“ГАЦУУРТ ХХК”-НИЙ ЗАХИРАЛ, ХӨДӨЛМӨРИЙН БААТАР Л.ЧИНБАТАД ХҮНИЙ АМИЙГ ХӨНӨӨХӨӨР ЗАВДСАН, ХУДАЛ МЭДЭЭЛЭЛ ТАРААСАН ҮНДЭСЛЭЛЭЭР ХЭРЭГ НЭЭЖЭЭ

06 / 19 3 сэтгэгдэл 5 264 үзсэнe

“Гацуурт” ХХК-ийг үүсгэн байгуулагч, Хөдөлмөрийн баатар Л.Чинбат Сэлэнгэ аймгийн Зүүнбүрэн сумын II багийн нутагт иргэд, малчдыг жолоодож явсан “Ланд круйзер” загварын автомашинаараа дайрч гэмтээсэн үйлдэл олны анхаарлын төвд байна. Дорнодын Баян-Уул сумаас гарал үүслийн гэрчилгээгүй 323 адууг Сэлэнгэ аймгийн нутагт тууж ирснийг орон нутгийнхан нь эсэргүүцэж, Л.Чинбат тэднээс нэг бус хүнийг дайрсан талаар бид мэдээлсээр байгаа. Уг адууг нь Төв аймгийн Баянцогт сумын уугуул, улсын харцага Ө.Даваабаатар тууж ирсэн бөгөөд Сэлэнгэ аймгийн Цагдаагийн газрынхан хэргийн газарт ажиллаж гэрчүүдээс тайлбар, мэдүүлэг авах үед утсаа салгаж, хаана байгаа нь тодорхойгүй болсон байв. Тиймээс түүнийг олж тайлбар мэдүүлэг авах шаардлагатай гэж хууль хяналтын байгууллагынхан үзсэн юм. Харин үдэш нь тэрбээр зарим цахим хуудасны сурвалжлагчид “Утас цэнэггүй болсон байсан. Би одоо тайлбар өгөхөөр явах гэж байна” хэмээн ярьсан. “Гацуурт” ХХК-ийн захирал Л.Чинбат дуулиан дэгдээснийхээ маргааш өглөө Сэлэнгэ аймгийн Цагдаагийн газрын мөрдөгчдөд тайлбар өгөөд удалгүй тус аймаг дахь “Алтанбулаг” боомтоор хил давж ОХУ руу явсан юм. Иргэдээс ирүүлсэн гомдол, мэдээллийн дагуу дөнгөж шалгалт эхэлж байсан учраас шүүх нь түүнд хилээр гарахыг хязгаарлах таслан сэргийлэх арга хэмжээ авах боломж бүрдээгүй үед ийнхүү хилээр гарчихав. Харин өмгөөлөгч нь “ОХУ-ын Буриад улс руу газар тариалангийн ажлаар явсан. Удахгүй эргэж ирнэ” хэмээж буй. Эх сурвалжуудын мэдээлснээр “Гацуурт” ХХК-ийн захирал, Хөдөлмөрийн баатар Л.Чинбатад Эрүүгийн хуулийн гурван ч зүйл заалтын дагуу хэрэг бүртгэлтийн хэрэг нээх тогтоол прокурор баталсан аж. Тодруулбал, хэд хэдэн хүнийг “Ланд круйзер-200” загварын 1559 УБЦ улсын дугаартай автомашинаар хөөж дайрч, гэмтээсэн үйлдэлд нь Эрүүгийн хуулийн ерөнхий ангийн 2.8-1 дэх хэсгийн журамлан тусгай ангийн 10.1-д заасан хүний амийг хөнөөхөөр завдсан, олон нийтийн сүлжээнд Сэлэнгэ аймгийн Зүүнбүрэн сумын иргэдийг малын хулгайч хэмээн мэдэгдэл гаргаж бусдын гүтгэсэн хэмээн тус хуулийн 13.14-т зааснаар, нийтийн хэв журмыг зөрчиж бусдад хүч хэрэглэн, гэмтээж, хүний халдашгүй, чөлөөтэй байх, олон нийтийн амгалан тайван байдлыг алдагдуулсан гэх үндэслэлээр хэрэг бүртгэлтийн хэрэг нээсэн байна.

