ХААХ
НЭГҮҮН МЭДЭЭ
ХХААХҮ-ИЙН САЙД Ж.ЭНХБАЯР ТӨВ, ДАРХАН-УУЛ АЙМАГТ АЖИЛЛАЛАА
08 / 26 0 сэтгэгдэл 273 үзсэнe

Сүүний фермүүдэд үхрийн үүлдэр угсааг тодорхой болгох чиглэл өгөв ХХААХҮ-ийн сайд Ж.Энхбаяр Төв аймгийн Батсүмбэр, Сүмбэр, Дархан-Уул аймагт ажиллаж төвийн бүсийг хөдөө аж ахуйн эрчимжсэн бүс нутаг болгон хөгжүүлэх Засгийн газрын бодлого шийдвэрийг танилцуулж ажиллалаа. Батсүмбэр сумын “Үдлэг Бургалтайн шим” фермийн хоршооны үйл ажиллагаатай танилцаж, сүү сүүн бүтээгдэхүүний үйлдвэрлэлийг нэмэгдүүлэх, хадлан тэжээл бэлтгэх, тарих гарц шийдлийн талаар аймгийн Засаг дарга, мал аж ахуйн мэргэжилтнүүдтэй уулзаж, ойрын хугацаанд сүүний чиглэлийн үхрийн үүлдэр угсааг төрөлжүүлж, нэгдсэн тоо гарган зохиомол хээлтүүлэгт боловсон хүчнээ бэлтгэхийг үүрэг чиглэл болголоо. “Үдлэг бургалтайн шим” хоршоонд нийт 40 гаруй өрх нэгдэж, 600 гаруй үнээний сүүг “Сүү” ХХК-д нийлүүлж байна. Сүүний фермийнхэнд тулгамдаж байгаа асуудал нь өвс, тэжээлийн үнэ их байгаагаас үхрээ стандартын дагуу тэжээж чадахгүй байна. Иймд малчдад тариан талбайг нэмж олгон шим тэжээл сайтай тариалан эрхлэх боломжийг олгож өгөхийг хүсч байна. Түүнчлэн Батсүмбэр сум нь цахилгааны хүчдэл муугаас цахилгаан саалтуур, сүү хөргүүрийн төхөөрөмжөө ажиллуулах боломжгүй болж, өөрсдөө цахилгааны өсгөгч авч сүүгээ хөргөн компаниудад нийлүүлж байгаа талаар хэлсэн. Цаашлаад сүүний урамшууллыг 09 дүгээр сараас 06 дугаар сар хүртэл олговол хаврын хатуу цагт өвс тэжээлээ бэлтгэхэд бодит дэмжлэг болно. Иймд салбарын яам тооцоо судалгаа хийж үзэх хүсэлтийг тавьж байлаа. Мах, сүүний чиглэлийн үхрийн гол тэжээл нь эрдэнэшиш ХХААХҮ-ийн сайд Ж.Энхбаяр яамны мэргэжилтнүүдийн хамт Төв аймгийн Сүмбэр суманд 80 га талбайд эрдэнэшиш тарьсан хөдөө аж ахуй судлаач, доктрант З.Чулуунцэцэгийн тариалангийн талбайтай танилцав. Эрдэнэшиш нь 66 хувийн цардуул, эслэг, уураг агуулдаг ургамал учраас мах, сүүний чиглэлийн үхэрт маш сайн тэжээл болдог гэдгийг шинжлэх ухааны үндэслэлтэй тайлбарласан. З.Чулуунцэцэгийн хувьд өөрийн төрж өссөн Сүмбэр сумандаа эрдэнэшиш тариалж малын тэжээлийн зориулалттай дарш бэлтгэн зах зээлд нийлүүлж байна. Эрдэнэшишийн даршаа Сүү ХХК-д нийлүүлж, мөн амтат чипс, дарс эсгэж байгаа талаар танилцуулав. Эрдэнэшишийн даршны борлуулалтын үнэ бусад тэжээлээс 1 дахин бага, ашиг шимийн хувьд 3 дахин их байгааг судлаачид онцолж байна. Газар тариалангийн тоног төхөөрөмжийн судалгаа гаргах чиглэл өглөө ХХААХҮ-ийн сайд Ж.Энхбаяр Дархан-Уул аймагт газар тариалангийн техникийн 30 гаруй дилер аж ахуй нэгжүүдийн төлөөлөлтэй уулзаж, цаашид техникийн шинэчлэл болон ургац хураалтад шаардлагатай техникийн сэлбэг хэрэгслээр хангаж ажиллах талаар санал солилцож уулзлаа. Аж ахуйн нэгжийн төлөөллүүд салбарын сайд, мэргэжилтнүүдээс асуулт асууж чөлөөтэй ярилцлаа. Төвийн бүсийг хөдөө аж ахуйн эрчимжсэн бүс нутаг болгон хөгжүүлэхэд тоног төхөөрөмж шаардлагатай. Иймд дилер компаниудын хувьд НӨАТ, гаалийн албан татвараас чөлөөлөх хүсэлтийг тавьж байсан.”Шинэ хоршоо” хөтөлбөрийн хүрээнд малчид өвс, тэжээл тариалж эхэлсэн. Иймд малчдад хадлангийн тоног төхөөрөмжийг 50 хувийн хөнгөлөлтөд хамруулж өгөхийг хүслээ. Бага хүүтэй урт хугацааны зээлийн эх үүсвэрийг нэмэгдүүлэх саналыг олон дилер аж ахуйн нэгж гаргасан. ХХААХҮ-ийн сайд Ж.Энхбаяр дилер аж ахуйн нэгжүүд зохион байгуулалтад орж, зөвлөл байгуулаад тариалан, хөдөө аж ахуйн салбарт ямар хүчин чадалтай хэдэн тооны тоног төхөөрөмж шаардлагатай байгаа талаар тооцоолол гаргахыг хүсэн эргэж уулзахаар боллоо

