МАЛЧДЫГ ЧАДАВХЖУУЛАХ ТӨСЛИЙГ ХЭРЭГЖҮҮЛЖ БАЙНА

04 / 11 0 сэтгэгдэл 873 үзсэнe

Хүний эрхийн боловсрол, өөртөө туслах бүлгээр дамжуулан туслах малчдыг чадавхижуулах төслийг Монголын Эмэгтэйчүүдийн Холбоо ТББ нь Хүний эрхийн үндэсний комисстой хамтран Европын холбооны санхүүжилтээр хэрэгжүүлж байна. Энэхүү төслийг Монголын Эмэгтэйчүүдийн Холбоо санаачлан 2019 онд эхлүүлсэн бөгөөд өдгөө Сүхбаатар, Хэнтий, Архангай, Өвөрхангай аймгийн мянгат малчин ихтэй нийт 12 суманд хэрэгжиж байгаа юм. Төслийн хэрэгжилтийн талаар Монголын Эмэгтэйчүүдийн Холбооны Удирдах Зөвлөлийн гишүүн,Хүний эрхийн идэвхтэн Ш.Ариунаа сурвалжлагчийн асуултанд хариулахдаа, "Өнгөрсөн хугацаанд төслийн хүрээнд сумын эмэгтэйчүүдийн зөвлөлийг чадавхижуулах сургалт явуулж, 113 хүнийг хамрууллаа.Туслах малчдын хүний эрх, нийгэм эдийн засгийн асуудлаар судалгаа хийсэн. Хөдөлмөрийн тухай хуулийн шинэчилсэн найруулгад мөн тодорхой санал өглөө. Цар тахлын нөхцөл байдлаас шалтгаалан төслийн ажил хэсэг завсарласан ч Туслах малчдад хүний эрхийн сургалт явуулах, Эзэн малчдад Хөдөлмөрийн тухай хуулийн холбогдох зүйл заалтуудын таниулан сурталчлах ажил эхэллээ.Үр дүн гарна гэдэгт итгэлтэй байна" гэж ярьж байна.Төслийн багийнхан энэ өдрүүдэд Сүхбаатар аймгийн Эрдэнэцагаан,Баяндэлгэр,Түвшинширээ,Хэнтий аймгийн Галшир,Батноров,Өмнөдэлгэр сумуудад ажиллаж байна.

ЗАЛУУСЫН ЖАГСААЛ 5 ДАХЬ ӨДРӨӨ ҮРГЭЛЖИЛЖ БАЙНА

04 / 11 0 сэтгэгдэл 892 үзсэнe

"Монголдоо сайхан амьдаръя" уриатай залуусын жагсаал өнгөрсөн долоо хоногийн Пүрэв гарагт /2022.4.07/ эхэлсэн. Тэдний зүгээс үнийн өсөлтийг бууруулахад арга хэмжээ авах, тэгш боломжоор хангах, хүүхдэд ээлтэй нийгмийг бүтээх Засгийн газар ажлаа хиисэн шиг хийж, хэмнэлтийн горимоо төр өөрсдөө баримтлахыг шаардсан. Тэгвэл өнөөдөр залуусын төлөөлөл төв талбайд тав дахь өдрөө жагсаалыг үргэлжлүүлж, төр засгийн дорвитой шийдвэрийг хүлээсээр. Өнөөдрийн жагсаалд "Ирээдүй чинь энд байна, та нар хаана байна", "Шийдвэр хүлээсээр үр дүн хаана байна", "Бид үзэл бодлоо худалдахгүй" хэмээх лоозонгууд барьжээ.