ГАНЦ ӨДРИЙН ДОТОР СОГТУУГААР ТЭЭВРИЙН ХЭРЭГСЭЛ ЖОЛООДСОН 90 ЗӨРЧИЛ ГАРЧЭЭ

06 / 19 0 сэтгэгдэл 492 үзсэнe

Согтуугаар тээврийн хэрэгсэл жолоодох зөрчил буурахгүй байгааг цагдаагийн байгууллагаас онцолж байна. Өнгөрсөн амралтын ганцхан өдөрт л согтуугаар тээврийн хэрэгсэл жолоодсон 90 зөрчил илэрсэн байна. Илэрсэн 90 зөрчил болохоос далдуур хэд хэчнээн согтуу жолооч явж байсныг мэдэх аргагүй юм. Жолооч та согтууруулах ундаа хэрэглэсэн бол жолооны ард суухгүй байхыг зөвлөж байна. Цагдаагийн байгууллагын 102 тусгай дугаарт 2023 оны 06 дугаар сарын 18- ны өдөр нийт 1717 дуудлага, мэдээлэл бүртгэгдсэнээс зөрчлийн шинжтэй 1477 гэмт хэргийн шинжтэй 64 дуудлага, мэдээлэл байна.

“ГАЦУУРТ” ХХК-НИЙ ЗАХИРАЛ Л.ЧИНБАТЫН АДУУГ ӨНӨӨДӨР СЭЛЭНГЭ АЙМГААС АЛБАДАН ГАРГАНА

06 / 19 0 сэтгэгдэл 914 үзсэнe

Хөдөлмөрийн баатар Л.Чинбат 2023.06.15-нд Сүхбаатар аймгийн Түмэнцогт сумаас 323 адууг Сэлэнгэ аймгийн Зүүнбүрэн сум руу ямар нэг зөвшөөрөлгүйгээр оруулахыг завдсан бөгөөд эсэргүүцсэн нутгийн иргэдийг дайрч алахыг завдсан хэрэг гарсан билээ. Малын халдварт өвчин гарсан бүс нутгаас өвчлөл гараагүй эрүүл бүс рүү дээрх адууг туувраар оруулахыг завдсан нь ийнхүү малчдын эсэргүүцэлтэй тулгарсан юм. Уг асуудал үүсэхтэй зэрэгцэн Л.Чинбатын адууг албадан гаргах захирамжийг Сэлэнгэ аймгийн Зүүнбүрэн сумын засаг дарга Э.Саранбаатар 2023.06.16-ны өдөр гаргасан. Уг захирамжийн дагуу өнөөдөр Л.Чинбатын 323 тооны адууг албадан гаргах юм байна. Тодруулбал, Сэлэнгэ аймгийн Засаг даргын 2022 оны “Мал амьтны гоц халдварт өвчнөөс урьдчилан сэргийлэх, шилжилт хөдөлгөөнийг хориглох, хяналт тавих ажлыг шуурхай зохион байгуулах тухай” 110-р захирамжийг үндэслэн Л.Чинбатын адууг Сэлэнгэ аймгаас албадан гаргах бөгөөд зардлыг нь Л.Чинбат хариуцах юм.

С.ЧИНЗОРИГ: 45-60 НАСНЫХНЫ 12 ХУВЬ НЬ СЭТГЭЦИЙН ЭМГЭГТЭЙ БАЙНА

06 / 16 0 сэтгэгдэл 1 227 үзсэнe

УИХ-ын чуулганы нэгдсэн хуралдаанаар Ерөнхий сайдын мэдээлэл: Хүн амыг халдварт болон халдварт бус өвчнөөс урьдчилан сэргийлэх, эрт илрүүлэх үзлэг, оношилгоо, шинжилгээнд хамруулах ажлын явц, үр дүнгийн талаар мэдээлэл сонсож байна. Мэдээллийг Эрүүл мэндийн сайд С.Чинзориг танилцуулав.Энэ үеэр Эрүүл мэндийн сайд С.Чинзориг “Эрт илрүүлэгт зориулж 2023 онд 76 байгууллагад 20 тэрбум 860 сая төгрөгийн санхүүжилтийг олгосон. Энэ үзлэг, оношилгоонд зургаадугаар сарын 8-ны өдрийн байдлаар 31 хувь буюу 1247271 хүн хамрагдсанаас 45 хувь нь эрэгтэйчүүд, 55 хувь нь эрэгтэйчүүд байна.45-60 насны хүн амын 12 хувь нь сэтгэцийн эмгэгтэй байна. Зонхилон тохиолдох сэтгэцийн үндсэн дөрвөн эмгэгээс архаг ядаргаа 3.5 хувь, сэтгэл түгшилт 7.6 хувь, тайлбарлаж боломгүй биеийн зовуурь шаналгаа 6.9 хувь, сэтгэл гутрал 1.7 хувь тус тус тохиолдсон байна” хэмээв.