“ЭРДЭНЭС МОНГОЛ" НЭГДЭЛ ЭХНИЙ ХАГАС ЖИЛИЙН АЖЛАА ДҮГНЭЖ, ӨВӨЛЖИЛТИЙН БЭЛТГЭЛЭЭ ХЭЛЭЛЦЭЖ БАЙНА
08 / 24 0 сэтгэгдэл 231 үзсэнe

Өнгөрсөн жилээс уламжлал болгон зохион байгуулж буй “Эрдэнэс Монгол нэгдлийн эхний хагас жилийн ажлын үр дүн-өвөлжилтийн бэлтгэл” удирдах ажилтны зөвлөгөөнийг 2024 оны 08 дугаар сарын 24-ний өдөр Багануур ХК-ийг түшиглэн зохион байгуулж байна. Энэхүү зөвлөгөөнд Монгол Улсын сайд, ЗГХЭГ-ын дарга Н.Учрал, УИХ-ын гишүүн Ц.Сандаг-Очир, “Эрдэнэс Монгол” компанийн ТУЗ-ийн дарга Ш.Мөнхцэрэн, гүйцэтгэх захирал С.Наранцогт нар болон нэгдлийн бүрэлдэхүүний охин, харьяа компанийн удирдлагууд оролцож, эхний хагас жилийн төлөвлөгөөт ажлын хэрэгжилт, үр дүнг үнэлэн дүгнэж, өвөлжилтийн бэлтгэлээ хэрхэн хангаж байгаа талаар мэдээлэл солилцон зөвлөлдөж байна. Энэ үеэр Монгол Улсын сайд, ЗГХЭГ-ын дарга Н.Учрал төрийн өмчит уул уурхайн компаниудын засаглал, үйл ажиллагааг сайжруулж, үр ашгийг дээшлүүлэх, улс орон, ард иргэдэд хүртээх эрдэс баялгийн үр өгөөжийг нэмэгдүүлэх “Монголын баялаг Монгол хүндээ” уриатай Үндэсний баялгийн санг бүрдүүлэх реформыг танилцуулж, Засгийн газрын үйл ажиллагааны мөрийн хөтөлбөртэй уялдуулан хэрэгжүүлэхээ олон нийтэд зарлалаа. Үндэсний баялгийн санг бүрдүүлэх цогц реформ нь дараах чиглэлээр хийгдэнэ: Нэг. Төрийн өмчит үйл ажиллагааг ил тод болгох, тунгалагжуулах реформ -Сайн засаглал, үр дүнг сайжруулах шинэчлэлийн хүрээнд төрийн өмчит компаниудын засаглалыг олон улсын жишигт хүргэж, эрх зүйн таатай орчин бүрдүүлнэ. Ингэснээр төрийн өмчит компаниудын засаглалын тогтолцоо олон улсын жишигт нийцэж, хөрөнгийн зах зээлд гарах (IPO) боломж бүрдэнэ. Түүнчлэн төрийн өмчит аж ахуйн нэгжийн олон төрлүүд тэдгээрийн эрх зүйн тодорхойгүй байдлыг цэгцлэх юм. -Аж үйлдвэрийн ээлтэй орчинг бүрдүүлэх эрх зүйн орчныг бүрдүүлэх реформын хүрээнд ашигт малтмалыг дотооддоо боловсруулж, нэмүү өртөг бүхий эцсийн бүтээгдхүүн үйлдвэрлэгч, аж үйлдвэржилтийн суурь дэд бүтцийг дэмжих, эрчимжүүлэх эрх зүйн орчныг