АПУ ХК-ИЙН УРИЛГААР МОНГОЛ УЛСЫН АРДЫН ЖҮЖИГЧИН Э.АМАРТҮВШИН “ДОМОГ” БОЛСОН АЛДАРТ ДУУЧИН ПЛАСИДО ДОМИНГО ТЭРГҮҮТЭЙ ДЭЛХИЙН ШИЛГҮҮДТЭЙ ЭХ ОРОНДОО ХОСЛОН ДУУЛЛАА

08 / 03 0 сэтгэгдэл 16 үзсэнe

АПУ компанийн 100 жилийн баярт зориулсан Дэлхийн сонгодог урлагийн оддын “Сentennial Celebration” тоглолтыг “Улсын Дуурь Бүжгийн Эрдмийн Театр”-ийн тайзнаа тоглож, Д.Сүхбаатарын талбайд олон нийтэд зориулан шууд дамжуулан хүргэлээ. АПУ компанийн 100 жилийн ойн баярт дэлхийн 20 гаруй улсаас хамтран ажилладаг дэлхийн шилдэг техник, технологи нийлүүлэгчид болон худалдааны түншүүд, олон улсын санхүүгийн байгууллагуудын төлөөлөл хүрэлцэн ирж оролцож байна. Энэхүү түүхэн ойн арга хэмжээг тохиолдуулан дэлхийн “Алдарт гурван тенор“-ийн нэг, дуурийн дуучин, удирдаач, тенор, баритон, 150 гаруй дүр бүтээсэн эклектик уран бүтээлч, Грэммигийн 12 шагналын эзэн Пласидо Доминго, энэ цаг үеийн алдарт баритон, дэлхийн бүхий л гол тайзнаа гайхамшигт хоолойгоороо эх орныхоо нэр хүндийг өндөрт өргөж яваа Монгол Улсын Ардын жүжигчин Э.Амартүвшин, олон улсад нэр хүнд нь тасралтгүй өсөж буй гайхалтай сопрано Нина Минасян, орчин цаг үеийн хамгийн агуу тенор дуучдын нэг алдарт Ла Скала театрын дуучин Фабио Сартори, дэлхийд тэргүүлэх залуу удирдаачдын нэг Гаэтано Ло Коко нарыг эх орондоо урьж, “Centennial Celebration” дуурийн сонгодог тоглолтыг зохион байгууллаа. ҮРГЭЛЖ ӨӨДӨӨ АПУ КОМПАНИ

ДАРХЛААЖУУЛАЛТЫН ВАКЦИН ХҮЛЭЭН АВЛАА

08 / 02 0 сэтгэгдэл 49 үзсэнe

Мал эмнэлгийн ерөнхий газар 2024 оны төсвийн худалдан авалтын төлөвлөгөөний дагуу зарласан “Үхрийн арьс товруутах өвчнөөс урьдчилан сэргийлэх вакцин худалдан авах” олон улсын нээлттэй тендерт Бүгд Найрамдах Турк Улсын “DOLLVET BIYOTEKNOLOJI A.A” ХХК шалгарч бараа бүтээгдэхүүн нийлүүлэх гэрээ байгуулсан. Энэхүү гэрээний дагуу Үхрийн арьс товруутах өвчнөөс урьдчилан сэргийлэх 2,2 сая тун вакцин, шингэлэгчийг хүлээн авч, зориулалтын агууллахад хадгаллаа. Дээрх вакцин нь 2024 оны 06 дугаар сарын 04-ний өдөр үйлдвэрлэгдэж, ДМАЭМБ-ын олон улсын лавлагаа лабораториор баталгаажсан, 2 жилийн хадгалах хүчинтэй хугацаатай, чанарын шаардлага хангасан, тээвэрлэлтийн явцад температурыг хянах зорилгоор электрон төхөөрөмж байршуулан хүлээн авсан.

