ЗХЖШ:123 ДУГААР АНГИЙН 24 АЛБА ХААГЧ СҮРЬЕЭ ТУССАН

Ховд аймгийн Жаргалант суманд байрлах Зэвсэгт хүчний 123 дугаар ангийн алба хаагчид сүрьеэ өвчнөөр өвдсөн талаар мэдээлэлд тайлбар өглөө. Энэ талаар ЗХЖШ-аас “Монгол Улс сүрьеэ өвчний тархалт өндөр бүс нутгийн нэг. Монголд жилд 3000-4000 хүн уг өвчнөөр өвддөг гэх тооцоо бий. Зэвсэгт хүчний 123-р ангид илэрсэн сүрьеэгийн өвчлөлийн эхний тохиолдол болох алба хаагч цэргийн албанд ирэхээсээ өмнө сүрьеэ өвчнөөр өвдсөн үеэлтэйгээ амьдардаг байсан. Цэргийн албанд татагдахдаа тухайн алба хаагчийн өвчлөл нууц үедээ байсан. Тус ангид сүрьеэ өвчний идэвхгүй хэлбэрийн 24 тохиолдол бүртгэсэн. Сүрьеэгийн халдварын голомтод байсан хүмүүсийг заавал эмчилгээнд хамруулах, эмчилгээ хийх ёстой. Сүрьеэгээр идэр насны залуус өвдөх магадлал өндөр байдаг. Цэргийн алба хаагчид нэг хуаранд амьдардаг. Тухайн цэрэгтэй ойр байсан алба хаагч нарын дийлэнх нь өвдсөн байна. Уг өвчний нууц үе зургаан сар хүртэл үргэлжлэх нь бий. Цэргийн алба хаагч нарыг цээжний рентген зургийг авдаг. Үүгээр илрээгүй. Монгол хүний 90 хувь нь сүрьеэгийн нян тээдэг. Гадаад, дотоод маш олон шалтгаанаар өвчлөл хүндэрдэг. Нууц үед оношлогдсон алба хаагчид халдвар тараахгүй. Цэрний шинжилгээ нь сөрөг гарсан. Хамгийн анхны тохиолдол болсон цэрэг ковид-19 халдвараар өвдөж биеийн байдал нь хүндэрсэн тул сүрьеэгээр өвдсөн байх магадлалтай хэмээн нарийн шинжилгээнд хамруулсан. Ингээд өвдсөн нь тогтоогдсон” гэв.

АМИА АЛДСАН ЦЭРГИЙН АСУУДАЛД ТУС АНГИЙН УДИРДЛАГУУДАД АРГА ХЭМЖЭЭ АВЧЭЭ

Өмнөговь аймагт хугацаат цэргийн алба хаагч өндөр барилгаас унаж амиа алдсан . Зэвсэгт хүчний жанжин штабын хэвлэлийн төлөөлөгч Б.Отгонбаяр: "Зэвсэгт хүчний 167-р ангид хугацаат цэргийн алба хаагч албаа хааж байхдаа харамсалтайгаар амь насаа алдсан хэрэг гарсан. Талийгаачийн аав, ээж төрөл төрөгсдөд дахин гүн эмгэнэл илэрхийлье. Өнгөрсөн хугацаанд тус ангид Зэвсэгт хүчний хяналт шалгалт, үнэлгээний газраас шалгалт хийж, хэргийн мөрөөр тодорхой арга хэмжээг авч хэрэгжүүлж байна. Үүнтэй холбоотой хууль тогтоомжийн дагуу удирдлагуудын дараах тушаал гарсан. 1. 2022 оны долоодугаар сарын 22-ны тушаалаар Зэвсэгт хүчний 167-р ангийн захирагчийг өнөөдрөөр буюу долоодугаар сарын 25-ны өдрөөр тасалбар болгож, албан тушаалаас нь чөлөөлсөн. 2. Зэвсэгт хүчний хуурай замын цэргийн командлагчийн тушаалын дагуу тус ангийн захирагчийн нэгдүгээр орлогч, штабын даргаар ажиллаж байсан албан тушаалтныг төрийн албанаас халж, сахилгын шийтгэл оногдуулсан. 3. Зэвсэгт хүчний 167-р ангийн нэгжийн захирагч болон ахлах ахлагч нарыг халж, албан тушаалаас нь чөлөөлсөн. Талийгаачийн нас барсан шалтгааныг тодруулахаар Өмнөговь аймгийн цагдаагийн газар ажиллаж байгаа ба цагдаагийн дүгнэлт гараагүй учир дэлгэрэнгүй мэдээлэл өгөх боломжгүй байна. Сүүлийн үед энэ талаарх худал мэдээлэл цахим орчинд тархаж байна" хэмээв .

