НӨАТ-ЫН СУГАЛААГ СЭРГЭЭНЭ

08 / 24 0 сэтгэгдэл 629 үзсэнe

Сангийн сайд Б.Жавхлан : "НӨАТ-ын сугалааг түр зогсоосон. Сугалааны процессыг шинэчилэх шаардлагатай. Сугалаа гарснаас хойш 7 жилийн хугацаанд огт шинчэлэгдээгүй. Өмнө нь бүх хэвлэгдсэн НӨАТ-ын баримтуудыг сугалаанд оруулдаг байсан. Өөрөөр хэлбэл, бүртгэгдээгүй баримт ч сугалаанд ордог байсан. Тэндээс азтан тодрохгүй байх асуудал гардаг байсан. Үүнийг шинэчилж, зөвхөн бүртгэлд орсон НӨАТ-ын баримтыг сугалаанд оруулах, мөн бүсчлэх, хамгийн гол нь ил тод болгоно. НӨАТ-ын сугалааг ирэх есдүгээр сараас сэргээхээр ажиллаж байгаа. Сугалаа явуулахыг 2022 оны зургаадугаар сард түр зогсоосноос хойш сугалааг бүртгүүлэх нь 50 хувиар буурсан. Тэгэхээр сугалаа нь НӨАТ-ын орлого дээр хөшүүрэг болж байсан нь эндээс харагдаж байгаа. Гэхдээ цаашдаа олон нийт хүлээн зөвшөөрөхүйц, ил тод, шударга хэлбэрээр явуулахаар бэлтгэл ажлыг хангаж байна. Буцаан олголт дээр нэмэхгүй. Сугалаа нь буцаан олголтын нэг хэлбэр" хэмээв .

ДУЛААНЫ АРГААР БОЛОВСРУУЛСАН МАХНЫ ЭКСПОРТ ӨНӨӨДРӨӨС НЭЭГДЛЭЭ

08 / 24 0 сэтгэгдэл 615 үзсэнe

Мэргэжлийн хяналтын ерөнхий газар болон холбогдох байгууллагуудын 2022 оны 06 сард зохион байгуулсан хяналт, шалгалтаар импортлогч улсын мал эмнэлэг, ариун цэвэр, чанар аюулгүй байдлын стандартын шаардлага хангаж буй аж ахуйн нэгжийн дулааны аргаар боловсруулсан мах, махан бүтээгдэхүүнийг өнөөдрөөс (2022 оны 08 дугаар сарын 24-ний өдрөөс) эхлэн экспортлох шийдвэрийг Засгийн газрын хуралдаанаар гаргалаа. Короновируст халдварын цар тахлаас шалтгаалан 2020, 2021 онд БНХАУ Монгол Улсаас мах, махан бүтээгдэхүүн импортлохыг тодорхойгүй хугацаагаар зогсоох шийдвэр гаргасан. Ингэснээр мах, махан бүтээгдэхүүний экспортын тоо хэмжээ өмнөх онуудтай харьцуулахад 35-45 хувь буурах үндэслэл болсон юм. 2021 оны 06 дугаар сарын 10-ны өдрөөс хойш Эрээн боомтоор мах, махан бүтээгдэхүүн экспортлоогүй байна. БНХАУ-д экспортын эрхтэй, хяналт шалгалтаар бүтээгдэхүүний чанар, аюулгүй байдал, импортлогч орны шаардлага хангаж буй 16 аж ахуйн нэгжийн (давхацсан тоогоор) агуулахад нийт 9537.6 тонн 206.0 тэрбум төгрөгийн экспортын зориулалтаар бэлтгэсэн мах хадгалагдаж байгаа бөгөөд эдийн засгийн хямралтай энэхүү цаг үед нийт 1200 гаруй ажилчин, албан хаагчид цалингүй, орлогогүй байна. Ийнхүү экспортыг нээж, 2021 онд бэлтгэсэн дээрх махыг урд хөрш рүү нийлүүлснээр 64.5 сая долларын орлого олох боломжтой. Мөн 2022-2023 онд өвөлжилт хүндэрч болзошгүй 10 аймгийн 6.5 сая толгой малыг (183 мян.тонн мах) эргэлтэд оруулж, экспортлох нөхцөлийг бүрдүүлэх юм.