ХАН-УУЛ ДҮҮРЭГТ БАРИГДАЖ БУЙ ЖИШИГ НЭГДСЭН ЭМНЭЛГИЙГ 2026 ОНД АШИГЛАЛТАД ОРУУЛНА

08 / 02 0 сэтгэгдэл 49 үзсэнe

Монгол Улсын Засгийн газар болон Азийн Хөгжлийн банк хамтран эрүүл мэндийн тусламж үйлчилгээг хүртээмжтэй хүргэх төслийг 2019 оноос хэрэгжүүлж буй. Уг төслийн хүрээнд Азийн Хөгжлийн банкны хөнгөлөлттэй зээлээр Хан-Уул болон Чингэлтэй дүүрэгт жишиг нэгдсэн эмнэлгийг барих юм. Хан-Уул дүүрэгт шинээр баригдах нэгдсэн эмнэлгийн тендерт БНХАУ-ын “Хятадын төмөр замын I групп” компани гүйцэтгэгчээр сонгогдож, барилгын ажлыг өнгөрсөн 5 дугаар сараас эхлүүлсэн. Нийслэлийн Засаг даргын орлогч Л.Хосбаяр болон холбогдох албаныхан өнөөдөр тус байршилд ажиллалаа. Энэ үеэр барилгын ажлын явцад тулгамдаж буй асуудлыг шийдлээ. Хан-Уул дүүрэгт баригдаж буй жишиг эмнэлэг нь 300 хүний ортой. Тус эмнэлэгт нийт 600 эмч, эмнэлгийн ажилтнууд ажиллах бөгөөд эрүүл мэндийн цогц үйлчилгээг үзүүлэх юм. Тус эмнэлгийг 2026 онд ашиглалтад оруулна.

БАГ ӨМССӨН 2 ЭТГЭЭД АЙЛД ДАЙРАН ОРЖ, ГАР БУУ ТУЛГАН ДЭЭРЭМДЖЭЭ

08 / 01 0 сэтгэгдэл 173 үзсэнe

Монгол Улсад зорчиж байгаа гадаад улсын иргэд их хэмжээний бэлэн мөнгө хадгалж буй тухай мэдээллээ бусдад дамжуулсны улмаас дээрмийн гэмт хэргийн хохирогч болж байна. Тухайлбал, Хан-Уул дүүрэг “Кинг тауэр” хотхонд оршин суух БНХАУ-ын иргэн “Ж”, эхнэр “Л” нарыг энэ оны 07 дугаар сарын 05-ны өдрийн 15 цагийн үед гэрт нь баг өмссөн үл таних 2 эрэгтэй хүн орж, гар буу тулгаж 1 сая ам.доллар өгөхийг шаардаж, 3 ширхэг гар утсыг нь дээрэмдсэн хэргийг цагдаагийн байгууллагаас илрүүллээ. Уг хэргийг иргэн “Х”, “Б”, “Х” нар нь гадаад улсын иргэд их хэмжээний бэлэн мөнгө гэртээ хадгалж байгаа гэсэн мэдээллийг авч, шунахайн сэдлээр бүлэглэн үйлдсэн байна. Мөн Баянгол дүүргийн 16 дугаар хорооны нутаг дэвсгэрт энэ оны 07 дугаар сарын 19-нөөс 20-нд шилжих шөнө БНХАУ-ын иргэн “Б” архи согтууруулах ундааны зүйл хэтрүүлэн хэрэглэсэн үед нь үл таних хүн хоолойг нь боож гар утас, хөөрөг зэрэг эд зүйлийг нь дээрэмджээ. Тухайн гэмт хэргийг “М” гэгч нь шунахайн сэдлээр үйлдсэн болохыг илрүүлж, мөрдөн шалгах ажиллагаа явуулж байна. Иймд Монгол Улсад аялал жуулчлал, амралтаар ирсэн гадаад улсын иргэд биедээ их хэмжээний бэлэн мөнгө, үнэт эдлэл авч явахгүй байх, архи согтууруулах ундааны зүйл хэтрүүлэн хэрэглэсэн үедээ харгалзах хүнгүйгээр шөнө, оройн цагаар явахаас татгалзаж, аюулгүй байдлаа хангахыг зөвлөж байна.

