ҮХЛИЙН ТОЙРОГ” УСК ДЭЛХИЙН ЗАХ ЗЭЭЛД АЛБАН ЁСНЫ ЭРХТЭЙГЭЭР ХӨЛ ТАВИЛАА

Дэлхийн кино зах зээлд албан ёсны эрхтэйгээр Үхлийн тойрог УСК “Dream entertainment” болон Тайланд улсын White light co.ltd -ийн хамтран бүтээсэн “Үхлийн тойрог” уран сайхны кино 2024 оны 5-р сарын 30-ны өдөр Монгол улсад нээлтээ хийсэн бол энэ 10 сард Тайландын 300 гаруй салбартай Major Cineplex кино театрт нээлтээ хийхээр анхны товоо гаргаж гэрээ хэлцэл хийгдсэн байна. Мөн Америкийн нэгдсэн улсын Mbrella films /Бангкок дахь Глобал төвтэй, дэлхий даяар үйл ажиллагаа явуулдаг продакшн/, Peripheral Pictures -ийн Найруулагч Joushua Dixon болон Захирал Adam Pray нартай хамтарч дэлхийн олон улсын кино наадам болох Busan International Film Festival-д 2024.10 сард оролцон дэлхийн кино театруудын зах зээлд гарах эрхээ авах юм. Үхлийн тойрог уран сайхны киноны найруулагчаар “Dream entertainment”-ийн захирал Ц. Цэрэндорж Тайландын найруулагч Tanit jitnukul нар хамтран ажилласан, хоёр орны нийт 150 гаруй уран бүтээлчдийн хүч хөдөлмөр тун удахгүй дэлхийн бүтээл болохоор зэхэж байна. Кино уран бүтээлийн баг хамт олонд халуун баяр хүргэе.

ТАРВАГАН ТАХЛЫН ЭРСДЭЛ ӨНДӨР БАЙНА

Үндэсний их баяр наадмын амралт, аялал зугаалгын улирал эхэлсэн энэ өдрүүдэд тарвага агнахгүй байх, улсын хилээр оруулах нь хориотой болохыг Зооноз өвчин судлалын үндэсний төвөөс анхаарууллаа. ЗӨСҮТ - ийн мэдээлснээр 15 аймгийн 80гаруй суманд тарваган тахлын эрсдэл өндөр байгаа аж . Хэрэв халдварт өвчнөөр өвдсөн тохиолдолд хүн бүрт эмнэлзүйн шинж тэмдэг харилцан адилгүй ч огцом халуурах, толгой өвдөх, бүх биеийн булчин өвдөх, тунгалгийн булчирхай томрох, гүйлгэх, бөөлжих, ханиалгаж амьсгал давчдах зэрэг шинж тэмдэг илэрнэ. Тарваган тахлаар амь насаа алдсан иргэдийн дийлэнх нь буюу 86 хувь нь эрэгтэйчүүд байна. Тахал туссан гурван тохиолдол бүрийн хоёр нь тарвага өвчиж махыг нь эвдэж байх үедээ халдвар авсан байдаг аж. Хэрэв хууль бусаар тарвага агнасан, тээвэрлэсэн, худалдсан, худалдан авсан бол Зөрчлийн тухай хуулиар иргэнийг 300 мянган төгрөгөөр, аж ахуйн нэгж, байгууллагыг гурван сая төгрөгөөр торгох заалттай.