сайжруулна. Ингэснээр эрх зүйн таатай орчин бүрдэх, байгалийн баялгийн үр өгөөжийг нэмэгдүүлэх, Үйлдвэрлэл технологийн паркийн суурь үйлдвэр, дэд бүтэц байгуулагдаж, нэмүү өртөг шингэсэн бүтээгдэхүүн үйлдвэрлэлийг дэмжих юм. Урьдчилсан тооцоогоор 6 үйлдвэр технологийн паркад хувийн хэвшлийн хөрөнгө оруулалтаар 6.2 тэрбум ам.долларын 68 төрлийн бүтээгдэхүүн үйлдвэрлэх 36 үйлдвэр байгуулагдана. -Түмэндээ харагддаг төрийн өмч буюу шилэн реформын хүрээнд нэгдлийн компаниудын өдөр тутмын үйл ажиллагааны үр ашиг, хяналтыг сайжруулах нэгдсэн удирдлагын систем (ERP) нэвтрүүлнэ. Энэхүү Их өгөгдөлд суурилсан цахим систем нь компаниудын бүх үйл ажиллагааг ил тод болгосноор үйл ажиллагааны үр ашгийг хамгийн багадаа 30%-иар нэмэгдүүлэх юм. Хүний нөөцийн сонгон шалгаруулалтыг Хиймэл оюун ухаанд суурилан нээлттэй, ил тод, ур чадварт суурилсан зарчмаар зохион байгуулж, стратегийн бүтээн байгуулалтад шаардлагатай мэргэжилтнүүдийн судалгааг гаргана. Хоёр. Аж үйлдвэрийн экосистем бүрдүүлэх “Түүхий эдийн түүхийн төгсгөл” реформ Хувийн хэвшлийн хөрөнгө оруулалтыг дэмжих эрх зүйн шинэчлэлийг хийхийн зэрэгцээ шаардлагатай дэд бүтэц, аж үйлдвэрийн үндсэн түүхий эд үйлдвэрлэх суурь үйлдвэрийг барьж байгуулан үйлдвэржилтийн гинжин хэлхээг бий болгоно. Энэхүү реформын хүрээнд 6 байршилд баригдах Үйлдвэрлэл технологийн паркаас нэн тэргүүнд стратегийн ач холбогдол бүхий дараах 3 үйлдвэрлэл, технологийн паркийн бүтээн байгуулалтыг эхлүүлнэ. Тухайлбал: 1. Эрдэнэт ҮТП-ийн дэд бүтцийн бүтээн байгуулалт, Зэс боловсруулах үйлдвэрийн цогцолбор. 2. Дархан ҮТП-ийн хүрээнд Ган боловсруулах үйлдвэрийн цогцолбор. Эхний ээлжинд түүхий эдээр тогтвортой хангах төмрийн нойтон баяжуулах, хорголжин үйлдвэрийн бүтээн байгуулалтын бэлэн байдлыг хангах, ТЭЗҮ, судалгааны ажлыг эрчимжүүлнэ. 