Цагдаагийн байгууллагад энэ оны 04 дүгээр сарын 03-ны 16 цагт Чингэлтэй дүүргийн 5-р хороо теди төвд “хүн ухаан алдаж унаад амьсгалахгүй байна” гэх дуудлага мэдээлэл ирүүлснийг шалгахад 40 настай, эрэгтэй А нь ухаан алдаж унан, амь нас хохирсон бөгөөд шалтгаан, нөхцөлийг тодруулахаар шинжээч эмчийг томилон шалгалтын ажиллагааг хийж байна.
Ерөнхий боловсролын сургуулийн 2022-2023 оны хичээлийн жилийн гуравдугаар улирлын хичээл эхэллээ. Гуравдугаар улиралд: 1-3 дугаар анги: Дөрөвдүгээр сарын 3-ны өдрөөс тавдугаар сарын 26-ны өдрийн хооронд 4-5 дугаар анги: Дөрөвдүгээр сарын 3-ы өдрөөс зургаадугаар сарын 2-ны өдрийн хооронд Дунд, ахлах анги: Дөрөвдүгээр сарын 3-ны өдрөөс зургаадугаар сарын 2-ны өдрийн хооронд хичээллэж, шалгалт зургаадугаар сарын 5-9-ний өдрүүдэд болно.
Автомашинаар нэгнээ мөргөж, хүнд гэмтээсэн осол Дорнод аймгийн Хэрлэн сумын нутагт 2021 оны долдугаар сарын 21-ний өдөр гарч байв. Эл хэргийг шүүхээр шийдвэрлэжээ. Тодруулбал, иргэн Д нь С, Т, Ч нарыг тээврийн хэрэгслээр дайрч алахыг завдсан, эрүүл мэндэд нь хохирол учруулсан. Мөн М, О, Э нарын нэр бүхий 9 иргэн бүлэглэн нийтийн хэв журмыг зөрчиж бусадтай зодолдон, олон нийтийн амгалан тайван байдлыг алдагдуулсан, бусдын эд хөрөнгийг гэмтээсэн гэх хэрэгт Дорнод аймгийн прокурорын газраас Эрүүгийн хуулийн 10.1 дүгээр зүйлийн 2.6 /Хүнийг алах/, 20.16 дугаар зүйлийн 1 /Олон нийтийн амгалан тайван байдлыг алдагдуулах/-т зааснаар яллах дүгнэлт үйлдэн, Дорнод аймаг дахь сум дундын эрүүгийн хэргийн анхан шатны шүүхэд шилжүүлсэн байна. Шүүхээс тус хэргийг энэ оны гуравдугаар 31-ний өдөр хянан хэлэлцээд, иргэн М, О, Э нарын нэр бүхий 9 хүнийг олон нийтийн амгалан тайван байдлыг алдагдуулсан, бусдын эд хөрөнгийг гэмтээсэн гэмт хэргийг үйлдсэн гэм буруутай тооцон хорих ял оногдуулахгүйгээр 1 жилийн хугацаагаар тэнсэв. Харин иргэн Д-г олон нийтийн амгалан тайван байдлыг алдагдуулсан, бусдын эрүүл мэндэд хүнд хохирол учрах, амь нас хохирох нөхцөл байдалд хүргэсэн гэж дүгнэн Эрүүгийн хуулийн 20.16 дугаар зүйлийн 2.4-т заасан гэмт хэргийг үйлдсэн гэм буруутай тооцож, 4 жилийн хугацаагаар хорих ял оногдуулж шийдвэрлэлээ. Эх сурвалж: УЕПГ
2023 оны гуравдугаар сарын 31-ний байдлаар Монгол орны нийт нутгийн есөн хувьд цасан бүрхүүлтэй байв. Харин дөрөвдүгээр сарын 1, 2-нд орсон цасны дараа нийт нутгийн 30 хувьд цасан бүрхүүл тогтжээ. Өнгөрсөн долоо хоногт ихэнх нутгаар цаг агаар тогтуун байсан бөгөөд хамгийн дулаан байсан нь Баянхонгор аймгийн Шинэжинст сум. Тус суманд гуравдугаар сарын 30-ны өдөр 23 градус дулаан байв гэж ЦУОШГ-аас мэдээллээ.
