ЯЛ ЭДЛЭХЭЭС ЗАЙЛСХИЙСЭН 100 ИРГЭНИЙ ЯЛЫГ ХОРИХ ЯЛААР СОЛИЛОО

10 / 12 0 сэтгэгдэл 844 үзсэнe

Прокурорын байгууллага ял эдлүүлэх ажиллагаанд хүний эрх, эрх чөлөө зөрчигдөхөөс хамгаалах, урьдчилан сэргийлэх зорилгоор хорих, хорихоос өөр төрлийн ял эдлүүлэх болон цагдан хорих, баривчлах, саатуулах шийдвэрийг биелүүлэх ажиллагаатай 458 удаа танилцаж, шалгалт 70, судалгаа 37-г хийжээ. Дээрх ажиллагааны явцад холбогдох хууль, журмыг зөрчсөн, хангалтгүй хэрэгжүүлсэн 185 зөрчлийг илрүүлж, шүүхийн шийдвэр гүйцэтгэх байгууллагад 17 шаардлага бичиж хүргүүлсэн байна. Прокурорын шаардлагыг хүлээн авсан байгууллага, албан тушаалтан ял эдлүүлэх ажиллагааны явцад гарсан зөрчил, түүнд нөлөөлсөн шалтгаан нөхцөлийг арилгах арга хэмжээ авч, 5 алба хаагчид сахилгын шийтгэл оногдуулсан байна. Мөн ял эдлэхээс зайлсхийсэн 100 иргэний ялыг эрүүгийн хуульд заасны дагуу солиулах арга хэмжээ авчээ. Тодруулбал, торгох ялыг шүүхээс тогтоосон хугацаанд нь биелүүлээгүй 23, нийтэд тустай ажил хийлгэх ялыг гүйцэтгээгүй 40, зорчих эрхийг хязгаарлах ял эдлэхээс зайлсхийсэн 37 иргэний ялыг хорих ялаар солиулсан байна. Түүнчлэн бусдад учруулсан хохирлоо нөхөн төлсөн, ял эдлэх хугацаандаа ноцтой зөрчил гаргаагүй, оногдуулсан ялын тодорхой хувийг эдэлсэн 85 иргэнийг хорих ялаас нь хугацааны өмнө суллах талаар хорих байгууллагын тодорхойлолтыг үндэслэн дүгнэлт бичиж, шүүхээр шийдвэрлүүллээ.

ПРОКУРОР: МӨРИЙТЭЙ ТОГЛООМ ТОГЛОХ ЗӨРЧЛИЙН ХЭРЭГ ЕСДҮГЭЭР САРД 3 ДАХИН ӨССӨН БАЙНА

10 / 12 0 сэтгэгдэл 692 үзсэнe

Улсын хэмжээнд 2022 оны 9 дүгээр сарын байдлаар 233053 зөрчлийн хэрэг бүртгэгдсэн нь 8 дугаар сартай харьцуулахад 0.01 хувиар өссөн байна. Нийт зөрчлийн хэргийн 74.2 хувь нь Нийслэлд, 25.7 хувь нь орон нутагт бүртгэгдсэн бол 99 хувийг Цагдаагийн байгууллага, 0.18 хувийг Мэргэжлийн хяналт, 0.01 хувийг Онцгой байдал, 0.79 хувийг бусад байгууллагын эрх бүхий албан тушаалтнууд шалгаж шийдвэрлэсэн байна. Дээрх хугацаанд 230895 хүн, 293 хуулийн этгээд Зөрчлийн тухай хуульд зааснаар шийтгүүлсэн ба өмнөх сараас шийтгэл оногдуулсан хүн 0.7 хувиар буурч, хуулийн этгээд 13.6 хувиар өсжээ. Зөрчил үйлдсэн хүмүүсийн 76 хувь нь эрэгтэй, 24 хувь нь эмэгтэй байгаа бол 64.4 хувь нь 26-45 насныхан байна. Өнгөрсөн 9 дүгээр сард үйлдэгдсэн зөрчлийг 8 дугаар сартай харьцуулбал Мөрийтэй тоглоом тоглох зөрчлийн хэргийн гаралт хамгийн их өссөн дүнтэй байна. Тодруулбал, Мөрийтэй тоглоом тоглох зөрчил 3 дахин, Олон нийтийн газарт зүй бусаар биеэ авч явах зөрчил 29.4 хувиар, Гамшгаас хамгаалах тухай хууль зөрчих зөрчил 25 хувиар, Хүүхдийн эрхийг зөрчих зөрчил 17.5 хувиар, Нийтийн зориулалттай орон сууцны оршин суугчдын амгалан тайван байдлыг алдагдуулах зөрчил 7.6 хувиар, Танхайрах зөрчил 0.4 хувиар тус тус өсжээ. Харин Хулгайлах зөрчил 21.4 хувиар, Архидан согтуурахтай тэмцэх тухай хууль зөрчих зөрчил 17.8 хувиар, Төрийн албан тушаалтны шийдвэрийг үл биелүүлэх, үйл ажиллагаанд нь саад учруулах зөрчил 16 хувиар, Замын хөдөлгөөний аюулгүй байдлын тухай хууль зөрчих зөрчил 2.1 хувиар, Гэр бүлийн хүчирхийлэлтэй тэмцэх тухай хууль зөрчих зөрчил 1.4, Хүний биед халдах зөрчил 0.3 хувиар тус тус буурсан байна.

