Төв цэвэрлэх байгууламжид хоногт дунджаар 3 тонн хатуу хог хаягдал ирж байна

07 / 22 0 сэтгэгдэл 85 үзсэнe

Хоногт 250 мянган шоо метр хаягдал ус цэвэрлэх хүчин чадалтай шинэ Төв цэвэрлэх байгууламжид нийслэлийн Засаг дарга бөгөөд Улаанбаатар хотын Захирагч Б.Пүрэвдагва ажиллалаа. Энэхүү байгууламж бохир усыг механик, физик, хими, нэмэлт биологийн цэвэрлэгээний аргаар технологийн дагуу боловсруулж байна. 55 барилга, байгууламжаас бүрдэх Төв цэвэрлэх байгууламж гарсан лагаа бүрэн боловсруулж, эрчим хүч үйлдвэрлэн дотоод хэрэглээнийхээ 35 хувийг хангах юм. Сонгинохайрхан дүүргийн 20 дугаар хорооны нутагт барьсан тус цэвэрлэх байгууламжийн Техник, эдийн засгийн үндэслэлийг НЗДТГ-ын захиалгаар Францын “Артеллиа вилл энд транспорт” компани боловсруулсан. Харин гүйцэтгэгчээр “Чайна тисижу сивил инженеринг групп”, “Бээжин констракшн инженеринг групп”-ийн хамтарсан консорциум ажилласан. Иргэдийн буруу дадлаас үүдэн бохирдлын хэмжээ нэмэгдэж, Төв цэвэрлэх байгууламжид тоног төхөөрөмжийн эвдрэл, гэмтэл үүсгэх эрсдэлтэй байдгийг инженерүүд анхааруулав. Тухайлбал, цэвэрлэх байгууламж өдөр тутамд усанд уусдаггүй цаас, салфетка зэрэг их хэмжээний хогийг ялгаж байна. Жилээс жилд хог хаягдлын хэмжээ нэмэгдэж байгаа таагүй мэдээтэй. Энэ бол оршин суугчдын буруу зуршилтай шууд холбоотой юм. Тиймээс ариутгах татуурга руу усанд уусдаггүй цаас болон хатуу хог хийхгүй байхыг зөвлөлөө. Тус байгууламж хэвийн ажиллахад иргэдийн оролцоо чухал юм. УСУГ-ын Цэвэрлэх байгууламжийн албаны дарга О.Оюунбаяр “Цэвэрлэх байгууламж 200 хүний бүрэлдэхүүнтэй, дөрвөн ээлжээр 24 цагийн турш ажилладаг. Хуучин цэвэрлэх байгууламж бохир усыг хүлээж аваад цэвэршүүлэх явцад үнэр ихээр ялгарч эргэн тойронд тархдаг байсан бол шинэ цэвэрлэх байгууламж таагүй үнэрийг шийдсэнээрээ онцлогтой. Төв цэвэрлэх байгууламж хоногт дунджаар 190.000-240.000 шоо метр бохир ус хүлээн авч байгаа юм. Хоногт гурван тонн хатуу хог хаягдал ирж байгаа нь эрсдэл дагуулсаар байна” гэлээ.

311 алба хаагч, 119 техник хэрэгсэлтэй ажиллаж үер усны аюул, болзошгүй эрсдэлээс сэргийлж байна