ЦЭЦЭРЛЭГИЙН ЗОРИУЛАЛТТАЙ БАРИЛГА ХУДАЛДАН АВАХ, ТҮРЭЭСЛЭХ ЖУРМААР 22 МЯНГАН ХҮҮХДИЙГ СУРАЛЦУУЛНА

2022-2023 оны хичээлийн жилээс нийслэл Улаанбаатар хотын цэцэрлэгийн насны хүүхдийг хамран сургах тойргийн цэцэрлэгт бүрэн хамруулах, цэцэрлэгийн хүртээмжийг нэмэгдүүлэх зорилгоор холбогдох хууль тогтоомжид нийцүүлэн арга хэмжээг авч хэрэгжүүлэхийг үүрэг болгосон. Энэ хүрээнд цэцэрлэгийн хүртээмжийг нэмэгдүүлэх нийслэл дэх ажлын хэсэг хуралдаж, түрээслэх, худалдан авах цэцэрлэгийн барилга, объектуудын талаар хэлэлцлээ. Хотын удирдлагууд есдүгээр сараас эхлэн хүүхдүүдийг сугалаагүйгээр цэцэрлэгт хамруулахын тулд нийслэл Улаанбаатар хотын зүгээс бүх боломжоор ажиллаж байгаагаа илэрхийлж байлаа. Уулзалтын үеэр Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө: -Цэцэрлэгийн хүртээмжийг нэмэгдүүлэх чиглэлээр Боловсрол, шинжлэх ухааны сайд Л.Энх-Амгалангаар ахлуулсан Ажлын хэсэг ажиллаж байгаа. Нийслэлд мөн Ажлын хэсэг байгуулж, Боловсрол, шинжлэх ухааны сайдад үр дүнг танилцуулахаар Ажлын хэсгийн хурлыг хийж байна. Одоогийн байдлаар нийслэл Улаанбаатар хотод 34 мянган хүүхэд цэцэрлэгт хамрагдаж чадаагүй байна. Үүний улмаас хамран суралцах асуудал их хөндөгдөж байна. Л.Энх-Амгалан сайд манлайлж, нийслэлийн зүгээс миний бие түрээслэх, худалдан авах объектийг судалж байгаа. Энэ жилийн хувьд цэцэрлэгийн зориулалттай барилга объект худалдан авах болон түрээслэх журмаар 22 мянган хүүхдийг суралцуулахаар болж байна. Үлдсэн хүүхдүүдийг гэр цэцэрлэг, хүүхэд харах үйлчилгээнд хамруулах гэх мэт шийдлүүдийг эрэлхийлж байгаа. Засгийн газраас өгсөн чиглэлийн дагуу есдүгээр сараас хүүхдүүдийг сугалаагүйгээр цэцэрлэгт хамруулахын тулд нийслэлийн зүгээс бүх боломжоор хангахаар ажиллаж байна. Боловсрол, шинжлэх ухааны сайд Л.Энх-Амгалангаар ахлуулсан ажлын хэсэг өнгөрсөн долоо хоногт Хан-Уул, Баянгол, Сүхбаатар дүүрэгт ажилласан. Энэ долоо хоногт бусад дүүргүүдэд хуваарь гарган ажиллана. Цэцэрлэгийн зориулалттай 14 объект худалдаж авах төлөвлөгөө гарсан. Үлдсэн объектийг түрээсэлнэ. Мянган хүнтэй орон сууцны хорооллын нэг айлд нэг бага насны хүүхэд байна гэж тооцоход 200 хүүхдийн цэцэрлэгийг заавал барьж байгуулах норм, стандарт бий. Барилгын компаниуд тодорхой норм, стандартын дагуу зургаа батлуулж, ажил болгодоггүй олон жишээ байна. Иймд хотын зүгээс норм стандартад өөрчлөлт оруулах, хангуулах, цэцэрлэггүй орон сууцны хорооллыг Улсын комисс хүлээж авахгүй байх хатуу шаардлага тавина. Нийгмийн хариуцлагын хүрээнд барилгын компаниуд хариуцлагатай байж, нийслэлийн удирдлагуудын зүгээс хүүхдүүд, иргэдийнхээ төлөө норм журмыг мөрдүүлэхийн төлөө ажиллана” хэмээн өгүүллээ.

