ХӨРӨНГИЙН ҮНЭЛГЭЭНИЙ БАЙГУУЛЛАГА СОНГОН ШАЛГАРУУЛАХ ТУХАЙ

“Дарханы төмөрлөгийн үйлдвэр” ХХК-ийн Ажилтны орон сууцны барилгын гүйцэтгэлд хөрөнгийн үнэлгээ хийлгэх эрх бүхий хөрөнгийн үнэлгээний компани сонгон шалгаруулна. Сонгон шалгаруулалтад оролцохыг хүсэгчид тавигдах ерөнхий шаардлага: 1. Эд хөрөнгийн үнэлгээний чиглэлээр 3-аас доошгүй жил ажилласан, хөрөнгийн үнэлгээ хийх дадлага туршлагатай; 2. Санхүүгийн болон хүний нөөцийн чадавхтай, үйл ажиллагаа нь тогтмолжсон байх /Ахлах үнэлгээчин эд хөрөнгийн үнэлгээ хийж байсан 3-аас доошгүй жилийн туршлагатай, эрх бүхий байх. Үнэлгээчин эд хөрөнгийн үнэлгээ хийж байсан 1-ээс доошгүй жилийн туршлагатай, мэргэшсэн/; 3. Үнэлгээг заасан хугацаанд чанартай хийж гүйцэтгэх чадвартай байх. Сонгон шалгаруулалтад оролцох саналаа ирүүлэхдээ дараах материалыг хавсаргасан байна. Үүнд: • Сонгон шалгаруулалтад оролцох тухай албан бичиг; • Хөрөнгийн үнэлгээ хийх үнийн санал; • Байгууллагын танилцуулга /өмнө нь хийж гүйцэтгэж байсан ижил төстэй ажлын туршлагын талаар тусгасан байвал давуу тал болно/; • Үнэлгээ хийх эрх олгосон зөвшөөрлийн хуулбар ; • Байгууллагын улсын бүртгэлийн гэрчилгээний хуулбар; Сонгон шалгаруулалтын материал авах хугацаа, байршил: Сонгон шалгаруулалтын материалыг 2024.04.16-ны өдрөөс 2024.04.19-ны өдрийн 10 цаг хүртэл Дархан-Уул аймаг, Дархан сум 16-р баг, “Дарханы төмөрлөгийн үйлдвэр” ХХК-ийн төв байр 305 тоот хүлээн авна. Сонгон шалгаруулалттай холбогдох бусад мэдээллийг 99224999 дугаар болон info@dmp.mn цахим хаягаар авна уу.

\2024.04.15\ ЭЦ-ГИЙН АЛБАНААС НЭГЖЛЭГИЙН БОЛОН БАРИВЧЛАХ АЖИЛЛАГАА ЯВУУЛСАН БИЛЭЭ. ЭНЭ ТАЛААР ЦАГДААГИЙН БАЙГУУЛЛАГААС МЭДЭЭЛЭЛ ӨГЛӨӨ.

Эрүүгийн цагдаагийн албаны Эдийн засгийн гэмт хэрэгтэй тэмцэх газрын дарга, цагдаагийн дэд хурандаа Б.Ганчулуун "Цагдаагийн байгууллагаас өчигдөр буюу 2024 оны 4-р дүгээр сарын 15-ны өдөр мөрдөн шалгаж байгаа хэргийн хүрээнд ажиллагаа явуулсан. Нэр бүхий этгээдүүд бүлэглэж, Сүхбаатар, Баянгол дүүргийн нутаг дэвсгэрт 2021 оны 9-р дүгээр сараас 11-р дүгээр сарыг хүртэл бусдаар гадаад улсын бооцоот тоглоомын сайтад мөрий тавиулж, их хэмжээний мөнгийг алдсан гэх шалтгаанаар тухайн иргэнийг зодож, зорчих эрхийг хязгаарлан заналхийлж, хүнийг хүчээр алга болгох гэх хэргүүдэд иргэн Б-ын хамаарал бүхий "Алтайн хүдэр", "Бүрдэл Майнинг" компани болон Тээвэр Хөгжлийн Банк болон иргэдийн орон байр зэрэг 10 объектод нэгжлэг хийж, 100 гаруй боть санхүүгийн анхан шатны баримт материал, гадаад валют, эд зүйлсийг хурааж авсан. Бусдын захиалгаар нэр бүхий этгээдүүд нь "Алдсан мөнгөө олж өг" гэх шалтгаанаар бусдыг хууль бусаар хорьж, эрүүл мэндэд хөнгөн хохирол учруулж, эд хөрөнгийн эрхийг шилжүүлж өгөхийг шаардаж өөрт нь болон түүний ойр дотнын хүнд хүч хэрэглэхээр заналхийлж, зорчих эрхийг хууль бусаар хязгаарласан гэмт хэрэг үйлдсэн байж болзошгүй үндэслэлээр шалгаж байна. Дээрх хэрэгт холбогдон шалгагдаж байгаа нэр бүхий дөрвөн иргэнийг өчигдөр баривчилж, хуулийн дагуу шүүхийн зөвшөөрөлгүйгээр 48 цаг цагдан хорихоор 461 дүгээр хорих ангид хүргэсэн. Өнөөдөр эрүүгийн хуулийн дагуу хэрэг үүсгэж, яллагдагчаар татах саналыг прокурорын байгууллагад хүргүүлээд байна" гэлээ.