3. Багануур ҮТП-ийн хүрээнд Хүрэн нүүрс боловсруулах цогцолбор байгуулна. Түүхий эдээр тогтвортой хангах нөхцөлийг бүрдүүлэх, дэд бүтцийн бүтээн байгуулалтыг яаралтай эхлүүлэх юм. Үндэсний баялгийн санг бүрдүүлэх реформын гол зорилго нь төрийн өмчит уул уурхайн компаниудын үйл ажиллагааг сайжруулж, төрийн эзэмшлийн 34% хүртэлх хувьд ногдох ногдол ашгийг нэмэгдүүлж, Хуримтлалын сангийн орлогыг бүрдүүлэх замаар эрдэс баялгийн үр өгөөжийг ард түмэнд тэгш шударга хүртээх юм. Түүнчлэн энэхүү реформыг хийснээр төрийн өмчит компаниудын үйл ажиллагаа цахим, ил тод нээлттэй болохоос гадна зардал буурч, үйлдвэрлэлийн бүтээмж нэмэгдэнэ. Мөн аж үйлдвэрийн үндсэн түүхий эд үйлдвэрлэх суурь үйлдвэрүүд, шаардлагатай дэд бүтэц, хууль эрх зүйн орчин сайжирснаар хувийн хэвшлийнхэн болон гадаад дотоодын бизнес эрхлэгчдэд үнэ цэн бий болгох хөрөнгө оруулалтын таатай орчин нөхцөл бүрдэнэ гэж үзэж байгаа юм. “Эрдэнэс Монгол” нэгдэл эхний хагас жилд 3.8 их наяд төгрөгийн цэвэр ашигтай ажиллав “Эрдэнэс Монгол” нэгдэл 2024 оны эхний хагас жилд үйлдвэрлэл, санхүүгийн үзүүлэлтээрээ төлөвлөгөөгөө давуулан биелүүлж, амжилттай ажиллалаа. Нэгдлийн үйлдвэрлэлийн үзүүлэлтийн хувьд, ашиглалтын үйл ажиллагаа явуулж буй компани, үйлдвэрийн газруудын хагас жилийн гүйцэтгэлээр олборлолт 100%, баяжмал үйлдвэрлэл 106%, хөрс хуулалт 88%-тай байна. Санхүүгийн үзүүлэлтийн хувьд, 8.7 их наяд төгрөгийн орлого бүрдүүлэхээр төлөвлөснөөс 9.0 их наяд төгрөгийн орлого бүрдүүлж, 3.8 их наяд төгрөгийн цэвэр ашигтай ажиллаж, төлөвлөгөөгөө 140%-тай биелүүллээ. 2024 оны эхний хагас жилийн байдлаар улсад 2.6 их наяд төгрөгийн татвар, хураамж төвлөрүүлээд байна. Өвөлжилтийн бэлтгэл байдлын хувьд, нэгдлийн олборлолт, үйлдвэрлэл, тээврийн үйл ажиллагаа эрхэлдэг компани, үйлдвэрийн газрууд нь 6 чиглэлээр 810 ажил төлөвлөснөөс дундаж гүйцэтгэл 44.1%-тай байна. Төвийн бүсийн эрчим хүч, дулааны системийн найдвартай ажиллагааг хангах зорилгоор Засгийн газрын 2024 оны 22 дугаар тэмдэглэлээр өгөгдсөн даалгаврын дагуу “Багануур” ХК болон “Шивээ Овоо” ХК-ийн техник, тоног төхөөрөмжийг шинэчлэхэд шаардлагатай нийт 29 тэрбум төгрөгийг толгой компанийн зүгээс шийдвэрлэж ажиллалаа.