ШӨНИЙН АВТОБУС ДАРААХ ЧИГЛЭЛД 22.00-02.00 ЦАГИЙН ХООРОНД ҮЙЛЧИЛНЭ

06 / 16 6 сэтгэгдэл 2 337 үзсэнe

Нийслэлийн иргэд шөнийн цагаар зорчих эрэлтийг хангах, аюулгүй, найдвартай тээврийн үйлчилгээ үзүүлэхээр шөнийн тээврийн үйлчилгээг өчигдөрөөс эхлүүлсэн. Нийтийн тээврийн дараах зургаан чиглэлд цахилгаан автобусууд 22.00-02.00 цаг хүртэл иргэдэд үйлчлэх юм. Тодруулбал, • ШҮ:1 “5 шар-Сүхбаатарын талбай” • ШҮ:2 “Сүхбаатарын талбай-Ботаникийн эцэс” • ШҮ:3 “Шархад-3, 4-р хороолол” • ШҮ:4 “3, 4-р хороолол-Өнөр хороолол-ХМК” • ШҮ:5 “Зунжин худалдааны төв-Ард кино театр” • ШҮ:6 “МУБИС-Архивын ерөнхий газар” гэсэн чиглэлд үйлчилнэ. Шөнийн автобусны үнэ энгийнхтэй адил 500 төгрөг байх бөгөөд 1.5 км радиус дотор дамжин суухад үнэгүй.