ДҮНЖИНГАРАВЫН УУЛЗВАРТ БОЛСОН ДЭЛБЭРЭЛТИЙН УЛМААС УРЬДЧИЛСАН БАЙДЛААР ₮1.8 ТЭРБУМЫН ХОХИРОЛ УЧИРЧЭЭ

Баянзүрх дүүргийн 26 дугаар хорооны нутаг дэвсгэрт байрлах “Дүнжингарав” худалдааны төвийн замд энэ оны нэгдүгээр сард гарсан галын хэргийг Улсын Ерөнхий Прокурорын Газраас байгуулсан ажлын хэсэг шалгаж байгаа. Энэ хүрээнд 250 гаруй хүнээс мэдүүлэг авч, зургаан төрлийн 62 шинжилгээ хийлгэхээр шинжээч томилж, 58 дүгнэлтийг гаргуулан, зарим эд зүйл, хөрөнгийн үнэлгээг тогтоожээ. Харин уг хэрэгт хэн нэгнийг яллагдагчаар татаагүй байна. Одоогоор гудамж талбай, зам байгууламж, тээврийн хэрэгсэл, сургууль, оффис, аж ахуйн нэгжид 1.8 тэрбум орчим төгрөгийн хохирол учирсан нь тогтоогдсон байна. Орон сууц болон оршин суугчдын хохирлын үнэлгээ гараагүй байгааг албаныхан тодотгов. Галын улмаас онцгой байдлын газрын гурван албан хаагч, явган болон автомашинаар зорчиж явсан дөрвөн иргэн нас барж, есөн хүн хөнгөн, хүнд гэмтэж, 26 иргэнд угаарын хийн хөнгөн зэргийн хордлогын шинж илэрсэн бол 36 тээврийн хэрэгсэл, гурван барилга байгууламж шатаж, 228 иргэн, 15 аж ахуйн нэгж байгууллагын эд хөрөнгөд хохирол учирчээ. Улсын Ерөнхий Прокурорын Газраас байгуулсан ажлын хэсэгт Нийслэл, Тээвэр, дүүргийн прокурорын газрын дөрвөн прокурор, цагдаагийн байгууллагын 115 мөрдөгч багтжээ.

Хэвлэлийн эрх чөлөөг хязгаарлаж буй хууль тогтоомжийг өөрчлөх, засаж сайжруулах чиглэлээр мөрийн хөтөлбөртөө тусгахыг улс төрийн намуудад уриалж байна