07 / 22 0 сэтгэгдэл 80 үзсэнe

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва үер усны аюул, болзошгүй эрсдэлээс сэргийлэх зорилгоор долоодугаар сарын 8-аас есдүгээр сарын 15-ныг дуустал өндөржүүлсэн бэлэн байдал зарласан. Тэрбээр өнөөдөр Туул голын эрэг дагуу ажиллаж, үүрэг даалгаврын хэрэгжилтийг шалгалаа. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Усны түвшин нэмэгдсэнтэй холбоотойгоор дуудлага мэдээллийн тоо өсөж байна. Албан хаагчид аюулгүй байдлын төлөө шаардлага тавьж байгаа учир иргэд та бүхэн хүлээцтэй хандан шаардлагыг биелүүлэхийг хүсье. Албан шаардлага биелүүлээгүйгээс болж эрсдэлд орох тохиолдол гардаг. Түүнчлэн голын усны түвшин нэмэгдсэн учир автомашиныхаа хүчинд эрдэж ус руу орж аюулд орохгүй байхыг анхааруулъя. Хар цэгүүдэд хяналтын завьт эргүүлүүд ажиллаж, аврах ажиллагаа явуулж байна. Эцэг эхчүүд, асран хамгаалагчид хүүхдэдээ тавих хараа хяналтаа сайжруулахыг хүсье. Долоодугаар сарын сүүл, наймдугаар сарын эхээр үргэлжилсэн бороо орох төлөвтэй байгаа учир бид үер усны аюулаас урьдчилан сэргийлэх зорилгоор дүүргүүдийн дарга нартай хамтран үерийн аман дээр буусан айл өрхүүдэд анхаарал хандуулж байна. Бие бүрэлдэхүүн өндөржүүлсэн бэлэн байдалд 24 цагаар ажиллаж байгаа юм” гэлээ. НОБГ-ын Тэргүүн дэд дарга Д. Оюунбат “Хар усан тохойгоос Зайсангийн гүүр, Зайсангийн гүүрнээс Сонсголонгийн гүүр, Тэрэлжийн гол, Хэрлэн гол дагуу завьт болон хөдөлгөөнт эргүүлүүд ажиллаж байна. Түүнчлэн алба хаагчид морь болон сурроноор эргүүл хийж байна. Мөн дроноор хянаж буй. Энэ өдрүүдэд нийслэлийн Онцгой байдлын газрын 242 алба хаагч, 64 автомашин, 10 мотопомптой, ГУББГ 19 алба хаагч найман автомашин, Ус сувгийн удирдах газрын 50 ажилтан 47 автомашинтай, нийт 311 алба хаагч, 119 техник, тоног төхөөрөмж багаж хэрэгсэлтэйгээр ажиллаж байна. Мөн гол, усны аюулаас урьдчилан сэргийлэх санамж хуудсыг 12350 иргэнд хүргэж, 1345 автомашиныг голын эргээс холдуулж сэрэмжлүүлэн ажиллалаа. 2026 оны долоодугаар сарын 10-18-ны өдрийн байдлаар нийт 64 дуудлага мэдээлэл бүртгэгдэж, голын уснаас таван иргэнийг аварсан. Мөн үер, усны ослоос аюулгүй бүсэд 88 хүнийг гаргасан юм. Үүний 35 нь хүүхэд байсан” гэв.

СЭРЭМЖЛҮҮЛЭГ: 0-4 НАСНЫ ХҮҮХДҮҮД МОГОЙД ХАТГУУЛЖ ГЭМТЭХ ТОХИОЛДОЛ НЭМЭГДЖЭЭ

07 / 21 0 сэтгэгдэл 306 үзсэнe

Амралт, зугаалгын улирал эхлэх энэ үед бага насны хүүхдэдээ тавих хараа хяналт суларч, хүүхдүүд гэнэтийн осол, гэмтэл, эрүүл мэндийн эрсдэлд орох нь их болдог. 2026 оны эхний хагас жилийн байдлаар улсын хэмжээнд хортой болон хоргүй могойд хатгуулж гэмтсэн 13 шинэ тохиолдол бүртгэгдсэн байна. Нийт тохиолдлын 23 хувийг 0-4 насны хүүхдүүд эзэлжээ. Эцэг эх, асран хамгаалагчдын хараа хяналт сул байгаа учир бага насны хүүхдүүд түлхүү хатгуулж байна гэж мэргэжилтнүүд онцоллоо. Говь-Алтай, Завхан, Өвөрхангай, Төв, Дархан-Уул аймагт тус, тус нэг тохиолдол, Дорноговь аймагт хоёр тохиолдол бүртгэгдсэн нь бусад аймгаас хоёр дахин өндөр байна. Үлдсэн 46 хувь нь нийслэл Улаанбаатарт тохиолджээ. Гэмтсэн эрхтний байршлаар зургаан хүн гар, сарвуу орчимдоо хатгуулсан нь хамгийн их буюу 46 хувийг эзэлсэн. Хөлийн шагай болон тавхайдаа хатгуулсан хоёр тохиолдол бүртгэгджээ. Нийт хатгуулсан 13 хүний 30 хувь нь хортой могойд хатгуулсан. Хэрэв хатгуулсан бол яаралтай эмнэлэгт хандах шаардлагатай. Олон төрлийн могой бий. Могой болгоны хоргүйжүүлэх чанар өөр. Могойд хатгуулсан орчимд маш их хаван үүсдэг, цус их бүлэглэх, цусны зарим үзүүлэлтэд өөрчлөлт орсноос цус алдах эрсдэлтэй. Мөн цусны бүлэгнүүлэгч эсийн тоо унадаг. Иймд хордлого тайлах эмчилгээ, шаардлагатай бол мэс заслын эмчилгээг яаралтай хийх ёстой гэж мэргэжилтнүүд тайлбарлалаа. Эх сурвалж: ГССҮТ