ЖИЖИГ ДУНД БИЗНЕС ЭРХЛЭГЧДИЙГ ХЭРХЭН ДЭМЖСЭНЭЭ ТАЙЛАГНАДАГ ТОГТОЛЦООТОЙ БОЛНО

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэнгээр ахлуулсан Ажлын хэсэг өнөөдөр Нийслэлийн Жижиг, дунд үйлдвэр, үйлчилгээг дэмжих төв НӨҮГ-т ажиллаж, жижиг, дунд, үйлдвэр, үйлчилгээ эрхлэгчдэд тулгамдаж буй асуудал, шийдлүүдийг хэлэлцлээ. Мөн энэ хүрээнд нийслэлийн удирдлагууд, харьяа байгууллагууд хамтран ажиллах арга замууд, төр хувийн хэвшлийн түншлэлийн хүрээнд явуулах үйл ажиллагаа зэрэг асуудлын талаар ярилцсан юм. Уулзалтын үр дүнд нийслэлийн худалдан авах ажиллагаанд жижиг, дунд, үйлдвэр, үйлчилгээ эрхлэгчдийн бүтээгдэхүүний эзлэх хувийг тогтмол гаргаж, аж ахуйн нэгжүүдэд тайлагнахаар болжээ. Энэ үеэр Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн “Улаанбаатар хотын эдийн засгийн дийлэнх хувийг үйлдвэрлэл биш, худалдаа давамгайлж байна. Шинээр бизнес эрхэлж буй залуусын дийлэнх нь борлуулалт хийх бодолтой байна. Мөн төрийн зүгээс үйлдвэрлэгчдийг дэмжиж байна гээд зөвхөн нэг агентлаг, яамд үүрэг өгч, биелэлт нэхэхээс илүүтэй иргэдэд үйлдвэрлэгч сэтгэхүй бий болгох нь чухал. Төрийн бүх байгууллагын бодлогод энэ талаар тусгах хэрэгтэй. Манайд импортоор бараа оруулж ирэх, тодорхой хэмжээний үнэ нэмж, худалдах хялбар схем явж байна. Түүнчлэн тодорхой хаалт тавиад үндэсний бараа бүтээгдэхүүнийг худалдан авалтыг зогсоож байна. Тухайлбал, эрүүл мэндийн хамгаалалтын хэрэгслүүдэд тавьсан стандартын улмаас дотоодын үйлдвэрлэгчдийг зогсоож, гаднаас бүтээгдэхүүн худалдан авахад хүрсэн. Мөн түлшний уутны олон тэрбум төгрөгийн оёдлын зардлыг БНХАУ-ын үйлдвэр лүү явуулж байна. Төрийн худалдан авалтын тухай хуулийн заалт ч үйлдвэрлэл эрхлэгчдэд хязгаарлалт болж, аж ахуйн нэгжийн орлого олох боломжийг хааж байна. Иймд төрийн байгууллагуудын худалдан авалт, үйл ажиллагаа бүрд жижиг, дунд, үйлдвэр, үйлчилгээ эрхлэгчид, үндэсний үйлдвэрлэлээ дэмжсэн хэлбэрийг шингээж, түүнийгээ тайлагнадаг болгох хэрэгтэй. Тухайн тайланг аж ахуйн нэгжийн төлөөлөлд эргэн тайлагнах тогтолцоог бий болгох, үндсийг тавихаар хэлэлцсэнээрээ үр дүнтэй уулзалт боллоо” хэмээв. Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын дарга Г.Гангамөрөн “Өнөөдрийн хэлэлцүүлгээр хүнсний хангамж нөөцийг Улаанбаатар хотын хэмжээнд жижиг, дунд, үйлдвэр, үйлчилгээ эрхлэгчид хэрхэн бүрдүүлж болох вэ гэдгийг хэлэлцэж, нийслэлээс юуг анхаарч, хэрхэн дэмжих вэ гэдгийг ярилцсан. Жижиг, дунд, үйлдвэр, үйлчилгээ эрхлэгчдийн 95 хувь нь цар тахлын шууд нөлөөнд өртсөн. Энэ хүндрэлийг даван туулах, санхүүгийн дэмжлэгийг зөв хүртээмжтэй хүргэх шийдлүүдийг хэлэлцсэн. Түүнчлэн төрийн худалдан авалтад жижиг, дунд, үйлдвэр, үйлчилгээ эрхлэгчдийн бараа бүтээгдэхүүнийг хамруулах, зөв уялдаа холбоог хангах тал дээр шийдлүүдийг гаргасан. Жижиг, дунд, үйлдвэр, үйлчилгээ эрхлэгчдийн бараа бүтээгдэхүүнээс төрийн худалдан авалт хийе гэсэн шийдэлд хүрлээ. Зах зээл дээрх бараа бүтээгдэхүүн чанаргүй, үнэтэй, түүхий эдийн нөөц бололцоо дутмаг гэсэн дүгнэлт гарсан. Иймд жижиг, дунд, үйлдвэр, үйлчилгээ эрхлэгчдийн сургалт, хөгжүүлэлтэд онцгой анхаарах хэрэгтэй. Энэ хүрээнд нийслэлийн хэмжээнд хэрхэн зохион байгуулах шийдлүүдийг хэлэлцсэн. Төрийн худалдан авалт буюу нийслэлийн худалдан авах ажиллагааны жагсаалтыг гаргаж жилийн эцэст нийслэлийн худалдан авах ажиллагааны хэдэн хувийг жижиг, дунд, үйлдвэр, үйлчилгээ эрхлэгчдийн бүтээгдэхүүн эзэлж байна вэ гэдэг тайланг гаргахаар боллоо” хэмээн өгүүллээ.

