ӨНӨӨДӨР ЦАХИЛГААН ХЯЗГААРЛАХ ХУВААРЬ
УЦТС компаниас өнөөдөр буюу зургаадугаар сарын 13-ны Мягмар гарагт хийх засварын хуваарийг танилцуулж байна. Хэрэглэгчид ээ, засвар хийх хугацаанд хэрэглээгээ түр зохицуулна уу.
З.ЭНХБОЛД:ЧАМ ШИГ МӨНГӨ ӨГӨХӨӨР ХУЦДАГ НОХОЙ БИШ
Замын-Үүд боомт дээр ачаа тээврийн автомашины 10 гаруй км үргэлжилсэн оочер бий болоод байгаа талаар олон нийтийн сүлжээнд мэдээлж буй. Учир нь Л.Оюун-Эрдэнийн тэргүүлж байгаа Засгийн газраас “Боомтын сэргэлтийн бодлого”-ийг дэвшүүлж, зарим бүтээн байгуулалтын ажлыг эхлүүлээд байгаа. Энэхүү асуудлын хүрээнд УИХ-ын дарга асан З.Энхболд, нийтлэлч Баабар нар твиттер хуудастаа маргалдсан ширүүхэн маргаан өрнүүлээд амжлаа. Тодруулбал, “Замын-Үүд боомт дээр ачаа тээврийн автомашины цуваа үүссэн” гэх бичлэгт З.Энхболд “Боомт сэргээд оочергүй болоогүй юм уу” гэсэн сэтгэгдэл үлдээжээ. Харин үүний хариуд нийтлэлч Баабар, “Ачаа бараагаа төмпөнгөөр зөөж ажлын байрыг нэмэгдүүлнэ гэж боомт хаасан гар чинь энэ өөрөө биз дээ” хэмээсэн бол З.Энхболд "Чам шиг мөнгө өгөхөөр хуцдаг нохой биш, хааяа бас эх орноо бодмоор юм, төлбөртэй хуцсаар байгаад овоо мөнгөтэй болоо биз дээ. Ерөнхийлөгч асан Баттулгатай ярилаа. Баабартай уулзаж энэ талаар ярилцаагүй гэж байна. Зөнөөд зохион бичдэг болжээ дээ." гэв.
GS25 СҮЛЖЭЭ ДЭЛГҮҮРТ ОЙ ХҮРЭЭГҮЙ ХҮҮХДЭЭ ОРХИЖ ЯВСАН ЭХИЙГ СХД-ИЙН НУТАГ ДЭВСГЭРЭЭС ОЛЖЭЭ
Чингэлтэй дүүрэгт байрлах GS25 сүлжээ дэлгүүрт энэ сарын 6-ны 17:00 цаг орчмын үед ой хүрээгүй хүүхдийг орхиж явсан хэрэг гарсан. Торуулыал, дэлгүүрийн ажилчид хүүхдийг хооллож, ээжийг нь хүлээсэн ч ирээгүй учир цагдаад дуудлага мэдээлэл өгсөн байдаг. Улмаар тухайн эхийг эрэн хайх ажиллагааг эхлүүлж, харин хүүхдийг Хүүхэд хамгаалах төвд хүргэсэн. 10 сартай хүүгээ үйлчилгээний газар орхиж зугтсан ээжийг цагдаагийн байгууллага, холбогдох албаныхан дөрөв дэх өдрөө хайж байна. Тэгвэл Чингэлтэй дүүргийн цагдаагийн газрын алба хаагчид уг эмэгтэйг өнөөдөр буюу 2023 оны 06 дугаар сарын 12-ны өдөр Сонгинохайрхан дүүргийн нутаг дэвсгэрээс олж тогтоон мөрдөн шалгах ажиллагааг үргэлжлүүлж байна.
2024 ОНООС 3-4 ДҮГЭЭР АНГИД АНГЛИ ХЭЛНИЙ ХИЧЭЭЛ ЗААНА
Боловсролын багц хуульд бүх шатны боловсролын байгууллагын судлах үндсэн гадаад хэл нь Англи хэл байна хэмээн заасан бөгөөд ирэх есдүгээр сарын 1-нээс эхлэн төрийн өмчит бүх ЕБС-ийн 5-6 ангид Pearson English англи хэлний сургалтын цогц хөтөлбөрийг хэрэгжүүлэхээр болжээ. БШУ-ны сайд Л.Энх-Амгалан "Английн "Pearson" компаниас англи хэлний хөтөлбөрийн платформыг авч туршилтаар 38 сургуульд нэвтрүүлж байна. Ирэх жил 5-6 дугаар ангид мөн англи хэлний шилдэг платформыг нэвтрүүлнэ. Цаашид гуравдугаар ангиас англи хэл заадаг болно" хэмээсэн юм.