Г.БАЯРСАЙХАН: АВТО ЗАМЫН ХУУЧИН ХАШЛАГЫГ ХАЯДАГГҮЙ, ИРГЭН, АЖ АХУЙ НЭГЖИД ӨГЧ АШИГЛУУЛДАГ
08 / 23 0 сэтгэгдэл 516 үзсэнe

СХД-ийн 20, 32 дугаар хороо, Сонсголонгийн уулзвараас баруун аймгууд салдаг уулзвар буюу хуучнаар 22-ын товчоо чиглэлийн 9.5 км авто замыг хэсэгчлэн шинэчилж буй. Ингэхдээ тус авто замд шинээр ус зайлуулах шугам хоолой угсарч, хуучин хашлагыг чулуун хашлагаар сольж байгаа. Олон нийтийн сүлжээнд эвдрэл, гэмтэлгүй авто замын хашлагыг сольж, хуучин хашлагыг хаясан талаар иргэд шүүмжилсэн. Тэгвэл хуучин хашлагыг иргэн, аж ахуйн нэгжид өгч ашиглуулдаг болохыг нийслэлийн Замын хөгжлийн газраас мэдээллээ. Энэ талаар нийслэлийн Замын хөгжлийн газрын дарга Г.Баярсайхан “Авто замын бетон хашлагыг 12-16 жилийн хугацаанд ашигладаг. Бидний шинэчилж байгаа дээрх замын авто хашлага 14 жил болсон. Бид бетон хашлагыг, байгалийн чулуун хашлагаар сольж байгаа. Байгалийн чулуун хашлага нь эдэлгээ удаан, чанар сайн учраас бид энэ жил хэд хэдэн байршилд байгалийн чулуун хашлагыг байршуулж байна. Хуучин бетон хашлагыг бид хуулаад хаядаггүй, иргэн, аж ахуйн нэгжид өгч ашиглуулдаг” гэв. НЗТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

ТАВАНТОЛГОЙ ТҮЛШ КОМПАНИЙН УДИРДАХ АЖИЛТНУУДАД АВЛИГАТАЙ ТЭМЦЭХ ГАЗРААС СУРГАЛТ ЗОХИОН БАЙГУУЛЛАА
08 / 23 0 сэтгэгдэл 141 үзсэнe

Тавантолгой түлш компанийн Захиргаа Удирдлагын Газар, Авлигатай тэмцэх газартай хамтран компанийн удирдах ажилтнуудад Авлигын эсрэг хууль тогтоомжийн мэдлэгийг нэмэгдүүлэх чиглэлээр сургалт зохион байгууллаа. Сургалтыг Авлигатай тэмцэх газрын Урьдчилан сэргийлэх, соён гэгээрүүлэх хэлтсийн ажилтан Комиссар С. Баярцэцэг, Комиссар А. Тунамал-Эрдэнэ нар удирдан явуулсан бөгөөд “Ашиг сонирхлын зөрчлөөс урьдчилан сэргийлэх”, “Авлигын ойлголт ба гэмт хэрэг” сэдвийн хүрээнд мэдээлэл өглөө. Сургалтанд Үйлдвэр, Газар, Хэлтсийн 20 орчим удирдах албан тушаалтнууд хамрагдаж Эрүүгийн хуулийн тусгай ангийн 22 дугаар бүлэгт заасан Авлигын гэмт хэргийн талаарх ойлголт, түүний хэрэгжилтийн талаарх мэдээллийг авч, цаашид авлигаас урьдчилан сэргийлэх чиглэлээр санал бодлоо солилцсон юм.