Нийслэлийн удирдах ажилтнуудын шуурхай зөвлөгөөн болж, Нийслэлийн Засаг дарга бөгөөд Улаанбаатар хотын Захирагч Д.Сумъяабазар удирдан явуулав. Ойн сан бүхий газрын газар ашиглалт, бүртгэлд хяналт шалгалт хийх, цаашид авах арга хэмжээний талаар Нийслэлийн Газар зохион байгуулалтын албаны дарга Г.Батзориг танилцуулжээ. Тэрбээр, “Ойн сан бүхий газарт 17,633 нэгж талбар бүртгэлтэй судалгаа гарсан. Цаашид газар олголтыг бүрэн хориглох, хоёр жил ашиглаагүй газрыг Газрын тухай хуулийн дагуу цуцлах, орц, гарц болон газрын маргаантай асуудлыг шийдвэрлэх, газрын үнэлгээний бүсчлэлд өөрчлөлт оруулахаар төлөвлөн ажиллаж байна. Мөн дүүргүүдийн газар олголтод хяналт шалгалтыг эхлүүллээ” гэв.
Төв аймгийн Батсүмбэр сумын засаг дарга Д.Ганболд Монгол улсын эрүүгийн хуулиар хариуцлага хүлээсэн тул засаг даргын сунгаа зарлагдаж Сумын Иргэдийн хурлаар Гансүхийн Мөнгөнхазаар гэгч засаг даргаар томилогдохоор сонгогдсон гэх мэдэээлэл байна. Асуудлын гол нь Г.Мөнгөнхазаар гэгч нь 2016 оны 06-р сарын 27 өдрийн 212 дугаартай шүүхийн тогтоолоор Эрүүгийн хуулийн тусгай ангийн 99.1 дүгээр зүйлээр гэмт хэрэг үйлдсэн нь тогтоогдсон. Мөн Эрүүгийн хуулийн тусгай ангийн 22.4 дүгээр зүйлээр шүүгдэгч Гансүхийн Мөнгөнхазаарыг нийтийн албанд томилогдох эрхийг таван жилийн хугацаагаар хасаж, 5.400.000 ( таван сая дөрвөн зуун мянган ) төгрөгөөр торгожээ. Энэ гэмт хэрэг нь Эрүүгийн хариуцлага хүлээж ажлаасаа халагдсан засаг дарга Д.Ганболдтой хамтран үйлдсэн ба Сумын Иргэдийн Хурлын дарга Б.Цэцэнтунсаг, Улсын асрамжийн газрын дарга н.Эрдэнэхүү нар үгсэн тохиролцож Гансүхийн Мөнгөнхазаарыг томилуулахаар улайрч буй гэдгийг эх сурвалжууд мэдээлж буй. Гансүхийн Мөнгөнхазаар сумын 3-р багын дарга хийж байгаад дээрх эрүүгийн хариуцлага хүлээж ажлаасаа халагдсан боловч өнөөдөр Улсын асрамжийн орлогч даргын албан тушаал хашиж байгаа. Мөн түүнийг мэргэжил боловсрол үгүй хуурамч дипломтой гэх мэдээлэл ч бий. Эндээс харахад ажил албаны дадлага туршлага үгүй мэдлэг боловсрол үгүй удаа дараа гэмт хэрэг үйлдэж байсан этгээдийг сумын МАН-ынхан, засаг даргаар томилохоор тохирчээ. Гэтэл удахгүй тухайн сумын 100-н жил, ЕБ Сургуулийн ч мөн 100-н жилийн ой тохиох гэж байхад авилгын хэрэгтэй этгээдийг засаг даргаар томилох гэж буйг иргэд эгдүүцэн эсэргүүцэж буй аж. Эх сурвалжийн хүсэлтээр тухайн мэдээллийг сурвалжлах болно.
