ХӨГЖЛИЙН БАНКНЫ ГЭХ ТОДОТГОЛТОЙ 80 ХҮН, 4 ХУУЛИЙН ЭТГЭЭДЭД ХОЛБОГДОХ ХЭРГИЙН ТАНХИМЫН НИЙТ ШҮҮГЧИЙН ХУРАЛДААН ХОЙШИЛЛОО

06 / 19 0 сэтгэгдэл 202 үзсэнe

Улсын дээд шүүхийн Эрүүгийн хэргийн танхимын нийт шүүгчийн 2024 оны 06 дугаар сарын 19-ний өдрийн хуралдаанаар Хөгжлийн банкны гэх тодотголтой 80 хүн, 4 хуулийн этгээдэд холбогдох 540 хавтастай хэргийн ээдрээ төвөгтэй байдал болон 42 гомдол, эсэргүүцэлтэй бүрэн танилцах шаардлагатай нөхцөл байдлыг харгалзан хэргийг хяналтын шатны шүүх хуралдаанаар хэлэлцүүлэх эсэхийг шийдвэрлэх танхимын нийт шүүгчийн хуралдааныг хойшлуулж шийдвэрлэлээ.

CОНГУУЛЬТАЙ ХОЛБООТОЙ ГЭМТ ХЭРЭГ, ЗӨРЧЛИЙН 468 ГОМДОЛ, МЭДЭЭЛЭЛ БҮРТГЭГДЖЭЭ

06 / 19 0 сэтгэгдэл 222 үзсэнe

Уих-ын ээлжит сонгуультай холбоотой гэмт хэрэг, зөрчлийн талаар Цагдаагийн байгууллагаас мэдээлэл хийлээ ЦЕГ-ын хэвлэл мэдээлэл, олон нийттэй харилцах хэлтсийн дарга Г.Пүрэвдэлгэр: "Улсын их хурлын 2024 оны сонгуультай холбоотой гэмт хэрэг зөрчлийн 468 гомдол, мэдээлэл бүртгэгдсэн байна. Үүнээс гэмт хэргийн шинжтэй 183, зөрчлийн шинжтэй 285 гомдол мэдээлэл байгаа. Одоогоор шийдвэрлэгдсэн 327, ажиллагаанд 141 гомдол, мэдээлэл шалгагдаж байна. Гэмт хэргийн шинжтэй 183 гомдол мэдээллийг задалж үзэхэд, 117 нь сонгуулийн илтэд худал мэдээлэл тараах гэсэн гомдол байна. Мөн эд хөрөнгө устгаж гэмтээх зөрчил нийт зөрчлийн 35 хувийг эзэлж байна. Энэ сонгуулийн сурталчилгааны самбар эвдэх, баллаж цохлох гэх мэт зөрчлүүд багтаж байгаа" гэлээ.

“ЦАГДАН ХОРИГДОЖ БАЙГАА 260 ОРЧИМ ИРГЭН САНАЛ ӨГӨХ ХҮСЭЛТ ГАРГАСАН“ ГЭВ

06 / 19 0 сэтгэгдэл 262 үзсэнe

Хүний Эрхийн Үндэсний Комиссоос УИХ-ын сонгуультай холбогдуулан эрх нь хязгаарлагдсан иргэдийн сонгох эрхийг бүрэн эдлүүлэх талаар мэдээлэл хийлээ. Энэ үеэр Хүний Эрхийн Үндэсний Комиссын гишүүн Б.Энхболд "Эрх нь хязгаарлагдсан иргэдэд мэдээллийг хангалттай хүргэх шаардлагатай. С онгуультай холбоотойгоор иргэдийн хувийн мэдээллийг цуглуулах явдал их гарч байна. Энэ нь хууль бус бөгөөд энэ тохиолдолд хуулийн хариуцлага хүлээлгэнэ. Үүнээс гадна гэмт хэрэг үйлдэж, шүүхээс хорих ял аваагүй л бол саналаа өгөх эрхтэй. Тухайлбал, албадан эмчлэгдэж байгаа, эрүү болон зөрчлийн хэргээр баримчлагдсан иргэд саналаа өгөх эрхтэй юм. Үүнтэй холбоотойгоор ХЭҮК-оос хорих 461 ангид хийсэн хяналт хийсэн. Мөн хугацаат цэргийн албан хаагчдад сонгуулийн мэдээллийг тэнцвэртэй хүргэх шаардлагатай. Тэд саналаа нөлөөнд автахгүй, чөлөөтэй өгөх эрхтэй” гэдгийг онцлов.