Д.ЗАГДЖАВ ГЕНЕРАЛ ХАСХОМ-ТЭЭ БҮРТГҮҮЛЭЭГҮЙ ОРД ГАЗАР, ЛИЦЕНЗЭЭ ГАДНЫХАНД ХУДАЛДАХ ГЭЖ БАЙНА

10 / 12 8 сэтгэгдэл 924 үзсэнe

Шинэхэн бригадын генерал, ШШГЕГ-ын дарга Д.Загджавын талаар хэл ам, хийсэн бүхэн нь асуудал дагуулдаг талаар бид өмнө нь баримттай хүргэсэн билээ. Тэгвэл Д.Загджавын өөрийн хөрөнгө орлогын мэдүүлэгтээ бүртгүүлээгүй орд газар, аж ахуйн нэгжийнхээ лицензийг гадаадынханд худалдахаар явж буй талаар чих дэлсэх болов. Энэ талаар дэлгэрүүлэн хүргэе! Монгол Улсын хэмжээнд MV буюу ашиглалтын тусгай зөвшөөрөлтэй 1806, XV хэмээх хайгуулын тусгай зөвшөөрөлтэй 1226, нийт 3032 аж ахуйн нэгж үйл ажиллагаа явуулдаг гэдгийг АМГТГ-ын цахим хуудаснаас харж болно. Тэдгээрээс Дундговь аймгийн нутагт ашигт малтмал олборлох чиглэлээр 115, хайгуулын 136 аж ахуйн нэгж ажиллаж буй аж. Тэдний нэг нь эрхэм генералын ойрын төрлийн садангийн хүний хүүхдийн эзэмшилд бүртгэлтэй байдаг юм билээ. Тодруулбал, УБЕГ-ын Хуулийн этгээдийн улсын бүртгэлийн мэдээллийн сангийн цахим хуудсанд улсын бүртгэлийн 6396682 дугаартай “Гео зил” ХХК нь уул уурхай, бизнесийн зөвөлгөө өгөх, гадаад худалдааны чиглэлээр үйл ажиллагаа явуулахаар байгуулсан, 2019 оны хоёрдугаар сарын 18-нд улсын бүртгэлд бүртгүүлсэн аж ахуйн нэгж. Тус компанийн захирал, эцсийн өмчлөгч нь Н.Ариунзаяа хэмээн бүртгэжээ. Тэрбээр бригадын генерал Д.Загджавын төрсөн дүү Д.Загдсүрэнгийн охин нь аж. “Гео-зил” ХХК нь 2019 оны нэгдүгээр сарын 30-нд Дундговь аймгийн Дэлгэрхангай, Хулд сумын нутаг дэвсгэрт түгээмэл тархацтай ашигт малтмал буюу барилгын материалын чиглэлээр 21 дүгээр зуун гэх талбайд 15408.02 га-д үйл ажиллагаа явуулах ашиглалтын MV021278 дугаартай тусгай зөвшөө рлийг 30 жилийн хугацаатай 2049 оны нэгдүгээр сарын 30-ныг хүртэл үйл ажиллагаа явуулахаар авчээ. Энэ том хэмжээтэй талбайд түгээмэл тархацтай ашигт малтмал буюу барилгын материалын ашиглалтын тусгай зөвшөөрлийг 2019 оны нэгдүгээр сарын 30-нд олгосон байдаг бөгөөд тухайн үед Д.Загджав Уул уурхай, хүнд үйлдвэрийн дэд сайдаар ажиллаж байсан нь тусгай зөвшөөрөл олгоход нөлөөлсөн байж болзошгүй гэх хардлага ч байдаг юм. Мөн бригадын генерал Д.Загджавын хамаарал бүхий гэж хэлж болохуйц өөр нэг компани Дундговь аймгийн Хулд суманд үйл ажиллагаа явуулах тусгай зөвшөөрөл эзэмшдэг юм байна. Гэхдээ тэр нь БНХАУ-ын хоёр ч аж ахуйн нэгжтэй хамтарсан хөрөнгө оруулалттай. Тодруулбал, Хятадын эрчим хүчний нөөцийн компани, БНХАУ-ын гэх аж ахуйн нэгжүүдтэй хамтарч МИНВЕСКО гэх компанийг М.Баатархүү гэх иргэн байгуулжээ. Энэ М.