НИЙСЛЭЛИЙН ЗАСАГ ДАРГЫН ЗАХИРАМЖААР “ХҮН, МАЛЫН ГОЦ ХАЛДВАРТ БОЛОН ТАРВАГАН ТАХАЛ ӨВЧНӨӨС УРЬДЧИЛАН СЭРГИЙЛЭХ” ХЯНАЛТ ШАЛГАЛТЫГ 2024 ОНЫ 08 ДУГААР САРЫН 15-НЫ ӨДРӨӨС 10 ДУГААР САРЫН 15-НЫ ӨДРИЙГ ХҮРТЭЛ ХУГАЦААНД ЗОХИОН БАЙГУУЛАН АЖИЛЛАЖ БАЙНА
08 / 23 0 сэтгэгдэл 151 үзсэнe

Нийслэлийн онцгой байдлын газар, Нийслэлийн цагдаагийн удирдах газар, Экологийн цагдаагийн алба, Тээврийн цагдаагийн албаны замын цагдаагийн газар, Нийслэлийн мал эмнэлгийн газар, Нийслэлийн байгаль орчны газрын албан хаагчид 24 цагаар хяналт шалгалтыг хийж байна. Мал эмнэлгийн улсын байцаагч нар халдварт өвчин дамжин тархахаас урьдчилан сэргийлэх, мал, амьтан тэдгээрийн гаралтай хүнсний болон хүнсний бус түүхий эд, бүтээгдэхүүний эрүүл ахуй, ариун цэврийн шаардлагыг хангах, малын шилжилт хөдөлгөөн болон мал эмнэлгийн гэрчилгээний баталгаажилт, тээвэрлэлтийг цахим гэрчилгээтэй тулгалт хийж, илэрсэн зөрчил, дутагдлыг холбогдох хууль, журмын дагуу арга хэмжээ авч ажиллаж байна.

БОРООНЫ УС ЗАЙЛУУЛАХ ХООЛОЙ РУУ ХӨРСНИЙ УС ШАХСАН БАРИЛГЫН КОМПАНИУДАД ЗӨРЧЛИЙН ХЭРЭГ НЭЭН ШАЛГАЖ БАЙНА
08 / 23 0 сэтгэгдэл 507 үзсэнe

Нийслэлийн Засаг даргаас өгсөн үүрэг чиглэлийн дагуу нийслэлийн хяналт шалгалтын газар, геодези усны барилга байгууламжийн газраас усны барилга байгууламж, барилга угсралтын ажлуудад төлөвлөгөөт бус шалгалтыг гүйцэтгэлээ. Шалгалтаар хэд хэдэн зөрчлийг илрүүлж холбогдох арга хэмжээг аваад байна. Энэ талаар Нийслэлийн хяналт шалгалтын газрын хэлтсийн дарга Г.Батбаатар “Хан-Уул дүүргийн 15 дугаар хороо, Орчлон сургуулийн өргөтгөл “Эм Си Эс проперти" ХХК-ийн гүйцэтгэж буй барилгын талбайд хяналт шалгалтыг явуулахад “Суруга Монгол” ХХК-ийн гүйцэтгэсэн усны барилга байгууламжийг гэмтээж, зөвшөөрөлгүйгээр барилга угсралтын ажлыг гүйцэтгэж байсныг илрүүлж зөрчлийг арилгуулсан. Барилгын ажлын зөвшөөрөлгүйгээр барилга угсралтын ажлыг гүйцэтгэж буй 23 зөрчилд зөрчлийн хэрэг нээн, 73 сая төгрөгийн арга хэмжээ авч улсын байцаагчийн дүгнэлтээр 28 аж ахуйн нэгж байгууллагад албан даалгавар хүргүүлээд байна” гэв. ГУББГ-ын Ерөнхий инженер С.Батсайхан “Улаанбаатар хотод үргэлжлэн орсон борооны улмаас ус зайлуулах хоолой усаа тогтоохгүй эргэн халих асуудал үүссэн. Үүнтэй холбогдуулан бид төлөвлөгөөт бус хяналт шалгалтыг явуулахад, барилгын компаниуд борооны ус зайлуулах шугам, хоолой руу хөрсний усаа шахсанаас болж, борооны ус автозам, явган хүний зам руу тогтож байгааг олж илрүүлсэн. Мөн үүнээс болж борооны зайлуулах төмөр бетон хоолой эвдэрч, гэмтсэн. Тиймээс борооны ус зайлуулах хоолой руу хөрсний ус шахсан барилгын компаниудад зөрчлийн хэрэг нээн шалгаж байна” гэв.