БНСУ РУУ ЗОРЧИХ, ВИЗ МЭДҮҮЛЭХ ИРГЭДИЙН АНХААРАЛД

06 / 16 0 сэтгэгдэл 4 348 үзсэнe

Бүгд Найрамдах Солонгос Улсын виз мэдүүлэх болон тус улс руу зорчиж буй иргэдийн тоо нэмэгдэж байгаатай холбогдуулан дараах зөвлөмж, мэдээллийг өгч байна. Үүнд: БНСУ-ын виз мэдүүлж байгаа иргэн нэн тэргүүнд өөрийн зорилгод нийцсэн ангиллын визийг мэдүүлэх, баримт бичгийн бүрдлийг үнэн зөв, сайтар хангаж, зорчих зорилгоо бүрэн тодорхойлох шаардлагатай /Виз мэдүүлэхтэй холбоотой дэлгэрэнгүй мэдээллийг БНСУ-ын ЭСЯ-ны https://overseas.mofa.go.kr/mn-mn/wpge/m_276/contents.do цахим хуудаснаас авна уу/. Виз мэдүүлж байгаа иргэний гэр бүлийн гишүүн, ойрын төрөл садан нь БНСУ-д визийн хугацаа хэтрүүлж оршин сууж байгаа эсхүл оршин сууж байсан, аливаа гэмт хэрэг, зөрчилд холбогдож байсан тохиолдолд виз мэдүүлэгчид виз олгохоос татгалзах магадлалтайг анхаарна уу. Зохих ангиллын виз авч БНСУ-руу зорчиж буй иргэд өөрийн аяллын зорилгыг нотлох баримт бичиг, тус улсад байх хугацаандаа байрлах газар, зочид буудлын баталгаажсан захиалга, хаягийг сайтар бэлтгэн биедээ авч явахыг анхаарна уу. Виз мэдүүлэх үедээ өгсөн мэдээллээ өөрчлөх, очоод байрлах хаягаа тодорхой хэлж чадахгүй байх, аяллын зорилгоо тодорхойлж, нотолж чадахгүй зэрэг нь БНСУ-ын хилээр гадаадын иргэдийг нэвтрүүлэхгүй байх үндэслэл болдог. БНСУ-ын ЭСЯ-наас олгосон виз нь тус улсын хилээр нэвтрэх бүрэн баталгаа биш бөгөөд аливаа улсын Хилийн шалган нэвтрүүлэх алба, Цагаачлалын алба нь гадаадын иргэнийг өөрийн улсын хилээр нэвтрүүлэх эсэх асуудлыг газар дээр нь буюу хилийн шалган нэвтрүүлэх цэгт шийдвэрлэх бүрэн эрхтэй байдаг. Өөрийн улсын дотоодын хууль, тогтоомжийн хүрээнд хийж буй энэхүү ажиллагаанд аливаа гадаад улсын төрийн байгууллага, хувь хүн хөндлөнгөөс оролцох боломжгүй. БНСУ-ын Цагаачлалын албаны мэдээллээр 2023 оны 5 дугаар сарын байдлаар Монгол Улсын 55,329 иргэн тус улсад оршин сууж байгаагаас 17,749 иргэн буюу 32 хувь нь визийн хугацаа, нөхцөлийг зөрчин оршин сууж байна. Түүнчлэн, өдөрт дунджаар 70 орчим монгол иргэн БНСУ-д оршин суух визийн хугацаагаа хэтрүүлж байгаа нь тус улсыг зорих, виз мэдүүлэх манай иргэдэд сөргөөр нөлөөлж байгаа талаар мэдээлсэн болно. Иймд, БНСУ руу зорчиж буй иргэд Та бүхэн зорчих зорилгодоо нийцүүлэн, визийн хугацаагаа хэтрүүлэхгүй зорчиж, суугаа улсын хууль тогтоомж, дүрэм журмыг чанд дагаж мөрдөхийг уриалж байна. Гадаад харилцааны яамны зүгээс иргэдийнхээ БНСУ-д зорчих нөхцлийг хөнгөвчлөх чиглэлээр солонгосын талтай үргэлжлүүлэн хамтран ажиллаж, шат дараатай арга хэмжээг авч хэрэгжүүлж байна. Эх сурвалж: Гадаад харилцааны яамны Консулын газар

ЭРДЭНЭТ ХОТОД БАЙРЛАХ ОРГИЛ ХУДАЛДААНЫ ТӨВ НЬ ЦАГИЙН АЖИЛЧДЫНХАА ЦАЛИНГААС БАРАА МАТЕРИАЛЫН ДУТАГДАЛ НЭРИЙДЛЭЭР 57 МЯНГАН ТӨГРӨГИЙН СУУТГАЛ АВЧ БАЙНА ГЭВ

06 / 16 0 сэтгэгдэл 688 үзсэнe

Эрдэнэт хотод байрлах Оргил худалдааны төв нь цагийн ажилчдынхаа цалингаас бараа материалын дутагдал нэрийдлээр 57 мянган төгрөгийн суутгал авч байна гэв. Тодруулбал: Тус Оргил худалдааны төв нь цагийн ажил хийх хүсэлтэй иргэнтэй өдрийн 67 мянган төгрөгийн цалинтай ажиллуулахаар тохиролцдог ба өглөө 08:00-23:00 цаг хүртэл ажиллах шаардлагыг тавьдаг байна.Гэвч анх тохиролцсон цалингаас өдөр бүр 57 мянган төгрөгийг бараа материалын дутагдал гэх нэрийдлээр цагийн ажилтанаасаа 5 хоногийн хугацаанд суутган авч 50 мянган төгрөгийн цалин олгожээ. Энэ талаар түүний ар гэрийхэн гомдолтой байгаагаа тухайн салбар хариуцсан захиралд мэдээлсэн боловч ажилтны буруутай үйлдлээс болж цалинг хассан энэ талаар мэдэхгүй, цалин олгосон задаргааг үзнэ гэх мэтчилэн үл тоомсорлосон байдлаар харьцсан талаар ар гэрийнхэнийхэн зүгээс мэдээлэл өгөхөөр болсон юм. Энэ талаарх дэлгэрэнгүй мэдээллийг Нэгүүн.мн сайт тун удахгүй сурвалжлан ажиллах болно.

