МЭДРЭЛИЙН ЁЗООР ТАЙРАХ ХАГАЛГААГ МАНАЙ УЛС АМЖИЛТТАЙ НЭВТРҮҮЛЛЭЭ

09 / 05 0 сэтгэгдэл 600 үзсэнe

Манай улс мэдрэлийн ёзоор тайрах хагалгааг Турк улсын эмч нарын дэмжлэгтэйгээр эх орондоо нэвтрүүлж чадлаа. ЭХЭМҮТ-д нийт 230 саа саажилттай хүүхдийг мэдрэлийн, мэдрэлийн мэс заслын, сэргээн засахын эмч нарын хамтарсан үзлэгт наймдугаар сард багтаан хамруулсан аж. Мөн есдүгээр сарын 1-3 хооронд 38 хүүхдэд үзлэг оношилгоо хийж, долоон хүүхдэд хагалгааны заалттай болохыг тогтоосон бөгөөд эхний ээлжид таван хүүхдэд мэдрэлийн ёзоор тайрах хагалгааг хоёр өдрийн турш турк болон монгол эмч нарын багш хамтран Улсын Гуравдугаар Төв эмнэлэгт амжилттай хийжээ. Эрүүл мэндийн сайд С.Энхболд хэлэхдээ "Эрүүл мэндийн сайдын хувьд салбарын эмч мэргэжилтэн, яамны удирдлагын багтайгаа хамтран уналт таталт, саа саажилттай хүүхдүүдийн эмчилгээний асуудлыг цогцоор шийдвэрлэх зорилго тавин ажиллаж байгаа билээ. Энэ хүрээнд гадаад оронд хийлгэх шаардлагатай байсан мэдрэлийн ёзоор тайрах хагалгааг эх орондоо нэвтрүүлэх зорилго тавин ажлаа эхлүүлсэн юм. Мэдрэлийн, мэдрэлийн мэс заслын, мэдээгүйжүүлэг унтуулгын, сэргээн засахын эмч, сувилагч, мэргэжилтнүүдээс бүрдсэн мэдрэлийн ёзоор тайрах хагалгааг Монгол Улсад нэвтрүүлэх мэргэшсэн үндэсний багийг бий болгох тушаалыг гаргаж, ажлаа эхлүүлсэн. ЭХЭМҮТ-д нийт 230 саа саажилттай хүүхдийг мэдрэлийн, мэдрэлийн мэс заслын, сэргээн засахын эмч нарын хамтарсан үзлэгт наймдугаар сард багтаан хамрууллаа. Есдүгээр сарын 1-3 хооронд Турк улсын Лийв эмнэлгийн эмч мэргэжилтний багтай хамтран 38 хүүхдэд үзлэг оношилгоо хийж, долоон хүүхдэд хагалгааны заалттай болохыг тогтоов. Ингэснээр эхний ээлжид нэн шаардлагатай хагалгаанд орох заалттай таван хүүхдэд мэдрэлийн ёзоор тайрах хагалгааг хоёр өдрийн турш Турк улсын эмч нарын багтай хамтран УГТЭ дээр Монголын эмч мэргэжилтнүүд хийж дууслаа. Цаашид хагалгаанд орсон хүүхдүүдийн сэргээн засах эмчилгээг ЭХЭМҮТ-д үргэлжлүүлэн хийх бэлтгэлээ хангасан. Ийнхүү Монгол Улсад дахин нэг шинэ эмчилгээний технологийг эрүүл мэндийн салбар багаараа нэвтрүүлж чадлаа. Гадаадад очин эмчлүүлэхэд үүсдэг аливаа хүндрэлүүд, тэр дундаа гадаадад хийгддэг хагалгааны зардлаас ойролцоогоор дөрөв дахин хямд хийгдэх боломж бүрдэж байгаа нь иргэдийн санхүүгийн асуудалд маш том хөнгөлөлт болж чадна. ЭМЯ цаашид уг хагалгааг төгс нэвтрүүлэхийн тулд гадаадаас дараагийн багийг урьж авчрах, эмч мэргэжилтнүүдээ тасралтгүй сургахад анхаарна. Бидний урилгыг хүлээн авч, хамтран ажиллаж буй Лийв эмнэлгийн багийг 20 жилийн туршлагатай мэдрэлийн мэс засалч профессор Др.Туфан, түүний баг хамт олон болон үндэсний багийнхаа эмч, сувилагч, мэргэжилтнүүддээ талархал илэрхийлж, илүү их амжилтыг хүсье. Монгол хүн бүр эх орондоо эрүүл мэндийн тусламж үйлчилгээг авах боломжийн төлөө хичээн ажиллах болно" хэмээжээ.