СЭРЭМЖЛҮҮЛЭГ: ЦАГНЫ ЗАЙ ЗАЛГИСАН БАГА НАСНЫ ХҮҮХЭД АМИА АЛДЛАА

04 / 11 0 сэтгэгдэл 933 үзсэнe

Өнгөрөгч гуравдугаар сарын сүүлчээр нийслэлийн Сонгинохайрхан дүүргийн нутаг дэвсгэрт байрлах орон сууцны гадна бага насны хүүхэд нас барсан байна гэх дуудлага цагдаагийн байгууллагад иржээ. Уг дуудлага, мэдээллийн дагуу албаныхан шалгалтын ажиллагаа явуулахад, дөрвөн настай эрэгтэй хүүхэд нас барсан байсан аж. Хүүхдийн нас барсан шалтгааныг тогтоохоор цогцсыг задлан шинжилгээнд оруулахад, хүүгийн мөгөөрсөн хоолой цоорсны улмаас амь насаа алдсан болох нь тогтоогджээ. Талийгаач хүү хагас жилийн өмнө цагны зай залгисны улмаас өвдөж, улаан хоолойн мэс засалд ороод байсан ажээ. Зайн дотор химийн түлэгч бодисууд агуулагдсан байдаг бөгөөд залгисан тохиолдолд улаан хоолойн ханыг үрэвсүүлж, шархлуулах ба хоол идэхэд өвдөлт өгч, халууруулж эхэлдэг. Яаралтай арга хэмжээ аваагүй тохиолдолд хүүхдийн амь насанд хүрэх хүртэл аюултай

БАНКУУД БИЕ ДААН ВАЛЮТ АРИЛЖААНД ХЯЗГААРЛАЛТ ТАВЬСАН

04 / 11 0 сэтгэгдэл 638 үзсэнe

Төгрөгийн ам.доллартой харьцах Төв банкны албан ханш ₮3021 байна. ОХУ, Украины мөргөлдөөн, БНХАУ-ын хилийн боомтууддаа тавих хяналт шалгалт чангарсан зэрэгтэй холбоотойгоор манай улсын экспорт буурч, эсрэгээрээ импортоор дамжин ам.долларын гадагшлах урсгал идэвхэжсэн нь ханшид нөлөөлж буй. Үүсээд буй нөхцөл байдлын улмаас арилжааны банкууд бэлэн ам.долларын нөөцгүй болж, бэлэн бус гүйлгээнд тодорхой хязгаар тогтоосон. Түүнчлэн Монголбанк арилжааны банкуудад валютаар гадаад төлбөр тооцоо хийж гүйцэтгэхэд хязгаарлалт тогтоох чиглэл өгсөн үү? гэдэг асуулт хариулт нэхэж буй. Тэгвэл Төв банкнаас дараах хариултыг өгч байна. “Монголбанк арилжааны банкуудын валютын арилжаанд хязгаарлалт тогтоосон гэх мэдээ нь ташаа мэдээлэл юм. Төв банк /Монголбанк/-ны тухай хуулийн 32.2 дугаар зүйлд Монголбанк хяналтын чиг үүргээ хэрэгжүүлэхдээ хуулийн дагуу үйл ажиллагаагаа явуулж байгаа банкны дотоод үйл ажиллагаанд хөндлөнгөөс оролцохгүй гэж заасан байдаг. Банкууд валют арилжаанд хязгаарлалт тавьж байгаа нь зах зээлд валютын нийлүүлэлт хомс байгаагаас шалтгаалан банкуудын бие даан гаргасан шийдвэр” гэв.

ЕРӨНХИЙЛӨГЧ У.ХҮРЭЛСҮХ УИХ-ЫН ДАРГА, САЙД НАРТАЙ УУЛЗЛАА

04 / 11 0 сэтгэгдэл 648 үзсэнe

Монгол Улсын Ерөнхийлөгч өнөөдөр (2022.04.11) УИХ-ын дарга, Ерөнхий сайд, УИХ-ын байнгын хороодын дарга нар, Засгийн газрын гишүүд, УИХ дахь МАН-ын бүлгийн дарга, гишүүдэд үүрэг, чиглэл өглөө. Уулзалтын үеэр Ерөнхийлөгч У.Хүрэлсүх "Ор нэр төдий биш, дорвитой, зоригтой алхам хийж, ажиллах"-ыг үүрэг болгов.