БРУЦЕЛЛЁЗ ӨВЧНИЙ ДАРХЛААЖУУЛАЛТ ЭХЭЛЛЭЭ

08 / 01 0 сэтгэгдэл 49 үзсэнe

Хүнс, хөдөө аж ахуй, хөнгөн үйлдвэрийн сайдын тушаалын хэрэгжилтийг хангаж, Малын бруцеллёз өвчинтэй тэмцэх стратеги, төлөвлөгөөг мэргэжлийн зөвлөлөөр хэлэлцэн баталж, энэ жилийн дархлаажуулалтыг 08 дугаар сарын 10-ний өдрөөс 9 дүгээр сарын 15-ны өдөр хооронд зохион байгуулахаар аймаг, нийслэлийн мал эмнэлгийн байгууллагуудад заавар, чиглэл хүргүүллээ. Дэлхийн мал, амьтны эрүүл мэндийн байгууллагаас бруцеллёз өвчнийг хяналтад авах, улмаар эрүүлжүүлэхэд нийт мал сүргийг бүрэн дархлаажуулалтад хамруулах талаар зөвлөмж өгч байна. Малчид, мал бүхий иргэд та бүхэн бруцеллёз өвчнөөс сэргийлэх вакцинжуулалтад малаа бүрэн хамруулахыг уриалж байна. Мөн Мал эмнэлгийн ерөнхий газраас зарим аймгийг сонгон дархлаажуулалтын явц, гүйцэтгэлд хяналт хийж байна.

БҮГД НАЙРАМДАХ УЗБЕКИСТАН УЛСЫН МАЛ ЭМНЭЛГИЙН АЛБАНЫ ТӨЛӨӨЛӨГЧИД МОНГОЛ УЛСАД АЖИЛЛАЖ БАЙНА

07 / 31 0 сэтгэгдэл 83 үзсэнe

Монгол Улсын Ерөнхийлөгч У.Хүрэлсүх Бүгд Найрамдах Узбекистан Улсад хийсэн айлчлалын хүрээнд Мал эмнэлгийн салбартай туршлагаа солилцох, мал амьтны халдварт өвчнөөс урьдчилан сэргийлэх, тандалт хийх, хяналт тавих чиглэлээр хамтран ажиллахаар тохиролцсон. Үүний хүрээнд БНУУ-ын Мал Эмнэлэг, Мал Аж Ахуйн Үндэсний Хөгжлийн Хорооны дарга Бахром Норкобилов болон албаны төлөөлөгчдийн хамтаар манай улсад ажиллаж байна. Монгол улсаас БНУУ-руу амьд, хонь ямаа экспортлох олон улсын мал эмнэлгийн гэрчилгээний нөхцлийг харилцан тохиролцож баталгаажуулах, экспортлох амьд, хонь, ямааны үүлдэр омог, мал нийлүүлэх боломжтой аймаг сум, хорио цээрийн хашаа, газар байршилыг тогтоох хорио цээр, хил гаалийн асуудлыг судлаж танилцлаа. Мөн 2 орны ерөнхий малын эмч нар олон улсын мал эмнэлгийн гэрчилгээг харилцан тохиролцож гарын үсэг зурж баталгаажуулсан бөгөөд амьд мал экспортлохтой холбоотой зарим асуудлаар орон нутагт ажиллаж байна.