ЗАВХАН АЙМГИЙН ЦАГААН ХАЙРХАН СУМЫН ЗАСАГ ДАРГА С.БАТ-ӨЛЗИЙ МӨН СУРГУУЛИЙН ЗАХИРАЛ Б.АНХБАЯР НАР АРДЧИЛСАН НАМЫН ГИШҮҮН ГЭХ НЭРИЙДЛЭЭР СУМЫН ЗАХИРГААНЫ АЖИЛТНАА НОЦТОЙГООР ЗОДОЖ ГЭМТЭЭЖЭЭ

06 / 16 1 сэтгэгдэл 1 596 үзсэнe

Завхан аймгийн Цагаан хайрхан сумын захиргаанд ажилдаг иргэн Д гэгчийг тус сумын засаг дарга С.Бат-Өлзий мөн сургуулийн захирал Б.Анхбаяр нар хамтран архидан согтуурсан үедээ зодож танхайрсан хэрэг 04-р сарын 14- нөөс 15 нд шилжих шөнө нутгийн захиргаа удирдлагын байранд болсон байна. Тодруу лбал: Иргэн Д гэгч нь ардчилсан намын төлөөлөл байсан гэх ба тус сумын засаг дарга, сургуулийн захирал гэх улс нь МАН-ын гишүүд дэмжигчид байснаас үүдэн хувийн чанартай өс хонзонгийн шалтгаанаар ухаангүй болтол нь зодож гэмтээсэн хэрэг гарчээ. Мөн иргэн Д-гийн ар гэрийнхэний мэдээлж буйгаар хэрэг гарсан өдөр ажлын цаг дууссаны дараа хохирогчийг ажлын байрандаа ирэхийг дуудсан ба сөн түшүүлэх зорилгоор авч гарсан талаар мэдээлэл өгсөн юм. Тус хэрэг болдог өдөр хохирогч иргэн Д-г зодож танхайрсан этгээдүүд эмнэлгийн анхан шатны тусламж үзүүлэлгүй хэргийн газраас зугтааснаас, иргэний биеийн байдал өнөөдөр хүндэвтэр хэвтэн эмчлүүлж байна. Хохирогч иргэн Д-г зодож гэмтээснээс хойш өдийг хүртэл Сумын засаг дарга С.Бат-Өлзий, сургуулийн захирал Б.Анхбаяр нарт хариуцлага тооцоогдоогүй ба хохирогч иргэн Д-г гомдол мэдүүлвэл ажлаас нь чөлөөлөх, ажилгүй болгох зэргээр удаа дараа айлган сүрдүүлсэнийг хохирогчдын ар гэрээс тодрууллаа. Энэ мэтчилэн монгол улсад МАН-ын гишүүд дэмжигчид, тэдний гар хөл болсон эрх мэдэл, албан тушаалтангуудад хууль үйлчилэхээ болиод удсаны нэг жишээ нь энэ юм.