Баатархүү нь дээрх “Гео зил”-ийг ч удирдаж байсан нэгэн аж. МИНВЕСКО-гийн эцсийн өмчлөгч нь М.Баатархүү, Bao Geriletu нар бол гүйцэтгэх захирал нь Л.Сайханцэцэг гэх эмэгтэй. Бригадын генерал Д.Загджав Удирдах зөвлөлийнх нь даргаар ажилладаг “Монголын энх тайван найрамдлын байгууллага” НҮТББ-тай дээрх Л.Сайханцэцэг бас холбоотой аж. МИНВЕСКО ХХК нь Хулд сумын нутагт “Гео зил” ХХК-тай ижил нэртэй буюу 21 дүгээр зуун хэмээх талбайд 2016 оны арваннэгдүгээр сарын 8-нд MV020674 дугаартай бал чулууны хайгуулын чиглэлээр 3000.56 га-д үйл ажиллагаа явуулах зөвшөөрөл 30 жилийн хугацаатай авсан юм байна. Улмаар МИВЕСКО ХХК нь 21 дүгээр зуун талбайд эзэмшиж байсан 589.26 га газраа “Гео зил” компани руу шилжүүлснийг АМГТГ-ын Кадастрын хэлтсээс гаргадаг Ашигт малтмалын тусгай зөвшөөрлийн 2019 оны зургадугаар сарын хөдөлгөөний мэдээнд тодорхой тусгажээ. Лицензээ нөгөө компанидаа шилжүүлсэн МИНВЕСКО ХХК-д хэд хэдэн захирал байдаг агаад “Космо” ХХК-ийн захирал Б.Батбаасан, иргэн Ц.Энхбүрэн нараас гадна бригадын генерал Д.Загджав нь захирал гэх албан тушаалд хамаарагддаг гэх мэдээлэл бий. Гэхдээ АТГ-т жил бүр гаргаж өгдөг ХАСХОМ-тээ дээрх компанитай холбоотой хувьцаа эзэмшдэг талаар мэдүүлээгүй байдаг. Түүгээр ч зогсохгүй УБЕГ-ын Хуулийн этгээдийн бүртгэлийн санд бүртгэгдсэн, Удирдах зөвлөлийн даргаар нь ажилладаг “Монголын энх тайван найрамдлын байгууллага” НҮТББ-аа ч бүртгүүлээгүй байгаа юм билээ. Эдгээр компанийнхан нь Дундговь аймгийн нутагт эзэмшдэг ашиглалтын дээр дурдсан хоёр тусгай зөвшөөрлөө гадаадынханд өндөр үнээр худалдахаар явж байгаа гэх мэдээлэл бий. Өөрөөр хэлбэл, Д.Загджав генералтай санхүүгийн юм уу, өөр ямар нэг байдлаар хамааралтай аж ахуйн нэгжийнхэн Монгол Улсын газар шороог лиценз хэлбэрээр наймаалцах гэж буй аж. ХАСХОМ-тээ бүртгүүлээгүй аж ахуйн нэгж, орд газраа гадаадынханд худалдах гэж байгаа нь үнэн ч бай, хов жив ч байлаа гэсэн АТГ Авлигын эсрэг хуулийн 13.5-13-8 дарь хэсгийг үндэслэл болгон шалгаж нягтлах, улмаар хариуцсан салбарын сайд хариуцлага тооцох боломж бүрэн бий. Авлигын эсрэг хуулийн 13.5-д “Авлигатай тэмцэх газар өргөдөл, гомдол, мэдээллийн мөрөөр, эсхүл төлөвлөгөөт хяналтаар шалгалт явуулж болно” гэж заасан бол 13.8.4-т “нэг жилийн цалинтай тэнцэх буюу түүнээс их хэмжээний хөрөнгө, орлогыг мэдүүлээгүй, худал мэдүүлсэн, эсхүл хөрөнгө, орлогын мэдүүлгийг гаргаж өгөөгүй, гаргахаас татгалзсан бол албан тушаалаас нь огцруулах буюу ажлаас халах” заалттай. эх сурвалж:arslan.mn