ЯПОНД ТАРХААД БУЙ ХАЛДВАР ДЭЛХИЙД ТАРХАХ ЭРСДЭЛТЭЙГ АНХААРУУЛАВ

06 / 19 2 сэтгэгдэл 32 759 үзсэнe

Японд тархаад буй стрептококкийн халдвар дэлхийн бусад оронд тархах эрсдэлтэйг анхааруулжээ. Японы эрүүл мэндийн салбарынхан үхэлд хүргэж болзошгүй хоолойн стрептококкийн халдвараар өвчлөгсдийн тоо нэмэгдэж байгааг анхаарууллаа. Японд 2024 оны эхний гурван сард бүртгэгдсэн стрептококкийн шокийн хам шинжийн (STSS) тохиолдлын тоо 600 гаруй болсон нь өнгөрсөн оны нийт 941 тохиолдлын талаас илүү хувь юм. Ахмад настнуудад энэ халдварын хүндрэлийн эрсдэл өндөр байдаг ч Японы Халдварт өвчин судлалын үндэсний хүрээлэнгийн сүүлийн үеийн мэдээллээс харахад энэ төрлийн өвчлөл 50-аас доош насны өвчтөнүүдийн нас барах шалтгаан болж байна. “The Guardian” хэвлэлд мэдээлснээр, аминд аюултай А бүлгийн стрептококкийн хүнд хэлбэрийн халдвар хэрхэн үүссэн тухай шинжээчид тодорхой хэлж чадахгүй байна. Кавасакигийн анагаах ухааны их сургуулийн профессор Такаши Накано халдварт өвчнөөс урьдчилан сэргийлэх арга хэмжээ авахыг зөвлөж байна. Стрептококкийн шокийн шинж тэмдэг нь, өндөр халуурах, бие зарайх, хоолой, өвдөх булчин шархирч өвдөх, дотор муухайрах,бөөлжих зэргээр илэрдэг байна. Стрептококк бактерийг махчин бактери гэдэг байна. Учир нь тус бактери эсийг үхүүлж, дотор эрхтнүүдийн үйл ажиллагааг огцом сааруулдаг ажээ. Хэдийгээр өндөр настнуудыг эмзэг бүлэгт хамруулдаг ч Японд 50 хүртэлх насны хүмүүсийн дунд эрчимтэй тархаж, 21 нас баралт бүртгэгдсэн тухай “Асахи Шинбүн” сонинд онцолжээ. Стрептококкийн халдвар агаар, дуслын замаар болон биеийн контакт үүсэхэд халдварладаг. Мөн шархаар дамждаг. Чихрийн шижинтэй хүмүүс эрсдэлийн бүлэгт багтдаг байна.

НИЙСЛЭЛИЙН ХЭМЖЭЭНД СҮҮЛИЙН 2 ХОНОГТ БҮРТГЭГДСЭН ГАЛ ТҮЙМРИЙН 40 ДУУДЛАГААС 31 НЬ МОДНЫ ХӨВӨН ШАТСАН ГЭХ ДУУДЛАГА МЭДЭЭЛЭЛ БАЙНА