МОРЬ ХҮРТЭЛ БАС Л АВЛИГАЛААР УРАЛДАХ УУ

Үндэсний их баяр наадмын хурдан морьдын уралдаан жилийн жилд хэрүүл маргаантай болдог байдал давтагдагдах шинжтэй. Өчигдөрхөн хурдан морины урьдчилсан хэмжилтээр морьдоо хэмжүүлсэн уяачид “хамгийн шударга шийдэл лазер метр” гэдгийг ам дэмжин ярьцгааж эхлэв. Гэтэл хурдан морины хэмжилтийг технологийн дэмшилтэт лазер метрээр хэмжих үү, хүний гараар дэлэн дээрээс нь дарж хүссэн тоогоо бичих үү гэдэг дээр талцаж уяачдын хөдөлмөрийг хэдхэн минутад үгүй хийх нь. Уяач бүр л сойсон морио улсынхаа наадамд уралдуулахыг боддог учир шалгуур шаардлага тавьж, хязгаарлах нь зөв байх. Гэвч лазер хэмжилтэд итгэхгүйгээр цэргийн алба хааж буй хөвгүүдэд команд өгч дэлэн дээр нь өөр өөр даралтаар дарж хэмжихийг илүүд үзэж зүтгээд байгаа Хурдан морины салбар хорооны дарга, бригадын генерал Д.Ганхуяг, НЗДТГ-ын Цэргийн штабын дарга, Хурдан морины уралдаан зохион байгуулах ажлын хэсгийн ахлагч, хурандаа Г.Ялалт нар хэнд үйлчилж, гараа хүндрүүлэх гээд байгаа нь анхаарал татаж байна. Монголчууд эртнээс морины босоо цагаан хийморь хэмээн бэлгэшээдэггүй бил үү, тэгвэл тэд тэр хийморийг нь албан тушаалаа ашиглан авлигалаар өөрсдийн танилуудад олгох магадлал өндөр болж байна. Хэдхэн жилийн өмнө Батлан хамгаалах яамны Төрийн нарийн бичгийн дарга, Хурдан морины салбар комиссын дарга, генерал Х.Батбилэг өндөр нь тэнцэхгүй морьдыг уралдаанд гаргаж, авилга авсан хэмээн АТГ-д шалгагдаж хариуцлага тооцуулсан гашуун түүхийг давтахгүй гэх баталгаа алга. Технологи хөгжсөн энэ үед нүдний хараагаа хүртэл лазераар сэргээж байхад нүдийг нь хутгаар зүсэж гараар оёно гэдэгтэй агаар нэг мэт.

ГОЛЫН ЭРЭГ ДАГУУ БАЙРЛУУЛСАН КАМЕРААР 200 МЕТР ЗАЙД ИРГЭДЭД ДУУТ СЭРЭМЖЛҮҮЛЭГ ХҮРГЭЖ БАЙНА.

Нийслэлийн Онцгой байдлын газраас Туул голын эрэг дагуу иргэдийг голын усны ослоос сэргийлэх, сэрэмжлүүлэг мэдээллийг хүргэх, зорчих хөдөлгөөнд хяналт тавьж аюулгүй байдлыг хангах зорилгоор нийгмийн хариуцлагын хүрээнд өнгөрсөн жил “Мандал даатгал” ХХК-тай хамтран Туул голын аюултай бүсүүдийг тодорхойлж, нэн шаардлагатай 5 байршилд 8 хяналтын камер байршуулсан. Эдгээр камер нь нэг чигийн болон 360 градус эргэдэг бөгөөд километрийн радиусыг хянаж, цагаан хоолойгоор дуут сэрэмжлүүлгийг 200 метр зайд иргэдэд хүргэж байна. Өнөөдөр /2024.07.10/-ны өдрийн 14:00 цагийн байдлаар Улаанбаатар хотын Туул гол дагуу иргэдийн зорчих хөдөлгөөн бага байна.