ЕРӨНХИЙ САЙДЫН АМАЛСАН АМЛАЛТ

04 / 11 0 сэтгэгдэл 769 үзсэнe

Төр, засгийг ажлаа хийхийг шаардсан залуус өнгөрсөн пүрэв, баасан гарагт төв талбайд тайван жагсаал зохион байгуулж, Засгийн газарт 15 зүйл бүхий шаардлагыг хүргүүлсэн.Засгийн газар өнгөрсөн баасан /2022.04.08/ гарагт ээлжит бусаар хуралдаж, дээрх 15 шаардлагын 11-ийг нь хүлээж авсан юм. Үлдсэн дөрвөн шаардлага нь Засгийн газрын эрх хэмжээнээс хэтэрсэн тул УИХ-тай хамтарч шийдэхээ АМЛАСАН . Ерөнхий сайд Л.Оюун-Эрдэнийн жагсагчдад өгсөн амлалт 1. Монгол Улсын Засгийн газраас Олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомсдолоос сэргийлэх, сөрөг нөлөөллийг бууруулах тухай хуулийн төслийг боловсруулан 2022 оны дөрөвдүгээр сарын 5-ны өдөр УИХ-д нэн яаралтай горимоор хэлэлцүүлэхээр өргөн мэдүүлсэн. Монгол Улсын Их Хурлын даргатай зөвшилцсөний үндсэн дээр тус хуулийг дөрөвдүгээр сарын 15-ны өдрийн дотор багтаан Улсын Их Хурлын нэгдсэн чуулганаар хэлэлцүүлж батлуулна. Энэ хууль батлагдсанаар олон улсын зах зээлд огцом өсч буй шатахуун, мах, гурилын үнийн өсөлт, хомсдолоос сэргийлж, мөнгөний болон сангийн бодлого уялдах эрх зүйн орчин бүрдэнэ. 3. Авилга, албан тушаалын хэрэгт яллагдагчаар татагдсан этгээдийн хэргийг хялбаршуулсан журмаар шийдэхгүй байх, авилгын хэргийн ялын бодлогыг чангатгасан хуулийн төслийг ирэх долоо хоногт Улсын Их Хуралд өргөн барихаар тогтов. 4. Авилгатай тэмцэх газар шалгах талаар Авилгын эсрэг хуулийн 13.2-т заасан өөрчлөлтүүд энэ хуулийн төсөлд багтсан байгаа болно. 5. Хөгжлийн банкны зээлийн асуудлыг шударгаар шалгаж, буруутай этгээдүүдийг илрүүлэх, хэргийг эцэслэн шийдвэрлэх талаар Монгол Улсын Засгийн газраас шалтгаалах бүх арга хэмжээг авч ажиллана. 6. Жижиг, дунд үйлдвэрлэлийн хөнгөлөлттэй зээлийн хүртээмж, сонгон шалгаруулалтыг ил тод болгоно. 7. Засгийн газар олон улсын хямралт байдлын үед шаардлагатай бүх арга хэмжээг хэмнэлтийн горимд шилжиж, суудлын том оврын албаны авто машиныг төрийн албан хаагчид нийслэл Улаанбаатар хотод ашиглахгүй байх, хөдөө орон нутагт нэгдсэн журмаар дуудлагын авто машиныг хэрэглэнэ. 8. Залуучуудын холбооны байр, газрын ашиглалттай холбоотой асуудлыг хууль хяналтын байгууллагаар шалгуулах холбогдох арга хэмжээг авах болно.

ЖАГСААЛЫН ҮЕЭР ГЭМТСЭН ЦАГДААГИЙН АЛБА ХААГЧ НЭГ НҮДНИЙ ХАРААГАА АЛДАЖ, МЭС ЗАСАЛД ОРЖЭЭ

04 / 11 0 сэтгэгдэл 715 үзсэнe

Өнгөрсөн Баасан гараг/2022.04.08/-т Сүхбаатарын талбайд үргэлжилсэн “Монголдоо сайхан амьдаръя” жагсаалыг цагдаагийн алба хаагчид албадан тарааж, зарим иргэнийг баривчилсан билээ. Энэ үеэр үүрэг гүйцэтгэж явсан цагдаагийн алба хаагч гавал тархиндаа битүү гэмтэл авч, баруун нүдний хараа нь алдагдан мэс засалд орсон байна. Мөн өөр нэгэн алба хаагч хөлөндөө бэртэл авч эмнэлэгт хэвтэн эмчлүүлж байгаа аж. Цагдаагийн ерөнхий газраас тус өдөр цагдаагийн нийт 9 ажилтан хүнд, хөнгөн бэртэл авсан гэж мэдээлсэн. Тэгвэл үлдсэн долоон алба хаагч гэрээр хэвтэн эмчлүүлж байгаа юм байна.