ӨМНӨГОВЬ АЙМГИЙН БУЛГАН СУМЫН ТҮҮХТ 70 ЖИЛИЙН ОЙН БАЯР НААДАМ ӨРГӨН ДЭЛГЭР БОЛЖ БАЙНА

ӨМНӨГОВЬ АЙМГИЙН БУЛГАН СУМЫН ТҮҮХТ 70 ЖИЛИЙН ОЙН БАЯР НААДАМ ӨРГӨН ДЭЛГЭР БОЛЖ БАЙНА Түүхт 70 жилийн ойн баяр наадамд УИХ-ын гишүүн Д.Бат-Эрдэнэ, аймгийн Засаг дарга Р.Сэддорж, аймгийн ИТХ-ын төөлөлөгч МУ-ын Тод манлай уяач Н.Хүрлээ нар ирж наадамчин олонд баяр хүргэж хүндэтгэл үзүүллээ. Булган сумын баяр наадмын хүчит бөхийн барилдаанд 64 бөх зодоглосоноос Улсын цолтой 7 бөх ирж зодоглолоо. Баяр наадмын бөхийн барилдааныг Улсын заан Ц.Одбаяр, Улсын начин Б.Сумьяа нар манлайлан барилдаж байна. Хурдан 6 нас, Жороо морьдын уралдаан болж байгаагаас баяр наадмын эхний өдөр хурдан Азарга, Их насны морьдын уралдаан болж түрүү магнайд Булган сумын хурдууд тэргүүлж байна. Сурын харваанд Улс аймгийн цолтой цэц мэргэн харваачид ирж оролцож байна. Энэ жил тэгш ой Өмнөговь аймгийн хэмжээнд Булган суманд тохиож байгаа юм. Баяр наадамд Булган нутгийн ард түмэн хол ойроос зорин ирж өргөн дэлгэр наадамлаж байна..

“U TRAVEL” АЯЛАГЧДАА ХЭРХЭН ХОХИРООСОН БЭ ?

УС ЗАЙЛУУЛАХ ШУГАМЫН 70 ХУВЬ НЬ НАСЖИЛТ ХЭТЭРСЭН

Өмнөх жилүүдэд үерийн дуудлага ихээр ирж, гол болон туслах зам дээр их хэмжээний ус тогтдог байсан. Өмнөх жилүүдэд үерийн дуудлага ихээр ирж, гол болон туслах зам дээр их хэмжээний ус тогтдог байсан. Уг аюул, эрсдэлийг бууруулахын тулд нийслэлийн зүгээс ус зайлуулах шугам сүлжээг угсрах, шинэчлэх ажлыг үе шаттайгаар хийж байгаа. Тус ажлуудыг амжилттай хийж гүйцэтгэснээр үерийн дуудлага, гамшгийн эрсдэл буурсан. Улаанбаатар хотод буй замын ус зайлуулах 209 км шугамын 70 хувийнх нь насжилт хэтрээд байна. Мөн далан, сувгуудыг 1960, 1970 онд барьсан тул хуучирч, муудсан. Иймд тэдгээр 163 км далан, сувгийн засвар, шинэчлэлийг үе шаттайгаар хийхгүй бол үерээс хамгаалах бус, илүү дор нөхцөл байдал үүсэх эрсдэлтэй аж.