Засгийн газрын тусгай сангуудын санхүүгийн тайлан дахь зөрчлүүд

08 / 24 0 сэтгэгдэл 936 үзсэнe

Засгийн газрын 2021 оны санхүүгийн нэгтгэсэн тайланд хийсэн Үндэсний Аудитын газрын тайлангаар 10.5 их наяд төгрөгийн зөрчил илэрсэн талаар өмнө нь мэдээлсэн. Тус тайланд Засгийн газрын 2020 оны санхүүгийн нэгтгэсэн тайлангийн аудитаар илэрсэн алдаа, зөрчлийг арилгуулахаар Ерөнхий сайд болон Сангийн сайдад тус тус таван зөвлөмж өгсөн боловч хэрэгжилт 60 хувьтай гэж дүгнэсэн буюу тал орчим хувийг нь хэрэгжүүлээгүй байгааг дурдсан байна. Засгийн газрын 2021 оны санхүүгийн нэгтгэсэн тайлангийн тухайд аудитаар тогтоосон материаллаг байдлын түвшнээс давсан дөрвөн зөрчил илэрсэн тухай Ерөнхий сайд Л.Оюун-Эрдэнэд ҮАГ-аас хүргүүлжээ. Үүнд: Гадаад зээлийн хөрөнгийн эх үүсвэрээс дамжуулан зээлдүүлсэн зээлийн хугацаа хэтэрсэн, эргэн төлөлт зогссон, эзэн холбогдогч тодорхойгүй, олон жил болсон 533.9 тэрбум төгрөгийн авлагыг барагдуулаагүй. Дамжуулан зээлийн хүүг тооцож, бүртгээгүйгээс 234.8 тэрбум төгрөгийн авлагыг дутуу тайлагнасан. Монгол Улсын Хөгжлийн Банк ХХК-ийн олгосон зээлийн үлдэгдлээс 56 хувь буюу 1,793.9 тэрбум төгрөг нь чанаргүй зээлийн ангилалд орсон Монголбанкнаас тогтоосон банкны үйл ажиллагааны зохистой харьцааны шалгуур үзүүлэлтүүдийг хангаагүй Үндэсний хөрөнгө оруулалтын банк, Чингис хаан банканд байршиж буй 264.3 тэрбум төгрөгийн мөнгөн хөрөнгөд эрсдэл үүссэн зэрэг алдаа зөрчлүүд нь Төсвийн тухай хууль, Нягтлан бодох бүртгэлийн тухай хуулийн холбогдох заалтуудтай нийцээгүй, санхүүгийн тайлагналын эрх ба үүрэг, иж бүрэн байх, нийцсэн бөгөөд зохистой оршин байх батламж мэдэгдлийг хангахгүй байна хэмээн бичжээ. Ингэхдээ төсвийн захирагч нар "Санхүүгийн нэгтгэсэн тайланг залилан эсвэл алдааны улмаас үүсэж болох материаллаг буруу илэрхийлэлгүй бэлтгэхэд шаардлагатай гэж үзсэн дотоод хяналтуудыг хэрэгжүүлэх хариуцлага хүлээнэ" тодотгосон байна. Уг тайланд Засгийн газрын тусгай сангуудын санхүүгийн тайланд хийсэн аудитын дүнг мөн хавсаргасан байна. Тодруулбал, Засгийн газрын 20 тусгай сангийн санхүүгийн тайлангаас 9 тусгай сангийн санхүүгийн тайланг түүвэрт хамруулж, 11 тусгай сангийн санхүүгийн тайланд дүгнэлт өгчээ. Аудитаар нийт 176.4 тэрбум төгрөгийн зөрчил илэрснээс 128.4 тэрбум төгрөгийн зөрчлийг арилгах 25 шаардлага хүргүүлсэн байна. Сангуудын зөрчлийн талаар дүгнэснийг харвал Боловсролын зээлийн сан: Өмнөх онд олгогдоогүй гадаад, дотоодын их, дээд сургуулиудын