ҮНДЭСНИЙ ИХ БАЯР НААДМЫН ӨДРҮҮДЭД ТОМООХОН ХУДАЛДАА, ҮЙЛЧИЛГЭЭНИЙ ГАЗРУУДЫН АЖИЛЛАХ ЦАГИЙН ХУВААРИЙГ ХҮРГЭЖ БАЙНА

ЕРӨНХИЙЛӨГЧИЙН ЗАРЛИГААР ӨНӨӨДРӨӨС ЭХЛЭН “УЛААНБААТАР” ЦЭЦЭРЛЭГТ ХҮРЭЭЛЭНД ТӨРИЙН ДАЛБАА БАЙНГА МАНДАЖ ЭХЭЛЛЭЭ

Төрийн далбаандаа хүндэтгэлтэй хандах, байнга мандуулж байх үүднээс Монгол Улсын Ерөнхийлөгч Ухнаагийн Хүрэлсүх Төрийн бэлгэ тэмдгийн тухай хуульд нэмэлт оруулах тухай хуулийн төсөл санаачлан боловсруулсныг өнгөрсөн тавдугаар сард УИХ-ын чуулганаар хэлэлцэн баталсан юм. Хуультай холбогдуулан Төрийн тэргүүн үндэсний эв нэгдлийг бэхжүүлэх, эх оронч үзлийг төлөвшүүлэх, төрт ёс, түүхэн уламжлалаа хойч үедээ өвлүүлэн үлдээх, эх орноороо бахархах, улс орноо сурталчлах зорилгоор ард түмний түүхэн уламжлал, хүсэл тэмүүлэл, эв нэгдэл, шударга ёс, цог хийморийн илэрхийлэл болсон Төрийн далбааг нийслэл Улаанбаатар хотноо байнга мандуулж байх зарлиг буулгасныг Ерөнхийлөгчийн Хэвлэлийн төлөөлөгч Ө.Золбаяр уншиж сонордууллаа. Өнөөдөр тохиож байгаа “Төрийн далбааны өдөр”-өөр дээрх зарлигийн дагуу Төрийн далбааг хүндэтгэлтэйгээр залж, “Улаанбаатар” цэцэрлэгт хүрээлэнд байнга мандуулж байх ёслол боллоо. Ерөнхийлөгч У.Хүрэлсүх энэ үеэр хэлсэн үгэндээ, “Өнөөдрөөс Монгол Улсын тусгаар тогтнол, бүрэн эрхт байдал, монголчууд бидний эв нэгдлийн бэлгэ тэмдэг, монгол төрийн сүр хүч болсон Төрийн далбаа нийслэл хотноо өнө мөнхөд мандах боллоо. Мөнх тэнгэрийн хүчин дор Монгол Улс мандан бадрах болтугай” гэлээ. Ийнхүү өнөөдрөөс “Улаанбаатар” цэцэрлэгт хүрээлэнд 60 метрийн өндөрт 16х8 хэмжээтэй Төрийн далбаа байнга мандаж эхэллээ. Ёслолд УИХ-ын дарга Д.Амарбаясгалан, Монгол Улсын Ерөнхий сайд Л.Оюун-Эрдэнэ, албаны бусад хүн оролцлоо. Төрийн бэлгэ тэмдгийн тухай хуулийн дагуу Төрийн далбааг байнга мандуулах газар, байршлыг Монгол Улсын Ерөнхийлөгч тогтоож, Ерөнхийлөгч, Улсын Их Хурлын дарга, Ерөнхий сайд нар улс орноо сурталчлах, эх оронч үзлийг төлөвшүүлэх зорилгоор Төрийн далбааг иргэн, хуулийн этгээдэд гардуулж өгөх боломжтой болсон юм. Монгол Улс 2008 онд Төрийн далбааны өдөртэй болгохыг хуульчлан 2009 оноос хойш ёсчлон мандуулж байна.