Засгийн газрын тогтоолоор хүнсний болон хөдөө аж ахуйн үйлдвэрлэлийг дэмжих 5-6 хувийн хүүтэй, хөнгөлөлттэй зээлийг арилжааны банкны эх үүсвэрээр санхүүжүүлж, Засгийн газраас хүүгийн зөрүү 13 хувийг хариуцан олгохоор шийдвэрлэсэн. Энэ хүрээнд арилжааны 10 банкаар дамжуулан эргэлтийн хөрөнгийн болон хөрөнгө оруулалтын зориулалтаар уг зээлийг олгох бөгөөд 2023 оны төсөвт хүүгийн хөнгөлөлтөд 135.5 тэрбум төгрөгийг тусгасан. Мал аж ахуйн үйлдвэрлэлийг дэмжихэд 132.3 тэрбум төгрөг, Газар тариалангийн үйлдвэрлэлийг дэмжихэд 342.6 тэрбум төгрөг, Хүнсний боловсруулах, сав баглаа боодлын үйлдвэрлэлийг дэмжихэд 507.1 тэрбум төгрөг, нийт 982.0 тэрбум төгрөгийн зээлийг хүнс, хөдөө аж ахуйн үйлдвэрлэл эрхлэгчдэд 3-5 жилийн хугацаатай олгох санхүүжилтийн гэрээг Сангийн яам, Хүнс, хөдөө аж ахуй, хөнгөн үйлдвэрийн яам, Монголбанк, арилжааны банкнууд хамтран байгуулж байна. Зээлийг зориулалтын дагуу, үр дүнтэй зарцуулснаар гол нэрийн хүнсний бүтээгдэхүүн үйлдвэрлэл эрхлэгчдэд үйлдвэрлэлээ өргөжүүлэх, шинээр үйлдвэр байгуулах, технологийн шинэчлэл хийх замаар ашиг орлогоо нэмэгдүүлэн, бүтээгдэхүүний аюулгүй байдлыг хангах нөхцөл бүрдэх юм. Эх сурвалж: ХХААХҮЯ
Сүүлийн үед нийтлэгдсэн онц ноцтой гэмт хэргийн талаар прокурорын зөвшөөрөгдсөн хэмжээнд Цагдаагийн Ерөнхий Газар (ЦЕГ)-аас өнөөдөр мэдээлэл өглөө. Гэмт хэргийн мэдээллийг ЦЕГ-ын Хэвлэл мэдээллийн төвийн дарга, цагдаагийн хошууч Г.Мөнхбаяр танилцуулав. Тэрбээр "Урьд өмнө нь удаа дараа ял шийтгэл эдэлж байсан эрүүгийн нөлөө бүхий бүлэг этгээдүүд зэвсэг, зэвсгийн чанартай зүйл ашиглан бусдын эд хөрөнгийг авахаар заналхийлэх, айлган сүрдүүлэх, хүчирхийлэх зэрэг гэмт хэрэг үйлдсэнийг цагдаагийн байгууллага шуурхай илрүүлж таслан зогсоон ажиллаж байна. Тухайлбал Ука хочит Алтанхуягийн захиалснаар Хулан хочит Хулансамбуу, Ууганаа хочит Ууганзаяа, Сайханаа хочит Энхсайхан нар бүлэглэн энэ оны гуравдугаар сарын 5-7 өдрүүдэд нэр бүхий иргэний Улаанбаатар хотын нутаг дэвсгэрт байрлах хоёр орон сууцны эзэмших гэрээг хүч хэрэглэн зэвсэг зэвсгийн чанартай зүйл ашиглан айлган сүрдүүлж, бусдын эд хөрөнгийг өөрийн нэр дээрээ шилжүүлэн авахаар заналхийлсэн гэмт үйлдэлд эрүүгийн хуулийн 16.7.2 дахь хэсгийн 2.3-т зааснаар бусдын эд хөрөнгийг авахаар заналхийлэх хэрэгт эрүүгийн хэрэг үүсгэж яллагдагчаар татан мөрдөн шалгах үйл ажиллагаа явуулж байгаа. Түүний гэр болон тээврийн хэрэгслээс дөрвөн хутга, хийн буу, ангийн зориулалттай сум, амьсгал боогдуулагч зэргийг хураан авсан. Ука хочит Алтанхуяг өмнө нь 2009-2021 онд эрүүгийн хуулийн тусгай ангийн 147.2 бусдын эд хөрөнгийг дээрэмдэх, 17.3.2 бусдын эд хөрөнгийг авахаар зэвсэг, зэвсгийн чанартай зүйл хэрэглэж дээрэмдсэн, 20.4.1 галт зэвсэг, гэлт хэрэглэл, тэсэрч дэлбэрэх зүйл хууль бусаар эзэмшсэн зэрэг гэмт хэргийг үйлдэж байсан. Тус бүлгийн Хулан хочит Хулансамбуу, Цэнгэл хочит Батцэнгэл, Ууганаа хочит Ууганзаяа нар бүлэглэн иргэн Сумъяажаргал гэх эмэгтэйн захиалгаар өнгөрсөн оны арванхоёрдугаар сард иргэн Б-г Улаанбаатар хотын нутаг дэвсгэрт байрлах зочид буудалд авч очин эд хөрөнгийн эрхээ шилжүүлэн өгөхийг шаардаж, хохирогчийг зодон биед нь гэмтэл учруулж, зодох үедээ бэлгийн дур хүслээ ёс бусаар ханган хүчиндэж, өөрт нь болон ойр дотны хүнд хүч хэрэглэхээр заналхийлж, бие болон сэтгэл санааны хохирол учруулан түүний эд хөрөнгийг захиалагч этгээдэд хууль бусаар шилжүүлсэн хэргийг илрүүлж 15 этгээдийг холбогдуулан эрүүгийн хуулийн тусгай ангийн 17.6.2 дахь хэсгийн 2.3-т зааснаар мөн хуулийн 12.1.2.8, 2.10 дахь хэсэгт зааснаар эрүүгийн хэрэг үүсгэж яллагдагчаар татаж мөрдөн байцаах ажлыг цагдаагийн байгууллагаас явуулаад байна" хэмээн мэдээлэв.