сургалтын төлбөрийн зээл, буцалтгүй тусламж, тэтгэлгийн санхүүжилт 6 тэрбум төгрөгийг тайлант оны зардлаар бүртгэсэн, журамд тусгаагүй тэтгэлгийн төрөлд 1.5 тэрбум төгрөгийн санхүүжилт олгосон Бүх нийтийн үйлчилгээний үүргийн сан: Хэрэгжиж дууссан төсөл, хөтөлбөрийн захиалагчийн хяналтын зардлын үлдэгдэл 0.03 тэрбум төгрөгийг улсын төсвийн дансанд төвлөрүүлээгүй, 0.2 тэрбум төгрөгийн олон жилийн насжилттай авлагын үлдэгдэлтэй, 0.6 тэрбум төгрөгийн авлагыг тооцоо нийлж баталгаажуулаагүй, төсөл, арга хэмжээнд зарцуулах 3.7 тэрбум төгрөгийг хувийн хэвшлийн байгууллагад татаасаар олгосон Жижиг, дунд үйлдвэрийг хөгжүүлэх сан: Төсвийн орлогыг 19.6 тэрбум төгрөгөөр тасалсан, найдваргүй авлагын үлдэгдэл 107.4 тэрбум төгрөг, 0.5 тэрбум төгрөгийн зээлийг программд зөрүүтэй бүртгэсэн Кино урлагийг дэмжих сан: Тус сангийн хөрөнгийг зарцуулах журмыг эрх бүхий байгууллагаар батлуулаагүй, эрх зүйн орчин бүрдээгүйгээс зарцуулаагүй хоёр жил болсон 10 тэрбум төгрөгийн мөнгөн хөрөнгийн үлдэгдэлтэй Хөдөлмөр эрхлэлтийг дэмжих сан: Тус сангийн хөрөнгийг зарцуулах журмыг эрх бүхий байгууллагаар батлуулаагүй, эрх зүйн орчин бүрдээгүйгээс зарцуулаагүй, эргэн төлөлтийн хугацаа дууссан нийт 15.4 тэрбум төгрөг авлагын үлдэгдэлтэй Шинжлэх ухаан, технологийн сан: Мал аж ахуйн эрдэм шинжилгээний хүрээлэн 0.2 тэрбум төгрөгийн авлагыг тооцоо нийлж баталгаажуулаагүй, урьдчилж гарсан зардалд бүртгэлтэй 4.6 тэрбум төгрөгийн 127 төслийн үр дүнг хэлэлцээгүй Эрүүл мэндийн дэмжих сан: Эрүүл мэндийг дэмжих сангийн хөрөнгийг зарцуулах журамд заасантай нийцэхгүй төсөлд 0.1 тэрбум төгрөг олгосон, 0.1 тэрбум төгрөгийн гэрээний үүргийн биелэлт хангалтгүй Ирээдүйн өв сан: Ирээдүйн өв санд төвлөрүүлэх 35 тэрбум төгрөгийн хүүгийн орлогыг төвлөрүүлээгүй Төсвийн тогтворжуулалтын сан: Тогтворжуулалтын сан болон Ирээдүйн өв санд төвлөрүүлэх орлогын эх үүсвэрийг хуулийн дагуу сар бүр шинжлүүлээгүй Хөдөө аж ахуйг дэмжих сан: Санхүүгийн тайлан иж бүрэн бус, санхүүгийн тайлангийн эхний үлдэгдэл баталгаажаагүй, төсвийн гүйцэтгэлийн тайланг бүрэлдэхүүн хэсгийн дагуу тайлагнаж ирүүлээгүй, авлага, өглөгийн дансны үлдэгдлийг тооцоо нийлж баталгаажуулаагүй, дэлгэрэнгүй бүртгэл хөтлөөгүй, нягтлан бодох бүртгэлийн программын мэдээлэл дутуу, зээлдэгчийн овог, нэр, регистрийн дугаар, зээлийн дүн зөрүүтэй, эзэн холбогдогч тодорхойгүй тул анхан шатны баримттай тулган баталгаажуулах боломжгүй тул "Дүгнэлт өгөхөөс татгалзсан" гэжээ.

