ШҮҮГЧИД НЭР ДЭВШИГЧДИЙГ ӨРГӨН МЭДҮҮЛЛЭЭ

06 / 17 0 сэтгэгдэл 444 үзсэнe

Шүүхийн ерөнхий зөвлөлийн 2024 оны 06 дугаар сарын 14-ний өдрийн ээлжит бус хуралдаанаар анхан болон давж заалдах шатны шүүхийн шүүгчид нэр дэвшигчдийг шүүгчийн албан тушаалд томилуулахаар Монгол Улсын Ерөнхийлөгчид өргөн мэдүүллээ. Шүүгчид тавих болзол, шаардлагыг үнэлэх, сонгон шалгаруулах журмын 9.2-т заасны дагуу нийлбэр онооны эрэмбийн эхнээс дараалан нэр дэвшигчид дараах сул орон тоо зарласан тодорхой нэг шүүхийн шүүгчийн албан тушаалд томилуулах хүсэлтийг Шүүхийн ерөнхий зөвлөлийн хуралдаанд гаргаж, хүсэлт гаргасан шүүгчийн албан тушаалд томилуулах саналыг Монгол Улсын Ерөнхийлөгчид өргөн мэдүүллээ. Эрүү, Иргэний хэргийг харьяалан шийдвэрлэх шүүхийн шүүгчийн сул орон тоонд нийлбэр оноогоор нэгдүгээрт эрэмбэлэгдсэн нэр дэвшигч Д.Мөнхбүрэн тодорхой нэг шүүхийн шүүгчийн албан тушаалыг сонгохоос татгалзаж, нөөцөд бүртгэгдсэн юм. ШҮҮГЧИЙН СОНГОН ШАЛГАРУУЛАЛТ, ХҮНИЙ НӨӨЦИЙН ГАЗАР ХЭВЛЭЛ МЭДЭЭЛЛИЙН ХЭЛТЭС

ДАРХАНД АЯЛЖ ЯВСАН ТАВАН ХҮНИЙ ХОЁР НЬ ТОГТООЛ УСАНД ЖИВЖ АМИА АЛДЖЭЭ

06 / 17 0 сэтгэгдэл 464 үзсэнe

Улсын хэмжээнд өнгөрсөн долоо хоногт нийслэлийн найман дүүрэг, 20 аймгийн 43 суманд аюулт үзэгдэл, ослын 102 удаагийн дуудлага бүртгэгджээ. Нийт дуудлагын 72 нь гал түймэр, 20 нь хүний үйл ажиллагаатай холбоотой осол, нэг нь геологийн гаралтай аюулт үзэгдэл, ес нь ус цаг уурын гаралтай аюулт үзэгдэл байна. Төв, орон нутгийн Онцгой байдлын байгууллагын алба хаагчид үүрэг гүйцэтгэж, 20 иргэний амь насыг авран хамгаалжээ. Харин гамшиг, аюулт үзэгдлийн улмаас 11 хүн нас барж, дөрвөн хүн гэмтэж бэртсэн байна. Тухайлбал өчигдөр 17:20 цагийн орчимд Дархан-Уул аймаг, Шарын гол сум Санжинт багийн “Задгай” гэх газар таван хүн аялж явснаас 18, 19 настай хоёр эрэгтэй тогтоол усанд живж амиа алдсан харамсалтай явдал болжээ. Талийгаач хоёр иргэн сонгуулийн ухуулагч биш гэдгийг цагдаагийн байгууллагаас тодотгов. Мэргэжлийн байгууллагаас өгч байгаа заавар, зөвлөмжийг дагах Гол, мөрөн нуурын ойролцоо амарч зугаалахдаа сонор, сэрэмжтэй байх Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах Согтууруулах ундаа хэрэглэсэн үедээ гол усанд орохгүй байх Баталгаатай гүүр, гарам, гарцтай газраар автомашинтай зорчиж гол, усны ослоос урьдчилан сэргийлэхийг Онцгой байдлын ерөнхий газраас анхааруулж байна.