ЭРХЭЭ ХАСУУЛСАН Ч ДАХИН СОГТУУГААР ЖОЛОО БАРЬСАН ИРГЭНИЙГ 5 САЯ ТӨГРӨГӨӨР ТОРГОЖЭЭ

07 / 31 0 сэтгэгдэл 176 үзсэнe

Иргэн Г 2023 оны 06 дугаар сарын 20-ны өдөр согтууруулах ундааны зүйл хэрэглэсэн үедээ тээврийн хэрэгсэл жолоодсон зөрчлөөр жолоодох эрхээ 1 жилээр хасуулжээ. Гэвч тээврийн хэрэгсэл жолоодох эрхээ хасуулсан үедээ буюу 2024 оны 05 дугаар сарын 18-ны өдөр Баянзүрх дүүргийн 16 дугаар хороо Улаанхуарангийн замд согтууруулах ундааны зүйл хэрэглэсэн үедээ Toyota Prius маркийн тээврийн хэрэгслийг жолоодож замын хөдөлгөөнд оролцсон. Тэрбээр “Би согтуугаар автомашин жолоодсондоо харамсан гэмшиж байгаа” гэж мэдүүлсэн байна. Баянзүрх дүүргийн эрүүгийн хэргийн анхан шатны шүүхээс Эрүүгийн хуулийн тусгай ангийн 27.10 дугаар зүйлийн 5 дахь зааснаар иргэн Г-ийн тээврийн хэрэгсэл жолоодох эрхийг 3 жилийн хугацаагаар хасаж, 5.000 нэгжтэй тэнцэх хэмжээний буюу 5.000.000 төгрөгөөр торгох ял оногдуулж шийдвэрлэсэн байна. Ташрамд мэдээлэхэд Эрүүгийн хуульд “Согтуурсан” гэж шалгаж, тогтоох ажиллагааны үр дүнд шалгуулагчийн амьсгал дахь спиртийн агууламж 0.20, түүнээс дээш промиль (%), эсхүл цусан дахь спиртийн агууламж 0.5, түүнээс дээш промиль (%) илэрснийг ойлгоно" гэж тайлбарлажээ.

АВТО ОСОЛД ОРСОН ИРГЭНД ЯАРАЛТАЙ ТУСЛАМЖ ҮЗҮҮЛЛЭЭ

07 / 31 0 сэтгэгдэл 179 үзсэнe

Гэмтэл согог судлалын үндэсний төвийн Хавсарсан гэмтлийн мэс заслын тасгийн эрхлэгч П.Баярсайхан, Мэс засал, мэдээгүйжүүлгийн нэгдсэн тасгийн сувилагч Б.Алтанцоож, жолооч М.Пүрэвбаатар нарын алсын дуудлагын баг энэ сарын 26-ны өдөр Говьсүмбэр аймагт ажиллаж, авто ослын улмаас цээжний хөндийн хавсарсан хүнд гэмтэл болон олон хавирганы тогтворгүй хугаралтай, амьсгалын дутагдалд орсон өвчтөнд мэс заслын яаралтай тусламж үзүүллээ. Тодруулбал, ГССҮТ-ийн Эмнэл зүй хариуцсан дэд захирал Р.Гантуяа тэргүүтэй зөвлөлийн шийдвэрийн дагуу тус алсын дуудлагын баг бүрэлдэхүүн Говьсүмбэр аймгийн нэгдсэн эмнэлгийн мэс заслын эмч Д.Наранбаатар, мэдээгүйжүүлгийн эмч Э.Алтанхуяг, мэдээгүйжүүлгийн сувилагч Н.Наранбаатар, мэс заслын сувилагч Д.Дэлгэрмаа, асрагч н.Отгонсүрэн нартай хамтран мэс засал эмчилгээг амжилттай хийсэн байна. Өдгөө өвчтөний биеийн байдал тогтворжиж, Эрчимт эмчилгээний тасгаас шилжин эмийн эмчилгээ хийлгэж буй бөгөөд орон нутгийн замд авто ослоос урьдчилан сэргийлж, автомашины бүрэн бүтэн байдлыг хангах, өөрийн болон бусдын амь нас, эрүүл мэндийг хамгаалах, аюул эрсдэлийг тооцож зорчихыг эрүүл мэндийн байгууллагаас сэрэмжлүүлж байна.

МАЛАЙЗ УЛСАД БОЛСОН "WORLD CITY CUP -2024" ОЛОН УЛСЫН ЦЭЭЖ БОДОЛТЫН ТЭМЦЭЭНД МОНГОЛЫН БАГ ТАМИРЧИД БАГААРАА 100 % АМЖИЛТТАЙ ОРОЛЦЖЭЭ