ЗӨВШӨӨРӨЛГҮЙ САМАР ТҮҮВЭЛ 5 САЯАР ТОРГОНО

08 / 24 0 сэтгэгдэл 761 үзсэнe

Жил бүрийн есдүгээр сарын 10-наас хойш самар түүхийг зөвшөөрдөг ч иргэд худалдан борлуулахаар их хэмжээний самар түүдэг нь байгаль экологийн тэнцвэрт байдлыг алдагдуулдаг гэдгийг БОАЖЯ-наас анхаарууллаа. Учир нь хуш модны самрын ургац бага, хушин ойн 40 хувь доройтолд орсон зэргээс шалтгаалж иргэдийг самар ихээр түүхгүй байхыг анхааруулж буй аж. Монголын 10 аймгийн 63 суманд хушин ой ургадаг бөгөөд өнгөрсөн жилийн тухайд найман аймгийн 25 суманд их ургацтай байжээ. Харин энэ жил экологийн тэнцвэрт байдал, “Тэрбум мод” хөтөлбөрийн хүрээнд аль болох самар хэт их түүхгүй байхыг уриалж байгаа юм. Хуулийн дагуу зөвшөөрөл авсан аж ахуйн нэгжүүд самар түүж бэлтгэх боломжтой. Зөвшөөрлийг тухайн аймгийн байгаль орчны газраас авдаг ба ахуйн зориулалтаар бэлтгэж байгаа бол 25 кг хүртэл самрыг түүх ёстой. Харин үйлдвэрийн зориулалтаар бол тухайн нөөцийнхөө 40 хүртэл хувийг бэлтгэх учиртай. Болц нь гүйцсэн самрыг түншихэд унадаг бол болц нь гүйцээгүйн улмаас түншээд унахгүй үед иргэд мод руу авирч бэлтгэж эрсдэлд орж байна. Зөвшөөрөлгүйгээр самар түүсэн нөхцөлд 5000 нэгж болон түүнээс дээш нэгжээр торгох эсвэл 1-2 жилийн хугацаагаар хорих ял шийтгэдэг байна. Хуш мод нь ойн нөөцийн таван хувийг эзэлдэг. Самар түүх зохистой хэмжээ байдаг ба 30 хувийг нь түүж, 70 хувийг нь үлдээх ёстой байдаг аж.

Л.ЭНХ-АМГАЛАН: 4800 ХҮҮХДИЙН НЭР , РЕГИСТРИЙГ ХУУРАМЧААР МСҮТ-Д БҮРТГЭЖ 2.3 ТЭРБУМ ТӨГРӨГИЙН ХОХИРОЛ УЧРУУЛСАН

08 / 24 2 сэтгэгдэл 1 021 үзсэнe

БШУ-ны сайд Л.Энх-Амгалан МСҮТ-д бүртгэлгүй 4800 хүүхдийн нэрээр залилан хийж, хувьсах зардал авдаг байсан талаар мэдээлсэн юм. Тэрээр: "Боловсролын салбарт, тэр дундаа мэргэжил сургалт үйлдвэрлэлийн төвд олон жил угжирсан асуудал ил болсон. МСҮТ-ийн сурагчдад 200 мянган төгрөг өгдөг байсан бол саяхнаас төгсөхөд нь нэг удаа хуримтлуулж байж өгдөг болсон. Үүнийг нь E-Mongolia цахим системээр өгч эхлэхэд сурагчдын тоо зөрсөн. Тодруулбал: 2,3 тэрбум төгрөгийн хэмнэлт гарч байгаа. Үүнийг цэвэрлэж, шалгаагүй байсан бол төрөөс ахин 2,3 тэрбум төгрөгийн хийдэл үүсэх байсан. Тэгвэл ЕБС болон их дээд сургуулийн сурагчдын буюу нийт 4800 хүүхдийн нэр, регистрийн дугаарыг хуурамчаар МСҮТ-д бүртгэж хувьсах зардал авдаг байсан залилан хийгдэж байсан. Тиймээс сургуулийн удирдлагуудтай хариуцлага тооцно" хэмээжээ.