Цагдаагийн ерөнхий газраас гурван настай хүүг зодож гэмтээсэн гэх хэргийн талаар мэдээлэл өглөө. ЦЕГ-ын Хэвлэл мэдээллийн төвийн дарга, цагдаагийн хошууч Г.Мөнхбаяр: "Гурван настай хүүхдийн хэрэгт холбогдсон "Э"-г нэг сарын хугацаагаар цагдан хорьж мөрдөн шалгах ажиллагааг явуулж байгаа. Яллагдагчаар татах саналыг Прокурорын байгууллагад хүргүүлж байгаа. Тухайн хүүгийн биеийн байдал дээрдэж, Турк улс руу эмчилгээнд явах гэж байгаа талаар хэвлэл мэдээллийн байгууллагуудад мэдэгдсэн байсан. Мөн хүүгийн ээжийг яллагдагчаар татах саналыг прокурорын байгууллагад хүргүүлсэн" гэв.
Нийслэлийн иргэдийн Төлөөлөгчдийн Хурлын ээлжит бус X хуралдаанаар Газрыг улсын тусгай хэрэгцээнд авах саналыг хэлэлцлээ. Богдхан төмөр замын бүтээн байгуулалтын ажилтай холбогдуулан Сонгинохайрхан дүүргийн 21, 32 дугаар хороо, Хан-Уул дүүргийн 13 дугаар хорооны нутаг дэвсгэрт төмөр замын чигийн дагуух 496 га зурвас газрыг тусгай хэрэгцээнд авах саналыг боловсруулсан байна. Богдхан төмөр замын трассын нийт урт нь 144.9 км урт бөгөөд нийт 1207 нэгж талбарыг дайран өнгөрч байгаа юм. Тиймээс трассын дагуух газрын хил заагийн эргэлтийн цэгийн солбилцол, талбайн хэмжээг тогтоож, бүтээн байгуулалт хийх газруудад шинээр газар олгохгүй байх, барилга байгууламж барихыг хориглох талаар арга хэмжээ авч ажиллах аж. Хэлэлцүүлгийн үеэр төлөөлөгчид уг замын трассын дагуух өмчлөх болон эзэмших эрхтэй иргэдийн нөхөн төлбөрийн асуудлыг хөндлөө. Төлөөлөгч Л.Отгонбаатар газрыг улсын тусгай хэрэгцээнд авах саналыг дэмжиж байгаа бөгөөд, газрын нөлөөлөлд өртсөн айл өрхүүдэд нөхөн олговор олгож, яаралтай чөлөөлөх талаар саналаа илэрхийллээ. Харин төлөөлөгч Н.Батсүмбэрэл Улаанбаатар хотын хөгжлийн бодлого, төлөвлөлттэй газрын харилцааг уялдуулж, хотын иргэд, нийтийн эрх ашгийг тэргүүн эгнээнд тавьж ажиллахыг сануулсан юм. Мөн нөлөөлөлд өртөж байгаа нэгж талбарт олгох нөхөн төлбөрийн зардлын тооцоог тодруулав. Уг газар чөлөөлөлттэй холбоотой шаардагдах зардлыг Тавантолгой төмөр зам компани бүрэн хариуцах бөгөөд 1207 нэгж талбарыг чөлөөлөх аж. Төсөөллийн үнэлгээгээр газар чөлөөлөлтөд 180 тэрбум төгрөг зарцуулна гэж тооцсон гэж Нийслэлийн газар зохион байгуулалтын газрын дарга хэлэв. Мөн энэ газрын трассын дагуу цахимаар өмчилсөн 500 гаруй газар байгаа бөгөөд нийслэлийн газрын албанаас газрыг газраар солих бодлогыг барьж байгаа аж. Улмаар Богдхан төмөр замын бүтээн байгуулалтын ажилтай холбогдуулан төмөр замын чигийн дагуу газрыг улсын тусгай хэрэгцээнд авахыг төлөөлөгчдийн олонх нь дэмжлээ.