ГОЛ, НУУР, УСНЫ ОСЛООС УРЬДЧИЛАН СЭРГИЙЛЭХИЙГ АНХААРУУЛЖ БАЙНА

Зуны урин дулаан цагт иргэдийн амралт зугаалгын үе эхэлж гэр бүл, найз нөхдөөрөө байгалийн сайханд цагийг өнгөрүүлэхээр хөдөө орон нутагт зорчих, орон нутгийн иргэд гол усны эрэг дагуу зусдаг. Энэ үедээ иргэдийн анхаарал болгоомжгүй байдлаас шалтгаалан бага насны хүүхэд усанд живж амь нас эрсдэх тохиолдол цөөнгүй бүртгэгддэг. Энэ төрлийн осол жилээс жилд нэмэгдэж байна. Тухайлбал, Энэ оны эхний 6 сард 12 хүүхдийн амь нас хохирсон бол 7 сарын эхний 10 хоногт 5 хүүхдийн амь нас хохирсон харамсалтай үйл явдлууд боллоо. Амь насаа алдаж байгаа хүүхдүүд 2-15 насны хүүхдүүд байх бөгөөд эцэг эх нь хамт байсан, бага насны хүүхэд гэрийнхээ ойр урсах голд живсэн, тогтоол ус, бассейнд сэлж сурсан хүүхэд байх жишээний олон шалтгаан тогтоогдож байна. Иймд иргэд та бүхэн гол мөрний ойр орчим амарч зугаалах, зорчихдоо өөрсдийн болон үр хүүхдийнхээ аюулгүй байдлыг ханган дараах зөвлөмжийг хэрэгжүүлэхийг цагдаагийн байгууллагаас зөвлөж байна. 1.Архи согтууруулах ундааны зүйл хэрэглэсэн үедээ гол, нууранд сэлэхгүй байх; 2.Хүүхдийг харгалзах хүнгүйгээр гол мөрөн, тогтоол усны орчимд тоглуулахгүй, ганцаар орхихгүй, тэдэнд усанд осолдох эрсдэлийг энгийн, ойлгомжтой үгээр хэлж ойлгуулах; 3.Цаг агаарын мэдээтэй тогтмол танилцаж, аяллын цаг хугацааг зөв сонгон, салхи шуургатай үед болон түргэн урсгалт голын усанд сэлэхээс зайлсхийх, 4.Малчид, тээврийн хэрэгслийн жолооч та бүхэн гол мөрний усны түвшин нэмэгдсэн, бороотой үед баталгаат гүүр,тэмдэглэгээ бүхий гарц, гармаар зорчихыг цагдаагийн байгууллагаас анхааруулж байна.

ЕРӨНХИЙ САЙД Л.ОЮУН-ЭРДЭНЭ ЗАСГИЙН ГАЗРЫН ГИШҮҮДЭЭ ТОМИЛЛОО

Монгол Улсын 33 дахь Ерөнхий сайд Л.Оюун-Эрдэнэ Засгийн газрын гишүүнийг томилох тухай захирамжид гарын үсэг зурах ёслолын ажиллагаа боллоо. Монгол Улсын Үндсэн хуулийн Гучин есдүгээр зүйлийн 4 дэх хэсэг, Монгол Улсын Засгийн газрын тухай хуулийн 23 дугаар зүйлийн 1 дэх хэсгийн 2-т “Засгийн газар Ерөнхий сайд, гишүүдээс бүрдэнэ, Засгийн газрын гишүүнийг Улсын Их Хурал, Ерөнхийлөгчид танилцуулснаар Ерөнхий сайд томилж, чөлөөлж, огцруулна” гэж заасан бүрэн эрхийн хүрээнд Ерөнхий сайд Л.Оюун-Эрдэнэ дараах хүмүүсийг Монгол Улсын Засгийн газрын гишүүнээр томиллоо. Засгийн газрын бүтэц болон Засгийн газрын бүрэлдэхүүний тухай хуулиар Засгийн газрын бүрэлдэхүүнийг 22 сайд, 16 яамтай байхаар баталсан юм. 1.Монгол Улсын Засгийн газрын гишүүн-Монгол Улсын Тэргүүн Шадар сайд бөгөөд Эдийн засаг, хөгжлийн сайдаар Лувсаннямын Гантөмөр 2.Монгол Улсын Засгийн газрын гишүүн-Монгол Улсын Шадар сайдаар Тогмидын Доржханд 3.Монгол Улсын Засгийн газрын гишүүн-Монгол Улсын Шадар сайдаар Сайнбуянгийн Амарсайхан 4.Монгол Улсын Засгийн газрын гишүүн-Монгол Улсын сайд, Засгийн газрын Хэрэг эрхлэх газрын даргаар Ням-Осорын Учрал 5.Монгол Улсын Засгийн газрын гишүүн-Монгол Улсын сайд, Хяналт, үнэлгээний Үндэсний хорооны даргаар Эрдэнэбилэгийн Одбаяр 6.Монгол Улсын Засгийн газрын гишүүн-Монгол Улсын сайд, 20 минутын хот Үндэсний хорооны даргаар Равжихын Эрдэнэбүрэн 7.Монгол Улсын Засгийн газрын гишүүн-Монгол Улсын сайд, Боомтын сэргэлтийн Үндэсний хорооны даргаар Буяагийн Тулга 8.Монгол Улсын Засгийн газрын гишүүн-Гадаад харилцааны сайдаар Батмөнхийн Батцэцэг 9.Монгол Улсын Засгийн газрын гишүүн-Сангийн сайдаар Болдын Жавхлан 10.Монгол Улсын Засгийн газрын гишүүн- Хууль зүй, дотоод хэргийн сайдаар Оюунсайханы Алтангэрэл 11.Монгол Улсын Засгийн газрын гишүүн-Аж үйлдвэр, эрдэс баялгийн сайдаар Цэвэгдоржийн Туваан 12.Монгол Улсын Засгийн газрын гишүүн-Батлан хамгаалахын сайдаар Сандагийн Бямбацогт 13.Монгол Улсын Засгийн газрын гишүүн-Байгаль орчин, уур амьсгалын өөрчлөлтийн сайдаар Салдангийн Одонтуяа 14.Монгол Улсын Засгийн газрын гишүүн-Боловсролын сайдаар Пүрэвсүрэнгийн Наранбаяр 15.Монгол Улсын Засгийн газрын гишүүн-Гэр бүл, хөдөлмөр, нийгмийн хамгааллынсайдаар Лувсанцэрэнгийн Энх-Амгалан 16.Монгол Улсын Засгийн газрын гишүүн-Зам, тээврийн сайдаар Борхүүгийн Дэлгэрсайхан 17.Монгол Улсын Засгийн газрын гишүүн-Соёл, спорт, аялал жуулчлал, залуучуудын сайдаар Чинбатын Номин 18.Монгол Улсын Засгийн газрын гишүүн-Хот байгуулалт, барилга, орон сууцжуулалтын сайдаар Жамбын Батсуурь 19.Монгол Улсын Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдаар Жадамбын Энхбаяр 20.Монгол Улсын Засгийн газрын гишүүн-Цахим хөгжил, инновац, харилцаа холбооны сайдаар Цэндийн Баатархүү 21.Монгол Улсын Засгийн газрын гишүүн-Эрчим хүчний сайдаар Баттогтохын Чойжилсүрэн 22.Монгол Улсын Засгийн газрын гишүүн-Эрүүл мэндийн сайдаар Тогтмолын Мөнхсайхан нарыг тус тус томиллоо.