Монгол Улсын Үндсэн хуульд нэмэлт, өөрчлөлт оруулах журмын тухай хуульд нэмэлт оруулах тухай хуулийн төслийг өргөн мэдүүлэв

08 / 24 0 сэтгэгдэл 661 үзсэнe

Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хууль, энэ хуулийг дагаж мөрдөх Монгол Улсын Үндсэн хуульд нэмэлт, өөрчлөлт оруулах журмын тухай хуульд нэмэлт оруулах тухай хуулийн төслийг Улсын Их Хурлын гишүүн Н.Энхболд, Д.Тогтохсүрэн, Ж.Мөнхбат, Л.Мөнхбаатар, Ш.Раднаасэд нар өнөөдөр (2022.08.24) Монгол Улсын Их Хурлын дарга Г.Занданшатарт өргөн мэдүүллээ. Монгол Улсын Үндсэн хуулийн цэц 2022 оны наймдугаар сарын 15-ны өдрийн Их суудлын хуралдаанаар Үндсэн хуульд оруулсан нэмэлт, өөрчлөлтийн зарим заалт Үндсэн хуулийн холбогдох заалтыг зөрчсөн эсэх тухай маргааныг хянан хэлэлцээд 2019 оны арваннэгдүгээр сарын 14-нд баталсан Үндсэн хуульд оруулсан нэмэлт, өөрчлөлтөөр өөрчлөн найруулсан Үндсэн хуулийн Гучин есдүгээр зүйлийн 1 дэх хэсгийн “Ерөнхий сайд болон Засгийн газрын дөрвөөс илүүгүй гишүүн УИХ-ын гишүүний албан тушаалыг хавсарч болно” гэсэн заалт нь Үндсэн хуулийн суурь үзэл баримтлалд харшилж, Монгол Улсын Үндсэн хуулийн зохих зүйл хэсэгт нийцээгүй гэж үзэн хүчингүй болгохоор эцэслэн шийдвэрлэсэн. Үндсэн хуулийн цэцийн шийдвэрийн талаар олон нийтийн байр суурь харилцан адилгүй, олон шүүмжийг дагуулж байгаа ч төрийн эрх барих, хууль тогтоох дээд байгууллага, Үндсэн хууль дээдлэн, үндэсний эв нэгдлийг хангах баталгаа болохынхоо хувьд Үндсэн хуулийн цэцээс гаргасан эцсийн шийдвэрийг хүлээн зөвшөөрөх, эс зөвшөөрөх, няцаах байр суурийг баримталж үл болох бөгөөд ардчилсан эрх зүйт төр ёсны дагуу Монгол Улсын Үндсэн хуулийн Жаран зургаадугаар зүйлийн 3 дахь хэсэгт зааснаар Цэцийн эцсийн шийдвэрийг хүндэтгэн Үндсэн хуулийн дагуу зохицуулах, залруулах үүргийг хүлээж байгаа нь Үндсэн хуулийн өмнө хүлээсэн хариуцлага юм. Гэтэл Үндсэн хуулийн цэцийн шийдвэр эцсийн болохын хувьд Үндсэн хуульд орсон өөрчлөлтийн уг эхийг нотлох, хадгалах, албан ёсны эх болгох, цаашилбал Үндсэн хуульд кодификац хийх, хэлэлцэн шийдвэрлэх хууль, эрх зүйн боломжгүй байгаа тул Монгол Улсын Их Хурлын чуулганы хуралдааны дэгийн тухай хууль болон Монгол Улсын Үндсэн хуульд нэмэлт, өөрчлөлт оруулах журмын тухай хуульд нэмэлт оруулах тухай хуулийн төслийг боловсруулсан хэмээн хууль санаачлагчид танилцууллаа гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.