АТГ: СҮХБААТАР АЙМГИЙН УДИРДЛАГУУД ГЭРИЙНХЭЭ ХООЛ ХҮНСИЙГ ХҮРТЭЛ АВЛИГЫН ЗАМААР АВДАГ БАЙСАН БАЙЖ БОЛЗОШГҮЙ

Сүхбаатар аймгийн засаг дарга М.Идэрбат, ИТХ-ын дарга Д.Хосбаяр нарыг АТГ-аас саатуулсан. Тэднийг дараах хэргүүдэд буруутган эрүүгийн хэрэг үүсгэсэн гэж мэдээллээ. Сүхбаатар аймгийн Засаг дарга М.Идэрбатын хувьд 1. Сүхбаатар аймгийн Засаг дарга М.Идэрбат Батлагдсан зураг төсөлгүй, барилгын ажил эхлүүлэх зөвшөөрөлгүй компанитай гэрээ хийсэн. Ингэхдээ шинэ суурьшлын бүс байгуулахад зориулж түлхүүр гардуулах нөхцөлтэй гэрээ байгуулан 1,4 тэрбум төгрөгийн санхүүжилт авах нөхцөл бүрдүүлэн өгчээ. Үүнийхээ хариуд БЗД-ийн нутаг дэвсгэрт гурван өрөө байр авлигад авсан байж болзошгүй байна. 2. Сүхбаатар аймгийн Засаг дарга нэр бүхий УИХ-ын гишүүний үеэл дүүгийн эзэмшлийн Баруун-Урт сумын 3-р багийн нутагт байх 6,700 болон 1,359 метр квадрат хэмжээтэй газрын зориулалтыг нь хууль зөрчин өөрчилж давуу байдал олгосон. 3. Хадам дүүгийнхээ эзэмшилд байх Баруун-Урт сумын 2-р багт байх 2,600 метр квадрат хэмжээтэй автоугаалга, гараашийн зориулалттай газрыг төлбөрөө төлөөүй байхад нь хууль зөрчин бусдад шилжүүлж давуу байдал олгосон. 4. Нэр бүхий УИХ-ын гишүүний эзэмшлийн Сүхбаатар аймгийн Баруун-Урт сумын нутагт байх 3,211 метр квадрат хэмжээтэй газрыг хууль зөрчин түүний хамаарал бүхий этгээдэд шилжүүлсэн. Сүхбаатар аймгийн ИТХ-ын дарга Д.Хосбаярын хувьд 1. Сүхбаатар аймгийн ИТХ-ын дарга Д.Хосбаяр нь эрх мэдэл, албан тушаалаа урвуулан ашиглаж Баруун-Урт сумаас зохион байгуулсан тендерт хамаарал бүхий этгээдийн компанийг шалгаруулсан. Ингэхдээ өөрийн эзэмшлийн компанид давуу байдал бий болгон эд хөрөнгө завшсан байж болзошгүй. 2. Мөн “1989 оны төгсөгчид” нэртэй төрийн бус байгууллагын ТУЗ-ын даргаар ажилладаг. Энэ байгууллагын гишүүдийн эзэмшдэг компаниуд аймгаас зарласан өндөр дүнтэй бүх тендерийг авдаг байсан байж болзошгүй байна. 3. Аймгийн удирдлагууд гэмт хэргийн замаар олсон хөрөнгөө өөрийн хамаарал бүхий этгээдийн данс, банкны картыг ашиглан авдаг байсан. Тэд гэртээ авах ахуйн хэрэглээний хүнс, баяр ёслолоор бусдад бэлэглэх бэлэг дурсгалыг хүртэл аймгийн дэлгүүр, худалдааны төвүүдээс үнэгүй авдаг. Төлбөрийг нь аймагт ашигт малтмалын үйл ажиллагаа эрхэлж байгаа гадаад болон дотоодын компаниудаар төлүүлдэг байсан байж болзошгүй нөхцөл байдал тогтоогджээ. Мөн Сүхбаатар аймгийн удирдлагууд төр захиргааныхаа бүх байгууллагын дарга нар болох 29 хүнийг БНХАУ-д аялуулсан. Ингэхдээ аяллын зардал болох төлбөрийг Сүхбаатар аймагт ашигт малтмалын олборлолтын үйл ажиллагаа явуулж буй нэр бүхий компаниар төлүүлжээ. Хэрвээ энэ үйлдэл нь нотлогдвол албан тушаалаа урвуулан ашиглаж өөртөө давуу байдал бий болгосон гэмт хэрэгт тооцогдох юм. Аймгийн удирдлагуудыг 2023 оноос эхлэн мөрдөн шалгасан гэж Авлигтай тэмцэх газраас мэдээллээ.