06 / 19 0 сэтгэгдэл 247 үзсэнe

Манай улсад хамгийн өндөр тархацтай модны төрөл бол улиас бөгөөд жил бүрийн 6 дугаар сарын дунд үеэс хойш бидний хэлж заншсан модны хөвөн буюу боловсроогүй үр нь гудамж талбай, олон нийтийн газар их хэмжээгээр унасантай холбоотой нийслэлийн хэмжээнд сүүлийн 2 хоногт бүртгэгдсэн гал түймрийн 40 дуудлагаас 31 нь модны хөвөн шатсан гэх дуудлага мэдээлэл байна. Энэхүү модны хөвөн нь нь шатамхай чанартай тул иргэд тамхины иш санамсаргүй хаях болон бусад санаатай үйлдлээс гал түймэр гарах, бага насны хүүхдүүд сониуч зангаар хөвөнг шатааснаас бусдын эд хөрөнгө, эрүүл мэндэд хохирол учруулж болзошгүй нөхцөл байдал үүсэж байгаа тул иргэд та бүхэн өөрсдийн үйлдэлд хянамгай хандаж, хүүхэд багачуудад үлгэр дуурайлтай байх, тэдэнд модны хөвөн шатаасны улмаас үүсэж болох хор хохирлын талаар сайтар хэлж ойлгуулах шаардлагатай байна. Мөн амралт зугаалгын үе эхэлж гэр бүлээрээ хөдөө орон нутагт зорчих, аялах, бага насны хүүхдийг өөрийн асрамжаас гадна хөдөө ах дүү, эмээ өвөөгийнд амраах зэргээр гол мөрөн бүхий газар, мал ахуйн орчинд амрах үед нь эцэг, эх, асран хамгаалагчаас бага насны хүүхдүүдэд тавих хараа хяналтыг сайжруулах, харгалзах хүнгүй гол, мөрний эрэг дагуу тоглуулахгүй байх болон байгалийн болон ахуйн болзошгүй эрсдлээс урьдчилан сэргийлэхийг цагдаагийн байгууллагаас зөвлөж байна.

Ө.ЦОГТБАЯР: ТАЛИЙГААЧ ЗАЛУУ ХҮҮХДҮҮДИЙГ УСНААС АВРААД ӨӨРӨӨ ХӨЛ АЛДЧИХСАН ЮМ БИЛЭЭ

06 / 19 0 сэтгэгдэл 329 үзсэнe

Сэлэнгэ аймгийн Шаамар сумын Дулаанхаан тосгоны нутагт Ерөө голд орсон хоёр хүүхдийг 19 настай Б гэх залуу авраад өөрөө эрсэдсэн харамсалтай хэрэг өнгөрсөн ням гаригт гарлаа. Хүүг эрэн хайх ажиллагаанд оролцсон Дулаанхаан тосгоны Захирагчийн ажлын албаны дарга Ө.Цогтбаяртай ярилцлаа. -Танай нутагт 19-хөн настай хүү хоёр хүүхдийн амийг авраад өөрөө энджээ. Ослын дуудлага хэзээ ирэв? -Маш харамсалтай явдал боллоо. Өнгөрсөн ням гаригийн өглөө 09:00 цагийн үед Өрхийн эрүүл мэндийн төвөөс холбогдож ийм осол болсныг дуулгасан. Үүний дагуу цагдаа, төлөөлөгч хоёроо явуулсан юм. Ерөө гол манай тосгоны урдуур өнгөрдөг. Манайхаас 3, 4 км-т осол болсон юм билээ. Ингээд аймаг руу цагдаа, онцгой руу дуудлага өгсөн. Дорхноо хүрээд ирцгээсэн. Би ч явж очсон. -Нөхцөл байдал ямар байв? -Амиа алддаг хүү есүүлээ явсан байсан. 16-19 насны хүүхдүүд Улаанбаатараас амарч явцгаасан. Сайханы хөтөл орчхоод буцах замдаа Ерөөгийн эрэг дээр цай унд ууцгаая гээд зогссон. Дөрөв нь дэлгүүр яваад тав нь үлдээд байсан. -Яг тэр үед осол гарчээ? -Тийм. Хөвгүүдээс дээшээ ерөөсөө 20-30 метрт амрагчид байсан. Нэг харахад хоёр хүүхэд хөтлөлцөөд ус руу орж яваад хөл алдсан. Хөвгүүд урсгалын дор байсан учраас бүгд ухасхийсэн гэж байгаа. Талийгаач хүү футболкоо тайлаад өмдтэйгөө яваад орсон. Ингээд хоёуланг нь бариад авсан. Нөгөө хөвгүүд нь модны мөчир хугалаад хүүхдүүд рүү сарвайж бариулж чадсан гэсэн. Харамсалтай нь залуу тэр дороо хөл алдчихсан гэж хүүхдүүд ярина лээ. Талийгаач осолдсон хэсэг гурван метр гүнтэй хэсэг. Тэгээд л гарч чадаагүй хөл алдчихсан бололтой, хөөрхий. Ерөө гол бол дээрээ намуухан юм шиг мөртлөө ширүүн урсгалтай шүү дээ. -Аврагдсан хүүхдүүд хэдэн настай хүүхдүүд юм бол. Ар гэр нь юу гэж байх юм бэ. Та ярилцаж үзэв үү? -Нүүр тулж уулзах боломж байгаагүй. Цагдаа хэргийн газрыг хамгаалалтад аваад мэдүүлэг авч байгаа учраас Бүгд л Улаанбаатарын хүмүүс юм билээ. Тухайн хүүхдүүд зургаа болон 13 насных гэж сонссон. Харгалзаж явсан хүмүүс нь эцэг эх, нэг настай хүн байсан. -Хүүхдүүдийг нь авраад өөр нэг цэл залуу хүү явчихсанд гэмшиж байсан байх даа? -Сүрхий тийм зүйл ажиглаг даагүй. Ер нь манайхан хэнэггүй шүү дээ. Тоодоггүй. Өөрсдийнх нь төлөө явж байгаа хүмүүсийг ад үзэх янзтай. Бид аялал зугаалгын үеэр Ерөө голоор байнга явж анхааруулга сэрэмжлүүлэг хийдэг. Түүнд амрагчид тун дургүй. Төрийн албан хаагчдыг элдэв янзаар доромжилно, хэл ам хийнэ. -Усанд осолдсон хүүгийн цогцсыг маргааш нь олсон гэсэн үү? -Онцгой байдлын эрэн хайх ангийн таван хүн, манай албанаас зургаан залуу эрэн хайх ажиллагааг тухайн өдрөө эхлүүлсэн. Ингээд өчигдөр (уржигдар) 15:30 цагийн үед ослын газраас 80-аад метрээс цогцсыг гаргаж авсан. -Ар гэр нь ямар хүмүүс байх юм? -Осол гараад хоёр цаг өнгөрсний дараа цагдаа, онцгой хамт явсан хүүхдүүдээр нь дамжуулаад ар гэрт нь мэдэгдсэн. Тэр орой 21:00 цагийн үед ээж нь гээд настай эмэгтэй, ах эгчийнх нь хамт ирсэн. Ээж нь нэлээд л биеэ барьж харагдсан. Залуус бидэнд хүнд байхад тэр хүнд ямар байсан нь ойлгомжтой. Ер нь ийм осол манайд жилийн жилд гардаг. Одоо яг оргил үе нь. Амрагчид болгоомжтой яваач, хүүхдүүддээ хяналт тавиач гэж л дахин дахин захимаар байна. Эх сурвалж: "Өдрийн сонин" Б.Энхзаяа