С.Батцэнгэл турник дээр тасралтгүй 1,111 удаа эргэж, Гиннесийн шинэ рекорд тогтоожээ

08 / 24 0 сэтгэгдэл 690 үзсэнe

С.Батцэнгэл турник дээр тасралтгүй 1,111 удаа эргэж, Гиннессийн рекорд тогтоожээ. Энэхүү амжилтыг Гиннест 2022 оны зургаадугаар сарын 30-нд бүртгэсэн байна. Тэрбээр үзүүлбэрээ 33 минут 30 секундийн хугацаанд гүйцэтгэжээ. С.Батцэнгэл нь Зэвсэгт хүчний 327 дугаар цэргийн ангийн ахлагч бөгөөд зэвсэгт хүчний 101 жилийн ойгоор турник дээр 1,101 удаа эргэж байсан талаар Батлан хамгаалахын сайд Г.Сайханбаяр мэдээлэв. Дэлхийн амжилтын тухайд өмнө нь өндөр турник дээр эргэх төрөлд Армени улсын тамирчин 1,001 удаа тасралтгүй эргэж тогтоосон байдаг бол зургаадугаар сарын 30-нд Монголын тамирчин С.Батцэнгэл 1,111 удаа эргэж, Гиннесийн шинэ рекордыг эзэмших болжээ.