УЛСЫН ЭМНЭЛЭГТ ҮЗҮҮЛЭХ ЦАГТАА ОЧООГҮЙ БОЛ ТОРГУУЛЬ ТӨЛНӨ

Эрүүл мэндийн даатгал төлдөг ч ихэнх хүн урьдчилан сэргийлэх болон бусад нарийн мэргэжлийн үзлэгт хамрагддаггүй. Угтаа иргэн бүр жилд нэг удаа үнэ төлбөргүй эрүүл мэндийн үзлэгт хамрагдах боломжтой байдаг. Мөн нөгөө талд эмнэлэгт цаг авсан ч тухайн товлолт өдөртөө очихгүй байх тохиолдлоос болж эмч болон үзлэгт хамрагдах гэж байгаа хүмүүс шаардлагатай тусламж үйлчилгээг үзүүлж, авч чадахгүй байх нь их. Тиймээс улсын эмнэлэгт цаг аваад тухайн товлолт хугацаандаа очоогүй иргэдэд торгууль ногдуулахаар болжээ. Тодруулбал, эмнэлэгүүдэд зохиомол ачаалал үүсгэхгүйн тулд эхний удаа авсан цагтаа очоогүй иргэд дахин үзлэгийн цаг авах бол 20 мянган төгрөгийн торгууль төлөхөөр болсон байна. Тус торгууль нь эмнэлгийн орлого болж үлдэх зохицуулалттай журам батлагдсан байна. Журмыг Эрүүл мэндийн даатгал /ЭМД/-ын ерөнхий газраас гаргасан бөгөөд торгуулийн мэдээллийг эмнэлэг заавал мэдээлэх ёстой аж. Гэхдээ торгуулийн дүн хасагдсан ч ЭМД-ын сангаас иргэнд олгох тусламж үйлчилгээний зардал суутгагдахгүй, бүрэн дүнгээр олгогдоно гэдгийг ЭМДЕГ-аас мэдээллээ.

ШИЛЖИН СУУРЬШИХ БҮРТГЭЛИЙГ ЭНЭ САРЫН 29-НИЙ ӨДРӨӨС ТҮР ХУГАЦААНД ЗОГСООНО

Монгол Улсын Их Хурлын сонгуулийн тухай хуулийн 25 дугаар зүйлийн 25.1 дэх хэсэгт “Иргэний шилжилт хөдөлгөөнийг санал авах өдрөөс 60 хоногийн өмнө зогсоож, санал авах өдрийн дараах өдрөөс сэргээнэ” гэж заасан байдаг. Үүний дагуу иргэний засаг захиргааны нэг нэгжээс нөгөө нэгжид шилжин суурьших хөдөлгөөний бүртгэлийг энэ сарын 29-ний өдрөөс эхлэн түр хугацаанд зогсооно. Нийслэлийн Улсын бүртгэлийн газрын дарга Г.Анхныбаяр "Бүртгэлийн байгууллага сонгуулийн хуулийн дагуу сонгогчийн нэрийн жагсаалтыг гардаг. Энэ дагуу энэ сарын 29-ний өдрөөс эхлэн иргэний шилжилт хөдөлгөөн зогсоно. Нийслэл хотод хаягийн бүртгэлтэй 1 сая 730 мянган иргэн байна. Урьдчилсан байдлаар сонгогчдын нэрийн жагсаалтыг гаргахад 1 сая 094.318 мянган иргэн бүртгэгджээ. Гэхдээ Улсын дээд шүүх, ШШГЕГ, УХМЕГ-аас нэрс ирэх бөгөөд эдгээр байгууллагаас ирсэн нэрс сонгогчийн нэрийн жагсаалтаас хасагддаг. Иргэд тухайн хаягаасаа нүүсэн ч хасалтаа хийлгэдэггүй. Энэ нь уг хаяг дээр олон хүн амьдарч байгаа юм шиг харагддаг. Тиймээс иргэд та бүхэн заасан хугацаанаас өмнө шилжилт хөдөлгөөнөө хийх шаардлагатай. Түүнчлэн тухайн хүний байнга оршин суудаг хаяг дээр нь танихгүй, гэр бүлийн биш хүн хүмүүс байвал УБЕГ-т өөрийн биеэр өргөдөл өгч болно. Мөн burtgel.gov.mn хаягаар хандаж тухайн нэрсийн жагсаалтаас харилцаж байгаа мэдээлэл зөрүүтэй бол шалгах гэсэн цэс рүү ороод гомдол гаргах боломжтой" гэв. Сонгогчдын нэрийн жагсаалтад бүртгэгдэн өөрийн оршин суугаа хаягийн мэдээлэл болон нийт сонгогчийн мэдээллийг https://election.burtgel.gov.mn/ цахим хуудаснаас харах боломжтой. Ташрамд, нийслэлийн 204 хороонд улсын бүртгэгч ажиллаж иргэний бүртгэлийн 10 төрлийн үйлчилгээг үзүүлдэг байсан. Өнгөрсөн оноос 29 төв, цэгээр 32 төрлийн үйлчилгээг үзүүлж байна. Мөн нийслэлийн хэмжээнд 29 цахим машинаар иргэн, хуулийн этгээдэд 24 төрлийн лавлагаа, үйлчилгээг үзүүлж байна.