ЭНЭ ДОЛОО ХОНОГООС ХАЛУУН УС ХЯЗГААРЛАХ БАЙРШЛУУД
Дулаан хангамжийн шугамд засвар хийхтэй холбогдуулан энэ зун халуун ус таслах хуваарийг хүргэсэн . Уг хуваарийн дагуу энэ долоо хоногт Барс-2 захаас Хархорин зах хүртэл, 1 болон 10-р хорооллын авто замын урд хэсэг, Түндэмүн саун, Гурван билэг их дэлгүүрийн урд тал орчим, Хуучин тээврийн товчоо, 5-р хороолол, Хотын төв 40, 50 мянгат, баруун 4 зам орчим, Хонхорын 7-р байр орчмын халуун усыг өнөөдрөөс эхлэн зургадугаар сарын 26-ныг хүртэл таслах аж.
СЭРЭМЖЛҮҮЛЭГ:ХҮҮХДЭЭ ХАРАА ХЯНАЛТГҮЙ ОРХИХ, ЗОРИУЛАЛТЫН БУС ХӨВӨГЧ ХЭРЭГСЭЛТЭЙГЭЭР ГОЛД ОРОХ ЗЭРГЭЭС УСНЫ ОСОЛ ГАРЧ БАЙНА
Улсын хэмжээнд он гарсаар өнөөдрийн байдлаар найман удаагийн усны ослын дуудлага бүртгэгдэж, Онцгой байдлын байгууллагын алба хаагчид дөрвөн хүний амь насыг авран хамгаалаад байна. Усны осол нь иргэдийн анхаарал болгоомжгүй, хайхрамжгүй байдал, бага насны хүүхдээ хараа хяналтгүй орхих, согтууруулах ундаа хэрэглэсэн үедээ гол, ус руу орох, зориулалтын бус хөвөгч хэрэгсэлтэйгээр гол усанд орсноос үүдэлтэй байгааг Онцгой Байдлын Ерөнхий Газраас мэдээлэв. Мөн цаг уурын байгууллагын ирүүлсэн мэдээгээр ихэнх нутгаар 30 градус давж халах төлөвтэй байна. Иймд: Иргэд усны ослоос урьдчилан сэргийлж, гол, мөрөн нуурын ойролцоо амарч зугаалахдаа сонор, сэрэмжтэй байх, Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах, Согтууруулах ундаа хэрэглэсэн үедээ гол усанд орохгүй байх, Баталгаатай гүүр, гарам, гарцтай газраар автомашинтай зорчиж гол, усны ослоос урьдчилан сэргийлэхийг Онцгой байдлын ерөнхий газраас анхаарууллаа.
ТАВАНТОЛГОЙ 450 МВТ-ЫН ДУЛААНЫ ЦАХИЛГААН СТАНЦЫН 300 МВТ-ЫН ГҮЙЦЭТГЭГЧ , САНХҮҮЖҮҮЛЭХ ЭХ ҮҮСВЭРИЙГ СОНГОН ШАЛГАРУУЛАХ ТЕНДЕР ЗАРЛАЛАА
“Тавантолгой дулааны цахилгаан станц” ТӨХХК нь Тавантолгой дулааны цахилгаан станцын төслийг 300МВт+150МВт гэсэн 2 үе шаттай хэрэгжүүлэх бөгөөд эхний ээлжийн 300МВт-ын түлхүүр гардуулах нөхцөлтэй EPC гэрээний гүйцэтгэгчийг сонгон шалгаруулахаар ажиллаж байна. Түлхүүр гардуулах гэрээгээр хэрэгжих тус станцын эхний ээлжийн 300 МВт-ын гүйцэтгэгч болон санхүүжүүлэх эх үүсвэрийг сонгон шалгаруулах тендерийг Эрчим хүчний яамнаас зарлаж байгаа тул сонирхсон этгээдийг оролцохыг урьж байна.