ЭНЭ ЖИЛ УЛААНБУУДАЙ, ТӨМСНИЙ ХЭРЭГЦЭЭГЭЭ 100 ХУВЬ, ХҮНСНИЙ НОГООНЫ 70 ХУВИЙГ ДОТООДООСОО ХАНГАХ ТӨЛӨВЛӨГӨӨТЭЙ БАЙНА

08 / 24 0 сэтгэгдэл 709 үзсэнe

Өнөөдөр Улсын ургацын комиссын анхны хуралдаан болж ургацын урьдчилсан баланс, ургац хураалтын үеийн цаг агаарын ерөнхий төлөв, тариалангийн талбай дахь хөнөөлт организмын тархалт судалгааны дүн, тэмцэх арга зөвлөмжийн талаар мэдээлэл өгч, Хүнс, хөдөө аж ахуй, хөнгөн үйлдвэрийн сайд, Улсын ургацын комиссын албан даалгаврыг танилцуулав. “Энэ оны ургацын урьдчилсан балансаар 470 мянган тонн үр тариа, үүнээс 441 мянган тонн улаанбуудай, 234 мянган тонн төмс, 126 мянган тонн хүнсний ногоо, 56 мянган тонн тосны ургамал, 104 мянган тонн малын тэжээлийн ургамал тус тус хураан авах боломжтой гэсэн төлөв гарсан. Урьдчилсан балансаас харахад улаанбуудай, төмсний хэрэгцээг 100 хувь, хүнсний ногооны 70 орчим хувийг дотоодын ургацаас хангах боломж бүрдэхээр байна. Энэ жил хүнсний ногоочдоо дэмжих зорилгоор Засгийн газраас хэрэгжүүлж авч хэрэгжүүлж буй бодлого шийдвэрийн үр дүнд хүнсний ногооны тариалалт 1500 га-гаар нэмэгдсэн” гэж Сайд З.Мэндсайхан мэдээллээ. Дэлхий нийтийг хамарсан цар тахал болон хөрш орнуудад үүссэн дайны нөхцөл байдлын улмаас импортын бүтээгдэхүүний нийлүүлэлтэд хүндрэл учирч байгаа энэ хүнд цаг үед үндсэн нэр төрлийн таримлын тариалалах талбай, хураан авах ургацын хэмжээг нэмэгдүүлэх чиглэлээр төрөөс олон чухал шийдвэрүүдийг гаргаж хэрэгжилтийг зохион байгуулан ажиллаж байна. Үүнд: Монгол Улсын Ерөнхийлөгчийн ивээл дор “Хүнсний хангамж, аюулгүй байдал - Газар тариалан” үндэсний чуулганыг “Атрын IY аян - Эх орны эрүүл хүнс” уриатайгаар зохион байгуулж, улмаар УИХ, Засгийн газарт хандаж нэгдсэн зөвлөмж гаргаж, хэрэгжилтийг зохион байгуулах үүрэг чиглэл өгсөний дагуу нийтдээ 1.7 их наяд төгрөгийн хөрөнгө оруулалтын төлөвлөгөөг боловсруулж хэлэлцүүлэн “Хүнсний хангамж аюулгүй байдлын талаар авах зарим арга хэмжээний тухай” УИХ-ын тогтоолоор батлуулж хэрэгжилтийг зохион байгуулж байна. Монгол Улсын Засгийн газрын 2022 оны “Эрүүл мэндээ хамгаалж, эдийн засгаа сэргээх” 10 их наяд төгрөгийн цогц төлөвлөгөөний хүрээнд арилжааны 7 банкаар дамжуулан Газар тариалангийн үйлдвэрлэл эрхлэгч 450 аж ахуйн нэгж, иргэнд 70.4 тэрбум, Төмс, хүнсний ногооны тариалан эрхлэгч 970 иргэн, аж ахуйн нэгжид 27,4 тэрбум, нийтдээ тариалан бүхий 1420 иргэн, аж ахуйн нэгжид 97.8 тэрбум төгрөгийн 3 хувийн хүүтэй, 2 жилийн хугацаатай зээлийг олгож тариалангийн салбарт хөрөнгө оруулалтын дэмжлэг үзүүлэв. Ургац хураалтын бэлтгэл ажлыг хангах зарим арга хэмжээний тухай Засгийн газрын 2022 оны 07 дугаар сарын 20-ны өдрийн 276 дугаар тогтоолоор Их дээд сургууль, коллеж, мэргэжлийн сургалт үйлдвэрлэлийн төвийн оюутан, сонсогч, хугацаат цэргийн алба хаагчид болон ажил эрчимтэй эрж байгаа иргэдийг сайн дурын үндсэн дээр ургац хураалтын ажилд татан оролцуулахаар шийдвэрлүүлж хэрэгжилтийг зохион байгуулж байна. Засгийн газрын 2022 оны 07 дугаар сарын 27-ний өдрийн 288 дугаар тогтоолоор ургац хураалт, уринш боловсруулалтын ажилд шаардагдах 10.0 мянган тонн дизель түлшний үнийг хаврын тариалалтын үеийн шатахууны үнэтэй ижил түвшинд байхаар тооцож, үнийн зөрүү болох 6.5 тэрбум хүртэл төгрөгийг Засгийн газрын нөөц сангаас гаргаж зохицуулахаар шийдвэрлүүлсэн. 2022-2023 оны өвөлжилт, хаваржилт болон ургац хураалтын бэлтгэл хангах тухай Монгол Улсын Ерөнхий сайдын 2022 оны 08 дугаар сарын 01-ний өдрийн 09 тоот албан даалгавар гарч хэрэгжилтийг зохион байгуулж байна. “Хүнсний улаанбуудайн нөөц бүрдүүлэх тухай” Засгийн газрын 2022 оны 119 дугаар тогтоолоор тариаланчдын гар дээр байсан, зах зээлийн эргэлтэд ороогүй, зохих стандарт, журмын шаардлагыг хангаж байсан 6.3 мянган тонн хүнсний улаанбуудайг улс худалдан авч санхүүжилтийг нь шийдвэрлээд байна. Тус яамны харъяа ХААДС нь нийтдээ 7 байршилд 186.0 мянган тонн хүнсний буудай хадгалах хүчин чадал бүхий элеватортой. Өнөөдрийн байдлаар 43.0 мянган тонн хүнсний буудайн үлдэгдтэй байгаа бөгөөд бусад элеваторын засвар үйлчилгээг хийлгэж буудай хүлээн авах бэлтгэлийг хангаж байгаагийн зэрэгцээ зарим элеваторуудыг гурилын үйлдвэрүүд түрээсээр ашиглуулах боломжийг бүрдүүлэн ажиллаж байна. ЦАГ АГААРЫН УРЬДЧИЛСАН ТӨЛӨВ Цаг агаарын урьдчилсан мэдээгээр 8 дугаар сарын сүүлч, 9 дүгээр сарын дунд 10 хоногийн эцсээр тариалангийн бүс нутгаар хур тунадас нойтон цас орж цочир хүйтрэх төлөвтэй байна. Тиймээс ургацыг хүйтрэлтээс хамгаалах, техникийн бэлэн байдлыг хангах, хаягдалгүй хураах технологийг боловсруулж тариалачдад хүргэх, төмс, хүнсний ногооны борлуулалтыг дэмжих, ургац хураалтын ажлыг технологийн хугацаанд үр дүнтэй, шуурхай зохион байгуулахад холбогдох төрийн байгууллагуудын оролцоо, ажлын уялдаа холбоог ханган ажиллаж байна.