Л.ЭНХ-АМГАЛАН: ХУУРАМЧ ДИПЛОМТОЙ БАГШ НАРЫГ ИРЭХ ДОЛОО ХОНОГТ ЗАРЛАНА

09 / 02 0 сэтгэгдэл 627 үзсэнe

“Нарны үрс” цэцэрлэгийн үйл ажиллагаатай танилцах үеэрээ БШУ-ны сайд Л.Энх-Амгалан “Хуурамч дипломтой багш нарыг ирэх долоо хоногт зарлах” тухайгаа мэдээллээ. Тэрбээр “Нийт 35 мянган багш нарынхаа дипломын шалгалтыг хийж дуусч байна. Ирэх долоо хоногт ЕБС-д багшилж буй хуурамч дипломтой багш нарыг зарлана. Их, дээд сургуулиудад багшилж байгаа, магистр, докторын зэрэг хамгаалсан хүмүүсийн дипломыг плагиаризмын шалгалтад хамруулж, бусдаас хулгай хийсэн, диплом нь хуурамч байгаа хүмүүсийг орон даяар зарлана” гэсэн юм.

ТОЙРГИЙНХОО ХУВИЙН ЦЭЦЭРЛЭГТ ХҮҮХДЭЭ ЯВУУЛСАН ТОХИОЛДОЛД ТӨРӨӨС ХУВЬСАХ ЗАРДЛЫГ 2 ДАХИН НЭМНЭ

09 / 02 0 сэтгэгдэл 642 үзсэнe

Дараах хорооны оршин суугчид хүүхдээ хамран сургах тойргийнхоо хувийн цэцэрлэгт явуулахаар бол төрөөс хувьсах зардлыг 2 дахин нэмэгдүүлж, хоолны зардлыг олгоно. Нэмэлт төлбөрийг эцэг эх, асран хамгаалагчид, цэцэрлэгийн удирдлагуудтай тохиролцох юм. Төрийн бус өмчийн цэцэрлэгт Засгийн газрын 91 дүгээр тогтоолын дагуу 1 хүүхдэд жилд 810,000 төгрөг буюу сард 90,000 төгрөгийн санхүүжилт олгогдохоор тусгагдсан. 2022-2023 оны хичээлийн жилд цэцэрлэгийн хүртээмжийг нэмэгдүүлэхтэй холбоотойгоор Монгол Улсын Их Хурлын 17 дугаар тогтоол, Засгийн газрын 218 дугаар тогтоолын дагуу хувьсах зардлыг 2 дахин нэмэгдүүлж, хоолны зардлын хамт олгоход 1 хүүхдэд ногдох хувьсах зардал нь жилд 1,620,000 төгрөг, хоолны зардал нь 470,250 төгрөг нийт 2,090,250 төгрөг болно. Нэг үгээр хэлбэл, 1 хүүхдэд сард 232,250 төгрөгийн хувьсах зардал олгогдохоор байна.

ЯАРМАГИЙН АВТО ЗАМД БАЙГУУЛЖ БУЙ НҮХЭН ГАРЦЫН ЯВГАН ЗОРЧИГЧДЫН ОРОХ, ГАРАХ ХЭСГИЙН БЕТОН ЦУТГАЛТЫГ ХИЙЖ БАЙНА

09 / 02 0 сэтгэгдэл 615 үзсэнe

Хан-Уул дүүрэг, Наадамчдын гудамж, Яармагийн авто замд байгуулж буй нүхэн гарцын явган зорчигчдын орох, гарах хэсгийн бетон цутгалтыг хийж байна. Тус нүхэн гарц нь нийт 37.5 метр урт, зургаан метр өргөнтэй, битүү дээвэртэй, шилэн фасадтай байхаар төлөвлөжээ. Харин явган зорчигчдын орох, гарах хэсэг нь хоёр талдаа тус бүр 39 метр урт, 5.7 метр өндөртэй байх аж. Түүнчлэн хөгжлийн бэрхшээлтэй болон дугуй унадаг иргэд зорчих боломжтой байхын тулд орц, гарцыг налуу зам болон шаттай хийж байгаа. Бороо орсон үед нүхэн гарц усанд автахаас сэргийлж ус зайлуулах, шүүрүүлэх худгийг мөн суурилуулж байна.

