САЙД С.АМАРСАЙХАН: МОНГОЛБАНКНЫ ЕРӨНХИЙЛӨГЧ Б.ЛХАГВАСҮРЭНГ ОГЦРУУЛЖ, ШАЛГАХ ЁСТОЙ

12 / 14 0 сэтгэгдэл 630 үзсэнe

Шадар сайд С.Амарсайхан "Банк санхүү, эдийн засгийн салбарын амь тасардаггүй алуурчид айдасгүй байна. Ипотекийн зээлийн эргэн төлөлтөөс 170 Тэрбум төгрөгийг арилжааны банкуудтай үгсэн,хууль бусаар ашиглаж, мөнгө угаах болон санхүүгийн гэмт хэрэг үйлдэж, инфльяц,төгрөгийн ханшыг барьж чадалгүй алдсан МБ-ны Ерөнхийлөгч Б.Лхагвасүрэнг огцруулж, хуулийн дагуу шалгах ёстой. Албан тушаалтнууд журам өөрчилж, хууль зөрчиж байгаад ядарсан иргэдийнхээ төлсөн зээлийн эргэн төлөлтөөс 400 тэрбум төгрөг хулгайлж, завшчихаад чимээгүй яваад байж болоод байдаг. Гэтэл нөгөө талд нь хэдэн үеээ барьцаалж арай хийн байртай болчихоод дээр нь хуруу хумсаа хугаслан, өдөр шөнөгүй зүтгэж олсон хэдээ ипотекийн зээлийн төлбөрт сар бүр төлдөг ч багагүй хувь нь хулгайн сүлжээг тэжээдэг. Зээл хүүгээ төлөөд, дээр нь өлсөж даарахгүйхэн өдөр хоногийг өнгөрөөх гэж хичээж байгаа иргэдийнхээ зээлийн 8 хувийг 2 хувиар бууруулж, дээрэмдүүлсэн олон зуун тэрбум төгрөгийг нь буцаан авч, зөрүүг нь төлүүлэх тухай шийдэл ярихаар тэрийж хэвтдэг цайрчихсан байж болохгүй юм. Үүний цаана орон сууцтай болох хүсэл мөрөөдөл дүүрэн мянга мянган залуу гэр бүлийн хувь заяа бас бий. Хийсэн хулгай, дээрмээсээ айдаггүй, хуулиас ч эмээдэггүй, ард түмний хэтэвчээс эхлээд айл өрхийн данс, аж ахуйн нэгжийн бизнес, улс орны сан хөмрөгт хүртэл шуналын савраа дүрсэн дээрэмчдийн мэргэшсэн сүлжээг ил гаргаж, нэг мөр цэвэрлэж байж Засгийн газрын авилгатай тэмцэх, нийгэмд эрх тэгш, шударга ёсийг тогтоох бодлого бүрэн хэрэгжих боломж бүрдэнэ " хэмээжээ.

ӨМНӨД СУДАНЫГ 40 ГАРУЙ ЭМЭГТЭЙ АЛБА ХААГЧ ЗОРИЛОО

12 / 14 0 сэтгэгдэл 535 үзсэнe

Монгол улсын зэвсэгт хүчний мотобуудлагын батальоны бүрэлдэхүүн НҮБ-ын энхийг сахиулах UNMISS ажиллагааны арванхоёрдугаар ээлжид үүрэг гүйцэтгэхээр Өмнөд Судан улсыг зорилоо. Эхний ээлж арваннэгдүгээр сарын 15-ны өдөр, хоёр дахь ээлжийнхэн арванхоёрдугаар сарын нэгний өдөр явсан бол гурав дахь ээлжийн офицер, ахлагч нар эх орноосоо морджээ. Энэ удаагийн бүрэлдэхүүнд 40 гаруй эмэгтэй цэргийн алба хаагч нэг дор үүрэг гүйцэтгэхээр явж байгаараа онцлогтой. Тус батальоны нийт цэргийн алба хаагчдын дотор 90 гаруй эмэгтэй цэргийн алба хаагч сонгон шалгаруулалтад тэнцэж, ажиллагааны өмнөх сургалтад амжилттай хамрагджээ.

Н.НОМТОЙБАЯР: ХӨГЖЛИЙН БАНКЫГ ТОНГОРСОН Х.БАТТУЛГА СИНГА РУУ ЗУГТСАН

12 / 14 2 сэтгэгдэл 1 383 үзсэнe

АТГ нүүрсний хэрэгт холбогдуулан шалгаж байгаа 17 хүний нэрийг зарласан. Энэ үйл явдалтай холбогдуулан "УИХ-ын гишүүн асан Н.Номтойбаяр өөрийн цахим хуудаснаа " ХБ-ыг тонгорсон @BattulgaKh синга руу зугтсан гэх…?! намайг МАНж бүлэглэл хөөхөд инээж байгаад тогтоолоо гардаж авсан, УИХГ-ний бүрэн эрх гэхэд нь инээж байгаад өргөдлөө өгсөн, хилс хэрэгт гүтгэхэд нь инээж байгаад шоронг давсан. Шулуухан хэлэхэд над шиг л бай л даа!" хэмээжээ.