Д.ЗАГДЖАВЫН АЛДСАН ХОРИГДЛУУДЫГ ОЛОХЫН ТУЛД ТӨСВӨӨС ИХ ХЭМЖЭЭНИЙ ЗАРДАЛ ГАРЧ БАЙНА

10 / 12 0 сэтгэгдэл 853 үзсэнe

ШШГЕГ-ын дарга, шинэхэн Бригадын генерал Д.Загджавын ажлын хариуцлага алдсантай холбоотой асуудлууд ар араасаа гарсаар байна. Шүүхийн шийдвэр гүйцэтгэх байгууллагын алба хаагчид ч мөн удаа дараа ажлын зохион байгуулалт, дарамт шахалттай холбоотой гомдол саналаа дээшээ уламжилдаг боловч огт шийдвэрлэгдэхгүй байсаар өнөөдрийг хүрчээ. Д.Загджав даргын хамар дороос байс хийгээд л нэг хоригдол оргодог болоод байна. Өнгөрсөн наймдугаар сард гэхэд л 2,3 хоригдол өөр өөр хорих ангиудаас оргоцгоосон. Тухайлбал, ШШГЕГ-ын харьяа 423 дугаар ангиас наймдугаар сарын 08-ны өдөр хоригдол А.Мөнхбат нь оргосон. Түүнийг өнгөрсөн хугацаанд бүтэн эрэн сурвалжлах баг гаран өдөр шөнөгүй хайж байж өнөөдөр дайчлан баривчилсан байна. Мөн Сэлэнгэ аймгийн Мандал сум дахь хорих 413 дугаар ангиас наймдугаар сарын 29-ний өдөр таван удаагийн ял шийтгэл эдэлсэн Б.Баянбаатар мөн л оргосон. Түүнийг шуурхайн эрэн сурвалжлах баг гарган хайснаар есдүгээр сарын 02-ны өдөр дайчлан баривчилсан. Тэгвэл Д.Загджав дарга хоригдолоо алдсан гээд жишим ч үгүй суух хооронд нь улсын төсвөөс өчнөөн зардал гарган шуурхайн багийг өдөр шөнөгүй ажлуулсны үр дүнд алдсан хоригдлоо олж, баривчилж байна. Зарим алдсан хоригдлуудыг нь өнөөдрийг хүртэл эрэн сурвалжилсаар л байна. Энэ бүх зардал чирэгдэлийг улсын төсвөөс гаргах биш хариуцлага алдсан ШШГЕГ-ын дарга Д.Загджав генералаар төлүүлдэг байя! Шүүхийн шийдвэр гүйцэтгэх байгууллагын алба хаагчдаас байгууллагынхаа үйл ажиллагаанд аудит оруулах саналаа удаа дараа илэрхийлж байжээ. Учир нь тухайн байгууллагад хэмнэлтийн хууль үйлчлэхээс илүү албан тушаал дагасан авлига цэцэглэж, төсвийн мөнгийг үрэн таран хийх явдал хэрээс хэтэрсэн хэмээн эх сурвалж мэдээлэж байв. Түүнчлэн хоригдлуудтай ар гэрийнхнийг нь уулзуулахад хүртэл төлбөр мөнгө авдаг, хүнд суртал үүсдэг талаар эх сурвалжууд мөн хэлж байна. Албан тушаалын бөглөөс хийж буй Д.Загджав даргад яагаад хариуцлага тооцохгүй байна вэ?! Эх сурвалж:arslan.mn