УЛААНБУРХНЫ 8 ТОХИОЛДОЛ ИЛЭРСЭН БАЯН-ӨЛГИЙ АЙМАГ РУУ ЗОРЧИХГҮЙ БАЙХЫГ АНХААРУУЛЛАА
08 / 23 0 сэтгэгдэл 432 үзсэнe

Манай улсад улаанбурхан өвчний зөөвөрлөгдсөн тохиолдол долоодугаар сарын 30-нд бүртгэгдсэн. Үүнээс хойш ЭМЯ, ХӨСҮТ, НЭМҮТ зэрэг холбогдох газрууд шаардлагатай арга хэмжээг авч ажилласаар байгаа. Гэвч Эрүүл мэндийн яамнаас хамгийн сүүлд өгсөн мэдээллээр наймдугаар сарын 22-ны байдлаар Баян-Өлгий аймаг улаанбурханы найман тохиолдол шинээр илэрч, нийт тохиолдлын тоо 12 болсон байна. Сэжигтэй тохиолдлын тоо өсч байгаа учир шат, шатны бүх эрүүл мэндийн байгууллагуудад тандалтын багийг ажиллуулж эхэлсэн. Мөн Баян-Өлгий аймаг руу хоёр дахь удаагаа зөвлөн туслах багийг явуулжээ. Түүнчлэн тус аймагт бүртгэгдсэн тохиолдлуудын ойрын хавьтлуудыг 86 хувьтай вакцинжуулжээ. Одоогоор Улаанбурханы товлолын вакцинд хамрагдаагүй 1500 хүүхэд, жирэмсэн эхчүүд, 0-9 сартай нярайн судалгааг гаргасан байна. ЭМЯ-наас Баян-Өлгий аймгаас болон баруун аймгуудаас орж ирж байгаа хилийн шалган нэвтрүүлэх байрууд, Алтай таван богд руу явж байгаа аялагчдад зөвлөмж өгч халдварын голомтот бүс рүү иргэд аль болох зорчихгүй байхыг анхааруулж байна.

"ЭТҮГЭН ИРВЭСҮҮД" ДЭЛХИЙН ЦОМЫН АВАРГА БОЛЛОО
08 / 23 0 сэтгэгдэл 532 үзсэнe

Олон улсын сагсан бөмбөгийн оюутны “ДЭЛХИЙН ЦОМ 36 дугаар тэмцээн БНХАУ-ын Жиси хотод боллоо. Тус тэмцээнд Этүгэн Ирвэсүүд клубийн эрэгтэй нэгдүгээр шигшээ “Омни Этүгэн Ирвэсүүд” баг улсаа төлөөлөн оролцсон бөгөөд тус тэмцээнд олон улсын нийт 10 гаруй шигшээ баг оролцсон байна. Наймдугаар сарын 21-ний өдөр болсон аваргын төлөөх тоглолт манай улсын тамирчид БНХАУ-н Бээжин хотын Биеийн Тамирын их сургуулийн шигшээ багтай тунаж үлдсэн бөгөөд 69:43 онооны харьцаатайгаар өрсөлдөгчөө буулган авснаар аваргын цомын эзэд болжээ. Тэмцээний дэд болон гутгаар байруудад Хятадын Бээжин хотын биеийн тамирын их сургууль болон ХУА ДОНГ их сургуулийн багууд тус тус шалгарчээ.