“ЖЕНДЭРИЙН ЭРХ ТЭГШ БАЙДЛЫГ ХАНГАХ САЛБАР ДУНДЫН СТРАТЕГИ ТӨЛӨВЛӨГӨӨ”-Г ТАНИЛЦУУЛЛАА

12 / 14 0 сэтгэгдэл 515 үзсэнe

Жендэрийн үндэсний шинжээч, зөвлөх Б.Долгор, Жэндэрийн үндэсний хорооны жендэрийн чадавх сургалтын бодлого хариуцсан мэргэжилтэн Б.Наранцацрал нар ХХААХҮЯамны албан хаагчдад Жендэрийн эрх тэгш байдлыг хангах салбар дундын стратеги төлөвлөгөө /2022-2031/-г танилцууллаа. Арга хэмжээнд Хүнс, хөдөө аж ахуй, хөнгөн үйлдвэрийн яам болон харьяа агентлаг Мал, эмнэлгийн ерөнхий газар, Жижиг, дунд үйлдвэрийн газрын нийт 71 албан хаагч оролцлоо. Энэхүү салбар дундын стратеги төлөвлөгөөний 1, 2, 5 дугаар зорилтын 22 арга хэмжээг ХХААХҮЯам дангаар болон төр, төрийн бус байгууллага, олон улсын байгууллага, хувийн хэвшил, иргэдийн оролцоотой хамтран хариуцаж хэрэгжүүлнэ.

"МАРАЛМАА"-ГИЙН ХЭРГИЙГ ЯЛЛАХ ДҮГНЭЛТ ҮЙЛДЭН АНХАН ШАТНЫ ШҮҮХЭД ШИЛЖҮҮЛЛЭЭ

12 / 13 0 сэтгэгдэл 514 үзсэнe

Тээврийн прокурорын газраас 7 автомашин мөргөж, хүүхэд дайрсан иргэн М-д холбогдох хэргийг яллах дүгнэлт үйлдэн шүүхэд шилжүүлсэн байна. Тодруулбал, М нь 2022 оны 10 дугаар сарын 10-ны өдөр Баянзүрх дүүргийн 26 дугаар хороо, “Олимп” хотхоны хойд замд “Toyota Landcruiser 200” маркийн тээврийн хэрэгслийг жолоодон замын хөдөлгөөнд оролцохдоо Монгол Улсын Замын хөдөлгөөний дүрмийн 3.7, 12.3, 11.5-т заасан заалтуудыг тус тус зөрчсөний улмаас эсрэг урсгал сөрөн 7 автомашин мөргөж, явган хүний замаар явж байсан 12 настай С, Э нарыг дайрч, эрүүл мэндэд нь хохирол учруулсан гэх хэрэгт Эрүүгийн хуулийн 27.10 дугаар зүйлийн 2 дахь хэсгийн 2.2, 2.4 дэх хэсэгт зааснаар /Автотээврийн хэрэгслийн хөдөлгөөний аюулгүй байдал, ашиглалтын журам зөрчих/ яллах дүгнэлт үйлдэн, Баянзүрх дүүргийн эрүүгийн хэргийн анхан шатны шүүхэд шилжүүл жээ.

УБТЗ ХНН: ДИЗЕЛЬ ТҮЛШИЙГ ХИЛЭЭР ОРЖ ИРСЭН ДАРУЙ ШУУРХАЙ ТЭЭВЭРЛЭЖ БАЙНА

12 / 13 0 сэтгэгдэл 463 үзсэнe

Улсын хэмжээнд дизель түлшний хомсдол үүссэнтэй холбоотойгоор ЗТХЯ-наас импортоор авч буй дизель түлшний татан авалтыг шуурхайлахыг УБТЗ-д үүрэг болгосон. Үүний дагуу хилээр орж ирсэн импортын түлшний татан авалтыг шуурхай зохион байгуулан ажиллаж байна. “ОХУ-ын Наушки өртөөгөөр өнгөрсөн 11 дүгээр сард 903 цистерн дизель түлш орж ирсэн бол 12 дугаар сарын эхний 13 хоногт 670 цистерн дизель түлш орж ирсэн. Хилээр орж ирсэн дизель түлшийг Улаанбаатар хүртэл тээвэрлэх хугацаа 36 цаг байсныг 20 цаг болгон бууруулж, татан авалтыг хил, гаалийн байгууллагатай хамтран саадгүй, түргэн шуурхай гүйцэтгэж байна” гэж УБТЗ ХНН-ээс мэдээллээ. БНХАУ-ын Эрээн өртөөнөөс энэ оны 11 дүгээр сарын 18-ны өдрөөс хойш нийтдээ 289 цистерн дизель түлш нарийн царигийн төмөр замаар хүлээн аваад байгаагаас 194 цистернийг нь шилжүүлэн ачилт хийж, Улаанбаатар, Толгойт, Чойр, Сайншанд өртөө рүү тээвэрлэжээ. Мөн 84 цистерн түлшийг Замын-Үүдэд буулгасан. Үлдэгдэл 11 цистерн дизель түлш шилжүүлэн ачилт хийгдэхээр нарийн царигийн төмөр зам дээр хүлээгдэж байна. Нефть, нефтийн бүтээгдэхүүний гол нийлүүлэгч ОХУ-аас өнгөрсөн 11 дүгээр сарын 1-ний өдрөөс хойш нийтдээ 3303 цистерн нефть, нефтийн бүтээгдэхүүн импортоор орж ирсэн гэдгийг мөн тус Нийгэмлэгээс нэмж хэллээ. Гэрэл зургийг Н.Батхүрэл