СОГТУУРСАН ҮЕДЭЭ ХУРД ХЭТРҮҮЛЖ, 2 ХҮНИЙ АМИЙГ ХӨНӨӨСӨН ЭТГЭЭДЭД 3 ЖИЛИЙН ЯЛ ОНООЖЭЭ

06 / 16 3 сэтгэгдэл 1 196 үзсэнe

Иргэн Ж нь 2022 оны наймдугаар сарын 19-ний өдөр архи, согтууруулах ундааны зүйл хэрэглэсэн үедээ ... аймгийн ... сумын ... багийн нутаг дэвсгэрт Toyota Sai маркийн **-** улсын дугаартай тээврийн хэрэгсэл жолоодож замын хөдөлгөөнд оролцож явахдаа Монгол улсын замын хөдөлгөөний дүрмийн 3.7.а-д заасан “Согтууруулах ундаа хэрэглэсэн үедээ тээврийн хэрэгсэл жолоодох” мөн дүрмийн 12.1-д заасан “Жолооч хөдөлгөөний эрчим, тээврийн хэрэгсэл болон тээж яваа ачааны онцлог, замын болон цаг агаарын нөхцөл, хөдөлгөөний дагуу үзэгдэлтийг харгалзан тээврийн хэрэгслийн хурдыг энэ дүрэмд тогтоосон хязгаараас хэтрүүлэхгүйгээр тохируулан сонгож явна” гэсэн заалтуудыг тус тус зөрчсөний улмаас зам тээврийн осол гаргажээ. Ослын улмаас Д.Ц, Б.М нарын амь нас хохирсон хэрэгт аймгийн прокурорын газраас яллах дүгнэлт үйлдэж, хэргийг шүүхэд ирүүлсэн байна. Эрүүгийн хуульд “...согтуурсан, мансуурсан үедээ үйлдсэн”, “энэ гэмт хэргийн улмаас хоёр, түүнээс олон хүний амь нас хохирсон бол тээврийн хэрэгслийг жолоодох эрхийг таван жилээс найман жил хүртэл хугацаагаар хасаж хоёр жилээс найман жил хүртэл хугацаагаар хорих ял шийтгэнэ” хуульчилжээ. Шүүгдэгч Л.Ж-ыг Эрүүгийн хуулийн 27.10 дугаар зүйлийн 4 дэх хэсгийн 4.1, 4.2-д заасан согтуурсан үедээ хөдөлгөөний аюулгүй байдлын тухай хууль түүнд нийцүүлэн гаргасан захиргааны хэм хэмжээний актыг зөрчсөний улмаас хоёр хүний амь нас хохирсон гэмт хэрэг үйлдсэн гэм буруутайд тооцсон. Түүний тээврийн хэрэгсэл жолоодох эрхийг 6/ зургаан/ жилийн хугацаагаар хасаж, 3 /гурав/ жилийн хугацаагаар хорих ялаар шийтгэж, хорих ялыг нээлттэй хорих байгууллагад эдлүүлэхээр шийдвэрлэжээ. Шүүгдэгч Л.Ж-аас 49.977.840 төгрөгийг амь хохирогч Б.М-ын хохирогчийн хууль ёсны төлөөлөгчид олгож, гэм хор учруулсны төлбөр, сэтгэцэд учруулсан гэм хорын нөхөн төлбөрийг иргэний хэрэг шүүхэд хянан шийдвэрлэх журмын дагуу нотлох баримтаа бүрдүүлэн жич нэхэмжлэх эрхтэй байна. Мөн шинжээчийн зардал 200.000 төгрөгийг шүүгдэгч Л.Ж-аас гаргуулж, шүүгдэгч Л. Ж-ын 06 /зургаан/ жилийн хугацаагаар оногдуулсан эрх хасах ялыг хорих ял эдэлж дууссаны дараа үеэс эхлэн тоолохоор шийдвэрлэжээ. Тойм бэлтгэсэн: ... аймаг дахь сум дундын Эрүүгийн хэргийн анхан шатны шүүхийн шүүгч, Ерөнхий шүүгч Н.Дэлгэрмаа

СЭРГЭЭН БОСГОХ АЖЛЫГ ЯАРАЛТАЙ ЭХЛҮҮЛЖ ГАЛТ ТЭРЭГНИЙ ХӨДӨЛГӨӨНИЙГ НЭЭЖЭЭ

06 / 16 0 сэтгэгдэл 272 үзсэнe

2023 оны зургадугаар сарын 15-ны өдрийн 15 цаг 50 минутын орчимд Замын-Үүдийн чиглэлд ачаа тээвэрлэж явсан 67 вагон бүхий 3390 тонн жинтэй 2810 дугаар галт тэрэгний бүрэлдэхүүн дундаас 10 вагон Шаргын-Овоо зөрлөгийн 1093-р километрийн 2-р зуутад замаас гарчээ. Уг галт тэрэг нь 15 цаг 40 минутад Шаргын-Овоо зөрлөгт ирж, Замын-Үүд – Сайншандын чиглэлийн галт тэргийг зөрж өнгөрүүлсэн байна. Үүний дараа 15 цаг 46 минутад хөдлөөд удалгүй Шаргын-Овоо зөрлөгийн гарах дохионы ойролцоо хөдлөх бүрэлдэхүүн замаас гарчээ. Замаас гарсан 10 вагоны 1 нь хоосон, 3 нь нүүрс, 6 нь жонш ачсан вагонууд байна. Сэргээн босгох ажлыг яаралтай эхлүүлж тухайн өдрийн 23 цаг 25 минутад галт тэргийг саадгүй аялах нөхцөлийг бүрдүүлэн галт тэрэгний хөдөлгөөнийг нээгээд байна. Сэргээн босгох ажил үргэлжилж байна. Эх сурвалж: “УБТЗ” ХНН