ЗАВХАН АЙМАГТ БОЛСОН ҮЕРТ ӨРТСӨН АЙЛУУДЫГ ШИНЭ СУУРЬШЛЫН БҮС РҮҮ НҮҮЛГЭЖ, ТҮР ХОРОГДОХ БАЙРТ БАЙРЛУУЛЖЭЭ

06 / 19 0 сэтгэгдэл 181 үзсэнe

Завхан аймгийн Улиастай суманд үүсэн үерийн нөхцөл байдалтай холбогдуулан үерийн дараах хор уршгийг арилгах, холбогдох арга хэмжээг аймгийн онцгой комиссоос шуурхай авч хэрэгжүүлэн ажиллаж байна. Үерт 5 багийн 158 өрхийн 449 хүн өртсөн бөгөөд 18 айл, өрхийг шинэ суурьшлын бүсэд нүүлгэн шилжүүлж, 45 иргэнийг түр хоргодох байрт байрлуулжээ. Нийтийн эзэмшлийн 1500 м2 талбай, иргэдийн 154 автомашин, 20 мотоциклийг ариутгал халдваргүйжүүлэлт хийж, хуримтлагдсан лаг шаврыг зөөвөрлөж байна. Мөн үерт өртөж эвдэрсэн замыг засварлах, хүчитгэх ажлыг зохион байгуулсан бөгөөд хохирлын үнэлгээ хийх, иргэдэд эрүүл мэндийн тусламж үйлчилгээ үзүүлэх, лаг шаврыг цэвэрлэх ажил үргэлжилж байгаа аж.