“ЭРДЭНЭТ ҮЙЛДВЭР”-ИЙН ХЭЛТСИЙН ДАРГЫН УГААСАН МӨНГИЙГ ЭХ ОРОНД НЬ ШИЛЖҮҮЛЭН АВАХААР АЖИЛЛАЖ БАЙНА
“Эрдэнэт үйлдвэр”-ийн Худалдааны хэлтсийн даргаар ажиллаж байсан, “Жаст групп”-ийн Ш.Батхүү нарт холбогдох хэрэгт олон жил мөрдөх байгууллага, шүүхийн хаалга татсан Г.Амарбат албан тушаалаа урвуулан ашигласан, мөнгө угаасан хэрэгт яллагдагчаар татагдсан билээ. Тодруулбал, түүнийг 2010-2013 онд “Эрдэнэт үйлдвэр”-ийн Гадаад худалдааны хэлтсийн дарга байхдаа тус үйлдвэртэй зэсийн баяжмал худалдан авах гэрээ байгуулж хамтран ажилладаг “Трафигура бехеер Амстердам”, “Таурус металс” гэх компанийнханд үйлчилж тээвэрлэлтийн хуваарийг хүсэлтийнх нь дагуу өөрчилснийхөө хариуд 678 132 ам.долларын хахууль авсан хэрэгт яллагдагчаар татсан юм. НПГ-аас Г.Амарбатад Эрүүгийн хуулийн 22.4-4 дэх хэсгийн “Нийтийн албан тушаалтан хахууль өгөгчийн ашиг сонирхлын үүднээс гүйцэтгэх ёсгүй үйлдлийг хийж хахууль авсан”, 18.6-1-ийн “Эх үүсвэрийг нуун далдлах зорилгоор мөнгө угаасан” гэх заалтыг үндэслэн яллах дүгнэлт үйлдэн Хан-Уул дүүргийн Эрүүгийн хэргийн анхан шатны шүүхэд шилжүүлсэн билээ. Тус шүүх энэ оны гуравдугаар сарын 22-нд түүнд холбогдох хэргийг хэлэлцээд зэсийн баяжмал ачих жагсаалтыг өөрчилсний хариуд Британийн Виржиний арлуудад бүртгэлтэй, өөрийн үүсгэн байгуулсан “Гарланд маркетинг” компанийн Латвийн “Ритуму” банканд эзэмшдэг дансаар дээрх мөнгийг хахууль болгож авсан. Ингэхдээ “Трафигура Бехеер Амстердам”, “Таурус Металс”-ын нэгдмэл сонирхолтой аж ахуйн нэгж болох “Etona investment corp”, “Grinder trade investment LTD”, “Noble phonenix limited” компаниар дамжуулан дансаар шилжүүлүүлж байсан нь тогтоогдсон гэж үзсэн юм. Мөн нийтдээ 1.7 тэрбум гаруй төгрөгтэй тэнцэх хэмжээний валютыг угаасан гэм буруутай гэж шүүх дүгнээд хахууль авсан үйлдэлд нь нийтийн албанд томилогдох эрхийг таван жил хасаж, хоёр жил хорих, мөнгө угаасан хэрэгт нь зорчих эрхийг нэг жил хасах ял шийтгэсэн билээ. Гэвч нийслэлийн Эрүүгийн хэргийн давж заалдах шатны шүүхийнхэн анхан шатны шүүхийн шийтгэх тогтоолыг хүчингүй болгочихоод буй. Бидний авсан мэдээллээр АТГ-ынхан Латвиас Г.Амарбатын хахууль болгож аваад, “Ритуму” банканд нь хувирган угаасан мөнгийг эх орондоо шилжүүлэхээр нэлээд хөөцөлдөж буй аж. Засгийн газрын “5Ш” хөтөлбөрийн нэг “Шилжүүлэн авах” ажиллагааны хүрээнд АТГ-ынхан Бүгд Найрамдах Латви Улсын Хууль зүйн яамтай хэлэлцээ хийж, Авлигын эсрэг НҮБ-ын конвенцыг хэрэгжүүлэхэд хамтран ажиллаж байгаа гэнэ. Латвийн тал уг мөнгийг өгөхгүй, эх орондоо шингээхээр болсон ч манай АТГ-ынхан яриа хэлэлцээ хийсний дүнд Г.Амарбатын албан тушаалаа урвуулж, гадаадын компаниудаас хахуульд авсан, түүнийгээ олон улсаар дамжуулан угаасан гэх мөнгийг нь харь гүрнийхний олз болгохгүй байхаар болсон сурагтай. эх сурвалж: tac.mn
АЯЛАГЧ АМАЙ БУЮУ Ж.ЗОЛБАЯРТ 1 ЖИЛ 5 САРЫН ХОРИХ ЯЛ ОНООЛОО
Нийслэлийн прокурорын газраас Эрүүгийн хуулийн тусгай ангид заасан “Хориглосон мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгогүйгээр хууль бусаар бэлтгэсэн, хадгалсан, бусдад өгсөн, олж авсан гэмт хэрэгт яллах дүгнэлт үйлдэж, ирүүлсэн Ж.Золбаярт холбогдох эрүүгийн хэргийг шүүхэд шилжүүлсэн. Чингэлтэй дүүргийн Эрүүгийн хэргийн анхан шатны шүүхээс шүүгдэгч Ж.Золбаярыг Эрүүгийн хуулийн тусгай ангид зааснаар Хориглосон мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгогүйгээр хууль бусаар бэлтгэсэн, үргэлжилсэн үйлдлээр хадгалсан гэмт хэрэг үйлдсэн гэм буруутайд тооцож, Эрүүгийн хуулийн тусгай ангид зааснаар шүүгдэгч Ж.Золбаярт 1 жил 5 сарын хугацаагаар хорих ял оногдуулж уг ялаа нээлттэй хорих байгууллагад эдлүүлэхээр шийдвэрлэжээ.