ОЛОН НИЙТИЙН ЦАГДААГААР АЖИЛЛАХ ХҮСЭЛТЭЙ ИРГЭДИЙГ БҮРТГЭЖ БАЙНА

08 / 24 0 сэтгэгдэл 835 үзсэнe

Тээврийн цагдаагийн албанд олон нийтийн цагдаагаар ажиллах хүсэлтэй иргэдийг сонгон шалгаруулалтад урьж байна. Тавигдах шаардлага: Урьд ял, шийтгэл эдэлж байгаагүй Согтуугаар тээврийн хэрэгсэл жолоодож арга хэмжээ авагдаж байгаагүй Насанд хүрсэн, жолооны үнэмлэхтэй, эрэгтэй Бүрэн дунд болон түүнээс дээш боловсролтой Дундаж хэвийн өндөртэй байна. Дэлгэрэнгүй мэдээллийг ажлын өдрүүдэд 08.30-17.30 цагийн хооронд 80100329 утсаар холбогдон авна уу.

"Дарханы замын асуудлаар албан тушаалтнуудыг саатуулсан нь үнэн"

08 / 24 0 сэтгэгдэл 718 үзсэнe

Авлигатай тэмцэх газар Дарханы замын асуудлаар хяналт шалгалтыг хийж буй. Тухайлбал, Дарханы замын тендер сонгон шалгаруулалттай холбогдуулж хэрэг бүртгэлтийн хэрэг нээсэн. Улмаар холбогдох албан тушаалтнуудыг шалгах ажиллагааг өнгөрсөн долоо хоногоос явуулж эхэлсэн. Энэ дагуу наймдугаар сарын 15-нд Зам тээврийн хөгжлийн яамны таван албан тушаалтны албан өрөө болон орон байр гээд нийтдээ 30 гаруй объектод нэгжлэг хийгээд байгаа. АТГ-аас прокурорын зөвшөөрөл авах шаардлагатай тул шалгагдаж байгаа албан тушаалтны нэрийг зарлах боломжгүй гэсэн юм. Тэгвэл өчигдөр /2022.08.23/ тус зам тендер шалгаруулалттай холбоотой ажиллаж байсан зарим хүнийг саатуулсан байна. АТГ-аас хэдэн хүнийг хэдий хугацаанд саатуулсан болохыг тодруулахад прокурорын зөвшөөрөлгүй мэдээлэл өгөх боломжгүй гэлээ. Өнгөрсөн долоо хоногт АТГ-ын шалгалт холбогдох яаманд хоёр цаг гаруй хугацаанд үргэлжилсэн. Энэ үеэр АТГ-ын өөр нэг албан тушаалтан мэдээлэхдээ, автомашины улсын дугаарыг худалдах дуудлага худалдаа зохион байгуулахдаа өгсөн зөвлөмжийг дагаж мөрдөж буй эсэхийг шалгасан гэж мэдээлж байв. Ерөнхий сайдын үүрэг болгосны дагуу АТГ-аас Дарханы замын тендер сонгон шалгаруулахад оролцсон, сонгосон эрх бүхий албан тушаалтнуудыг шалгаж байгаа. Ийнхүү тус хяналт шалгалт үргэлжилж буй аж. Дархан-Улаанбаатар чиглэлийн замыг нийтдээ таван хэсэгт хувааж тендер сонгон шалгаруулсан бөгөөд II болон IV хэсгийг цаасан дээрх компани сонгон шалгаруулсан байж болзошгүй гэнэ. Дархан-Улаанбаатар чиглэлийн замын анх 2019 онд эхлүүлж, хэд хэдэн сайдын нүүр үзэж байгаа ч өнөөдрийг хүртэл ашиглалтад ороогүй байгаа юм. Монгол Улсын Ерөнхий сайд Л.Оюун-Эрдэнэ өнгөрсөн зургадугаар сард Дархан-Улаанбаатар чиглэлийн автозамын ажилтай газар дээр нь очиж танилцсан. Энэ үеэр тендер шалгаруулалтад оролцсон албан тушаалтнуудыг шалгах, хариуцлага тооцно хэмээн мэдэгдээд байсан юм.