ЭНЭ ОНД 70 ОРЧИМ ОЙ, ХЭЭРИЙН ТҮЙМЭР ГАРЧЭЭ

06 / 17 0 сэтгэгдэл 327 үзсэнe

Энэ сарын 17-ны байдлаар, он гарснаас хойш улсын хэмжээнд Булган, Дорнод, Сүхбаатар, Сэлэнгэ, Ховд, Хөвсгөл, Хэнтий, Архангай, Увс, Төв аймгийн 30 суманд ой, хээрийн гал түймрийн 69 тохиолдол бүртгэгдээд байна. Ой, хээрийн гал түймэрт 685.267 га талбай, 5 гэр, 4 хашаа саравч, 19 толгой бог мал өртөж, экологид 353.085.498 төгрөгийн хохирол учирчээ. Ой, хээрийн гал түймрийн дуудлага, мэдээлэл өнгөрсөн оны мөн үеийнхтэй харьцуулахад 7,2 хувиар нэмэгдсэн байна. Ой, хээрийн түймрийн аюултай үе зургаадугаар сарын эхний арав хоногт дууссан ч хойд, баруун хойд ойн бүс нутгаар хуурайшилтын түвшин хэвээр байгааг ОБЕГ мэдээлжээ. Тиймээс ой, хээрээр явахдаа ил задгай гал түлэхгүй байх, татсан тамхи, асаасан шүдэнзнийхээ галыг бүрэн унтрааж, галын аюулгүй байдлаа хангахыг анхааруулж байна.

УЛСЫН ЭМНЭЛЭГТ ДАВТАН ҮЗЛЭГТЭЭ ОРООГҮЙ, АВСАН ЦАГТАА ОЧООГҮЙ БОЛ 20 МЯНГЫГ ТӨЛНӨ

06 / 17 0 сэтгэгдэл 422 үзсэнe

Улсын эмнэлэгт цаг авах иргэдийн тоо ихэсч, эмнэлгийн ачаалал өндөр байгаа ч авсан цагтаа очдоггүй хүмүүсээс болж шаардлагатай тусламж үйлчилгээгээ авч чадахгүй хохирох хүн цөөнгүй байдаг. Үүнтэй холбоотойгоор иргэдийг хариуцлагатай байлгаж, авсан цагтаа үйлчлэхгүй тохиолдолд төлбөрийн тодорхой хувийг өөрсдөөс нь гаргуулахаар болжээ. Тодруулбал, Эрүүл мэндийн даатгалын үндэсний зөвлөлийн 2024 оны дөрөвдүгээр сарын 1-ний 06 дугаар тогтоолын хавсралтын дагуу даатгуулагч амбулаторийн үзлэг, оношилгоо, шинжилгээний цогц тусламж үйлчилгээг бүрэн аваагүй буюу өөрийн буруугаас давтан үзлэгт хамрагдаагүй тохиолдолд тухайн эрүүл мэндийн байгууллагадаа дараагийн удаа үйлчилгээний зардлын 25 хувийг өөрөө төлөх шийдвэр гарсан байна. Ингэснээр эрүүл мэндийн байгууллагад цаг авсан боловч тухайн цагтаа эрүүл мэндийн байгууллагадаа өөрийн буруугаас болж ирээгүй бол тухайн эмнэлэгтээ дахин амбулаторийн тусламж үйлчилгээ авахад 20 мянган төгрөгийг иргэн төлөх юм. Цогц тусламж дотор хийгдсэн оношилгоо шинжилгээ нь Эрүүл мэндийн сайд Сангийн сайдын хамтарсан тушаалаар батлагдсан "Төлбөртэй тусламж үйлчилгээний жагсаалт"-д орсон нэгжийн үнэ нь 45 мянган төгрөг ба түүнээс дээш өртөг бүхий оношилгоо шинжилгээнд 30 хувийн хамтын төлбөрийг иргэн төлөхийг мөн тогтоолд тусгажээ. Гэхдээ дараах тохиолдолд хамтын төлбөр төлөхгүй байна. Үүнд: Тэтгэврээс өөр мөнгөн орлогогүй иргэн Нийгмийн халамжийн дэмжлэг, туслалцаа зайлшгүй шаардлагатай иргэн, хугацаат цэргийн жинхэнэ албан хаагч Хүүхдээ хоёр /ихэр бол гурав/ нас хүртэл нь өсгөн бойжуулж байгаа эцэг эх Ял эдэлж байгаа ялтан Жирэмсэн, төрөлт, төрсний дараа үетэй холбоотой эх барих зэрэг хүмүүс төлбөрөөс чөлөөлөгдөх заалттай аж.