ШИНЭЭР АШИГЛАЛТАНД ОРОХ ХОТХОН, ХОРООЛОЛ БҮРИЙГ ЦЭЦЭРЛЭГ, СУРГУУЛЬТАЙ БАЙХ ШААРДЛАГА ТАВИНА

09 / 02 0 сэтгэгдэл 914 үзсэнe

Хотын дарга Д.Сумъяабазар өчигдөр /2022.09.01/ өөрийн цахим хуудаснаа "Улсын төсвөөс 100 тэрбум, Нийслэлийн төсвөөс 100 тэрбум төгрөг гаргаж цэцэрлэгийн хүртээмжийг нэмэгдүүллээ" хэмээн бичжээ. Түүнчлэн тэрбээр "Хүсэлт гаргасан бүх хүүхэд буюу 115 мянган хүүхэд цэцэрлэгтэй болж, өмнө нь цоожтой хаалганы цаана үлддэг байсан 38 мянган хүүхэд энэ жил цэцэрлэгт хамруулсан. Их хэмжээний хөрөнгө оруулалт, зоригтой шийдвэр гаргасны үндсэн дээр нийслэлийн хүүхэд бүр сурч боловсрох эрхээ эдлэх боломжтой болж байна. 200 тэрбум төгрөг гэдэг бол өнгөрсөн 10 орчим жилд боловсролын салбарт зарцуулж ирсэн мөнгөн дүнтэй дүйцэх хэмжээний хөрөнгө оруулалт юм. Цаашид дахин хүнд нөхцөлд орохгүй байхын тулд шинээр баригдаж байгаа хотхон, хороолол бүр стандартын дагуу сургууль, цэцэрлэгтэй байх шаардлагатай. Энэ стандартыг мөрдүүлэхэд гардаг хийдэл, хуулийн цоорхойг судалж, арилгахын төлөө ажиллаж байна" хэмээжээ.

19 НЭР ТӨРЛИЙН ХҮНСЭЭР ДОТООДЫН ХЭРЭГЦЭЭГЭЭ ХАНГАНА

09 / 02 0 сэтгэгдэл 550 үзсэнe

Төрийн тэргүүний санаачилгаар “Хүнсний хангамж-аюулгүй байдал” үндэсний хөдөлгөөнийг зарласан. Энэхүү хөтөлбөрийн хүрээнд манай улс ойрын 5 жилийн хугацаанд 19 нэр төрлийн хүнсээр дотоодын хэрэгцээгээ бүрэн хангах зорилт дэвшүүлэн ажиллаж байгаа. Ерөнхийлөгчийн зүгээс хүнсний хувьсгал хийхэд нэн тэргүүнд малыг эрүүлжүүлэх шаардлагатай тул мал эрүүлжүүлэх бодлогын зөвлөл, ажлын хэсэг байгуулж, нарийвчилсан төлөвлөгөө гаргаж ажиллах хэрэгтэй талаар уламжиллаа.

ЦЭЦЭРЛЭГИЙН ХҮҮХДИЙН ХООЛНЫ ЗАРДЛЫГ ЭЦЭГ, ЭХЧҮҮДТЭЙ ХУВААН ГАРГАХ ТАЛААР СУДАЛЖ БАЙНА

09 / 02 0 сэтгэгдэл 608 үзсэнe

Цэцэрлэгийн хүүхдийн нэг өдрийн хоолны мөнгө 2400 төгрөг байдаг. Тус мөнгөөр хүүхэд хангалттай илчлэг авч чадахгүй байгаатай эцэг эхчүүд мөн холбогдох албаны хүмүүс санал нэгддэг. Мөн энэ оны хоёрдугаар сард УИХ-ын чуулганаар төсвийн тодотгол хэлэлцэх үед тус салбарын сайд Л.Энх-Амгалан “Цэцэрлэгийн хүүхдийн хоолны мөнгийг эцэг эхтэй нь хуваалцахгүй бол, төр дангаараа нуруун дээрээ үүрч явахад хүндрэлтэй болж байна. Тиймээс цаашид хүүхдийн хоолны зардлын 50 хувийг эцэг эхээс нь гаргуулах шаардлага байна" гэж мэдээлж байсан юм. Тэгвэл цэцэрлэгийн хүүхдийн хоолны зардлын тодорхой хувийг эцэг, эхчүүдээс авах талаарх судалгааг БШУЯ-наас хийж байгаа аж. Энэ талаар БШУЯ-ны Сургуулийн өмнөх боловсролын хэлтсийн дарга Ж.Мягмараас тодруулахад "Энэ жил холбогдох байгууллагууд цэцэрлэгийн хүүхдийн хоол хүнсний чанар дээр анхаарч ажиллана. Сургуулийн өмнөх боловсролын тухай хуулинд цэцэрлэгийн хүүхдийн хоолны зардлыг эцэг, эхтэй хуваалцах боломжийг хуульчилсан байдаг. Тиймээс үүний хүрээнд манай яам судалгаа хийж байгаа" хэмээв.