БАРУУН АЙМГУУДЫН НУТГААР ЦАСАН ШУУРГА ШУУРЧ, ЭРС ХҮЙТЭРНЭ

Цаг агаарын аюултай үзэгдлээс сэрэмжлүүлэх мэдээ: Дөрөвдүгээр сарын 12-ны өдөр Ховдын төв, Говь-Алтайн баруун хэсгээр салхи секундэд 18-20 метр, зарим үед секундэд 24 метр хүрч ширүүснэ. Малчид, иргэд, тээвэрчдийн анхааралд: Энэ сарын12-нд баруун аймгуудын нутгийн баруун болон хойд хэсгээр, 13-нд нутгийн баруун хагаст, 14-нд нутгийн зүүн хагаст цас орж, цасан шуурга, нутгийн өмнөд хэсгээр шороон шуурга шуурч, эрс хүйтрэхийг онцгойлон анхааруулж байна. 2024 оны дөрөвдүгээр сарын 11-ний 20 цагаас дөрөвдүгээр сарын 12-ны 20 цаг хүртэл цаг агаарын урьдчилсан мэдээ: Хур тунадас: Нутгийн баруун хагаст үүлшинэ, бусад нутгаар солигдмол үүлтэй. Шөнөдөө баруун болон төвийн аймгуудын нутгийн хойд, зүүн аймгуудын нутгийн зүүн хэсгээр бага зэргийн бороо, нойтон цас, өдөртөө баруун аймгуудын нутгийн баруун болон хойд, төвийн аймгуудын нутгийн баруун хойд хэсгээр бороо, нойтон цас, уулаараа цас орж, цасан шуурга шуурна. Салхи: Шөнөдөө ихэнх нутгаар баруун өмнөөс секундэд 5-10 метр, өдөртөө нутгийн баруун хэсгээр баруун өмнөөс баруун хойш эргэж секундэд 9-14 метр, Алтайн уулархаг нутаг болон Арц богдын өвөр хоолойгоор секундэд 18-20 метр, зарим үед секундэд 24 метр хүрч ширүүсэж, шороон шуурга шуурна. Агаарын температур: Шөнөдөө Увс нуур болон Дархадын хотгор, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр -3…-8 градус хүйтэн, Алтай, Хангай, Хөвсгөлийн уулархаг нутаг, Орхон-Сэлэнгийн сав газар, Туул, Хэрлэн, Онон, Улз голын хөндийгөөр -4…+1 градус, говийн бүс нутгийн өмнөд хэсгээр +4…+9 градус, бусад нутгаар 0…+5 градус дулаан, өдөртөө Увс нуурын хотгор, Тэс голын хөндийгөөр -2…+3 градус, Монгол-Алтайн уулархаг нутаг, Завхан голын эх, Хүрэнбэлчир орчмоор +4…+9 градус, Их нууруудын хотгор, Хангай, Хөвсгөлийн уулархаг нутаг, Тэрэлж голын хөндийгөөр +10…+15 градус, говийн бүс нутгийн өмнөд хэсэг, Дорнод-Дарьгангын тал нутгаар +21…+26 градус, бусад нутгаар +15…+20 градус дулаан байна. УЛААНБААТАР ХОТ ОРЧМООР: Шөнөдөө үүл багасна, өдөртөө үүлшинэ. Хур тунадас орохгүй. Салхи баруун өмнөөс секундэд 5-10 метр. Шөнөдөө +1…+3 градус, өдөртөө +16…+18 градус дулаан байна. БАГАНУУР ОРЧМООР: Шөнөдөө үүл багасна, өдөртөө багавтар үүлтэй. Хур тунадас орохгүй. Салхи баруун өмнөөс секундэд 6-11 метр. Шөнөдөө -2…-4 градус хүйтэн, өдөртөө +15…+17 градус дулаан байна. ТЭРЭЛЖ ОРЧМООР: Шөнөдөө үүл багасна, өдөртөө багавтар үүлтэй. Хур тунадас орохгүй. Салхи баруун өмнөөс секундэд 6-11 метр. Шөнөдөө -3…-5 градус, өдөртөө +13…+15 градус дулаан байна.