УИХ-ЫН СОНГУУЛЬД 1339 НЭР ДЭВШИГЧ ӨРСӨЛДӨХӨӨР БАЙНА

06 / 17 0 сэтгэгдэл 275 үзсэнe

УИХ-ын 2024 оны ээлжит сонгуульд одоогийн байдлаар 1339 нэр дэвшигч өрсөлдөхөөр байна. Энэ сарын 10-нд тус хороо 1336 нэр дэвшигчийг бүртгэж, үнэмлэх гардуулснаар сонгуулийн сурталчилгаа албан ёсоор эхэлсэн. Үүний дараа Сонгуулийн ерөнхий хороо энэ сарын 13-нд хуралдаж, Захиргааны хэргийн давж заалдах шатны шүүхийн шийдвэрийг үндэслэн Үндэсний эвслээс нэр дэвшигч Н.Номтойбаярыг бүртгэж, үнэмлэх олгохоор шийдвэрлэсэн юм. Мөн уг хорооны өнгөрсөн баасан гаргийн хуралдаанаар Захиргааны хэргийн давж заалдах шатны шүүхийн шийдвэрийг хүлээн авч, Үндэсний эвслээс нэр дэвшигч П.Баярхүү, Д.Ганболд нарыг нэр дэвшигчээр бүртгэж, үнэмлэхийг нь гардуулсан аж.

БУУДАЛ, КАРАОКЕНЫ ӨРӨӨНД КАМЕР БАЙРШУУЛСАН НЬ ИЛЭРЧЭЭ

06 / 17 0 сэтгэгдэл 530 үзсэнe

Ховд аймгийн прокурорын газраас гэмт хэрэг, зөрчлөөс урьдчилан сэргийлэх ажлын хүрээнд тус аймгийн Цагдаагийн газартай хамтран Хүний хувийн мэдээллийг хамгаалах тухай хуулийн хэрэгжилтийг шалгажээ. Тодруулбал, хувцас солих өрөө, караоке, зочид буудлын өрөө, эрүүл мэндийн тусламж үйлчилгээ үзүүлэх өрөө, ариун цэврийн өрөө зэрэг хүний халдашгүй, чөлөөтэй байх эрхэд илтэд халдахаар байршилд дүрсний бичлэгийн төхөөрөмж байршуулахыг хориглосон уг хуулийн заалтыг аймгийн төв Жаргалант сумын нутаг дэвсгэрт үйл ажиллагаа явуулж буй үйлчилгээний газрууд хэрхэн хэрэгжүүлж байгааг шалгасан байна. Шалгалтаар 40 орчим газрын үйл ажиллагаатай танилцахад, нэр бүхий 14 газрын зочид буудлын болон караокены өрөөнд дуу, дүрсний бичлэгийн төхөөрөмж байршуулсан байсан нь илэрчээ. Тиймээс Ховд аймгийн прокурорын газраас хүний эрхийг хамгаалах, илэрсэн зөрчлийг арилгуулахаар тухайн газруудад прокурорын мэдэгдэл хүргүүлж, холбогдох хууль тогтоомжийн талаар сургалт хийсэн байна.

ГАДААД УЛСАД БАЙГАА 13 МЯНГАН ИРГЭН СОНГУУЛЬД ОРОЛЦОХООР БҮРТГҮҮЛЖЭЭ

06 / 17 0 сэтгэгдэл 363 үзсэнe

Монгол Улсын Их Хурлын 2024 оны ээлжит сонгуулиар гадаад улсад байгаа иргэдийн саналыг 2024 оны 6 сарын 20, 21, 22, 23-ны өдрүүдэд авна. Сонгогчдын нэрийн жагсаалтад бүртгэл нь баталгаажсан сонгогч 2024 оны 6 дугаар сарын 20, 21, 22, 23-ны өдрүүдэд 07:00-22:00 цагийн хооронд /орон нутгийн цагаар/ саналаа өгөхөөр бүртгүүлсэн тухайн Элчин сайдын яам, Ерөнхий консулын газар, Консулын газарт байрлах санал авах байранд гадаад паспорт эсхүл иргэний үнэмлэхтэйгээ биечлэн очиж саналаа өгнө. Гадаад улсад байгаа сонгогчид Монгол Улсын Их Хурлын 48 гишүүнийг хувь тэнцүүлэн төлөөлөх аргаар буюу нам, эвсэлд саналаа өгөх юм. Гадаад улсад байгаа 13095 иргэн сонгуульд саналаа өгөхөөр сонгогчдын нэрийн жагсаалтад бүртгүүллээ. Бүртгэлийг цахимаар зохион байгуулснаар Монгол Улсын Их Хурлын 2012 оны сонгуультай харьцуулахад санал өгөхөөр бүртгүүлсэн сонгогчийн тоо 3 дахин өссөн байна. Сонгуулийн ерөнхий хороо саналын хуудсыг Төв комиссоор дамжуулан салбар комиссуудад хүргүүлсэн бөгөөд Дипломат төлөөлөгчийн газрууд сонгогч саналаа нууцаар, чөлөөтэй өгөх боломжийг хангасан байр бэлтгэсэн байна. Гадаад улсад байгаа сонгогч Та 2024 оны 6 дугаар сарын 20, 21, 22, 23-ны өдрүүдийн аль нэг өдөр нь саналаа өгч, сонгуульдаа идэвхтэй оролцоно уу.

