Үндэсний статистикийн хороо, Цахим хөгжил, харилцаа холбооны яам хамтран “Өрхийн болон хувь хүний мэдээлэл, харилцаа холбоо, технологийн хэрэглээний судалгаа”-г олон нийтэд танилцууллаа.

Энэхүү судалгаа нь Олон улсын цахилгаан холбооны байгууллагын зөвлөмжийн дагуу хийгдсэн Үндэсний хэмжээний анхны түүвэр судалгаа болоод байгаа бөгөөд НҮБ-ын Тогтвортой хөгжлийн шалгуур үзүүлэлтүүдийг бодитой тооцоход Монгол Улсын тоо баримтыг тусгах, цаашид салбарын хөгжлийн бодлогыг боловсруулах, стратегийн ач холбогдол бүхий төсөл хөтөлбөрүүдийг хэрэгжүүлэхэд шаардагдах суурь судалгаа, статистик мэдээ мэдээллээр хангах, харилцаа холбоо, мэдээллийн технологийн өнөөгийн байдлыг үнэлэх ач холбогдолтой уг судалгаа нь Монгол Улсын 335 сум, суурин газарт өндөр хурдны интернет сүлжээ орсноор нийт өрхийн 80 хувь нь интернет хэрэглэж байгаа. Мөн үүрэн холбооны хэрэглэгчдийн тоо жил бүр өсөн нэмэгдэж, 2021 оны байдлаар нийт иргэдийн 97,6 хувь нь гар утас хэрэглэж, үүнээс ухаалаг гар утасны хэрэглээ 84,7 хувьтай  гарчээ. Энэ нь төрийн үйлчилгээг цахимаар хурдан шуурхай, нээлттэй, хүртээмжтэй авах боломжийг бүрдүүлэхэд чухал ач холбогдолтой гэдгийг тус судалгаанаас харагдаж байна.

Судалгаанд хамрагдсан иргэдийн 98 хувь нь гар утастай бөгөөд үүнээс 54.8 хувь нь боловсролгүй иргэд байгаа бол. 15 ба түүнээс дээш насны хүмүүсийн 31.5 хувь нь суурин компьютер ашиглаж цахим худалдаанд иргэдийн 29.9 хувь нь тодорхой хэмжээгээр оролцсон байна. Сүүлийн гурван сарын хугацаанд судалгаанд оролцсон иргэдийн 84.3 хувь нь интернет ашигласан бөгөөд тэдний 95 хувь нь мэдээлэл авах зорилгоор  интернетийг ашигласан байна.

Түүнчлэн Монгол Улсын нийт өрхийн:

• 97.9 хувь нь гар утастай
• 97,3 хувь нь телевизтэй
• 80.0 хувь нь интернеттэй
• 8.1 хувь нь радиотой
• 9.0 хувь нь суурин утастай
• 33.3 хувь нь компьютертой гэсэн судалгаа гарчээ.

Мөн сүүлийн гурван сарын хугацаанд монголчууд харилцаа холбоо, мэдээллийн технологийн зардалд 246,1 мянган төгрөгийг зарцуулжээ. Үүний

• 29 хувь нь тоног төхөөрөмж
• 69,9 хувь нь үйлчилгээ
• 0.5 хувь нь программ хангамж
• 0.5 хувь контент
• 0.1 хувь нь видео тоглоомд зарцуулсан байгааг Үндэсний статистикийн хороо, Цахим хөгжил, харилцаа холбооны яам хамтарсан “Өрхийн болон хувь хүний мэдээлэл, харилцаа холбоо, технологийн хэрэглээний судалгаа”-наас харж болохоор байна.