НИТХ-Д ТЭГШ, СОНДГОЙГООР ҮРГЭЛЖЛҮҮЛЭН ЯВУУЛАХААР САНАЛ ОРУУЛНА

09 / 02 0 сэтгэгдэл 518 үзсэнe

Тэг зогсолт хийх эрсдэлтэй болсон учир хичээлийн шинэ жил эхэлж буйтай холбогдуулан нийслэлийн тодорхой бүсэд автомашинуудыг улсын дугаарын тэгш, сондгойгоор замын хөдөлгөөнд оролцуулж байгаа. Энэ нь дугаарын хязгаарлалт хийгээгүй байх үеийн хөдөлгөөний ачаалалтай харьцуулбал 45-50 хувиар буурсан мэдээ гарсан байна. Тэгвэл энэхүү шийдвэрийг цаашид үргэлжлүүлэх сонирхолтой байгаагаа хотын дарга Д.Сумъяабазар хэлж байгаа бөгөөд энэ асуудлыг энэ сарын 7-нд болох НИТХ-аар оруулахаар бэлтгэсэн талаар эх сурвалж мэдээллээ.

МЯНГАН ЭЭЖ АЖИЛТАЙ, ОРЛОГОТОЙ БОЛЖЭЭ

09 / 01 0 сэтгэгдэл 442 үзсэнe

Энэ жилийн хувьд нийслэлийн хэмжээнд 34 мянган хүүхдийг цэцэрлэгт хамруулах боломжоор хангаж буй. Тэгвэл хүүхдийн тоо нэмэгдэхийн хэрээр цэцэрлэгийн багшийн тоог нэмэгдүүлэх шаардлага тулгарч байгаа. Тиймээс энэ жил хүүхдээ асран гэртээ сууж буй 1000 ээжийг туслах багшийн курст суулгажээ. МУБИС тэргүүтэй сургуулиудын консерциум энэ зун хоёр ээлжээр 1000 туслах багшийг 45 хоногийн сургалтад хамруулж, бэлтгэсэн. Сургалтад хамрагдсан багш нар 18 кредитийн 11 төрлийн хичээл судалсан аж. Уг 45 хоногийн сургалтаар үзсэн хичээлүүд дараа дараагийн сургалтын кредитэд тооцогдож, туслах багшаас багш, багшаас эрхлэгч болж дэвшин суралцах боломжтойг БШУ-ны сайд хэлж байлаа. Ийнхүү мянган ээж ажилтай, орлоготой болсон байна. Энэ бол “Халамжаас хөдөлмөрт” хөтөлбөрийн хүрээнд хийж буй бодитой, үр дүнтэй ажлын нэг ажээ.

ЧУЛУУН НҮҮРСНИЙ ЭКСПОРТЫН ДУНДАЖ ҮНЭ ӨМНӨХ ОНЫ МӨН ҮЕЭС 2.5 ДАХИН ӨСЖЭЭ

09 / 01 0 сэтгэгдэл 519 үзсэнe

Нийт экспорт 2022 оны эхний 7 сарын байдлаар 6,464.7 сая ам.долларт хүрч өнгөрсөн оны мөн үеэс 1,723.1 сая ам.доллар буюу 36.3 хувиар өссөн байна. Үүнээс: Эрдэс бүтээгдэхүүний экспорт 6,076.4 сая ам.долларт хүрч өнгөрсөн оны мөн үеийн гүйцэтгэлээс 1,802.1 сая ам.доллар буюу 42.2 хувиар өссөн байна. Чулуун нүүрс, зэсийн баяжмал, төмрийн хүдэр, цайрын баяжмал, хайлуур жонш, молибдены баяжмал, боловсруулаагүй нефть, боловсруулаагүй буюу хагас боловсруулсан алт, мөнгө, тунгаасан зэс ба хайлш зэрэг уул уурхайн бүтээгдэхүүн нь нийт экспортын 94.0 хувийг эзэлж байна. Чулуун нүүрсний экспорт: 2022 оны эхний 7 сарын байдлаар 3,096.4 сая ам.долларын 11,052.6 мян.тн чулуун нүүрс экспортолсон байна. Өнгөрсөн оны мөн үеэс үнийн дүнгээр 1,995.6 сая ам.доллар буюу 2.8 дахин, биет хэмжээгээр 1,116.3 мян.тн буюу 11.2 хувиар тус тус өссөн байна. 1 тн чулуун нүүрсний экспортын дундаж үнэ 280.1 ам.доллар болж, өнгөрсөн оны мөн үеэс 169.4 ам.доллар буюу 2.5 дахин өссөн байна. Чулуун нүүрсний 89.3 хувийг БНХАУ, 8.1 хувийг Сингапур Улс, 2.6 хувийг бусад улс руу тус тус экспортолсон байна.