НИЙСЛЭЛИЙН 2024 ОНЫ ТӨСӨВТ ӨӨРЧЛӨЛТ ОРУУЛАХ ТОГТООЛЫН ТӨСЛИЙГ БАТАЛЛАА

06 / 19 0 сэтгэгдэл 176 үзсэнe

НИТХ-ын ээлжит бус XX хуралдааны хоёр дахь хэлэлцүүлэг өчигдөр болж, 2024 оны төсөвт өөрчлөлт оруулах тогтоолын төслийг батлав. Тус хэлэлцүүлгээр нийслэлийн 2024 оны төсөвт өөрчлөлт оруулах тухай, үнэт цаас гаргаж, арилжих тухай, 2024 оны газар зохион байгуулалтын төлөвлөгөөнд нэмэлт өөрчлөлт оруулах зэрэг асуудлыг хэлэлцжээ. Нийслэл энэ онд багтаан үнэт цаасыг дотоодын зах зээлд арилжаалах болсонтой холбогдуулан 2024 оны төсөвт өөрчлөлт оруулах шаардлага үүссэн юм. Тодруулбал, Монгол Улсын Засгийн газрын тогтоол, НИТХ-ын тэмдэглэлээр “Алсын хараа-2050” урт хугацааны хөгжлийн бодлого, “Шинэ сэргэлтийн бодлого” болон нийслэлийн дунд хугацааны хөгжлийн төлөвлөлтийн баримт бичигт нийцүүлэн холбогдох төслийг нийслэлийн үнэт цаасны хөрөнгөөр санхүүжүүлнэ. Нийслэл үнэт цаас арилжаалснаар эрчим хүч хуримтлуурын станцын ажил, ашиглалтын шаардлага хангахгүй нийтийн зориулалттай орон сууцны барилгыг буулган дахин барилгажуулах төслийн инженерийн шугам сүлжээний ажил, гэр хорооллын дахин төлөвлөлтийн хүрээнд хэрэгжүүлэхээс гадна инженерийн шугам сүлжээний ажлыг тус тус хийх юм. Мөн авто замын байгууламжийн засвар, шинэчлэлт, зураг төсвийн ажлын санхүүжилтыг нэмэгдүүлэхээс гадна Сэлбэ дэд төвийн орон сууцны иж бүрэн цогцолбор хорооллын бүтээн байгуулалтын ажлыг санхжүүлэх ажээ. Энэ үеэр нийслэлийн Засаг дарга бөгөөд Улаанбаатар хотын захирагч Х.Нямбаатар, “Энэ жил хот, нийтийн аж ахуйн салбарын зардлыг нэмэгдүүлэх, гадаад, дотоод бондын эх үүсвэрийг төсөвт тодотгон тусгах үүднээс 2024 оны төсөвт өөрчлөлт оруулж байна. Өнгөрсөн нэгдүгээр сард нийтийн тээврийн салбарт богино эргэлтийн шугамыг нэвтрүүлсэн. Тухайн үед маш их эсэргүүцэлтэй тулгарсан ч богино эргэлтийн шугамын 70 гаруй хувийг үргэлжлүүлсэн. Нийтийн тээврийн салбар эхний зургаан сарын байдлаар 25 тэрбум төгрөг хэмнэсэн. Хэмнэсэн 25 тэрбум төгрөгөө хот, нийтийн аж ахуйн салбар руу шилжүүлж байна. Мөн төсвийн хөрөнгө оруулалтын худалдан авах ажиллагаа өнөөдрийн байдлаар 93 хувьтай зарлагадаад явж байгаа. Энэ жил бид нийслэлийн хөрөнгө оруулалт, батлагдсан төсвийн үр өгөөжийг нэмэгдүүлж, эрчимжүүлж ажиллаж байна. Энэ бол урд өмнө нь гарч байгаагүй үзүүлэлт гэдгийг хэлье” гэв. Ийнхүү НИТХ дахь намын бүлгүүд болон төлөөлөгчдийн саналыг тусган, төсөвт өөрчлөлт оруулах тогтоолын төслийг баталлаа. Мөн хуралдаанаар нийслэлийн үнэт цаас гаргаж, арилжих тухай, 2024 оны газар зохион байгуулалтын төлөвлөгөөнд нэмэлт өөрчлөлт оруулах тогтоолын төслийг баталсан юм.