ЦАХИЛГААН ТАМХИ ТУРШИЖ ҮЗСЭН 5 ХҮН ТУТМЫН ХОЁР НЬ ЯНЖУУР ТАМХИНААС ТАТГАЛЗЖЭЭ

10 / 12 0 сэтгэгдэл 769 үзсэнe

Иргэдэд тамхинаас гарахад нь туслах зорилгоор цахилгаан тамхины үнэгүй хэрэглээний эрх өгөхөд нэг сарын дотор 100 гаруй хүн янжуур тамхинаас татгалзжээ. Уг судалгаанд Английн Норфолк дахь Грейт Ярмут хотын тамхи татдаг иргэдийг хамруулсан бөгөөд тэд өмнө нь тамхинаас гарах оролдлого хийж байсан хэдий ч огт гарч чадаагүй байна. Судалгааны үр дүнд 5 хүн тутмын 2 нь тамхинаас бүрэн татгалзжээ. Судалгааг Зүүн Английн Их сургууль удирдан явуулсан бөгөөд Цахилгаан тамхийг үнэ төлбөргүй хэрэглэх эрх авсан 340 хүнээс 143 нь буюу 42% нь дөрвөн долоо хоногийн дотор тамхинаас бүрэн татгалзжээ. Туршилтыг амжилттай болсны дараагаар Норфолк мужийн захиргаа муж даяар цахилгаан тамхийг туршиж үзэх үнэгүй эрхийн бичиг тараасан байна. Ярмут хортын захиргаанаас цахилгаан тамхийг янжуур тамхинаас гарах хамгийн үр дүнтэй арга хэмээн үзсэн бөгөөд үүний дараагаар иргэдэд зөвлөгөө, дэмжлэг үзүүлэх үүднээс туршилтын хэрэглээг цааш үргэлжлүүлэх болсон байна. Мөн энэхүү аргыг улс даяар хэрэгжүүлснээр олон хүн тамхинаас бүр мөсөн татгалзаж чадна гэдэгт итгэлтэй байна гэжээ. Мөн Зүүн Английн Их сургуулийн Норвичийн Анагаах Ухааны Их Сургуулийн профессор Кейтлин Нотли бусад аргуудтай харьцуулахад цахилгаан тамхи хэрэглэн янжуур тамхинаас татгалзах нь хамгийн үр дүнтэй арга хэмээжээ.

Б.ЖАРГАЛСАЙХАН: “УЛНЫ“ 26 МЯНГАН ИРГЭН ТӨРИЙН ЯМАР Ч ХАЛАМЖ ХҮРТДЭГГҮЙ...

10 / 11 0 сэтгэгдэл 752 үзсэнe

Улс төрч Б.Жаргалсайхан өөрийн цахим хуудастаа "УЛНЫ" 26 МЯНГАН ИРГЭН ТӨРИЙН ЯМАР Ч ХАЛАМЖ ХҮРТДЭГГҮЙ... Монгол Улсад бүртгэлгүй 26 мянган айл байдаг. Ядуу, нэн ядуу, амжиргааны түвшин доогуур иргэдээ НХХЯ-ынхан "Улны айл" гэж нэрлэдэг гэнэ. Тэгэхээр энэ улсад хамааралгүй мэт 26 мянган иргэдээ ил болгосон Сарангэрэл сайдын зөв үү буруу юу. Тэдгээр иргэд төрөөс хайр халамж хүртдэггүй. Төрөөс мартсан 26 мянган иргэнээ хэзээ бүртгэлжүүлэх вэ" хэмэээн бичжээ.