“ТҮР ХҮРЭЭ” БАЙГУУЛАГДАЖ, 1080 АЛБА ХААГЧ ҮҮРЭГ ГҮЙЦЭТГЭЖ БАЙНА

Монголын ард түмний түүх, соёлын дархлааны илэрхийлэл болсон Тулгар төрийн 2233, Их Монгол Улсын 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмыг тохиолдуулан цагдаа, дотоодын цэргийн анги, байгууллагын алба хаагчид өндөржүүлсэн бэлэн байдлын зэрэгт шилжин ажиллаж байна. Үүнтэй холбогдуулан Цагдаагийн ерөнхий газрын дарга, Дотоодын цэргийн командлагчийн тушаалаар “Хүй долоо худаг”-т “Түр хүрээ” байгуулагдаж, 35 анги, байгууллагын 1080 алба хаагч гэмт хэрэг зөрчил, зам тээврийн осол, зөрчил, иргэд, уралдаанч хүүхдийн аюулгүй байдлыг хангах, бага насны хүүхдийг төөрөх зэрэг болзошгүй эрсдэлээс урьдчилан сэргийлэх чиглэлээр ажиллаж байна.

УИХ-ЫН ГИШҮҮН Ч.УНДРАМЫГ БОЛОВСРОЛ, СОЁЛ, ШИНЖЛЭХ УХААН, СПОРТЫН БАЙНГЫН ХОРООНЫ ДАРГААР СОНГОХЫГ ДЭМЖЛЭЭ

УИХ-ын байнгын хороод хуралдаж дарга нараа сонгож байна. УИХ-ын Боловсрол, соёл, шинжлэх ухаан, спортын байнгын хороо хуралдаж, хуралдаанд оролцсон гишүүдийн 71.4 хувийн саналаар УИХ-ын гишүүн Ч.Ундрамыг тус байнгын хорооны даргаар сонгохыг дэмжлээ.