"ХУРД" ХОРООЛОЛЫН ДЭЭВРЭЭС ТӨМӨР УНАЖ БУСДЫН ЭД ХӨРӨНГӨД ХОХИРОЛ УЧРУУЛЖЭЭ

Хан-Уул дүүргийн 15-р хороо, Төв цэнгэлдэх хүрээлэнгийн урд талын "Хурд" хорооллын 28-р байрны дээврийн нимгэн төмөр өчигдөр /2022.07.21/ оройны 20.00 цагийн орчимд унасан байна. Ингэхдээ 28-р байрны зогсоолд байрлуулсан хар өнгийн Приус, цагаан өнгийн Вангуард маркын авто машин дээр унаж, багагүй хохирол учруулжээ. Хэдийгээр хүн бэртэж гэмтсэн тохиолдол гараагүй ч төмөр унасан байрны 1-р давхарт хүнсний дэлгүүр байрладаг ба хүн өртөх магадлал өндөр байсан . 3 жил дараалан Хурд хороололд болж байна. Өнгөрсөн жилийн хавар хүүхдийн тоглоомын талбай руу 12 давхараас тагтны хаалт хагарч, унасан тохиолдол гарч байсан.

ХӨСҮТ: ИРЭХ САРААС 5-11 НАСНЫ ХҮҮХДҮҮДИЙГ КОВИДЫН 2 УДААГИЙН ТУНГААР ДАРХЛААЖУУЛНА

Омикроны BA4, BA5 хувилбараар өвдсөн тохиолдолд хоолой өвдөх, халуурах, үе мөч өвдөх, тасралтгүй ханиалгах зэрэг шинж тэмдэгүүд нийтлэг илэрч байна. Тандалт, судалгааны албанаас хүмүүсийн эмнэлзүйн шинж тэмдгийг судалж үзжээ. Ингэхэд хоолой өвдөх 58 хувь, хуурай ханиалгах 56.3 хувь, толгой өвдөх 41.8 хувь, хоолой сэрвэгнэх шинж тэмдэг 41.4 хувь нь илэрсэн аж. Харин бага насны хүүхдүүдэд хоол боловсруулах замын хямралууд болох бөөлжих, суулгах зэрэг зовуурь 4-6 хувьд нь илэрч байна гэлээ. Наймдугаар сарын 1-нээс 5-11 насны хүүхдийг сарын зайтай хоёр удаагийн тунгаар дархлаажуулна.

КОВИД-19 ТОХИОЛДОЛ ЦААШИД НЭМЭГДЭХ ХАНДЛАГАТАЙ БАЙНА

Монгол улсад сүүлийн 24 цагийн дотор Ковид-19-ийн 308 тохиолдол бүртгэгдсэн байна.Үүнээс нийслэл хотод шинээр 186 тохиолдол илэрсэн юм.Цаашид цар тахлын нөхцөл байдал хүндрэх эрсдэлтэй тул Вакцины 1, 2-р тунд хамрагдсан иргэдийг 3 болон 4-р дүгээр тундаа хамрагдахыг ЭМЯ-наас анхааруулж байна.Энэ нь мутацид орж буй Ковид-19-ийн ВА4, ВА5 хэлбэрээр дэлхийн хүн амын 5-15 хүртэлх хувь нь өвчлөх эрсдэлтэйг ДЭМБ-аас зарласантай холбогдуулан урьдчилан сэргийлэх зорилгоор авч хэрэгжүүлж буй арга хэмжээ юм. Иймд нийт иргэд амны хаалтаа зүүж, өөрийн гэр орон болоод ажлын байрны агааржуулалтыг сайжруулан дор бүртээ Витаминлаг хоол хүнс хэрэглэхийг уриалж байна. Одоогоор нийт халдвар авсан хүний тоо 935,360 болсон бол 2119 хүн коронавируст халдвартайгаар нас бараад байна.