ЗАЙСАН ТОЙРУУГИЙН ЗАМЫН ХӨДӨЛГӨӨНИЙГ МАРГААШААС ХУУЧИН ЗОХИЦУУЛАЛТААР ЯВУУЛНА

06 / 16 0 сэтгэгдэл 92 үзсэнe

“Эрэл групп”-ийн зүүн талаар өнгөрөх авто замын хөдөлгөөнийг нээлээ ХУД-ийн III хороонд үйл ажиллагаа явуулж буй “Эрэл групп” газраа чөлөөлж өгөөгүйн улмаас Говийн замыг “Мишээл экспо”-ийн замтай холбох ажил гурван жил орчим гацсан юм. Тэгвэл өнөөдөр тус группийн зүүн талаар өнгөрөх авто замын хөдөлгөөнийг нээлээ. Т одруулбал, Өнгөрсөн дөрөвдүгээр сард хотын дарга Х.Нямбаатар газар дээр нь ажиллаж, газар чөлөөлөхийг холбогдох албанд үүрэг болгосон. Энэ хүрээнд “Эрэл групп”-ийн зүүн талаар өнгөрөх 800 метр газрыг өнгөрсөн сарын 7-ны өдөр албадан чөлөөлж, замын ажлыг эхлүүлж байсан. Тус зам ашиглалтад орсноор Нарны зам болон Гурвалжингийн гүүрний зорчих хөдөлгөөний ачаалал 16 хувиар буурна. Нийслэлийн Засаг дарга бөгөөд Улаанбаатар х отын Захирагч Х.Нямбаатар “Улаанбаатар хотын түгжрэлийг бууруулах ажлын хүрээнд дөрвөн байршилд нүхэн гарц байгуулах төслийг хэрэгжүүлж байна. Үүний нэг болох “Гермес” төвийн урд талын нүхэн гарцтай уг замыг холбоно. Өөрөөр хэлбэл, хотын хэвтээ тэнхлэгийн замуудыг холбох холбоос зам гэж болно. Өнгөрсөн дөрөвдүгээр сараас өнөөдрийг хүртэлх хугацаанд засаж, шинэчилсэн замууд энэ онд төлөвлөсөн нийт ажлын 30 хувь нь. Энэ онд Улаанбаатар хотын нийт замын 80 хувийг засаж, шинэчилнэ. Засварын ажилд хүлээцтэй хандаж, дэмжиж байгаа иргэддээ баярлалаа” гэлээ. Түүнчлэн ирэх долоо хоногт хоёр жил гаруй гацсан Ээрмэлийн замын ажил дуусаж, зорчих хөдөлгөөнийг нээнэ. Мөн Таван шарын нүхэн гарцыг энэ сард нээх бол Яармагийн замыг ирэх долоодугаар сард нээнэ.

ААДАР БОРООНЫ УЛМААС 500 ГАРУЙ БОГ МАЛ ХОРОГДЖЭЭ

06 / 14 0 сэтгэгдэл 333 үзсэнe

Завхан, Өвөрхангай аймагт энэ сарын 12-нд орсон түр зуурын аадар борооны улмаас Завханы Улиастай суманд 20 орчим айлын байшин, гэр, хашаа руу үерийн ус оржээ. Мөн Өвөрхангай аймгийн Нарийнтээл сумын нутагт айлын 5 ханатай гэр, Богд сумын нутагт хоёр айлын гэр үерт өртөж, 500 гаруй бог мал хорогдсон байна. Тиймээс орон нутгийн түвшинд бэлэн байдлыг хангаж, үер усны аюулаас сэрэмжтэй байх, урьдчилан сэргийлэх арга хэмжээг тухай бүр авч хэрэгжүүлэх шаардлагатайг холбогдох албаныхан анхааруулав. Дашрамд дурдахад, цаг уурын байгууллагын өгч байгаа мэдээллээр энэ сарын 17-ноос баруун аймгуудын нутгаар, цаашдаа ихэнх нутгаар борооших төлөвтэй байна.

ОРОН СУУЦНЫ ҮНЭ 11.9 ХУВИАР ӨСЖЭЭ

06 / 14 0 сэтгэгдэл 404 үзсэнe

Үндэсний статистикийн хорооны мэдээлснээр өнгөрсөн сарын байдлаар Улаанбаатар хотод шинэ орон сууцны үнэ өмнөх оны мөн үетэй харьцуулахад 11.9 хувиар өсч, нэг метр квадратын үнэ 4 сая төгрөг давсан байна.