ИХ, ДЭЭД СУРГУУЛЬ, КОЛЛЕЖИЙН ХИЧЭЭЛИЙГ 9-Р САРЫН 15-НААС ЭХЛҮҮЛНЭ

07 / 21 0 сэтгэгдэл 154 үзсэнe

Улаанбаатар хотод цөлжилттэй тэмцэх СОР17 олон улсын чуулган 8-р сарын 17-28-нд болно. Олон улсын хурал болохтой холбоотойгоор хичээлийн шинэ жил эхлэх хугацаанд өөрчлөлт оруулна. Тухайлбал, СОР-ыг зохион байгуулах төвийн бүсийн буюу Сүхбаатар, Чингэлтэй дүүргийн сургууль, цэцэрлэгүүдийн бүртгэл болон хичээлийн цагийн зохицуулалтыг Боловсролын яамнаас гаргаж, ирэх долоо хоногт хуваарийг олон нийтэд танилцуулна. Харин хөдөө, орон нутгийн сургууль, цэцэрлэгийн хичээл 9-р сарын 1-наас эхэлнэ гэлээ.

НАЙМДУГААР САРЫН 1-НЭЭС БАЯР НААДМУУДЫГ ОРОН ДАЯАР ЗОГСООНО

07 / 21 0 сэтгэгдэл 79 үзсэнe

Улсын хэмжээнд наймдугаар сарын 1-нээр бүх баяр наадмыг дуусгахыг Засгийн газраас үүрэг болгож байна. Зөвхөн Баян-Өлгий Ховд аймагт шүлхий гарсантай холбоотой баяр наадам нь хойшлогдож, 8-р сарын 1, 2-нд болно. Үүнээс хойш наадам зохион байгуулахгүйг хатуу анхааруулж байна. Найр, наадам ихсэхэд өвөлжилтийн бэлтгэл ажил цалгарддаг. Орон нутгийн удирдлагууд баяр наадам зохион байгуулах үүрэгтэй. Өөрсдөө баярлаж, наадна гэсэн ойлголт байхгүй. Өвөлжилтийн бэлтгэл ажилтай газар дээр нь танилцахаар Шадар сайд 21 аймагт ажиллана гэв.

Б.Пүрэвдагва: “Туул-1” коллекторыг ашиглалтад оруулж байж бид гэр хорооллыг барилгажуулна