ТЭМЦЭГЧДЭД "ШОНХОР ШУВУУД АРАБТ ОЧООД ТА НАРААС Ч ИЛҮҮ АМЬДАРДАГ" ГЭЖЭЭ
08 / 22 0 сэтгэгдэл 1 421 үзсэнe

Монгол улсын нутаг дэвсгэрээс идлэг шонхор барих, тээвэрлэх, арчлах, гадаад улсад гаргах үйл ажиллагаанд мөрдөх журамд өөрчлөлт оруулах зорилго бүхий санал солилцох уулзалт Хууль Зүй, Дотоод Хэргийн Яам (ХЗДХЯ)-нд өчигдөр /2024.08.21/ болсон. Энэ үеэр ХЗДХ-ийн сайд О.Алтангэрэл "Манай улсад шонхор шувуу барихтай холбоотой зохицуулалт байхгүй биш байна. Хамгийн гол асуудал нь гадаадын иргэд буюу Арабууд, тэдэнтэй хамт явж буй хэлмэрч, орчуулагчид хууль, дүрэм журамтайгаа танилцдаг уу. Тэр наалт тэмдэг нь хаана байна, хэлмэрч орчуулагч, отгийн байршлыг хэн мэдэж байна. Шонхор шувууг барих үйл ажиллагаатай холбоотойгоор иргэд, иргэний нийгмийн байгууллагуудын тавьсан шаардлага үндэслэлтэй байжээ. Үүнийг Монгол Улсын хууль тогтоомжоор зохицуулсан боловч энэ харилцаанд тавьж байгаа хяналт сул. Энэ үйл ажиллагаа хуулийн дагуу явагдахгүй байж. Гадаадын иргэдийн хууль зөрчсөн байж болзошгүй үйл ажиллагаа байна гэдгийг танилцуулгаас харсан байх. Асуудал гарахаар тойрч шуураад дараа нь мартдаг байдлыг эцэслэе. Дараа дараагийн жилүүдэд үндэсний бахархал болсон шонхор шувууныхаа талаар талцаж хуваагдсан байдлыг давтахгүйн тулд анхаарах хэрэгтэй" гэж хэллээ. Харин анхлан шүгэл үлээж, асуудал бийг илчилсэн иргэдийн төлөөлөл "Эдгээр шувуу чинь Араб улсад очоод бараг та нараас илүү амьдарч байна гэх яриа ч бий. Хамгийн гол нь шонхор шувуу барих зөвшөөрлийг нь олгосон бол улс оронд мөнгө орж ирэх ёстой. Тэгвэл энэ мөнгө хаана байгаа юм бэ. Энэ мэдээллийг ил тод шилэн байлгах, юунд зарцуулагдаж байгааг харуулдаг байх ёстой" гэж байр сууриа илэрхийллээ. Шонхор шувуу барьж буй этгээдүүдийн эрх, үүрэг: Зөвшөөрөгдсөн тоо хэмжээгээр зөвшөөрсөн газар нутгаас барих Байгаль орчныг бохирдуулахгүй байх Гэмтээх, ичээ ухах зэрэг хориглосон аргаар барихгүй Шонхор барихаас өмнө хууль дүрэм журам, гэрээтэй танилцсан байх Холбогдох зөвшөөрлийг биедээ заавал авч явах ёстой. Отог болон шонхор барих зөвшөөрөл бүхий этгээдийн машин дээр БОУАӨЯ болон Засаг даргаас олгосон тусгай наалттай байх. Энэ наалтыг машин дээрээ заавал наах Барьж буй шонхорт давхар зүүлт зүүлгэнэ. Энэхүү зүүлтийг БОУАӨЯ-наас олгох бөгөөд агнах зөвшөөрлийн тоо хэмжээ зүүлтийн тоо хэмжээтэйгээ таарах Отог байгуулах зөвшөөрөл гэрээгээ байгуулна. Иргэдийн гар дээрээс шонхор шувууг худалдаж авахгүй байх үүрэгтэй

1 ... 35 36 37 38 39 40 41 42 43 ... 330