ХУУРАМЧААР МАТЕРИАЛ БҮРДҮҮЛЭН ГРУППТ ОРСОН 3700 ЗӨРЧИЛ ИЛЭРЛЭЭ

04 / 11 0 сэтгэгдэл 770 үзсэнe

“Хөдөлмөрийн чадвар алдалтын хувь хэмжээ, хугацаа тогтоосон байдалд хяналт, шалгалт хийх аян”-ыг зохион байгуулснаар 3700 гаруй зөрчил илрүүлжээ. Хөдөлмөрийн чадвар алдалт буюу групп тогтоолгох ажил улсын хэмжээнд багагүй маргаан дагуулж ирсэн. Тус асуудлыг цэгцлэх зорилгоор Хөдөлмөр, нийгмийн хамгааллын яам Засгийн газрын 2021 оны 67 дугаар тогтоолоор Эмнэлэг хөдөлмөрийн магадлах комиссын дүрмийг шинэчлэн батлуулж, комиссын бүрэлдэхүүнийг бүрэн шинэчилсэн. Мөн бусад холбогдох журам, заавар, өвчний жагсаалтыг 2021 онд нэг бүрчлэн шинэчлэн баталж, мөрдүүлж байна. ХНХЯ-наас Хөдөлмөрийн чадвар алдалтыг улсын хэмжээнд шалгах ажлыг төрийн болон төрийн бус байгууллага, АТГ, цагдаагийн газар, ЭХМТК-той хамтран 2021 онд зохион байгуулж, 66 мянган хүнийг шалгаж, 3700 гаруй зөрчил илрүүлэн, хоёр мянган хүний шийдвэрийг цуцалж, тэтгэврийн сангийн зардлыг 17 тэрбум төгрөгөөр хэмнэсэн. Энэ ажлын үр дүнд улсын хэмжээнд 2020 оны байдлаар хөдөлмөрийн чадвар алдсан хүний тоо 110.4 мянга буюу нийт хүн амын 3.4 хувь эзэлж байсан бол 2021 оны эцэст 105.6 мянга буюу 5 мянгаар буурч, нийт хүн амд эзлэх хувь 3.2 боллоо.

36 ТӨРЛИЙН АРХИНААС ДЭЭЖ АВЧ, ШИНЖИЛЖ БАЙНА

04 / 11 0 сэтгэгдэл 759 үзсэнe

Нийслэлийн Мэргэжлийн хяналтын газраас нийслэлийн найман дүүргийн хүнсний худалдааны газруудад худалдан, борлуулж буй архи, согтууруулах ундааны чанар, аюулгүй байдлын баталгаажилтад хяналт хийж байгаа аж. Дотоодын архины үйлдвэрүүдэд үйлдвэрлэсэн давхардсан тоогоор 36 нэрийн архины дээжийг Монгол Улсад мөрдөж буй “Цагаан болон өвөрмөц архи" техникийн ерөнхий шаардлага, MNS 0179:2016” стандартад нийцэж буй эсэхийг шинжилж эхэлжээ. Хяналтын явцад аж ахуйн нэгж, байгууллагуудад холбогдох хууль тогтоомжийн хэрэгжилтийг хангаж ажиллах талаар мэргэжил арга зүйн зөвлөгөө өгчээ.

Г.ЗАНДАНШАТАР:ХОТОД 570, 200 МАРКИЙН МАШИН УИХ-ЫН ХАРЬЯА БАЙГУУЛЛАГУУДЫН УДИРДЛАГУУД УНАХГҮЙ

04 / 11 0 сэтгэгдэл 448 үзсэнe

Улсын их хурлын даргын 2022.04.08-ний өдрийн 48 тоот захирамжаар байгуулагдсан ажлын хэсгийн хуралдаан үргэлжилсээр. Хямрал нөхцөл байдлыг шийдвэрлэх бодлогын шийдэл гаргах, төрийн хэмнэлтийн горимд шилжих чиглэлээр төсөвт тодотгол хийх зэрэг асуудлыг хэлэлцэж байна. УИХ-ын дарга Г.Занданшатар: "Маргаашаас УИХ-ын харьяа байгууллагуудын удирдлага хотод 570, 200 маркийн машин унахгүй. Хэмнэлтийг өөрсдөөсөө эхэлье. УИХ-ын зардлыг өмнөх төсвийн тодотголоор 5.6 тэрбумаар танасан. Гишүүний зардал 11 хувиар, Байнгын хорооны зардал 16 хувиар хасагдсан. Дахин 10-аас багагүй хувиар танахаас өөр аргагүй" хэмээв.