ГАДААДЫН ИРГЭНД 100 ЖИЛЭЭР ГАЗАР ЭЗЭМШҮҮЛЭХ ЗААЛТЫГ ХӨРӨНГӨ ОРУУЛАЛТЫН ХУУЛИАС ХАСЛАА

Өнөөдрийн чуулганы нэгдсэн хуралдаанаар гадаадын иргэнд газрын 100 жилээр эзэмшүүлэх заалтыг Хөрөнгө оруулалтын хуулиас хасах хуулийн төслийг хэлэлцэж баталлаа. Иргэд төрийн үйл хэрэгт шууд оролцох эрхээ УИХ-аар дамжуулан эдлэх Үндсэн хуулийн заалтыг хэрэгжүүлж, УИХ-ын нийтийн өргөдлийн цахим системийг нэвтрүүлсэн. 100 мянган иргэний дэмжлэг авсан санал түүхэндээ анх удаа хууль болон батлагдаж байгааг УИХ-ын дарга Г.Занданшатар онцлоод, нийтийн өргөдөл санаачилсан иргэн Н.Номун-Эрдэнэ болон дэмжиж саналаа өгсөн Монгол Улсын 100 мянган иргэнд тусгайлан талархал дэвшүүлэв. УИХ-ын дарга Г.Занданшатар: Жирийн иргэн цахимаар хуулийн төсөлд саналаа өгч, үүнийг нь УИХ-аар хэлэлцэн баталж буй нь ардчилсан, цахим парламентын хөгжлийн тод жишээ боллоо. Өнөөгийн технологийн эрин зуунд цахим талбарыг зөв ашиглаж, эрх ашгийг нь хөндсөн заалтыг хуулийн төслөөс хасуулав. Иргэн хүн төрийн бодлогод саналаа хэлж, олноороо дэмжигдэж, хууль болон батлагдах үйл явц цааш цаашдын парламентад зөв үлгэр жишиг болно гэдэгт итгэж байна 2013 онд батлагдсан Хөрөнгө оруулалтын тухай хуулинд “хөрөнгө оруулагчид газрыг 15-60 хүртэл жилээр гэрээний үндсэн дээр ашиглуулах, уг хугацааг гэрээний анхны нөхцөлөөр нэг удаа 40 хүртэл жилээр сунгах хөрөнгө оруулалтын татварын бус урамшууллыг үзүүлж болно” гэсэн заалт нь орсон байдаг. Гэвч Газрын тухай болон Үндсэн хуультай зөрчилдсөн тул өнөөг хүртэл хэрэгжээгүй. Хэдийгээр хэрэгжээгүй заалт боловч цаашид ийм санаархал гарахаас сэргийлж, хуулийн зохицуулалтаар хаалт хийнэ гэж УИХ-ын дарга мэдэгдэж байсан. Ийнхүү газрыг гадаадын иргэнд 100 жилээр эзэмшүүлэх заалт Монгол Улсын ямар ч хуулинд байхгүй боллоо.

ИХ ХЭМЖЭЭНИЙ СУМ, ГАЛТ ЗЭВСГИЙГ ХУУЛЬ БУСААР ТЭЭВЭРЛЭЖ ЯВСНЫГ ИЛРҮҮЛЖЭЭ

Цагдаагийн байгууллагаас иргэн Д нь 2024 оны дөрөвдүгээр сарын 11-ний өдөр Хан-Уул дүүргийн 21 дүгээр хорооны нутаг дэвсгэрт байлдааны зориулалттай их хэмжээний сум, галт зэвсгийг хууль бусаар тээвэрлэж явсныг илрүүллээ. Эрүүгийн хуулийн тусгай ангийн 20.4 дүгээр зүйл /Галт зэвсэг, галт хэрэгсэл, тэсэрч дэлбэрэх бодис хууль бусаар эзэмших/-д заасан гэмт хэргийн шинжтэй үйлдэлд мөрдөн шалгах ажиллагааг явуулж байгаа аж. Иймд иргэд та бүхэн бүртгэл, гэрчилгээгүй галт зэвсэг, түүний бүрдэл хэсэг, тэсэрч дэлбэрэх бодис, галт хэрэгсэл, тэсэлгээний хэрэгслийг хууль бусаар олж авсан, хадгалж байсан хүн зохих байгууллагад сайн дураараа авчирч өгсөн бол эрүүгийн хариуцлагаас чөлөөлөх эрх зүйн зохицуулалттайг анхаарна уу.