КОЙН ГАРГАЖ, ХӨРӨНГӨ ТӨВЛӨРҮҮЛСЭН 9 ЭТГЭЭДИЙГ ШАЛГАЖ БАЙНА

10 / 11 0 сэтгэгдэл 1 010 үзсэнe

Монгол Улсын Засгийн газраас “Виртуал хөрөнгийн үйлчилгээ үзүүлэгчийн тухай” хуулийн төслийг боловсруулан Улсын Их Хурлаар хэлэлцүүлэн 2021 оны 12 дугаар сарын 17-ны өдөр баталж, энэ оны 02 дугаар сарын 24-ний өдрөөс эхлэн дагаж мөрдөж эхлээд байна. Мөн “Виртуал хөрөнгийн үйлчилгээ үзүүлэгчийн тухай” хуулийн хамт Эрүүгийн хуульд нэмэлт өөрчлөлт оруулах тухай хууль батлагдаж ЭХТА-ийн 18.19 зүйлд “Виртуал хөрөнгийн үйлчилгээний дотоод мэдээллийг хууль бусаар ашиглах”, 18.20 дугаар зүйлд “Виртуал хөрөнгийн үйлчилгээ үзүүлэгчийн үйл ажиллагаанд арилжааг урвуулан ашиглах” гэмт хэргийг шинээр тодорхойлсон. Шинээр батлагдсан “Виртуал хөрөнгийн үйлчилгээ үзүүлэгчийн тухай” хуулиар салбарын зохицуулагч байгууллагыг Санхүүгийн зохицуулах хороогоор тодотгосон бөгөөд хорооноос энэ оны 06 дугаар сарын 25-ны өдрөөс 09 дүгээр сарын 26-ны өдрийн хооронд бүртгэлийн ажиллагаа явуулж “Айдакс” ХХК, “Койнхаб” ХХК, “Дижитал Эксчэйнж Монголиа” ХХК нар бүртгэлд хамрагдсан бол өнөөдөр буюу 2022 оны 10 дугаар сарын 10-ны өдөр 6 виртуал хөрөнгийн үйлчилгээ үзүүлэгч бүртгэгдэж, нийт 9 виртуал хөрөнгийн үйлчилгээ үзүүлэгч бүртгэгдсэн байна. Цагдаагийн байгууллагаас Санхүүгийн зохицуулах хороо, Татварын ерөнхий газартай хамтран “Виртуал хөрөнгө гаргагч болон виртуал хөрөнгийн үйлчилгээ үзүүлэгч нарын татвар төлөлттэй холбоотой болон залилан мэхлэх гэмт хэргийн шинжтэй эсэхэд” шалгах ажиллагааг явуулж байна. Виртуал хөрөнгө буюу койн, токен шинээр гаргаж хөрөнгө төвлөрүүлсэн этгээдүүдтэй холбоотой хэрэг бүртгэлтийн хэрэг Цагдаагийн байгууллагад шалгагдаж байгаа бөгөөд мөрдөн шалгах ажиллагаа явуулж байгаа учир Прокурорын байгууллагын зөвшөөрөлгүй мэдээлэл өгөх боломжгүй болно.

ШҮҮХЭЭС Ж.БАТ-ЭРДЭНИЙГ НЭГ САРЫН ХУГАЦААНД ЦАГДАН ХОРИХООР ШИЙДВЭРЛЭЛЭЭ

10 / 11 0 сэтгэгдэл 485 үзсэнe

Зам тээврийн хөгжлийн Дэд сайд асан, ХХААХҮ-ийн дэд сайд Ж.Бат-Эрдэнийг өнгөрсөн долоо хоногийн Лхагва гарагт Авлигатай Тэмцэх Газар/АТГ/-аас 48 цагийн хугацаатай саатуулсан. Түүнийг Зам, тээвэр хөгжлийн яаманд ажиллаж байхдаа албан тушаалаа урвуулан ашиглаж, Улаанбаатар-Дархан чиглэлийн авто замын ажилд бусдад давуу байдал олгосон, үндэслэлгүйгээр хөрөнгөжсөн байж болзошгүй хэмээн шалган 48 цаг саатуулаад сулласан бөгөөд тухайн хэрэгтэй холбогдуулан шүүхээс өнөөдөр 30 хоног цагдан хорих шийдвэр гаргажээ. Тодруулбал, аравдугаар сарын 11-ний өдөр Чингэлтэй дүүргийн Эрүүгийн хэргийн анхан шатны шүүхээс Ж.Бат-Эрдэнийг нэг сарын хугацаатай үргэлжлүүлэн цагдан хорих шийдвэр гаргасан байна.