ШУУРХАЙ: С.ЭРДЭНИЙН ХҮРГЭН Г.ЭНХБОЛД "ХАРХОРИН СУМАНД БУСДЫГ ЗОДОЖ, ЭРҮҮЛ МЭНДИЙГ НЬ ХОХИРООСОН" ГЭХ ЭРҮҮГИЙН ХЭРЭГТ ХОЛБОГДОН ШАЛГАГДАЖ ЭХЭЛЖЭЭ
Сүүлийн үед бусдын эрүүл мэндийг хохироох гэмт хэргийг гаралт өсөж, шүүхээр шийтгүүлж ял авч байгаа ихэнх хэргийг энэ төрлийн гэмт хэрэг эзэлж байгаа талаар албаны эх сурвалжууд мэдээлж буй. Тодруулбал, 2017 онд Эрүүгийн тухай хуульд өөрчлөлт орж иргэд хоорондоо маргалдаж биед нь хүнд, хөнгөн гэмтэл учруулсан л бол заавал шүүхээр орж зорчих эрх хязгаарлах, торгох, хоригдох зэргээр ялаар шийтгүүлдэг болсон гэж байгаа юм. Тэгвэл саяхан АН-ын дарга асан С.Эрдэнийн хүргэн буюу Нийслэлийн Баянгол дүүргийн Иргэдийн төлөөлөгчдийн хурлын дарга асан Г.Энхболд бусдыг зодож, эрүүл мэндийг нь хохироосон хэрэгт холбогдон, цагдаагийн байгууллага энэ хэргийг шалгах болсон байна. Тодруулбал, АН-ын дарга асан С.Эрдэнэ, түүний хүргэн Г.Энхболд болон иргэн Т.Хаянхярваа гээд Баянгол дүүргийн АН-ын гишүүд өнгөрөгч тавдугаар сарын сүүлээр /2023.05.28/ бурхан болоочийн хойдын буянд зориулж суварга босгож, шашин номын ажилд оролцохоор Архангай аймгийн Хотонт сумыг зорьсон байна. Ингээд тэд Архангай аймгийг зорих замдаа Өвөрхангай аймгийн Хархорин сумын нэгэн амралтын газарт буудаллаж, хоногложээ. Тэд согтууруулах ундааны зүйл хэрэглэсэн байж болзошгүй байгаа юм. Улмаар энэ үеэр Баянгол дүүргийн ИТХ-ын дарга асан Г.Энхболд АН-ын гишүүн Т.Хаянхярвааг зодож, эрүүл мэндэд хохирол учруулсан байж болзошгүй хэрэгт холбогджээ. Тодруулбал, тус хэргийн хохирогч Т.Хаянхярваа Г.Энхболдод зодуулсан гэх гомдлыг Хархорин сумын цагдаагийн хэлтэст гаргасан байна. Иймд Өвөрхангай аймгийн цагдаагийн газрын Хархорин сумын цагдаагийн хэлтсээс шалгалтын ажиллагаа эхлүүлж хохирогч Т.Хаянхярваагийн биед учирсан гэмтлийг тогтоохоор шүүх шинжилгээний байгууллагаас шинжээч томилуулан, мөрдөн шалгах ажиллагааг эхлүүлсэн гэх мэдээлэл байна. Харин зарим эх сурвалжуудын өгч байгаа мэдээллээр,“АН-ын дарга асан С.Эрдэнэ энэхүү хэрэг явдалтай холбогдуулан хохирогч Т.Хаянхярваатай холбогдон "өргөдлөө татчих, ах нь чамайг хаяхгүй" гэж ятгасан байж ч болзошгүй байгаа аж. Мөн цагдаагийн байгууллагаас тус хэргийн гэрчүүдийг дуудан мэдүүлэг авч эхэлсэн гэх мэдээлэл байна. Сонирхуулахад, " Хүний эрүүл мэндийн халдашгүй байдлын эсрэг гэмт хэрэг"-ийг Эрүүгийн тухай хуулийн 11 дүгээр бүлэгт заасны дагуу хуулиар зохицуулдаг байна. Тодруулбал, тус хуулийн 11.6.1-д, “Хүний эрүүл мэндэд хөнгөн хохирол санаатай учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ” гэж заажээ. Мөн тус хуулийн 11.1.1-д “Хүний эрүүл мэндэд хүнд хохирол санаатай учруулсан бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ” гэжээ. Иймд иргэд та бүхнийг бусадтай маргалдахгүй байх, бусдын биед халдахгүй байхыг сэрэмжлүүлж тус мэдээллийг нийтэллээ. эх сурвалж:isee.mn