07 / 20 0 сэтгэгдэл 24 үзсэнe

Бохир ус татан зайлуулах “Туул-1” коллекторын ажил үргэлжилж байна. “Туул-1” коллекторын IV хэсэгт нийслэлийн Засаг дарга бөгөөд Улаанбаатар хотын Захирагч Б.Пүрэвдагва болон холбогдох албаныхан ажиллалаа. “Туул-1” коллектор нь Улаанбаатар хотын бохир усны шугамын ачааллыг авах гол хэвтээ тэнхлэгийн шугам бөгөөд одоо байгаа болон ирээдүйд барих барилга байгууламжийн бохир усыг татан зайлуулах стратегийн ач холбогдолтой инженерийн шугам сүлжээ юм. Тодруулбал, тус коллектор нь Гачуурт, Хужирбулан, Улиастай, Налайх, Амгалан, Шархад, Дамбадаржаа, Долоон буудал, Баянхошуу, Толгойт, Баянголын ам орчмын хорооллуудын бохир усыг төв цэвэрлэх байгууламжид хүргэхээр төлөвлөгдсөн. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва ““Туул-1” коллекторт хамгийн сүүлийн үеийн технологиор хийсэн 50-100 жилийн эдэлгээг даахуйц, химийн бодист тэсвэртэй материалаар хийгдсэн 1200-1500 мм голчтой хоолойг ашиглаж байна. Хоолойн дотор ханын гөлгөр гадаргуу нь бохир усны урсгалыг чөлөөтэй дамжуулах давуу талтай. “Туул-1” коллектор ашиглалтад орж байж бид гэр хорооллыг барилгажуулах боломжтой болно. Энэ ажлыг хийж дуусгахгүй бол өмнөдийн 1000-ын коллектор татан зайлуулж буй бохир усны ачааллаа дийлэхээ больж, бохир халих эрсдэлтэй юм” гэв. Гачуурт тосгоноос Төв цэвэрлэх байгууламж хүртэл 30.4 км үргэлжлэх "Туул-1" коллекторыг барих шийдвэрийг 2007 онд гаргасан ч хэрэгжиж дуусалгүй олон жил болсон. Харин УСУГ-аас “Туул-1” коллекторын шугам угсралтын ажлыг өнгөрсөн оны 10 дугаар сараас эхлүүлсэн юм. “Туул-1” коллекторын III, IV дүгээр хэсгийн 1200-1500 голчтой шугамаас угсралт хийгдээгүй үлдсэн 10.4 км шугамын угсралтыг хийж дуусгаснаар Улаанбаатар хотын ариутгах татуургын гол цуглуулах шугамын хүчин чадал 80 хувиар нэмэгдэж, шинээр 300 мянган өрхийг ариутгах татуургын төвлөрсөн системд холбох боломжтой болно. Ажлыг үргэлжлүүлэхэд газар чөлөөлөлт, бусад инженер хангамжийн шугам сүлжээг зөөж, шилжүүлэх асуудал тулгамдаж байгааг УСУГ-ын дарга Ц.Төрхүү хэллээ.

БАЯР НААДМЫН ӨДРҮҮДЭД ИХЭНХ НУТГААР ХУР БОРОО ОРНО

07 / 06 0 сэтгэгдэл 304 үзсэнe

2026 оны 07 дугаар сарын 06-наас 07 дугаар сарын 15-ныг хүртэлх 10 хоногийн цаг агаарын урьдчилсан төлөвийг танилцуулж байна. 09-нд нутгийн баруун хэсгээр, 10-нд нутгийн төв хэсгээр, 11-нд нутгийн зүүн хагаст бороо, дуу цахилгаантай аадар бороо орж, сэрүүснэ. Хур тунадас: 07-нд төв болон зүүн аймгуудын нутгийн зарим газар, говийн аймгуудын нутгийн зүүн хэсгээр, 08-нд баруун аймгуудын нутгийн хойд хэсэг, төв болон зүүн аймгуудын нутгийн зарим газраар, 09-нд баруун аймгуудын нутгийн хойд, төвийн аймгуудын нутгийн баруун хэсэг, зүүн аймгуудын нутгийн зарим газраар, 10-нд баруун болон төвийн аймгуудын ихэнх нутаг, говийн аймгуудын нутгийн хойд хэсгээр, 11-нд төв болон зүүн аймгуудын ихэнх нутаг, говийн аймгуудын нутгийн хойд болон зүүн хэсгээр, 12-нд төв болон зүүн аймгуудын нутгийн зарим газраар, 13-нд зүүн аймгуудын нутгийн зарим газраар, 14-нд Монгол-Алтай, Хангай, Хөвсгөл, Хэнтийн уулархаг нутгаар бороо, дуу цахилгаантай аадар бороо орно. Салхи: Ихэнх хугацаанд ихэнх нутгаар секундэд 5-10 метр, борооны өмнө салхи түр зуур ширүүснэ. Агаарын температур: Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Туул, Тэрэлж голын голын хөндийгөөр шөнөдөө +6...+11 градус, өдөртөө +20...+25 градус, Их нууруудын хотгор болон говийн бүс нутгийн өмнөд хэсгээр шөнөдөө +20...+25 градус, өдөртөө +34...+39 градус, говийн бүс нутгийн хойд хэсгээр шөнөдөө +15…+20 градус, өдөртөө +29...+34 градус, бусад нутгаар шөнөдөө +11...+16 градус, өдөртөө +24...+29 градус дулаан байна. 10-нд баруун болон төвийн аймгуудын нутгаар, 11-нд ихэнх нутгаар сэрүүснэ. Улаанбаатар хот орчмын 10 хоногийн цаг агаарын урьдчилсан төлөв Хур тунадас: 10, 11-нд бороо, 12-нд бага зэргийн орно, дуу цахилгаантай. Салхи: Ихэнх хугацаанд секундэд 5-10 метр, борооны өмнө салхи түр зуур ширүүснэ. Агаарын температур: 07, 08, 09-нд шөнөдөө +11...+16 градус, өдөртөө +23...+28 градус, 10-наас сэрүүсэж шөнөдөө +8...+13 градус, өдөртөө +18...+23 градус дулаан байна.