ГАДААДАД БАЙГАА ИРГЭД МАРГААШААС САНАЛАА ӨГЧ ЭХЭЛНЭ

06 / 19 0 сэтгэгдэл 198 үзсэнe

УИХ-ын 2024 оны ээлжит сонгуулиар гадаадад байгаа иргэдийн саналыг зургаадугаар сарын 20, 21, 22, 23-нд авахаар тогтоосон. Дэлхий олон оронд амьдарч буй 13095 иргэн сонгуульд саналаа өгөхөөр сонгогчдын нэрийн жагсаалтад бүртгүүлээд байна. Сонгогчдын нэрийн жагсаалтад бүртгэл нь баталгаажсан сонгогч зургаадугаар сарын 20, 21, 22, 23-ны өдрүүдэд 07.00-22.00 цагийн хооронд /орон нутгийн цагаар/ саналаа өгөхөөр бүртгүүлсэн тухайн Элчин сайдын яам, Ерөнхий консулын газар, Консулын газарт байрлах санал авах байранд гадаад паспорт эсхүл иргэний үнэмлэхтэйгээ биечлэн очиж саналаа өгнө. Гадаад улсад байгаа сонгогчид УИХ-ын 48 гишүүнийг хувь тэнцүүлэн төлөөлөх аргаар буюу нам, эвсэлд саналаа өгөх юм.

"МАН Г.САЙХАНБАЯРЫГ НЭР ДЭВШИГЧЭЭС ЭРГҮҮЛЭН ТАТАХ АЛБАН БИЧГИЙГ СЕХ-НД ӨГЛӨӨ"

06 / 18 0 сэтгэгдэл 392 үзсэнe

Засгийн газрын хэрэг эрхлэх газрын дарга Д.Амарбаясгалан өнөөдөр /2024.06.18/ Сонгуулийн ерөнхий хороонд бичиг хүргүүллээ. Тодруулбал, УИХ-ын сонгуулийн нэгдүгээр тойрогт нэр дэвшигч Г.Сайханбаярын ухуулагч хүний аминд хүрсэн хэрэгтэй холбоотойгоор ёс зүйн хүрээнд нэр дэвшигчийг эргүүлэн татах болсон талаар МАН-аас мэдэгдсэн. Тэрбээр үүнтэй холбоотойгоор тайлбал өглөө. ЗГХЭГ-ын дарга Д.АМАРБАЯСГАЛАН: -Монгол Ардын намын сонгуулийн төв штабаас улс төрийн шийдвэр гаргаад нэр дэвшигч Г.Сайханбаярын сонгуулийн сурталчилгааны үйл ажиллагааг зогсоох, эргүүлэн татах асуудлаар Сонгуулийн ерөнхий хороонд албан ёсоор албан бичгээр хандлаа. Уг асуудал үүссэн нөхцөлийн тухайд энэ сарын 15-16-нд шилжих шөнө золгүй явдлын улмаас иргэн Б амиа алдсан эмгэнэлт үйл явдал тохиолдсон. Үүнтэй холбоотойгоор амь хохироогч П.Отгонбаатар нь нэр дэвшигч Г.Сайханбаярын штабтай гэрээ байгуулж, ухуулагчаар ажиллахаар явж байсан учраас бид ёс зүйн хариуцлага хүлээлгэсэн. Нэр дэвшигч Г.Сайханбаяр тус гэмт хэрэгт холбогдогчтой өөрөө уулзаж, албан ёсны гэрээ хэлцэл байгуулаагүй. Амь хохирогч этгээд нь сонгуулийн сурталчилгааны ажилд оролцож эхлээгүй байсан хэдий ч МАН-ын зүгээс төрийн эрх барих дээд байгууллагын сонгуулийн үйл ажиллагааг илүү хариуцлагатай, ёс зүйтэй явуулах үүднээс тус ши йдвэрийг гаргасан болно. Тус асуудалтай холбогдуулан мөн тодорхой улс төрийн намын удирдлага, тухайн тойрогт нэр дэвшиж байгаа нэр дэвшигчдийн өмнөөс энэ золгүй явдлыг улс төрийн сонгуулийн компанит ажлынхаа хэсэг болгон ашиглаж байгаад нэр дэвшигчийн зүгээс харамсч байгаагаа илэрхийлсэн. Бид хариуцлагын тогтолцоог улам сайжруулна.