07 / 29 0 сэтгэгдэл 303 үзсэнe

Малайз улсад болсон "World city cup -2024" Олон улсын Цээж бодолтын тэмцээнд манай улсаас 21 тамирчин 25 улсын 500 гаруй оюун ухааны тамирчидтай 6 төрөлд өрсөлдөж 10,11 мөнгө гардан авчээ.7-10 насны ангиллын Croup C, Croup B, Grade 1, Grade 2, Grade 3, Grade 4, Grade 5, Grade 6 төрөлд; Т.Элбэгжаргал Алтан цом Б.Шинэ-Эрдэнэ Алтан цом Э.Нигүүн Алтан цом О.Намулун Алтан цом Б.Цолмон Алтан цом Ч.Цэлмэг Алтан цом О.Тодрох Алтан цом Б.Ухаанзаяа Алтан цом Б.Гэгээнхүслэн Алтан цом Ш Билгүүн Алтан цом О.Мичидмаа Мөнгөн цом Б.Анх-Ирээдүй Мөнгөн цом О.Анужингоо Мөнгөн цом Б.Эрхэс Мөнгөн цом Ш.Үржин Мөнгөн цом А.Ундрам-Эрдэм Мөнгөн цом М.Мөнх-Ундрах Мөнгөн цом У.Билгүүдэй Мөнгөн цом Ү.Аминшагай Мөнгөн цом Ж.Сумъяабазар Мөнгөн цом Г Мөнхжин Мөнгөн цом тус тус авчээ. Ийнхүү Монголын баг тамирчид багаараа 100 % амжилттай оролцжээ. Эдгээр хүүхдүүд Монголдоо зохиогдсон оюун ухааны тэмцээнүүдэд 1-3-р байрууд эзэлж Олон улсад явах эрхээ авсан бсан бна. Ийнхүү Монголын маань багачууд багийн дүнгээр оюун ухаанаараа дэлхийд гайхагдаж бна.

ГАЛЗУУ ӨВЧНИЙ ТАЛААРХ ГУРВАН ТАЛТ БҮСИЙН УУЛЗАЛТ БОЛЛОО

07 / 29 0 сэтгэгдэл 48 үзсэнe

Мал, амьтны галзуу өвчин нь бүх төрлийн бүлээн цуст амьтдын төв мэдрэлийн системийг гэмтээгч вирусаар үүсгэгддэг, цочмог, зооноз өвчин (мал, амьтнаас хүнд халдварладаг) юм. Өвчний гол эх үүсвэр нохой, чоно, үнэг, хярс гэх мэт бөгөөд үхлийн аюулт өндөр эрсдэлтэй дэлхий нийтээрээ тус өвчнийг устгах нь чухал ач холбогдолтой. ГАЛЗУУ өвчин нь жилд ойролцоогоор 59,000 хүний нас баралтын шалтгаан болж байна. Дэлхийн малын эрүүл мэндийн байгууллагаас галзуу өвчнөөс сэргийлэх, өвчний эрсдэлийг бууруулахын хүрээнд Дэлхийн эрүүл мэндийн байгууллага (ДЭМБ), Дэлхийн мал амьтны эрүүл мэндийн байгууллага (ДМАЭМБ), Нэгдсэн үндэсний байгууллага (НҮБ) хамтран “Ази Номхон далайн орнуудын галзуу өвчний уулзалт” сэдэвт уулзалтыг Тайланд улсын нийслэл Бангкок хотноо зохион байгууллаа. Манай улсаас Мал эмнэлгийн ерөнхий газрын Зооноз, архаг халдварт өвчний асуудал хариуцсан ахлах мэргэжилтэн А.Түвшинбаяр, Зоонозын өвчин судлалын үндэсний төвийн тархвар зүйч А.Бямбахишиг, НҮБ-ын хүнс, хөдөө аж ахуй байгууллагын төслийн зөвлөх Л.Амарсанаа нар оролцлоо. Уулзалтаар Ази Номхон далайн орнуудын хүн, мал амьтны галзуу өвчний өнөөгийн нөхцөл байдал, хэрэгжүүлж байгаа арга хэмжээний талаар танилцуулж, туршлага, санал солилцож, цаашид галзуу өвчинтэй тэмцэх стратеги төлөвлөгөө боловруулж, тухайн улс орны хамтын ажиллагааг өргөжүүлж, нохойн тоо толгойг хянах, лабораторийн чадавхыг бэхжүүлж, ажиллахаар зөвлөмж, чиглэл өгөв. Монгол орны хувьд мал, амьтны галзуу өвчний тохиолдол харьцангуй бага бөгөөд жил бүр урьдчилан сэргийлэх төлөвлөгөөт ажлуудыг хэрэгжүүлэн ажиллаж байна.