БНХАУ-ААС ЦЭРГИЙН БУЦАЛТГҮЙ ТУСЛАМЖИЙН ТЕХНИК ХЭРЭГСЛИЙГ ХҮЛЭЭН АВЛАА

07 / 06 0 сэтгэгдэл 378 үзсэнe

Монгол Улс, Бүгд Найрамдах Хятад Ард Улсын Иж бүрэн стратегийн түншлэлийн харилцаа, батлан хамгаалах салбарын хамтын ажиллагааны хүрээнд БНХАУ-ын Батлан хамгаалах яамнаас Монгол Улсын Батлан хамгаалах яаманд үзүүлж буй цэргийн буцалтгүй тусламжийн техник хэрэгслийг албан ёсоор хүлээн авах арга хэмжээ зохион байгуулагдлаа. Тус тусламжийн хүрээнд Батлан хамгаалах яамны харьяа анги, байгууллагуудын үйл ажиллагаа, алба хаагчдын тээвэрлэлтийн нөхцөлийг сайжруулах, өдөр тутмын бэлэн байдлыг хангах зориулалт бүхий зорчигч тээврийн автобуснуудыг хүлээлгэн өгөв. Арга хэмжээнд УИХ-ын гишүүн, Засгийн газрын гишүүн, Батлан хамгаалахын сайд Д.Батлут, БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань, Батлан хамгаалахын атташе, ахлах хурандаа Жан Сюлян болон хоёр талын батлан хамгаалах салбарын удирдлага, албаны хүмүүс оролцсон юм. Батлан хамгаалахын сайд Д.Батлут арга хэмжээг нээж хэлсэн үгэндээ хоёр улсын төрийн тэргүүн нарын манлайлал дор Иж бүрэн стратегийн түншлэл бүхий л салбарт идэвхтэй хөгжиж, 2026 он гарсаар Ерөнхий сайд Н.Учрал, Шадар сайд Н.Номтойбаяр нарын БНХАУ-д хийсэн айлчлал, БНХАУ-ын Гадаад хэргийн сайд Ван И, дэд сайд Сун Вэйдун нарын Монгол Улсад хийсэн айлчлалууд нь харилцаанд талууд онцгой ач холбогдол өгч буйг харуулсныг тэмдэглэв. Мөн саяхан хамтран зохион байгуулсан “Талын түнш-2026” хээрийн сургууль нь харилцан итгэлцэл, бүс нутгийн энх тайвныг бэхжүүлэхэд чухал үүрэг гүйцэтгэснийг дурдаад, БНХАУ-ын БХЯ-наас олгож буй энэхүү цэргийн буцалтгүй тусламж нь Зэвсэгт хүчний чадавхыг бэхжүүлэх, техник хэрэгслийн шинэчлэлд бодит дэмжлэг болж байгаад чин сэтгэлийн талархал илэрхийллээ. Талууд энэхүү үйл ажиллагаа нь хоёр орны найрсаг харилцаа, харилцан итгэлцлийг гүнзгийрүүлэхэд чухал ач холбогдолтойг онцлон тэмдэглэв.