Л.ЭНХ-АМГАЛАН: ОХИДЫН ГЭХ ТУСГАЙЛСАН ҮЗЛЭГ БАЙХ ЁСГҮЙ

10 / 11 0 сэтгэгдэл 509 үзсэнe

Нэгдсэн Үндэстний байгууллага 2012 оноос эхлэн жил бүрийн аравдугаар сарын 11-ний өдрийг "Охидын эрхийг хамгаалах олон улсын өдөр" болгон зарлаж, охидын эрхийг сурталчлах, хүйсээр ялгаварлах, хүйсийн тэгш бус байдлыг шийдвэрлэх, хүчирхийлэлд өртөж байгаа охидод туслахад уриалдаг. Энэ өдөртэй холбогдуулан БШУ-ын сайд Л.Энх-Амгалан охидын гэх тусгайлсан үзлэг боловсролын салбарт байх ёсгүй гэдгийг тодотголоо. Тэрээр "Охидын гэх тусгайлсан үзлэг байх ёсгүй. Өнөөдөр олон улсын охидын эрхийг хамгаалах өдөр. "Охидын" гэх тусгайлсан үзлэгийг боловсролын орчинд зохион байгуулах ёсгүй гэдгийг албан ёсоор зарлаж байна. Өсвөр насны охид, хөвгүүд эрүүл мэндийн байгууллагаар дамжуулан, өөрөө хүссэн үедээ САЙН ДУРААРАА эрүүл мэндийн урьдчилан сэргийлэх үзлэг, анхан шатны тусламж үйлчилгээ авдаг байх ээлтэй орчныг бүрдүүлнэ" хэмээн байрь сууриа цахим хуудсаараа илэрхийлэв. Багш ба охид | Охидын санаа бодлыг анхааран сонсдог байгаасай. Охидыг ялгаварлан харьцдаггүй байгаасай. Охидод гарч байгаа эерэг өөрчлөлтийг цаг тухай бүрт нь харж урам өгдөг байгаасай. Бусдын өмнө охидыг буруутгахгүй байгаасай. Эцэг, эхчүүд ба охид | Биднийг ойлгож, хүндэтгэж харьцдаг байгаасай. Бидэнд цаг гарган сонсож, хүсэл мөрөөдлийн минь талаар ярилцдаг байгаасай. Бидэнд урам өгч дэмждэг байгаасай. Охид ба үе тэнгийнхэн | Охид бүр амьдрал, сургалтын амжилт, үзэл бодлын зөрөөтэй байдлаас болж биенээ ялгаварлан гадуурхдаггүй, дээрэлхдэггүй байгаасай. Охид бие биедээ сөргөөр нөлөөлдөггүй байгаасай. Бидэнд томчууд зөв үлгэр дуурайлалтай байгаасай. Цахим орчинд бие биенээ гадуурхдаггүй байгаасай. Асуудлуудыг хэрхэн шийдэх вэ? Охидынхоо мөрөөдлийг сонсоорой. Охидтойгоо ярилцаарай. Тэдний ахиц дэвшил бүрийг нь хараад урам өгөөрэй. Тэдэнд итгэл найдвар төрүүлээрэй. Тэднийг бусадтай бүү харьцуулаарай. Охиддоо нөхөрлөл, хүндлэхийн чухлыг ойлгуулаарай. Охидоо хайрлая, хүндэлье, ойлгоё!

2023 ОНЫ ТӨСВИЙН ТӨСЛИЙН ТАЛААРХ ИРГЭДИЙН САНАЛЫГ “D-PARLIAMENT” ЦАХИМ ХУУДАС БОЛОН УТСААР АВЧ БАЙНА

10 / 11 0 сэтгэгдэл 568 үзсэнe

Улсын Их Хурлын 2022 оны намрын ээлжит чуулганаар Монгол Улсын 2023 оны төсвийн төслийг хэлэлцэж, хоёр дахь хэлэлцүүлэгт шилжүүлсэнтэй холбогдуулан Төсвийн байнгын хорооноос анх удаа “Төсөв-2023” олон нийтийн нээлттэй хэлэлцүүлгийг энэ сарын 19-ний өдөр Төрийн ордонд зохион байгуулахаар болсон. Монгол Улсын төсвийг хэлэлцэх, батлах үйл явцыг олон нийтийн өмнө нээлттэй, ил тод болгох үүднээс иргэдийн оролцоо, хяналтыг тавих боломжийг хангасан шинэ жишгийг тогтоосон хэлэлцүүлгийг зохион байгуулах гэж буйтай холбогдуулан иргэн та төсвийн талаарх саналаа өгөхөд 6 хоног үлдээд байна. Олон нийтийн нээлттэй, хяналттай хэлэлцүүлэгт иргэд тэр дундаа төсөв, санхүүгийн чиглэлээр мэргэшсэн иргэний нийгмийн болоод мэргэжлийн судалгааны байгууллагуудаас “ D-Parliament ” цахим хуудас, D@parliament.mn мэйл хаягаар болон 51-262727 утсаар саналаа аравдугаар сарын 7-ноос 17-ны өдрийг хүртэл хүлээн авч байна. Та дараах заавар, зөвлөмжийн дагуу төсвийн төсөлд саналаа өгөөрэй. Хавсралт видео