НИТХ-ЫН ТӨЛӨӨЛӨГЧ Л.ХОСБАЯР ХҮҮХДИЙН КИНОНЫ УРАН БҮТЭЭЛЧИДТЭЙ УУЛЗАЖ, ХАМТРАН АЖИЛЛАХ САНАЛ СОЛИЛЦЛОО

07 / 01 0 сэтгэгдэл 6 үзсэнe

НИТХ-ын төлөөлөгч Л.Хосбаяр хүүхдийн киноны уран бүтээлчидтэй уулзаж, хамтран ажиллах санал солилцлоо. Уг санал солилцсон уран бүтээл болох БНСУ-тай хамтарсан “Тhat day” кино төслийн зохиол нь Монгол Улсын Засгийн газар, Хүүхдийн төлөө Үндэсний зөвлөлийн тэргүүн Н.Учралын санаачилсан “Хүүхдийн төлөө за бол заавал хий” үндэсний хөдөлгөөн, НИТХ-ын төлөөлөгч Л.Хосбаярын санаачилсан “365 хоног эвдрээгүй ирээдүйг бүтээе”, “365 хоног анхаарч, хайрлая” зэрэг аяны зорилготой нийцэж байгааг талууд хэлэлцлээ. Тиймээс нийгмийн хариуцлагын хүрээнд өнөөгийн нийгэмд тулгамдаж буй асуудал “Хүүхэд өсвөр үеийнхний дунд үүсээд буй дээрэлхэлт цаашлаад гэмт хэрэгт өртөх эрсдэлт үйлдлээс урьдчилан сэргийлэх соён гэгээрүүлэх нөлөөллийн кино төслийг дэмжин хамтран ажиллах талаар санал солилцсон юм. “Тhat day” кино төслийн уран бүтээлчид болох “Бросис Пикчерс” ХХК нь Монголын ирээдүй болсон хүүхэд, өсвөр үеийнхнийг кино урлагаар дамжуулан соён гэгээрүүлэх, зөв төлөвшилтэй иргэн болгон төлөвшүүлэхэд хувь нэмэр оруулах зорилгоор сүүлийн 10 жилд хүүхдийн кино, дуу, контент “Том 4 толгой”, “Том 6 толгой”, “Том амжилт”, “Том тоглоом”, “Гурван эрдэнийн эрэлд”, “Өвөөгийн хайр” зэрэг уран бүтээлийг туурвиж, кино, урлагийн фестивалиудад амжилттай оролцож иржээ.

ЭЗЭМШИЛ, АШИГЛАЛТЫН ГАЗРЫН 50 МЕТР ХҮРТЭЛХ ТАЛБАЙГ УГААЖ, ӨНГӨ ҮЗЭМЖИЙГ САЙЖРУУЛАН ҮҮРГЭЭ ХАРИУЦЛАГАТАЙГААР БИЕЛҮҮЛЭХИЙГ УРИАЛЛАА

06 / 30 0 сэтгэгдэл 5 үзсэнe

НИТХ-ын 2009 оны 63 дугаар тогтоол, 2012 оны 61 тогтоолоор батлагдсан “Хот тохижилт цэвэрлэгээний талаар иргэн аж ахуйн нэгж байгууллагаас дагаж мөрдөх журам”-ын хэрэгжилтийг баталсан байна. Гэвч эдгээр тогтоолын хэрэгжилт хангалтгүй байгаатай холбогдуулан иргэд, аж ахуйн нэгжүүддээ хандан нийслэлийн Засаг дарга бөгөөд Улаанбаатар хотын Захирагч Б.Пүрэвдагва уриалга гаргав. “Хот тохижилт, цэвэрлэгээний журам”-ын дагуу иргэн, аж ахуйн нэгж, байгууллага нь өөрийн эзэмшил, ашиглалтын газрын 50 метр хүртэлх орчны, мөн дүүргээс хариуцуулсан нийтийн эзэмшлийн зам, талбай, явган хүний зам, ногоон байгууламжийн хог хаягдлыг цэвэрлэж, орчны бохирдлыг арилгах, аюулгүй байдлыг хангах үүрэгтэй. Тиймээс иргэн, аж ахуйн нэгж байгууллагууд ойролцоох 50 метр доторх газрын тохижилт, ногоон байгууламж, хог хаягдал, цэвэрлэгээ үйлчилгээг бүрэн хариуцаж, илүү аюулгүй, цэвэрхэн орчныг бүрдүүлж ажиллахыг нийслэлийн Засаг дарга бөгөөд Улаанбаатар хотын Захирагч Б.Пүрэвдагва нийслэлчүүддээ уриалж байна.